Dalebüd Cifala de 1949, Gustul 16, Nüm: 3
Demölo § 9 statudas kadäma Volapüka, e
vätälölo, das söl: ‚Johann Schmidt, musigal ä profäsoran Volapüka, eduinom lepromi pö § 12 statudas peflagöli, e fovo, das flags valik in nomem konömik kadäma Volapüka tefü cäl kadämana Volapüka pelonöls pefölons, pö kelos steifädan edagetom vögodanumi ma § 25(2) statudas peflagöli,
cälob söli: ‚Johann Schmidt, pemotöli in ‚Weißkirchen am Taunus (Deutän), tü 1895 setul 28 e lödöli us, ‚Bahnhofstraße: 20,
as kadäman Volapüka (126).
‚Gams (Jveizän), 1949 gustul 16.
Cifal Volapükanefa ä dilekan kadäma Volapüka:
JAKOB SPRENGER
Se Volapükagased pro Nedänapükans 1948, Nüm: 5, Pad: 17.
Dalebüd Cifala de 1949, Tobul 14, Nüm: 4
Vätälölo, das söl: ‚Filippus Johann Krüger, pükitidan, ma nunod söla: xaman: ‚Dr. Arie De Jong ebenoduinom xami ad daget dinita tidana Volapüka,
cälob söli: ‚Filippus Johann Krüger, pemotöli in ‚Odoorn (Nedän) tü 1911 tobul 23 e lödöli in ‚Amsterdam, W. (Nedän), ‚Reinier Claeszenstraat: 49,
as tidan Volapüka (1821).
Xaman Volapüka:
ARIE DE JONG
‚Gams (Jveizän), 1949 mayul 1.
Cifal Volapükanefa:
JAKOB SPRENGER
Se Volapükagased pro Nedänapükans 1949, Nüm: 6, Pad: 21.
Lojadabiliet
Fa ‚Paul Roos
Domadünan äletom lädi kulivik yunik ini vobacem, ed ämogolom poso ko vöds: „Söl: ‚Jenkins okömom onu lä ol“. Läd äzilogof nuläliko in cem, ab nos ädabinon, kel äjonon, das in cem at balan manas sagatikün Yuropa ävobom. Len völs gavots Linglänik vönädik älagons, su tab buks e gaseds äseatons pemiko in brul pänabajönik. Tü timül at yan ämaifikon e ‚Joe Jenkins ästanom fo jivisitan.
„Stunob, o läd! das ya äsevol, das etävob lü ‚London.“
„Älilob fädo osi äsoaro,“ läd ägespikof. „Övegol de ‚Paris lü ‚London, in el ‚foyer ela ‚St. James-theatre äspikoy dö atos. Äfredob, ven älilob osi, o söl: ‚Jenkins! atosi kanob sagön ole! Labob sevabo dini vemo veütiki, keli mutob bespikön ko ol.“
„Ven vom yunik plitülik ä liegik se el ‚society di ‚London visitof obi göda ya tü düp: degbal, tän atos muton vo labön kodi veütik!“ täktifan äsagom smililölo.
„Jenöfö!“ ägespikof. „Himatan obik igo no sevom, das binob lä ol, ed ob it äsevob bü düps anik i no nog atosi. Tik äsüikon änu pö ob. Ab süadob, das himatan obik olobülom visiti at, pato bi om labom dämi gretikün sekü midun.“
Täktifan äseidom oki. „Konolös nu seimna obe veitöfiko utosi, kelos ejenon!“
„Cedob, das nem, keli ereidol su visitakad obik, no binon nesevädik pro ol“ jivisitan äprimof.
„Klülo no!“ täktifan äsiom: „In ‚Paris ereidob i nomiko delagasedis di ‚London, ed in ons elogob klüliko, das daut ela ‚Honorable Jim Sutherland ematikof ko bijutel sevädik: ‚James Wimbledon“.
„Verätö! Mat at pävipon fa pals de flans bofik. Binos niludo sevädik pö ol, das fat obik binom monemik. Ed i söl: ‚Wimbledon, as geran soelik bijutabüsida: ‚Wimbledon Bros, dalom flagodön kalieti: liegik.“
„Binom-li fiaman soelik?“
„Si! fat omik edeadom bü yels anik, e ‚James estäänükom veütiko büsidi. Spekuls omik in ‚Amsterdam e ‚Paris ebinons dü tim semik yegäd spikotas valik. Äkanob kludo labön fümi, das söl: ‚Wimbledon no ämatikom ko ob demü mon obik; atos binon bos, keli obs: dauts fatas liegik ai mutobs demön. Klüliko jigamagivot obik no binon mikömik; pö tedan, äsä binom, mon ebo ai fruton tü del seimik.“
„Ekeblinol-li monamödoti gretik ini mat? o läd: ‚Wimbledon!“ el ‚Jenkins äsäkom zogiko?
