Сильное звено / Илери кеткенлер
...Меним яратыджылыгъым 2008 сенесинде башланды. 7-нджи сыныфтан башлап чешит мевзуларда шиирлер уйдурмагъа ве чешит эдебият ярышларында иштирак этмеге башладым. Эдебияткъа авеслигим мектеп чагъында башланды. Бу авеслик манъа битамдан Сеитхалилова Сайдеден кечти. Битам башлангъыч мектепте окъугъанда Экинджи джиан дженки башлай...сонъра сюргюнлик фаджиасы,онынъ ичюн тек 2-инджи сыныфны битирмеге чареси олды. Онынъ тасили етерли олмагъаны себебинден озь шиирлерини бастырмады.10-инджи сыныфта окъугъанымда, меним биринджи "Ана-бабалар" адлы шиирим "Янъы дюнья" газетасында
бастырылды:
Ана-бабалар
Ана-баба дюньягъа,
Эки кельмей, бир келе.
Ынджытманъыз, достларым,
Олар бизге кереклер.
Ана-баба елундан баргъан,
Ич хор олмай.
Ана-баба ынджыткъан,
Билинъ, достлар, ич онъмай.
Ана-бабанен оськен,
Огълан, къызлар, шенъ ола,
Келеджекте къучакълары,
Десте-десте гуль тола!
Ана-баба шадлана,
Огълу, къызы оськен сонъ.
Буюк огълу Ватанына,
Арбий хызмет эткен сонъ.
Тувгъанларым, ана-бабам,
Мен сизлерни пек севем.
Бунынъ ичюн сизлерге,
Тешеккюрлер бильдирем!
Достларым! Къана энди эр куню,
Бойле сёзлер айтайыкъ,
Келеджекте дюньяда,
Бахтлы олып яшайыкъ!
Бундан сонъ авеслигим даа да зияде артты. Эльбетте, бу шиир битамнынъ ярдымынен язылды, чюнки ондан эвель мен шиирлер язмай эдим.
2013 сенеси Къырым муэндислик ве педагогика университетине къырымтатар ве тюрк филологиясы факультетине окъумагъа кирдим. Янъы йылгъа якъын курсдашым – Кешфединова Алименен ёл къазасына огърадым. Достумны джойгъан сонъ, оны сагъынгъанымда, тарсыкъкъанымда, Алиме акъкъында язмагъа башладым. Бу мевзуда язмагъа башлагъанымдан сонъ, мен беллесем, шимди мен пек джиддий шейлер акъкъында язам. Биринджиден, тувгъанларым ве якъынларым акъкъында язам. Бу къазадан сонъ, эр бирини джоймагъа къоркъам. Ана-бабама озь самимий дуйгъуларымны ве севгимни косьтермеге ве исбатламагъа тырышам. Мен хастаханеде яткъанымда, олар къасевет этип, бармагъа ер тапмадылар. Пек чокъ адам манъа ярдым этти. Мен озюмни ве ана-бабамнынъ адындан миллетимизге ве эр бир ярдым эткен адамгъа чокътан чокъ тешеккюр бильдирмек истер эдим, чокъ сагъ олунъыз..!
Багъчасарай р-ны, Заланкой коюнде Сайде битам Сейтхалилова яшай. Шииримни онъа багъышлайым:
Севимли битам
Бабамнынъ анасы,
Эвимизнинъ чырагъы,
Бильдирмеге истейим тешеккюрлер,
Амма тапалмайым мен сезлер,
Тувгъан битам, гузель битам,
Меним экинджи анам.
Эвге бир кунь келялмасам,
Сизни мен сагъынам.
Меним битам,сиз чокъ яшанъ,
Ич бир вакъыт хаста олманъ
Багъчасарай р-ны, Заланкой койде анам Бекирова Халиде яшай, шииримни онъа багъышлайым:
Севем сени, анам
Анам меним, анам...
Он секиз йыл эвель
Дюньяны сен косьтердинъ.
Энди мен меракълы шейлер корем:
Ана-баба севгисини дуям,
Яхшылыгъынызны сезем,
Мен бахт корем...
Анам меним, анам,
Сенсиз мен яшалмам.
Севимли анам,
Буны санъа мен чокъ айтам:
Севем сени, анам.
Мен озь Ватанымны Къырымны джандан-юректен севем. Ватаным акъкъында пек чокъ шейлер язам:
Эр бир инсан ичюн Ана-ватан дюньяда энъ дюльбер, энъ тувгъан, энъ севимли ердир. Чюнки бу аджайип ерде темиз ава, дюльбер табиат, мераметли инсанлар яшай. Азиз юртумызда эр бир кошечик муляйымдыр.
