Doküm küpädik).

In staudöp: „Krokodil“ tö ‚Neurenberg debükot doküma küpädik lagon. Ninädon jenotemi caniseda Deutänik balid medü tren. Tü 1836 yulul 11 cif biröpa: „Lederer“ tö ‚Neurenberg ädagetom de cif feba trenavegik Deutänik balid, kel äcifom febi ela ‚Ludwigsbahn vü ‚Neurenberg e ‚Fürth, däli ad sedön fladis tel labü bir lotidöpane lotidöpa: „Zur Eisenbahn“ tö ‚Fürth. Pro atos kruzars 6 ämutons papelön, e zuo getan ämutom bligidön ad deramenön fladis tel et sunädo pos lüköm trena. Cif feba äspelom, das „prim smalik at caniveiga oplöpon, e latikumo bo ovedon gretikum“. In magod lä doküm peläüköl logoy veigi fladas tel. Seatons su skafül boadik, kel pepladon sui vab smalik nemediko po lemüf sököl. Ve trenaveg nulälikans stanons ad lülogön veigi fledacana at.

 

 

Se Volapükagased pro Nedänapükans 1934, Nüm: 4, Pads: 22-23.

 

Hilöpätal: Plin: ‚Hendrik

<Volapükagased pro Nedänapükans

 

Ünü tim vemo brefik pos deadam jimayedala: jireg-mot mijenot dönuik edrefon dafamüli regik e neti Nedänik.

Tü yulul, 3 i plin: ‚Hendrik edeadom.

Staned sogädik plin-hiatala no äbinon fasilik: too ai evälom ko töd feinik pladi verätik, kel ädutom lü om.

Äsenälom patiko klieni ad jäfikön me jäfots ut, kels äkanons läsükön ditretis kemenas oka. Somo ästütom ed äfödom in län obas savafebädi, ed äjáfom nefeniko as presidan lecifefa ela „krod redik“ Nedänik.

Edagetom dub balug gretik oka, jovial ladöfik oka, gud stedälik oka pöpedi pöpa Nedänik.

 

REDAK.

 

 

Se Volapükagased pro Nedänapükans 1934, Nüm: 5, Pad: {{{pads}}}.

 

Dalebüd Cifala de 1934, Mayul 1, Nüm: 2

Fölölo desini in büad obik de 1934, yanul, 1 pemäniotöli,

lunob me penäd at statudis sököl tefü Volapükanef.

Statuds at plaikons nomenis büik valik.

Dalebüd at ponotükon büo in „Volapükagased pro Nedänapükans“, e pötatimo i in „Zänagased Volapüka“, ven gased lätik podabükon.

 

 

STATUDS TEFÜ VOLAPÜKANEF

 

I. Dil valemik.

§ 1. Volapükan alik labon bligi:

1ido ad dasevön cifali as cif löpikün Voolapükanefa, e bai atos

2ido ad dasevön i stidis Volapükik, kels padasevons fa cifal.

§ 2. Sekü § 1 statudas at Volapükan alik bligidon

1ido ad gebön Volapüki, soäsä at baiodü cifal pelonon fa kadäm Volapüka, e

2ido ad födön ma mafäd näma okik sevädi, paki e gebi Volapüka.

§ 3. Ad riv diseina in § 2 statudas at pemäniotöla binos vipabik, das Volapükan alik

1ido lebonedon eli „Zänagased Volapüka“, e

2ido lüyumon ad bal Volapükaklubas netik ud ad „Diläd valemik feda Volapükaklubas“.

§ 4. Ad dakip baläta bevü Volapükans it, e leigo ad pladul cifala lo cifods notik in reigäns difik, zesüdos ad labön klubädi patik pösodas, kels bitons as guverans Volapükik.

§ 5. Födü balät Volapüka zesüdos ad labön plödü kadäm Volapüka klubädi pösodas, kels bitons as Volapükinolans.

§ 6. Cifal Volapükanefa büdakipom oke gitäti teik

1ido ad givön diplomis alseimik Volapüki tefölis,

2ido ad gividön demü kod alseimik dili gitäta at oka klube, u stide votik, u pösode patik alseimikes, e

3ido ad gesumön mögädo demü kod veütik gitäti at fa om pegividöli.

 

II. Dil guverik.

§ 7. Cifü Volapükans reigäna cif binon, kel labom tiädi: lecif, if reigän tefik labon lödanis plu balion, e tiädi: cif, if reigän tefik labon lödanis läs balion. Cifs Volapükanas reigänas labü lödans läs balion ponemons in statuds at: cifs calik.

§ 8. Ziläks reigänas gretik, kels laabons pluuneplu reigis livätik, kanons palecedön mögädo, sevabo if atos binon vipabik, as reigäns, in kels cifs calik kanons pacälodön labü tiäd: lecif.

§ 9. Lecifs e cifs calik komulons Volapükanis ziläkas oksik lo cifal, e pladulons cifali lo Volapükans ziläkas oksik.

§ 10. Lecifs e cifs calik pacälodons nemediko fa cifal. Mutons dalabön diplomi profäsorana Volapüka.

§ 11. Reigän alik, in kel lecif dabinon, kanon padilön ma neod ad ziläks smalikum, in kels Volapükans pacifons fa cifs. Cifs at binons sumätöfü lecif.

§ 12. Cifs sumätöfik pacälodons fa cifal sekü mob lecifas löpü ons binölas. Mutons dalabön diplomi tidala Volapüka.

§ 13. Pos fin kaledayela cifs sedons lecife löpü ons binöle nunodis dö stad Volapüka in ziläks oksik.

§ 14. Lecifs e cifs calik sedons cifale mögiküno suno pos fin kaledayela nunodis dö stad Volapüka in ziläks oksik.

§ 15. Cifal kanom säcälön cifis e lecifis Volapükanas

1ìdo sekü beg lönik onas,

2ido sekü mob Volapükanas ziläkas onsik, e

3ido demü kods veütik.

 

III. Dil nolavik.

§ 16. Volapükan alik, kel fölon flagis e stipis pro gredät nolik alik pelonülölis, kanon dagetön sökaleodiko diplomis sököl:

I. diplom tidana Volapüka,

II. diplom tidala Volapüka,

III. diplom profäsorana Volapüka,

IV. diplom xamana Volapüka.

§ 17. Diploms in § 16 pemäniotöls teiko pagivons fa cifal.

§ 18. Lisitan diplomas nolik no kanon dagetön diplomi gredäta löpikum, büä udagetom diplomi u diplomis büikumis.

 

IV. Siks.

§ 19. (1) Cifal büdakipom oke gitäti ad sikön utanis, kels ebenodistükons okis mu patiküno tefü Volapük, medü sikots sököl:

I. Diploms sikik pro meritabs patik, sevabo:

a) stimadiplom tradutana,

ä) stimadiplom lautana,

b) stimadiplom spikädana,

c) stimadiplom musigala,

d) stimadiplom poedana,

e) stimadiplom kadämala,

f) stimadiplom senätana.

II. Cäl ad stimaliman Volapükanefa.

III. Legiv köna di ,Schleyer'.

(2) Stimadiplom kadämala kanon te padagetön fa liman süperik kadäma Volapüka, du sikots votik valik kanons padagetön fa Volapükan alik, kel ebenodistükon patiküno oki.