Пятница. Покров Пресвятой Владычицы нашей Богородицы и Приснодевы Марии.

Совершается бденная служба праздника Покрова Пресвятой Богородицы.

Календарные заметки:

На утрене величание: «Величаем Тя, Пресвятая Дево, и чтим Покров Твой честный, Тя бо виде святый Андрей на воздусе, за ны Христу молящуюся».

На великой вечерне «Блажен муж» – 1-й антифон.

На «Господи, воззвах» стихиры Богородицы, глас 1-й:

О великое заступление / печальным еси, Богородице Чистая, / скорая Помощнице, / спасение мира и утверждение, / милости пучина, Божия мудрости источниче, / миру покров; / воспоем, вернии, светлый омофор Ея, / хваляще неизреченно: / Обрадованная, радуйся, с Тобою Господь, // подаяй миру Тобою велию милость. (дважды)

Дивный прорече Исаия: / будет бо, рече, в последняя дни / яве гора Господня и дом Господень верху горы; / увидехом же, Владычице, / о Тебе истинное сбытие, / горы бо и холми украсишася многоименитыми церквами Твоих праздников. / Тем весело вопием Ти: / Обрадованная, радуйся, с Тобою Господь, // подаяй миру Тобою велию милость.

О чудное украшение всем верным еси, / пророческое истинное сбытие, / апостолом слава и мучеником удобрение, / девству похвала и всему миру предивный покров. / Покрый, Владычице, омофором милости Твоея вся люди, вопиющия: / Обрадованная, радуйся, с Тобою Господь, // подаяй миру Тобою велию милость.

И глас 4-й:

Яко Богонасажденный рай / и место Животнаго древа, напаяемо Духом Святым, / Тебе, Богородице, сведуще, / Творца всех рождшую, / Животным Хлебом верныя питающа, / Емуже о нас с Предтечею молися, // честным омофором покрывающи люди от всякия напасти.

Освящается Небо и земля, / Церковь же светится, и людие вси веселятся: / се бо Мати Божия / со Ангельскими воинствы, с Предтечею и Богословом, / с пророки же и апостолы, невидимо вшедши, / за христианы молится Христу помиловати град и люди, // славящия Тоя Покрова праздник.

Доброту Тя Иаковлю / и лествицу Небесную, / по нейже Господь сниде на землю, / тех же тогда образи / Твою честь и славу, Богородице, проявляху. / Тя, Рождшую Бога всех, / блажат Небеснии Ангели и земнии человецы, яко за весь мир молишися, / покрывающи милостию // Твой честный совершающих праздник.

Возсия днесь радостный праздник / всечестнаго Покрова Божия Матере: / днесь бо Царица и Владычица всех, / руце свои простерши к Сыну Своему, молится прилежно, / просящи мира мирови, / покрывающи люди от нахождения иноплеменных омофором милости Своея / и, Тобою хвалящеся, победы на сопротивныя просят // покрывающеся омофором человеколюбия Твоего.

«Слава, и ныне» – Богородицы, глас 8-й:

Срадуются с нами умная вся чиноначалия, / духовно совокупльше чувственный лик, / видяще Царицу и Владычицу всех / многоименне верными славиму; / радуются же и дуси праведных, / сущии зрителие видения / на воздусе молебно простирающу всечестнеи Свои руце, // просящу умирения миру и спасения душ наших.

Вход. Прокимен дня. Паримии Богородицы – 3.

На литии стихиры Богородицы, глас 3-й:

Наста днесь пресветлый праздник, Пречистая Дево, / честнаго Твоего Покрова. / Паче солнца освещаеши люди, / верою от чиста сердца Тебе Истинную Матерь Божию исповедающия / и Сыну Твоему вопиющия: / Христе Боже, молитвами Приснодевы, / чисто и без истления рождшия Тя, / не предаждь врагом ратующим Твое достояние, // но яко Милостив спаси в мире души наша.