Меним энъ тувгъан ерим, Ватаным – Къырым. Бу ерде мен дюньягъа кельдим, биринджи кере кунешнинъ парлакъ нурларыны корьдим, ягъмур шувулдагъаныны сездим, Ана-ватан топрагъыма биринджи адым бастым, мектепке бардым, достларымнен таныш олдым. Аллагъыма бинъ кере шукюр!
Ватан севгисини сиз билесинъизми?
Денъиз дагъларыны коресинъизми?
Чечеклерни къокъусыны дуясынъызмы?
Темиз авада кокюс чекип, нефес аласынъызмы?
Джевап беринъ бу суаллерге…
Юрегинъиз абдыраймы Ватан дегенде?
Юртумызны табиат дюльберлигини
Унутманъыз, джевап бергенде…
Эр къырымлы озюне бойле суаль бергендир: «Мен насыл Къырымда яшамакъ истер эдим?» Меним фикиримдже, бу пек актуаль суальдир. Онъа джевап бермек ичюн яхшы этип тюшюнмек керек. Амма, биринджиден, бойле суальге джевап беринъиз: Я мен озь Ватанымны гузеллештирмек ичюн не яптым? Демек, Къырымнынъ такъдири бизим элимизде. Эбет, эр бир Ватанда етишмемезликлер бардыр. Амма бу къытлыкъларгъа бакъмадан, эр бир Юртнынъ гузелликлери эп бир чокътыр.
Инанам ки, бизим къырымтатар халкъымыз бирликте кучьлю ве къуветли. Онынъ ичюн бизим Ана-юртумыз эр даим гуллей, чечек киби ачыла. Унутмамалы ки, эр инсаннынъ вазифеси – Ватаныны севип, онъа ярдым этмектир. Бизим борджумыз – бу вазифени беджермектир.
Ватан, Ватан, Ватаным,
Къырым – сенинъ дюльбер адынъ!
Севимли, гузель Ана-юртым,
Меним тувгъан тарафым.
Къырым, Къырым, дженнетим,
Гъурурланам сенден, гузелим.
Санъа бакъам, чечегим,
Сен ёл косьтересинъ эр даим.
Мен Ватанымны джан-юректен севем ве онынъ тарихыны чокъча бильмеге тырышам. Къырымнынъ насыл этип гузеллештирмеге мумкюн олгъан елларыны къыдырам. Мен пек къуванам, чюнки бизим ярымадамызда миллетлеримиз бирликте яшай. Бунынъ буюк эмиети бардыр. Ниетлеримден бири: яш несилимизге Ватангъа севги ашламакъ. Мен беллесем, бойле макъсадлар чокъча олса, Къырым даа зияде ачылыр.
Билесизми, асретликте яшамакъ пек къыйын…Языкъ ки, Ватан ичюн джаныны феда эткен адамлар азлаша. Айдынъыз, этрафтаки муитни сакълайыкъ ве къорчалайыкъ. Бойле этип, биз арзу эткенимиз киби яшармыз. Келинъиз, Аллагъа дува этейик дженк олмасынъ, озь Къырым Ватанымыздан бизни айырмасынъ.
Къара денъиз далгъасы,
Шекер, шербеттир алмасы.
Дертлерге дева берген
Озь Ватанымнынъ авасы!
Буюк языджымыз Шамиль Алядиннинъ 100-йыллыгъына бир шиир багъышладым, республикада учюнджи ерни алдым:
Буюк языджымызгъа
Къырымтатар халкънынъ буюк ифтихары -
Шамиль Алядиндир онынъ ады!
«Юзюкке къоюлгъан козь таш киби»,
Къальбимизде яшасын онынъ ады.
Олмакъ истер эдим мен языджы!
Бойле зенгин инсанлар дюньяда чокъча олсун,
Буюк языджымызгъа ошамагъа тырышсын,
Халкъымызнынъ буюк йылдызы деп, сайылсын.
Бизлер ичюн чокъ китап багъышлады,
Окъуп етиштирамайым мен оларны.
Ах, не къадар гузель сёзлер,
Аджайип ве меракълы эсерлер.
Эр бир китап – янъы фикир,
Олардан мен чокъ шей огренем,
Шаиримиз акъкъында шиир тизем…
Ватан дженкте арбий хызмет эте,
Истидатлы яшларгъа ёл косьтере.
Мына бугунь ифтихарымызнынъ юз йыллыгъы,
Онъа багъышладым мен шииримни.
Подготовила Урие АБЛА