Volapükaklub valemik Nedänik: Kobikam 29id

Fa ‚J. G. M. Reynders.

 

Ün poszedel zädela: 1939 mäzul 11 kobikam valemik 29id päjenükon in bal lecemas ela ‚Hotel „Noord-Braband“, ‚Vredenburg: 3 in ‚Utrecht.

Ze tü düp: tel e laf presidan: ‚Dr. Arie De Jong se ‚Voorschoten ämaifükom kobikami. In glidaspikäd oka ämebom deadami tü novul 29 lätik stimalimana: söl: ‚A. A. Moll van Santbergen in ‚Scheveningen‚ kel leigo äsä söls: ‚Dr. T. C. Winkler in ‚Haarlem, ‚Dr. H. Van de Stadt in ‚Arnhem, ‚E. F. L. Haastert in ‚Rotterdam, ‚D. Feikema in ‚Velp e nog votikans anik, ädutom lü pionirs, kels esevädükoms in län obsik Volapüki, e ko at valemapükasäkädi. Fovo presidan äsagom sekretane, noe nemü ok it, abi nemü klub, dani ladöfik demü laut pämoda: „ ‚De Wereldtaal. Volapük., kel ipubon bü brefüp. Äspelom, das pämod at obinonöv vemo frutik pro klub.

Protok kobikama valemik büik päloreidon, e pos lobül kobanefa pädispenon fa presidan blöfü baibin.

Nunod fa sekretan peblinöl dö yel epasetiköl äninädon brefo sökölosi:

Limananum epluikon boso. Klub äperon sekü deadam stimalimani oka: söl: ‚A. A. Moll van Santbergen in ‚Scheveningen. Yeged pededietöl mebe oma pelasumon ini nüm balid yeloda presenöl gaseda at. Nemü klub lecifef äsedon floraglidi, ed i penedi kelieda röletanes peposbinüköl.

Kobikam valemik büik päjenükon tü 1938 mäzul 12 in ‚Zeist in el ‚Hotel Figi. Nunod kobikama at pelasumon ini nüm: 3 yeloda büik gaseda obsik, ed i ini delagaseds gretik anik läna obsik. Pö kobikam at söl: ‚N. Schravesande pädavälom as vipresidan.

Jäfidot kluba: „Vpagased pro Nedänapükans“ epubon nomöfiko aipos muls tel‚ ed eprimon tü yanul 1 lätik yelodi jölid oka. Dub pak veitik gaseda at Volapük aiplu pasevädükon. Pläso limanes Vpaklubas gased at sevabo pasedon i mödikes niverabukemes in lomän e foginän‚ delagasedes, reidalecemes notidik, studanaklubes, pöpaniveres, e ladetes difik votik. De flans ze mödiks gased ädalon getön jonülis baisenäla. In yelod epasetiköl plä konots anik i yegeds veütik anik äpubons, äsä „Daved Vpa“ e „Pük menik“ fa ‚Prof. Dr. Alb. Sleumer, „Literat vönädik Vpa“ fa ‚J. Schmidt, ‚Eugène Dubois fa ‚J. F. Van Bemmelen, „Yudakritans“ fa ‚D. J..

De Vpamäks ün yel epasetiköl samäds 1500 päselons, leigodü samäds 1800 ün 1937. Bi Vpamäks at kanons yufön vemo mödiko paki Vpa, geb onas pakomandon vemo.

Demü propagid ün laf balid ela 1938 nomöfiko telna a mul noteds dö Vp. pälasumon ini el ‚De Zeister Courant.

Ad Vpa-vödabuk Deutänapükik fa ‚Dr. Arie de Jong fövot mälid eblümikon. Ün prim yela at pö fiam: ‚Broekhoff v/h Kemink in ‚Utrecht pämod fa ‚J. G. M. Reynders Sr. pelautöl: „ ‚De Wereldtaal. Volapük. “ äpubon. Pämod at nu binon sivovik valöpo in bukated tä suäm mö flonazims Ned. 35 a samäd. Limans kluba Nedänik ägetons glato bukili at.

Tefü Vpakadäm kanos panunön, das söl: ‚J. G. M. Reynders Sr. päcälom fa cifal: ‚Prof. Dr. Alb. Sleumer ün 1938 mayul 7 as kadämal Vpa.

Diläd valemik feda Vpaklubas epluikon boso me limans anik. Lü atans dutom i söl: ‚J. Sprenger, sekretan kluba bevünetik, kel ogebom fovo pla Vp. vönädik jünu pegeböl Vpi perevidöl. As liman vemo zilik diläda valemik feda söl: ‚Johann Schmidt dalom panemön‚ kel etradutom lautotis mödik se püks Deutänik e Linglänik ini Vp. Se spod ejenöl klülädos, das Vp. aiplu vedon sevädik e süükon nitedäli.

Ma ced semanas valemapükasäkäd jinon patuvedön ainog no saidiko. Söl: ‚Aldo Lavagnini in ‚Mexico sevabo edatikom dönu valemapüki nulik, eli ‚Mondlingwo II. In periodapenäd: ‚De Kern dinädü yeged fa ‚W. A. Powell in el ‚The Contemporary Review „pük bevünetik“ nog pebesikon as säkäd no nog petuvedöl. El ‚International Auxiliary Language Association in ‚New York jäfon ainog me suk tuveda valemapükasäkäda.