Глас 4-й:

Хваление Тебе, еже по достоянию, / людие Сына Твоего, Пречистая Владычице, / желающе воспети, но не возмогут. / Всегда бо всех верных заступаеши / и покрываеши честным Твоим Покровом, / и молишися спастися всем, // верою Тебе Чистую и Истинную Богородицу почитающим.

Глас 2-й:

Пренепорочную всех Царицу, Пречистую Деву, / сошедшеся, вернии, днесь ублажим, Матерь Христа Бога: / присно бо к Сыну руце милостивно простирает. / Юже и предивный Андрей виде на воздусе, / честным Своим Покровом люди покрывающую, / и Той умильно возопиим: / радуйся, покрове и заступление, // и спасение душам нашим.

«Слава, и ныне» – Богородицы, глас 2-й:

Смысл очистивше и ум, / со Ангелы и мы торжествуем, / светло начинающе Давидскую песнь Отроковице, / Невесте всех Царя Христа Бога нашего, / воскресни, Господи, глаголюще, в покой Твой, / Ты и кивот святыни Твоея: / яко бо палату красну, Сию украсив, / и причте Ю граду Твоему, Владыко, / строити и покрывати от сопостатных поган // державною силою Твоею, молитвами Ея.

На стиховне стихиры Богородицы, глас 2-й:

Яко всех вышши сущи Небесных и земных, / Херувим славнейши и всея твари честнейши, / Тебе, Заступницу и покров державен, / христианскому роду Христос дарова / покрывати и спасати люди согрешшия, / к Тебе притекающия. / Темже прибежище всем, Тебе воспеваем, Владычице, / и честный праздник Твоего Покрова празднуем светло, // Христа моляще даровати нам велию милость.

Глас 5-й:

Стих: Слыши, Дщи, и виждь, / и приклони ухо Твое.

Воспоим, людие, светло Давидскую песнь / Отроковице Невесте, / Божии Матери всех Царя Христа: / предста Царица одесную Тебе, Владыко, / рясны златыми одеяна и преукрашена Божественными лепотами. / Сию бо избранную в женах, / паче всего мира удобрив, / благоизволи родитися от Нея, / великия ради милости, / и Сию Помощницу людем Своим дарова / строити и покрывати от всякия беды рабы Своя, // Едину Благословенную.

Глас 7-й:

Стих: Лицу Твоему / помолятся богатии людстии.

Гора еси велика и преславна, / паче горы Синайския, Богородице: / она бо, не терпящи снития Славы Божия во образе и сенех, / огнем возгарашеся, и громи и молния тамо быша. / Ты же всего в Себе Божественнаго Огня сущи, / Божия Слова во чреве неопально носила еси, / манием носящаго вся, / и, матерне дерзновение к Нему имущи, / помози, Владычице, верно празднующим / Твой честный праздник / и не забуди, милостивно посещающи: / прияла бо еси от Бога дар строити // и покрывати христоименитое Твое стадо, рабы Твоя.

«Слава, и ныне» – Богородицы, глас 2-й:

Яко венцем пресветлым, Всечистая Богородице, / Покровом Твоим честным Церковь Божия приодеяся / и светится, радующися, днесь, / и тайно ликовствует, Владычице, вопиющи Тебе: / радуйся, одеяние честное и венче Божия славы; / радуйся, Едина славы совершение и вечное веселие; / радуйся, к Тебе притекающим пристанище, и избавление, // и спасение наше.

По Трисвятом – тропарь Богородицы (Покрова), глас 4-й (трижды):

Днесь благовернии людие светло празднуем, / осеняеми Твоим, Богомати, пришествием, / и к Твоему взирающе пречистому образу, умильно глаголем: / покрый нас честным Твоим Покровом / и избави нас от всякаго зла, / молящи Сына Твоего, Христа Бога нашего, // спасти души наша.

На утрене на «Бог Господь» – тропарь Богородицы, глас 4-й (дважды). «Слава, и ныне» – тот же тропарь.

