Неделя 16-я по Пятидесятнице. Глас 7-й. Преставление апостола и евангелиста Иоанна Богослова.

Воскресная служба Октоиха совершается в соединении с бденной службой ап. и ев. Иоанна Богослова.

На великой вечерне «Блажен муж» – кафизма вся.

На «Господи, воззвах» стихиры на 10: воскресные, глас 7-й:

Пpиидите, возpадуемся Господеви, / сокpушившему смеpти деpжаву, / и пpосветившему человеческий pод, / со безплотными зовуще: / Содетелю и Спасе наш, слава Тебе.

Кpест пpетеpпел еси Спасе, / и погpебение нас pади, / смеpтию же яко Бог смеpть умеpтвил еси. / Темже покланяемся тpидневному воскpесению Твоему: / Господи, слава Тебе.

Апостоли видевше воскpесение Содетеля, чудяхуся, / поюще хвалу Ангельскую: / сия слава есть цеpковная, / сие богатство Цаpствия: / постpадавый нас pади, Господи, слава Тебе.

Аще и ят был еси Хpисте, от беззаконных мужей, / но Ты ми еси Бог, и не постыждуся; / биен был еси по плещема, не отметаюся; / на Кpесте пpигвожден был еси, и не таю; / востанием Твоим хвалюся: / смеpть бо Твоя живот мой, / Всесильне и Человеколюбче Господи, слава Тебе.

и апостола, глас 1-й:

Зритель неизреченных откровений, / и сказатель вышних Божиих таин, / сын Зеведеев, / написав нам Христово Евангелие, / богословити Отца, и Сына, и Духа Святаго, // научил есть. (дважды)

Богодвижимая цевница Небесных пений, / тайнописец сый, / Богосказанная уста, пение песней поет красно: / устне бо движя, яко струны, / якоже бряцало язык движя, // и молится спастися нам. (дважды)

Громогласным твоим языком / извещая Божия мудрости / сокровенное слово, Богу возлюбленне, / зовеши присно, движя устнами часто: / еже в начале бе Слово, // и научаеши всякаго человека к знанию Бога. (дважды)

«Слава» – апостола, глас 2-й:

Сына громова, основание Божественных словес, / начальника богословия, / и проповедника первейшаго, истины догматов Божия мудрости, / возлюбленнаго Иоанна и девственника, / человеческий род по долгу благопохвалим: / сей бо непрестанно в себе имея Божественное, / еже, в начале бе, рече, Слово, / абие же ко Отцу неразлучное, / и равное по сих Отча Существа, / показуя нам Собою православие Святыя Троицы: / Содетеля же суща со Отцем, и жизнь носяща / и Свет Истинный Тогожде показа нам. / О чудесе ужаснаго, и вещи мудрительныя! / Яко полн сый любве, / полн бысть и богословия, / славою и честию и верою, / основатель сый чистыя нашея веры. // Еяже ради получим вечная благая в День Судный.

«И ныне» – догматик, глас 7-й:

Мати убо позналася еси, паче естества, Богоpодице, / пpебыла же еси Дева, паче слова и pазума: / и чудесе Рождества Твоего сказати язык не может. / Пpеславну бо сущу зачатию Чистая, / непостижен есть обpаз pождения: / идеже бо хощет Бог, побеждается естества чин. / Темже Тя вси, Матеpь Божию ведуще, / молим Ти ся пpилежно, / моли спастися душам нашим.

Вход. Прокимен дня. Паримии апостола – 3.

На литии стихира храма и литийные стихиры апостола, глас 1-й:

Реки богословия из честных твоих уст / истекоша, апостоле, / из нихже Церковь Божия напаяема, / покланяется православно Троице Единосущней, / Юже и ныне моли, Иоанне Богослове, // утвердити и спасти души наша.

Сад чистоты, миро благовония / паки возсия нам в присущем празднице, / возопити к нему: / возлегий на перси Владычня, / и одождив слово миру, Иоанне апостоле, / Деву сохранивый яко зеницу ока, // испроси нам от Христа велию милость.

Учениче Спасов, девственниче и Богослове, / тебе яко девственнику, / Деву и Богородицу, / Христос Бог распинаемь предаде, / и Сию сохранил еси яко зеницу ока. // Тем моли спастися душам нашим.

Яко неизреченных таин самовидец / воззвал еси вопия: / Превечное Слово, в начале быти к Богу, / и Того быти Бога, / Иоанне апостоле / наперсниче Христов и друже присный, / Троицы сладосте, / Ефеса и Патма утверждение непоколебимо, / наша же помощь, / молися Богослове всеблаженне, / от злочестивых врагов чувственных и мысленных / избавитися людем, // память твою присно совершающим верно.

«Слава» – апостола, глас 4-й:

Возлег на перси Учителя Христа, / на вечери Господни, возлюбленне учениче, / оттуду познал еси неизреченная, / и Небесный всем возгремел еси глас: / в начале бе Слово, / и Слово бе к Богу, / и Бог бе Слово, / Свет Истинный, просвещаяй всякаго человека в мир грядущаго, // Христос Бог и Спас душ наших.