Nunod äfinikon me jon ad mäzul 31 ayela, tü dät kelik yels mäldeg epasetikons‚ das pädan: ‚Johann Martin Schleyer in ‚Litzelstetten in Deutän etuvedom ön mod nidik valemapükasäkädi me Volapük oka.

Pos atos kal dö 1938 päxamon e päzepon. Kal päjöton me jötasuäm gönetik mö fl. N. 26.25.

Bevü penäds pigetöl penäd cifala: ‚Prof. D. Dr. Alb. Sleumer ädabinon, kel älüvipom kobikame benoseki.

Pö daväl limanas tel lecifefa söls: ‚Dr. Arie De Jong e ‚J. G. M. Reynders Sr., kels älaboms turni ad säcalikön‚ pädaväloms dönu me vögods valodik tefädo as presidan e sekretan-kädan.

As top kobikama valemik sököl el ‚Utrecht pälonon, ed as tim del bal ünü pasatavaken.

Pos atos äbespikoy dinis anik Vpi tefölis e modis, me kels okanoyöv reklamön ko benosek Vpi.

Pos atos presidan äfärmükom me vöds ladöfik anik kobikami ko stigädam ad kälön mögiküno demädis Vpa.

Lecifef kluba nu binädon me ‚Dr. Arie De Jong in ‚Voorschoten: presidan; ‚N. Schravesande in ‚Hilversum: vipresidan; ‚J. G. M. Reynders Sr. in ‚Den Haag: ‚Goudsbloemlaan: 120: sekrean-kädan.

 

 

Se Volapükagased pro Nedänapükans 1939, Nüm: 3, Pads: 26-28.

 

Bödaflen de ‚Joplin, ‚MO (Tats Pebalöl Nolüda-Meropa)

Fa ‚Prof. Dr. Albert Sleumer, ‚Studiendirektor p.d., ‚Bad Godesberg (Deutän).

 

Ün bäldot lifayelas ze teldeg el ‚Guy Greenwell' sevom ad jänälön lemödotis lilanas‚ ven medü radion lomazifa okik spikom lü balionats menas. Pö spikäds oka säkom büiküno, dö böds kinik omutom spikön, e lönülom täno ma vip pluamanuma. E va tefos blägakapaparudi (‚parus atricapillus') u gokahauki (‚astur palumbarius'), boturi (‚ardea stellaris') u jipülavulturi (‚gypaëtus barbatus') el ‚Guy' spikom mu nolaviko dö bödem lölik. Givom teiko memo nünis kuratikün dö köl, pats, nulüdot e kösömots, ed i dö bisars valik lifamodas onas‚ äsä te nataflen laidälik, kel vestigom verati lölik tefü bödalif, fägom ad givön.

Ya go suvo ele ‚Guy' päbegos ad bitön as tidan fo tänadöps gretik boskotanas e tevanas, ed atos ya äjenon sis yels mödik. Too leno binom milagacil, soäsä atos kazeto palesagon in gaseds Lamerikänik. Ab sis cilüpayels oka ejäfom tio nenropiko me stud vola plümilabik. Fat omik dalabom bödibridöpi lardik. El ‚Guy' ädaglofom zänodü goks, döks, gans e dinduns. Pälanälükom ai dub magod u buk alik, kel änünon ome dö böds. Pals omik ägebidükons ome gasedis e periodapenädis gudikünis dö bödav. Mem omik äjinon fägik ad sumodön ko füm tuvemik vödi alik päreidöl. Lü atos nog tumats e milats düpas äkömons, dü kels älelogom nati. Ai dönu äziglibom da fot e fel ad seivön kuratiko flenis plümilabik oka. Dü tims düpalunik äseatom ids bim alseimik ad lükön nästibumi, kaniti u komipi onas. Igo böds plafikün ävedons konfidiks kol om. Ven ün del seimik fat äkeblinom ko ok hipuli zülyelik lü kobikam gretik nataflenas‚ el ‚Guy' i pävüdom ad spikön lü sedäbs 1600 ela ‚Isaac-Walton-Liga'. Ädunom atosi ön mod so vemo staböfik e jänälöl, das valans ästunons. De timül et (1927) ämutom jenükön in dils valik topäda nilikum lomäna okik tumatis spikädas dö böds pälöföl.

Neai pals emütons hipuli ad studön; estöpädons güo go suvo tuzili oma. Sosus periodapenäds nulik ilükömons, ai dönu meib fata u mota ätonon: „O ‚Guy'! kvänolöd liti, e gololöd lü bed!“ Bi hipul nolom notetis mögik valik dö böds plu 750‚ fägom ad begespikön dötumis 98 säkas valik, kels pälonülons fa lilans noliälik oma. No selediko nem omik komädon as spikädan näi uts nolavanas plakilabikum su vüdakads klubas nolavik.

Te löf vemöfik ela ‚Guy' kol nat, kel tenikon i kol fits, salmuns, bufods, sneks... kelas samädis liföl mö tumats anik käledom, evedükon omi nolani ä konani somiki. Reto kondötom, äsä hiyunan saunik alik mö yels teldeg. Binom komunan gudik, kel ye labom dagebi vödastoka vemo gretikuma, ka bäldavik omik binon go veütik. I palobom demü atos - kelos padigidon in sogods Lamerikänik as tug patik - das süperiko bemaston lotografi brulik Linglänapüka. Reto löfom svimi, glöpädi, nüdafutogoli e kompenom pö mäts bäldotakompenanas oka.

 

 

Se Volapükagased pro Nedänapükans 1939, Nüm: 3, Pads: 28-29.