ЧУДЬ ЙЫЛIСЬ ИНЬВЕНСКÖЙ ПРЕДАННЁ

 

Миян фольклорын эм ыджыт раздел, кöда эшö абу на быдöс öктöм и öддьöн умöля исследуйтöм. Этö — историческöй преданнёэз, кытчö пырöны и чудскöй йöз йылiсь предан­нёэз. Отирын висьтасьöны, бытьтö миян кра­йын кöркö олöм мöдiк йöз, важ йöз, кöда шусьöма чуддэзöн [2]. Кöр пондöм локны эна местаэзö виль, миян отирыс, чудскöйеслö некытчö лоöм воштiсьны, и нiя асьныс асьнысö торкöмась: гарйöмась му гуэз, пырöмась сэт­чин, кералöмась гу столббесö — нiйö сэтчö и ляпкöтöм, тыртöм мунас.

Сэтшöм преданнёлöн вуж, основа. И колö шуны, что висьтасьöны этö не только коми-пермяккез, но и коми-зыряна, Архангельскöй да Вологодскöй областтезiсь роччез — почти быдлаын миян Европейскöй Северын, Уралын, а сiдзжö мукöдлаас и Сибирьын. Мукöд исследователлез лыддьöны, что легендасö быдлаö паськöтiс роч йöз аслас колонизация коста. Но кытöн былись шогмис легендаыс, киннэз лöсьöтiсö сiйö, мыля сiя олö унажыксö ойвылын, мыля роч летописеццез кöркö шувлiсö чуддэзнас только ойвывся отирсö, а именно нiйö, кöдна пырöны сiдз шусяна финно-угорскöй группаö (эстонеццез, вепссэз, кареллэз, коми-зыряна, коми-пермяккез, ханттэз, манси да мöдiккез) — быдöс эна проблемаэс абу на разрешитöмöсь. Эшö колö керны ыджыт удж, медбы öктыны энö преданнёэсö быдлаись, кытöн нiя эмöсь, гижны нiйö и вöлись анализируйтны. Эд быдлаын преданнёэс не öткодьöсь, быд отир содтö ны дынö мыйкö вильö, ассис, ассяняс. Нельки миян коми-пермяцкöй деревняэзын не öтмоза висьтасьöны чудскöй отир йылiсь. Но и öткодьыс сэтöн неетша: чуддэсö коми-пермяккес лыддьöны важ, кöркöся отирöн, кöда кольöм ас бöрсяняс сiдз шусяна «чучкöй» городищеэз, юкмöссэз, гряддэз, туйез, шойнаэз [3], кытшöмкö кладдэз да «чучкöй чачаэз». Этö — берся историческöй местаэз да памятниккез, кöдна кольччöмась миян предоккезсянь быдкодь каддэзсянь. Чуддэс преданнёэзас мыччассьöны тожö быдкодя: то нiя учöтик, вынтöм мортоккез, кöдна олöны пемытiнын, повзьöтлöны отирсö да пöртмасьöны, то нiя вына богатыррез [4], кöдна вермасьöны лёк враггезкöт и вермöны нiйö: крут береггез вывсянь катлялöны враггес вылö керрез, гарйöны му пытшкöт туйез, чапкасьöны керöс вывсянь керöс вылö кöртовöй беддезöн, дзебöны муö ыджыт богатствоэз и сiдз одзлань.

Быдöс преданнёэз йылiсь эта неыджыт статьяын висьтасьны оз позь, сiйöн ми пон­дам баитны эстöн только öтiк вариант йы­лiсь, кöдаын мыччассьö миян предоккезлöн кытшöмкö мöдiк отиркöт важся ни важся пантасьöм. Вот мый баитсьö сыын:

«Важынся-важын каддэзö эна местаэзын олöм мöдiк, не миян важ йöз — чучкöй йöз. Олöмась чучкöйес му пытшкын, сэтшöм оланiннэзын — му гуэзын. Отирыс вöлöма сьöд, поснитик: сэтшöм поснитик, что сю пытшкöт пö котрасьöны и озö тыдалö сы пытшкись, только сюыс юкласьö.

