Припев: Слава, Господи, святому Воскресению Твоему.
Тропарь: Всего мя восприял еси весь в совокуплении неслитно,/ всему ми дая, Боже мой, Спасение страстию Твоею,/ юже на Кресте претерпел еси телесне,// благоутробия ради многаго.
Припев: Слава, Господи, святому Воскресению Твоему.
Тропарь: Твои ученицы зряще отверзен гроб Твой,/ и богоносныя плащаницы испражнены воскресением Твоим,// с ангелом глаголаху: воистинну воста Господь.
Припев: Пресвятая Троице, Боже наш, слава Тебе.
Троичен: Единице убо Божественнаго Существа, но Ипостасьми Троице,/ вси вернии покланяющеся,/ в неслиянных Ипостасех Равносильную Единочестную// ныне благочтуще величаем.
Первый канон Рождества, глас 1:
Припев: Слава Тебе, Боже наш, слава Тебе.
Тропарь: Изрядное течение зряще/ волсви необычныя новыя звезды новосияющия,/ Небеса просвещающия, Христа Царя знаменующия на земли,// рождшагося в Вифлееме на спасение наше.
Припев: Слава Тебе, Боже наш, слава Тебе.
Тропарь: Новорожденное, – волхвом, глаголющим, –/ Отроча Царь, Егоже звезда яви, где есть?/ Тому бо поклонитися приидохом./ Яряся, Ирод смущашеся,// Христа убити богоборец шатаяся.
Припев: Слава Тебе, Боже наш, слава Тебе.
Тропарь: Испыта Ирод время звезды,/ еяже вождением волсви в Вифлееме покланяхуся Христу с дары;/ еюже, ко отечеству наставляеми,// лютаго детоубийцу оставиша поругана.
Второй канон Рождества, глас 1:
Припев: Слава Тебе, Боже наш, слава Тебе.
Тропарь: Образы несветлы и сени приведены,/ о Мати Чистая, видевше Слова,/ нова явльшагося от врат заключенных,// мнящии же истинную светлость, достойно Твою благословим утробу. (Дважды)
Припев: Слава Тебе, Боже наш, слава Тебе.
Тропарь: Желание получивше и Божия пришествия христокраснии людие сподобльшеся,/ ныне утешаются паки бытием:/ яко живоносну благодать даеши, Дево Чистая,// поклонитися славе.
Канон святых, глас 4:
Припев: Святии Богоотцы, молите Бога о нас.
Тропарь: Рождшемуся от Девы вся тварь трепетом послужи:/ Небеса убо – звездою, земля же – ясльми,/ гора – вертепом, волсви – дарми,// пастырие – чудесем, Ангели же – слава в Вышних Богу.
Припев: Святии Богоотцы, молите Бога о нас.
Тропарь: Царь от пастырей древле убо Давид бысть,/ от колена же Иудова и царскаго ты, Иакове, пастырь паствы показался еси// Воплощшагося, Агнца Вышняго и Сына Божия.
Слава Отцу и Сыну и Святому Духу.
Тропарь: Вифлееме, ныне веселися, град быв Новаго Давида,/ и Сионе, возвещай Церквей старейшинство, общее веселие, всех Царя,// и Того угодники ныне восприемши.
И ныне и присно и во веки веков, аминь.
Богородичен: Ангельстии собори Тя, Богородительнице, славят,/ и человеческий род Тя непрестанно песньми почитает,/ Ты бо Божественным Рождеством земныя с Небесными совокупила еси.// Темже Тя почитаем.
Катавасия, глас 1:
Хор: Таинство странное вижу и преславное:/ Небо – вертеп, Престол Херувимский – Деву,/ ясли – вместилище,/ в нихже возлеже Невместимый – Христос Бог,// Егоже, воспевающе, величаем.
Ектения малая:
Иерей: Яко Тя хвалят вся силы небесныя, и Тебе славу воссылаем, Отцу и Сыну и Святому Духу, ныне и присно и во веки веков.
Хор: Аминь.
Диакон: Свят Господь Бог наш.
Хор: Свят Господь Бог наш
Диакон: Яко Свят Господь Бог наш.
Хор: Свят Господь Бог наш.
Диакон: Над всеми людьми Бог наш.
Хор: Свят Господь Бог наш.
Ексапостиларий воскресный седьмой:
Яко взяша Господа, Марии рекшей,/ на гроб течаста, Симон Петр,/ и другий таинник Христов, егоже любляше:/ течаста же оба, и обретоста плащаницы едины внутрь лежаща,/ и главный же бе сударь кроме их./ Темже паки умолчаста,// дондеже Христа видеста.
Слава Отцу и Сыну и Святому Духу.
Светилен святых, подобен: "Со ученики…":
Со Иаковом воспоим, славным Богобратом, Давида Богоотца,/ Иосифа же Божественнаго, Богородицы обручника:/ Христову Божественному Рождеству послужиша во граде Вифлееме боголепно,/ со Ангелы, волхвы же и пастырьми Тому песнь поюще,// яко Богу и Владыце.