Суббота. Преставление прп. Сергия, игумена Радонежского, всея России чудотворца.

Приводим порядок бденной службы прп. Сергия Радонежского.

На великой вечерне «Блажен муж» – 1-й антифон.

На «Господи, воззвах» стихиры преподобного, глас 6-й:

Мира мятеж, преподобне, оставив, / и взем Крест твой, / последовал еси Христу / невозвратным помыслом, / и в пустыню вселился еси, преподобне, / душевныя страсти из корене исторгая, / и телесная чувства огорчевая, / и частыми бдении и молитвами, / благодать восприял еси, преподобне, / целити различныя недуги, / Ангелов собеседниче, и преподобных сожителю: / молися Господу, Сергие преподобне, // помиловатися душам нашим.

Преподобне отче, / кто исповесть труды твоя и болезни? / Или кий язык изречет жестокое твое житие, / бдение же и сухоядение, / и еже на земли легание, / чистоту душевную и телесную, / устнами и умом совершенное безмолвие, / смирение же нелицемерное, / молитвы непрестанныя, и разсуждение доброразсудное, / худость ризную, и память смертную? / Сергие, отче наш, // моли спастися душам нашим.

Преподобне отче Сергие, / ты врач душ и телес явился еси, / источая недужным исцеления струи, / даром же пророчествия украшен, / прорицая яко настоящая будущая. / Молитвою бо князя вооружив, варвары победити, / хвалящияся отечество его разорити. / Но самех богопораженною язвою / трупия достойно падоша, // псаломски, при аде, преподобне.

Богомудре Сергие, / славу маловременную оставль, / и в пустынях и горах, / ты живый явился еси, / и Троицы чистый дом, / блаженне, был еси, / Еяже силою пресвятыя храмы воздвиг, / и ограды монашествующим во спасение создал еси: / живяше же в тебе Христос Бог наш, / Егоже от юности возжелел еси. / Того моли, Сергие преподобне, // спастися душам нашим.

Ины стихиры, глас 2.

Терпя нынешняя мужественне, / веселяся будущими, / ко всем глаголал еси, преподобне Сергие: / еда убо туне подвизаемся, / но вечнаго живота чающе получити? / Люты скорби, но сладок рай, / болезнены труды, но присносущно восприятие. / Не обленимся убо, о постницы. Мало стерпим, / да венцы нетленными увяземся // от Христа Бога и Спаса душ наших. (дважды)

Зря яко наслаждение скорби, / шествуя тесным путем, / ко учеником твоим глаголал еси, преблаженне Сергие: / не устрашимся подвига постнаго, / да страшнаго геенскаго мучения избегнем, / согбенне будут руце, / да простираются же к Богу, / нозе же утверждены / на молитве предстояти. / Не пощадим естества тленнаго, изволим подвиг, / да венцы победными увяземся // от Христа Бога, и Спаса душ наших.

Отверг тленныя ризы, / ходил еси в зиме без теплыя одежды якоже в лете, / глаголя, терпеливе Сергие: / за рай, егоже погубихом, / ризы мягкия ныне отлагаем, / грехом иногда преступления одеяхомся, / совлецемся ныне, ради нетленных риз, / небрежем, братие, о зиме преходящей: плоть изнурим, / да венцы победными увяземся // от Христа Бога и Спаса душ наших.

«Слава» – преподобного, глас 6-й:

Еже по образу соблюд невредимо, / ум владыку над страстьми пагубными постнически поставив, / во еже по подобию яко мощно возшел еси: / мужески бо естество понудив, / потщался еси хуждшее покорити лучшему, / и плоть поработити духу. / Темже монашествующих явился еси верх, / житель пустынный, благотекущих обучитель, / правило добродетели известнейшее, / и ныне на Небесех, зерцалом разрешшимся, / отче наш Сергие, / чисте зриши Святую Троицу, / моляся несредственне // о иже верою и любовию чтущих тя.

«И ныне» – догматик, глас тот же:

Кто Тебе не ублажит, Пресвятая Дево?/ Кто ли не воспоет Твоего пречистаго Рождества?/ Безлетно бо от Отца возсиявый Сын Единородный,/ Тойже от Тебе, Чистыя, пройде,/ неизреченно воплощься,/ естеством Бог сый/ и естеством быв Человек нас ради,/ не во двою лицу разделяемый,/ но во двою естеству неслитно познаваемый./ Того моли, Чистая, Всеблаженная,// помиловатися душам нашим.

Вход. Прокимен дня. Паримии преподобного – 3.

На литии стихира храма и стихиры преподобного, глас 6-й:

Приидите празднолюбцы, / и постников сословие, / верою сошедшеся, / истиннаго постника почтим днесь Сергия, / с веселием шествовавшаго по стопам Владыки своего / узкий путь, и безстрастную жизнь, / и верою возопиим: / о всеблаженне, преподобных сожителю? / И постников похвало. / О нас молися ко Господу, // помиловатися душам нашим.