А сюыс сэк мöднёж быдмывлöма: сустава тылöпа, быд суставсянь шеппез розъясьöны — быд тылöп вылын тыр шеп.

Вундыны сэтшöм сюсö чучкöйеслö вöлöм öддьöн сьöкыт. Чарла нiя абу тöдлöмась. И вот öтпыр адззасö чучкöйес чарла, озö тöдö, мый сыкöт керны и кытчö сiйö воштыны. Вöтьны пö сiйö колö ваö. Даскык чучкöй морток лэбтасö сiйö, ваясö ты дорö, пуктасö пыжö, сэтчö пуксясö асьныс и давай сынны. Локтасö ва шöрас, домаласö чарлаыс бердö из, кутчисясö чарлаыс да изыс бердö быдöнныс и лэбтасö да чапкасö пыжсис. Но чарлаыс эд чукыля, сiя и кышасяс пыж до­рас да бергöтас пыжсö. Чучкöйес быдöс усяласö ваас и вöясö öтлаын чарлаыскöт.

Вундывлöмась пö чучкöйес нето пыжьяннэзöн, нето öжыннэзöн. Быд быдмассö пöрöтлöмась торйöн: бытшкас улiсь суставас — сiя и чегö. Сэсся кöрталасö пö гезокöн коль­та и кыскöны гужöн му кузяс. Вундыны сьö­кыт вöлöм. Сiйöн кытшöмкö чучкöй öтчид вундас, вундас да мыдзас, сэсся кватитас сю кустсö киэзнас, сырйыштас роззэсö да ёрдас. Роззэс быдöс киссясö, только йылас öтiк шеп кольччас. Сэксянь пö и лоöм сюыс только öтiк шепа.

Сюыс шогмывлöм етша, видзлöмась сiйö дöракöммезын, но тырмывлöм пö быдöнныслö, и чуддэс олöмась бура — кладдэз да мый да муас кольöмась пö.

Кытчö лоис эта йöзыс — тöдны оз позь. Вежсьöм, виль йöз лоöм, öння йöз» [5].

Ми шуам этö преданнёсö иньвенскöйöн сiйöн, мыля сiйö висьтасьöны унажыксö лунвывся, иньвенскöй коми-пермяккез — Кудымкарскöй да Юсьвинскöй районнэзын. Эта вылö вачкисьлана варианттэз сiдзжö эмöсь язьвинскöй коми-пермяккез фольклорын, но сёжö нiя не быдсöн öткодьöсь.

Иньвенскöй преданнё зэв интереснöй сiйöн, что нуöтö миянöс öддьöн важ кадö, кытшöмкö мöдiк отир дынö и мöдiк культураö. Сiдз, чудскöйес бытьтö вöлöмась учöтикöсь и сьöдöсь. Эта висьталö миянлö кытшöмкö мöдкодь антропологическöй тип йылiсь. Бы­дыс тöдö, что коми-пермяккез фольклорын и оланын медбасöкöн лыддиссьöны чочком, югыт вира морттэз (сказкаэзын нывкаэз лён кодь юрсиаöсь, кымöр рöма синаöсь; мукöдчид, кöр чужас сьöд кага, сiйö радейтöны етшажык; мукöдыс видöны сьöд вира отирöс: сьöд пач, сьöд чуд, чуд пиян и сiдз одзлань). Эта мыччалö, что основнöй антро­пологическöй типыс кöркö миян вöлi сётаки чочком.