«И ныне» – Богородичен Минеи, глас тот же:

Со Отцем и Духом славословимый Сын / в вышних от Херувимов, / первозданнаго наздати хотяй, / всего Себе Самаго истощи неизреченно / во утробе Твоей, Богородице Всепетая: / и из Тебе возсияв, просвети весь мир Божеством, / избавляя идолонеистовства, / и в Себе обожив, / на Небеса возведе человечество, // Христос Бог и Спас душ наших.

На стиховне стихиры воскресные, глас 7-й:

Воскpесл еси из гpоба Спасе миpа, / и совоздвигл еси человеки с плотию Твоею: / Господи, слава Тебе.

Стих: Господь воцарися, / в лепоту облечеся.

Воскpесшему из меpтвых, и пpосветившему вся, / пpиидите поклонимся: / от адова бо мучительства нас свободил есть, / своим тpидневным Воскpесением живот нам даpовавый, / и велию милость.

Стих: Ибо утверди вселенную, / яже не подвижется.

Во ад сошед Хpисте, смеpть пленил еси, / и тpидневен воскpес, нас совоскpесил еси, / славящих Твое всесильное востание, / Господи Человеколюбче.

Стих: Дому Твоему подобает святыня, / Господи, в долготу дний.

Стpашен явился еси Господи, во гpобе лежа яко спя, / воскpес же тpидневен яко силен, / Адама совоскpесил еси зовуща: / слава Воскpесению Твоему, / Едине Человеколюбче.

«Слава» – апостола, глас 6-й:

Апостоле Христов, евангелисте Богослове, / неизреченных таинник быв, / премудрости неизглаголанная нам возгремел еси учения, / Еже в начале бе, уяснив верным, / и еже не бе, отложив, / еретичествующих отревая словеса. / Наперсник явився, и друг возлюблен, / якоже Исаиа велегласнейший, / и Моисей Боговидец, / дерзновение имея к Богу, // прилежно молися о душах наших.

«И ныне» – Богородичен воскресный, глас тот же:

Творец и Избавитель мой, Пречистая, / Христос Господь из Твоих ложесн прошед, / в мя Оболкийся, / первыя клятвы Адама свободи. / Темже Ти, Всечистая, / яко Божии Матери же и Деве, / воистинну вопием немолчно: / радуйся Ангельски, радуйся, Владычице, / Предстательство и Покрове, / и Спасение душ наших.

По Трисвятом – «Богородице Дево…» (дважды) и тропарь апостола, глас 2-й (единожды).

 

Тропарь апостола, глас 2-й:

Апостоле Христу Богу возлюбленне, / ускори избавити люди безответны: / приемлет тя припадающа, / Иже падша на перси Приемый. / Егоже моли, Богослове, / и належащую мглу языков разгнати, // прося нам мира и велия милости.

 

На утрене на «Бог Господь» – тропарь воскресный, глас 7-й (дважды).

Тропарь воскресный, глас 7-й

Разрушил еси Крестом Твоим смерть, / отверзл еси разбойнику рай; / мироносицам плач преложил еси / и Апостолом проповедати повелел еси, / яко воскресл еси, Христе Боже, / даруяй мирови / велию милость.

«Слава» – тропарь апостола, глас 2-й, «И ныне» – Богородичен воскресный по гласу «Славы»:

Вся паче смысла, / вся преславная Твоя, Богородице, таинства, / чистоте запечатанной и девству храниму, / Мати позналася еси неложна, / Бога рождши Истиннаго; / Того моли спастися душам нашим.

Кафизмы 2-я и 3-я. Малые ектении. Седальны воскресные.

Полиелей. Величание апостола и избранный псалом. «Ангельский собор...». Ипакои гласа. Седален апостола по 1-м стихословии, глас 8-й: «Ты сын назвался еси…»; седален апостола по 2-м стихословии, глас тот же: «Глубину ловления оставив…». «Слава» – седален апостола по полиелее, глас тот же: «Возлег на перси…», «И ныне» – Богородичен Минеи, глас тот же: «Небесную дверь и кивот...». Степенны и прокимен – гласа. Евангелие воскресное 5-е. «Воскресение Христово видевше…». По 50-м псалме: «Слава» – «Молитвами апостолов…». Стихира воскресная, глас 6-й: «Воскрес Иисус от гроба…».

Каноны: воскресный со ирмосом на 4 (ирмосы единожды), Богородицы (Октоиха) на 2 и апостола (два канона) на 8.

Библейские песни «Поем Господеви…».

Катавасия «Отверзу уста моя…».

По 3-й песни – кондак и икос апостола, глас 2-й; седален апостола, глас 8-й (дважды). «Слава, и ныне» – Богородичен Минеи, глас тот же.