Кафизмы 19-я и 20-я. Малые ектении. Седальны Богородицы (по дважды).

Полиелей. Величание Богородицы и избранный псалом. Седален Богородицы по полиелее, глас 4-й: «Яко древняго воистину…». «Слава, и ныне» – ин седален Богородицы по полиелее, глас тот же: «Приими, Владычице…». Степенна – 1-й антифон 4-го гласа. Прокимен Богородицы, глас 4-й: «Помяну имя Твое во всяком роде и роде»; стих: «Лицу Твоему помолятся богатии людстии». Евангелие – Богородицы. По 50-м псалме: «Слава» – «Молитвами Богородицы…». Стихира Богородицы, глас 8-й:

Срадуются с нами умная вся чиноначалия, / духовно совокупльше чувственный лик, / видяще Царицу и Владычицу всех, многоименне верными славиму, / радуются же и дуси праведных, сущии зрителие видения, / на воздусе молебно простирающу всечестнеи Свои руце, / просящу умирения миру // и спасения душ наших.

Канон Богородицы со ирмосом на 12 (ирмосы по дважды).

Библейские песни «Поем Господеви…».

Катавасия «Отверзу уста моя…».

По 3-й песни – седален Богородицы, глас 5-й. «Слава, и ныне» – тот же седален.

По 6-й песни – кондак и икос Богородицы, глас 3-й.

Кондак, глас 3:

Дева днесь предстоит в церкви / и с лики святых невидимо за ны молится Богу, / Ангели со архиереи покланяются, / апостоли же со пророки ликовствуют: // нас бо ради молит Богородица Превечнаго Бога.

На 9-й песни поем «Честнейшую».

По 9-й песни «Достойно есть» не поется. Светилен Богородицы (дважды). «Слава, и ныне» – тот же светилен.

«Всякое дыхание…» и хвалитные псалмы.

На хвалитех стихиры Богородицы, глас 8-й:

Тебе припадаем, Госпоже, / умильно кланяющеся, молим Тя: / радуйся, Богоблаженная Владычице, / многоименитая Дево, / пророки проображенная честно: / в Тя бо, яко роса, Христос Бог сниде, / и родила еси, Браконеискусная Чистая, и на руку носила еси всех Творца и Господа. / Емуже ныне о нас молися, // славящих верно Твоего Покрова праздник. (дважды)

Поют Тя, Дево Богородице, Ангельстии чини, / и славят патриарси со архиереи / и святии апостоли, / яко Матери Божии честно служат Тебе, / видяще Тя за мир молитву творящую / ко Спасу всех, Христу Богу. / Емуже помолися избавити град и люди, / славящия Тя верно // и Твоего Покрова праздник чествующия.

Паче Аароня кивота / всю Тя Бог освяти / Духом, Богородице, Святым, / и паче солнечных луч / Твоим светящимся омофором / освещаеши Церковь и люди / и тьму грехов наших отгоняеши, / избавляеши же от бед и скорбей // верою чествующия Твоего честнаго Покрова праздник.

«Слава, и ныне» – Богородицы, глас 6-й:

Яко виде Тя пречудный Андрей на воздусе / со Архангельским множеством, / со апостолы, и пророки, / и множеством мучеников, / Сыну Твоему и Богу нашему о граде и людех молящуюся, Владычице, / и честным Твоим Покровом покрывающую, / не оскудей и ныне, Пречистая, / спасти изрядное достояние Твоего Сына, // пречестный праздник Твой празднующе, Многопетая.

Великое славословие. По Трисвятом – тропарь Богородицы, глас 4-й (единожды).

На часах – тропарь и кондак Богородицы.

На Литургии блаженны Богородицы, песнь 3-я (со ирмосом) и 6-я – 8.

По входе – тропарь Богородицы (Покрова). «Слава, и ныне» – кондак Богородицы (Покрова).

Прокимен, аллилуиарий и причастен – праздника.

Апостол и Евангелие – праздника.

По «Изрядно…» поется «Достойно есть».