Преподобне и богоносе Сергие, / любве ради Христовы вся оставил еси, / и в пустыню вшед, / никакоже убоялся еси невидимых врагов коварствия: / аще бо и многажды приидоша на тя, / скрежетанием зубным ярость показующе: / ты же молитвами твоими, / яко дым без вести сих сотворил еси. / О непорочныя твоея души, / и крепкаго терпения твоего! / Христа непрестанно моли, // спастися душам нашим.

Российская убо всеосвященная, и великая Церковь, / с православными соборы монахи же и простыми, / Евангельских источников струями напоившеся, / духовно веселимся, / в нарочитом празднице, добраго пастыря и учителя, / и целебныя его мощи обстояще любезно облобызаем, / и сих яко цветы песньми и хвалами увязем рекуще: / радуйся Сергие блаженне, / Небесный человече, земный Ангеле, / и Духа Святаго обитель. / Радуйся, яко многих ко спасенному пути наставил еси. / Радуйся, православному воинству нашему похвала и утверждение, / преподобне Сергие богоприятне, / отечеству твоему пресветлый светильниче, // и молитвенниче о душах наших.

«Слава» – преподобного, глас тот же:

Приидите монашествующих множество днесь, / Сергия, благочестия подражателя / песньми и пеньми восхвалим, / и честную его и многоцелебную раку обстояще, / любезно облобызаем, глаголюще: / радуйся, преславне Сергие, / отечеству твоему пресветлый светильниче. / Радуйся, яко чисте чистейшему Свету совокупився. / Радуйся, яко Троице предстоиши со Ангелы. / Юже непрестанно моли, // даровати душам нашим велию милость.

«И ныне» – Богородичен воскресный, глас тот же:

Творец и Избавитель мой, Пречистая,/ Христос Господь,/ из Твоих ложесн прошед,/ в мя оболкийся,/ первыя клятвы Адама свободи./ Темже Ти, Всечистая,/ яко Божии Матери же и Деве,/ воистину вопием немолчно:/ радуйся, ангельски, радуйся, Владычице,/ предстательство, и покрове,// и спасение душ наших.

На стиховне стихиры преподобного, глас 1-й:

Наста, богоносе, солнца светлейши твой праздник, / озаряя приходящия к тебе верою, / и безсмертие благоухает: / душам же источает нетление от святаго твоего телесе, / Сергие преподобне, // молитвенниче о душах наших.

Стих: Честна пред Господем / смерть преподобных Его.

Чувственныя страсти телесныя победил еси, / воздержания броздами, чудодейственне Сергие, / и ревность к Безплотным на земли показал еси, / все же плотское желание духу повинул еси. / Тем и ныне в Небесных дворех водворяяся, // моли о душах наших.

Стих: Блажен муж бояйся Господа, / в заповедех Его восхощет зело.

Блаженне Сергие, основание положив добродетели, / древняго человека совлекся с похотьми, / и во Христа облеклся еси Истину. / Тем обличил еси, преподобне, многая врагов ополчения, / наставник монахов быв, // моли спастися душам нашим.

«Слава» – преподобного, глас 8-й:

Монахов множества / наставника тя почитаем, отче наш Сергие: / твоею бо стезею воистинну право ходити познахом. / Блажен еси, Христу работав, / и вражию обличил еси силу, / Ангелов собеседниче, преподобных сопричастниче и праведных: / с нимиже молися Господеви, // помиловатися душам нашим.

«И ныне» – Богородичен воскресный, глас тот же:

Безневестная Дево,/ Яже Бога неизреченно заченши плотию,/ Мати Бога Вышняго,/ Твоих рабов мольбы приими, Всенепорочная,/ всем подающи очищение прегрешений,/ ныне наша моления приемлющи,// моли спастися всем нам.

По Трисвятом – тропарь преподобного, глас 4-й (дважды) и «Богородице Дево…» (единожды).

Тропарь преподобного, глас 4:

Иже добродетелей подвижник, / яко истинный воин Христа Бога, / на страсти вельми подвизался еси в жизни временней, / в пениих, бдениих же, и пощениих образ быв твоим учеником. / Темже и вселися в тя Пресвятый Дух, / Егоже действием светло украшен еси: / но яко имея дерзновение ко Святей Троице, / поминай стадо, еже собрал еси, мудре, / и не забуди, якоже обещался еси, / посещая чад твоих, // Сергие преподобне, отче наш.

На утрене на «Бог Господь» – тропарь преподобного, глас 4-й (дважды). «Слава, и ныне» – Богородичен воскресный, глас 6-й: Благословенную нарекий Твою Матерь,/ пришел еси на Страсть вольным хотением,/ возсияв на Кресте, взыскати хотя Адама,/ глаголя Ангелом:/ срадуйтеся Мне, яко обретеся погибшая драхма./ Вся мудре устроивый,// Боже наш, слава Тебе.