Кондак апостола, глас 2:

Величия твоя, девственниче, кто повесть? / Точиши бо чудеса, и изливаеши исцеления, / и молишися о душах наших, // яко Богослов и друг Христов.

По 6-й песни – кондак и икос воскресные, глас 7-й.

Кондак воскресный, глас 7:

Не ктому держава смертная / возможет держати человеки: / Христос бо сниде, сокрушая и разоряя силы ея. / Связуем бывает ад, / пророцы согласно радуются: / предста, глаголюще, Спас сущим в вере, / изыдите, вернии, в воскресение.

На 9-й песни поем «Честнейшую».

По 9-й песни – «Свят Господь Бог наш». Ексапостиларий воскресный 5-й, светилен апостола. «Слава» – ин светилен апостола, «И ныне» – Богородичен воскресного ексапостилария.

«Всякое дыхание…» и хвалитные псалмы.

На хвалитех стихиры на 8: воскресные, глас 7-й:

Воскресе Христос из мертвых, / разруш смертныя узы: / благовести земле, радость велию, / пойте Небеса Божию славу.

Воскресение Христово видевше, / поклонимся святому Господу Иисусу: / единому безгрешному.

Христову воскресению кланяющеся не престаем: / той бо спасл есть нас от беззаконий наших, / Святый Господь Иисус, / явлей воскресение.

Что воздамы Господеви о всех, яже воздаде нам? / Нас ради Бог в человецех, / за истлевшее естество Слово плоть бысть, / и вселися в ны, к неблагодарным, Благодетель: / к пленником, Свободитель: / ко иже во тьме седящим, Солнце Правды: / на Кресте, безстрастный: во аде, свет: / в смерти, живот: воскресение, падших ради. / К Немуже возопиим: / Боже наш, слава Тебе.

и апостола, глас 8-й:

Блаженне Иоанне всемудре, / обильною теплотою Христовы любве, / множае всех был еси учеников / любимь Всевидцу Слову, / и судящему правыми мерами / всей вселенней, / чистоты и девства добротами озарився, / телом и помыслом, // богоблаженне.

Девства процветение, / честных добродетелей приятное жилище, / мудрости орган, / Духа храм, / светоносная уста благодати, / Церкве светлейшее око, / всечестнаго Иоанна / песньми духовными ныне восхвалим, // яко служителя Христова.

Богословия воды, / на перси возлег, Мудрости / почерпл еси, / и мир напоил еси, / Иоанне всеизящнейше, / Троицы ведением / море изсушил еси безбожия, / столп быв и облак одушевлен, // наставляя ны к Небесному наследию.

Евангелисте Божественне, / благих источник, / Царство недвижное, жизнь вечную, и радость неизглаголанную, / и зрения Божественнаго наслаждение, / и богатодатно Христова дарования, / ум превосходяй, и человеческий помысл, / сыне громов, // благовествуяй миру, уяснил еси.

«Слава» – стихира евангельская 5-я:

О премудрых судеб Твоих, Христе! / Како Петру убо плащаницами единеми, / дал еси разумети Твое воскресение? / Луце же и Клеопе спутешествуя, беседовал еси, / и беседуяй не абие себе являеши? / Темже и поносимь бываеши, яко един пришельствуяй во Иерусалим, / и не причащаяйся в конец совета их. / Но Иже вся к создания пользе строя, / и яже о Тебе пророчествия открыл еси, / и внегда благословити хлеб, познался еси им, / ихже и прежде того сердца к познанию Твоему распаластася, / иже и учеником собранным уже / ясно проповедаста Твое воскресение, / имже помилуй нас.

«И ныне»:

Преблагословена еси, Богородице Дево, / Воплощшим бо ся из Тебе ад пленися, / Адам воззвася, / клятва потребися, / Ева свободися, / смерть умертвися, и мы ожихом. / Тем воспевающе вопием: / благословен Христос Бог, / благоволивый тако, слава Тебе.

Великое славословие. По Трисвятом – тропарь воскресный:

Днесь спасение мiру бысть, / поем Воскресшему из гроба, / и Начальнику жизни нашея: / разрушив бо смертию смерть, / победу даде нам и велию милость.

На часах – тропарь воскресный. «Слава» – тропарь апостола. Кондаки апостола и воскресный читаются попеременно.

На Литургии блаженны гласа – 6 и апостола, песнь 3-я – 4.

По входе – тропари и кондаки:

В храме Господском – тропарь воскресный, тропарь апостола. «Слава» – кондак апостола, «И ныне» – кондак воскресный.

В храме Богородицы – тропарь воскресный, тропарь храма, тропарь апостола; кондак воскресный. «Слава» – кондак апостола, «И ныне» – кондак храма.

В храме святого – тропарь воскресный, тропарь апостола; кондак воскресный. «Слава» – кондак апостола, «И ныне» – «Предстательство христиан…».

Прокимен, аллилуиарий и причастен – воскресные и апостола.

Апостол и Евангелие – дня и апостола.