Антропологгез важын ни адззисö, что коми-пермяккес быд районын не öткодьöсь. Ежели ойвывся районнэзын отирыс унажык чочком юрсиа, югыт вира, югыт сина, то лунвывся, иньвенскöйес, унажыксö сьöдöсь. Быдöс коми-пермяккес относитчöны вятско-камскöй (сублапоноиднöй) антропологиче­скöй тип дынö, но иньвенскöйес коласын эм эшö сiдз шусяна северопонтийскöй (сьöд) тип [6]. Ны коласын эмöсь уна неыджыт мыгöра, монголоиднöй чужöмбана отир. Эна признаккес вермисö мыччисьны сэк, кöр миян крайö виль эраись IV-V веккезö лунвывсянь Кама ю йыввезö локтiс пода вöдитiсь йöз — угорскöй йöз [7], сьöд вира, мöдiк отир [8].

Олiсö ли сiя кадö миян предоккезным эстöн, локтiсö ли нiя кысянькö татчö сыбöрын, тöдны оз позь. Кыдз бы сiя эз вöв — миян предоккезным пантасисö мöдкодь отиркöт. Эта отирыс коми-пермяккеслö кажитчис сьöд, учöтик, не ны кодь народöн, кöдалöн, видно, вöлi и мöдкодь материальнöй культура. Сiдз, преданнёын баитсьö, что чуддэс абу тöдлöмась чарла, что нылöн быдмöм кытшöмкö мöдiк сельскохозяйственнöй куль­тура (кöда розъясьöм мусянь), что нiя сюсö видзлöмась дöракöммезын.

Кытшöм жö сю вермис лоны уна вожаöн да уна розъяöн? Сэтшöм сюыс чожажык вермис лоны проса. Проса — лунвывся быд­мас, любитö кöс, шондiа гожум, быдмö мукöдчид полтора метр сувдаöдз и суставвезсянь розъясьö. Просалöн тылöппес унаöн кызжыкöсь рудзöг тылöппезся и вундыны сiйö сьöкытжык. Миян странаын просасö вöдитöны Поволжьеын, Башкирияын и нельки Пермскöй областись лунвывся районнэзын. Учёнöй археологгез адззисö му пытшкись ид, рудзöг да шогдi туссезся öприч и проса туссез [9]. Сiдзкö, легендаас не весь баитсьö мöдкодь быдмас йылiсь, кöда öнi абу ни (öнi просасö миян ладорын озö вöдитö). Сэкся ылiсь каддэзö лунвывся культурасö вермис вайны сьöрсяняс лунвывся угорскöй йöзыс. Сiя пондылiс быдтыны просасö татöн, но миян кöдзыт климатыс, натьтö, эз сет сылö воны быд год, мыйсянь сыбöрын и дугдiсö сiйö вöдитны.

Преданнёын баитсьö сiдзжö, что чудскöй йöзыс абу тöдлöм чарла. Миян крайын чар­ла адззöм Х векся археологическöй находкаэз коласын [10]. Сы вотöдз чарлаыс, видно, эшö эз на вöв. Угорскöй йöз, кöда унажыксö вöдитiс пода, вермис и не тöдны, мый сэтшöм чарла. А ежели вöдитiс проса, может, сiйö вундывлiс кытшöмкö мöдiк орудиеэзöн. Сiйöн преданнёын баитсьö, что чудскöйеслö чарлаыс кажитчöм тöдтöм, неколана торöн, кöдö нiя решитöмась вöйöтны.

Но чарлаыс преданнёас мыччассьö чучкöйесся вынажыкöн. Этаын отразитчис земледельческöй культуралöн вын и преимущество, отразитчис чудскöй отирлöн виль ме­стаын да тöдтöм условиеэзын слабость, ны­лöн пораженнё. Ми тöдам, что мукöд угор­скöй племёэс дугдiсö вöдитны пода и пондiсö вöравны да чериавны и мунiсö эшö ылöжык ойвылö да Урал сайö (öння ханттэз да манси). А мукöдыс сорласисö коми йöзкöт, примитiсö нылiсь кыв да мууджалöм. Нысянь и аркмис коми-пермяккезлöн öння иньвенскöй (сьöд рöма) группа. Сiйöн именно иньвенскöй краяс öнöдз эзö вунöтö этö важ, не öння, йöз отирсö, кöдö шуöны öнöдз чуд­скöй йöзöн.