Кафизмы 16-я и 17-я². Малые ектении. Седальны преподобного (по дважды).

Полиелей. Величание преподобного и избранный псалом. Седален преподобного по полиелее, глас 8-й (дважды). «Слава, и ныне» – Богородичен Минеи, глас тот же. Степенна – 1-й антифон 4-го гласа. Прокимен преподобного, глас 4-й: «Честна пред Господем смерть преподобных Его»; стих: «Что воздам Господеви о всех, яже воздаде ми?». Евангелие – преподобного. По 50-м псалме: «Слава» – «Молитвами преподобнаго и богоноснаго отца нашего Сергия…». Стихира преподобного, глас 6-й:

Иже на земли Ангела, / и на Небеси человека Божия, / мира благое украшение, / пищу благих добродетельных, / постников похвалу, / Сергия великаго почтим: / насажден бо в дому Господни, / и процвете праведно. / Яко кедр в пустыни, / умножив стадо Христово словесных овец, // в преподобстве и правде.

Каноны:

В храме Господском и Богородицы – канон храма со ирмосом на 6 (ирмосы по дважды) и преподобного (два канона) на 8.

В храме святого – канон Богородицы (с прошедшей Недели) со ирмосом на 6 (ирмосы по дважды) и преподобного (два канона) на 8.

Библейские песни «Поем Господеви…».

Катавасия «Отверзу уста моя…».

По 3-й песни – ин кондак преподобного, глас 8-й; седален преподобного, глас 4-й (дважды). «Слава, и ныне» – Богородичен Минеи, глас тот же.

По 6-й песни – кондак и икос преподобного, глас 8-й.

Кондак преподобного, глас 8:

Христовою любовию уязвився, преподобне, / и Тому невозвратным желанием последовав, / всякое наслаждение плотское возненавидел еси, / и яко солнце отечеству твоему возсиял еси: / тем и Христос даром чудес обогати тя, / поминай нас, чтущих пресветлую память твою, да зовем ти: // радуйся, Сергие богомудре.

На 9-й песни поем «Честнейшую».

По 9-й песни «Достойно есть» не поется. Светилен преподобного (дважды). «Слава, и ныне» – Богородичен Минеи.

«Всякое дыхание…» и хвалитные псалмы.

На хвалитех стихиры преподобного, глас 4-й:

Егда Божественное звание / найде на тя, пребогате, / тогда все плотское мудрование / духу повинул еси, / пощения страданьми утвердився, / и яко злато в горниле искушено сияя явился еси. / Приятелище был еси Духа Пресвятаго, / собрав монашествующих множества, / и учении твоими, яко некоею небовосходною лествицею, / на высоту добродетелей возводя. / Поминай нас, Сергие, чтущих память твою, // спасти и просветити души наша. (дважды)

Возсия днесь пресветлая / и всепразднственная память твоя, преславне Сергие, / созывающи многочисленное постников сословие, / и преподобных ликостояния, / в нейже Ангели славят / в Троице покланяемаго Бога нашего, / человецы же притекающии / к священней раце мощей твоих, / исцеления дары приемлют. / И тя венчавшаго / Христа прославляем, // Спаса душ наших.

Богоносе и преблаженне / отче Сергие, / ты пророчески / постелю слезами измывал еси: / не дал еси сна твоим очесем, / ни веждом дремания, / сердечное желание еже ко Христу являя, / Егоже измлада возлюбив, / всякия добродетели вид исправил еси. / Темже тя ублажаем, / Христа величающе, // тя прославльшаго.

«Слава» – преподобного, глас 2-й:

Преподобне отче, / измлада воздержанию прилежав постився, / орган был еси Святаго Духа. / Тем и чудес дарования прием, / человеки научил еси преобидети маловременная: / ныне же неизреченным светом светле сияеши, / просвети наша мысли ходатайством твоим, // мудре Сергие.

«И ныне» – Богородичен Минеи, глас тот же:

Все упование мое на Тя возлагаю, / Мати Божия, // сохрани мя под кровом Твоим.

Великое славословие. По Трисвятом – тропарь преподобного, глас 4-й. «Слава, и ныне» – Богородичен воскресный, глас 6-й: «Благословенную нарекий...».

На часах – тропарь преподобного. Кондаки преподобного читаются попеременно.

На Литургии блаженны преподобного, 1-го канона песнь 3-я – 4 (со ирмосом), и 2-го канона песнь 6-я – 4.

По входе – тропари и кондаки:

В храме Господском и Богородицы – тропарь храма, тропарь преподобного; кондак преподобного. «Слава» – ин кондак преподобного, «И ныне» – кондак храма.

В храме святого – тропарь преподобного; кондак преподобного. «Слава» – ин кондак преподобного, «И ныне» – «Предстательство христиан…».

Прокимен, аллилуиарий и причастен – преподобного.

Апостол и Евангелие – преподобного.

Примечание. Рядовые чтения переносятся на пятницу 24 сентября.