„Pounis teldeglulmil.“
„Ö! balionat lafik jilidas! Mödot vo no neplitik!“ täktifan äsagom.
„Äsä niludo omemol mated obsik päzelon me zäl gretik in lotidöp: ‚Claridge. Pos at ädetävobs lü Kanariyuäns, ko desin ad gekömön ün mayul deg. Vüo fat obik iremom pro obs domi in ‚Kesington Square, ed ibüedom blimön oni. Mot obik ikälälof lasumi dünanefa; val öblümon tü del degid mayual.“
„Ab“, ‚Jenkins älogedöl kaledi ävüspikom spikami ofik, „tü timül at binos pas del mälid mayula!“
„Verätö!“ läd yunik äsiof smilölo. „Okonob ole utosi, kelos binon kod atosa. Himatan obik no äkanom sufätön lunüpikumo nosduni in ‚Teneriffe. Kösömom ad vobön deliko de düp zülid jü düp lulid, ed us no äkanom dunön votikosi, äsä svimön, sailön e seatön in solam. Ün prim mayula äsagom, das no äsufätom lunüpikumo osi, e kludo äsludobs ad getävön bü tim pirajanöl lü ‚London. Ädesinobs ad dabinön nesevädo in ‚London, go romato. Ölödobs dü dels anik in dom nulik obas in ‚Kesington Square, nes ek ösevon bosi atosa! Atos i no pänunon pales obik; te sevädans anik ela ‚James äsevoms osi; ämutom sevabo tivön ko oms tefü büsidadins.“
„E dünanef-li?“ täktifan äsäkom.
„I dünanef no pinunedon,“ läd: ‚Wimbledon ägespikof smilölo. „Äcedobs osi droliki, das obs it ödunobs dü dels balid konömi; ökanobs ga fidön in staudöp! Dü dels lätik ob it ekvisinob; atosi elärnob in ‚Lausanne! E kanob sagön ole, das äbinos süperik!“
„Dö atos no dötob, o läd!... Dalob-li nu säkön ole...“
„Sunädö! o söl: ‚Jenkins!“ No badocedolös osi obe, das binob boso prolidik pö nüdugot obik ab atos zesüdon pro suem gudik dina, soäsä onu oküpol. Äsoaro äseadobs tü düp: vel ad fidedön, ven klokül pätoenon. Äcedobs atosi küpädiki, bi nek äsevon komi obas. Himatan obik ägolom ad maifükön; äbinos penediblinan ko spidapened, ed in pened at biliet äbinon pro lojad in el ‚St. James-theatre. Lä at penedil äibnon ko vöds: „Rätolös seimna, kin seidon-li bilieti at?“ Benö! no emeditobs lunüpo atosi.
Ba äkömon de söl: ‚Atkinson, kel ejonülom obes dü matirajan obsik pluna plütotis smalik somik, ba i mögos, das pesedon fa jiflen, keli äkolkömob fädo äzedelo in ‚Oxfordstreet. Alo biliet äfruton ebo obis, ed egebädobs sunädo oni. Telefono äbüedobs kömön toodi ed ävegobs lü teatöp. Nu mutol küpälön gudiko. Ven ägekömobs tü düp: degbal e laf dönu lomio, no äfägobs ad maifükön yani. Pos töbid mödik äplöpos, e bi äcedobs atosi nekösömiki, ägolobs sunädo löpio lü vobacem himatana obik. Yan ämaifon, du äsevob fümiko, das ifärmükob oni, ven äsegolobs. Änükurbob in cem liti, e din balid, keli älogob, äbinon monaramar pimaibreiköl! Yan pimaifükon mekädo, bijuts obik e mon valik ämoons! Dil gretikün monema himatana obik petifon!“
‚Jenkins äfronükom flomi okik, ed äsäkom: „Kis binon-li kod, das himatan olik älabom lomo moni kädöfik so mödiki?“
„Himatan obik ämutom dunön ünü brefüp remis gretik, iramenom kludo mödoti ze gretiki de bank, pato i, bi binos adelo ‚bankholiday.“
„Vö! lojadabiliet et eblinon sio fruti givane giviälik!“ täktifan äküpetom ko smilil.
„Enunedobs sunädo poldi,“ läd: ‚Wimbledon äfovof. „Edunoy vestigi büfik, ed obs ölelilobs sio fovo tefü din. Suemol, das äneito no eslipobs mödiko, o söl: ‚Jenkins! Agödo süpiko tikod äsüikon pö ob, das ol bo okanolöv yufön obis. Äsumob toodi, ed äkömob mögiküno spido isio.“
„Obinos fred pro ob, ad bitön pro ol in din at, o läd! Labol-li bo niludi, kin kanonöv binön kodädan atosa?“
Vom yunik ätikof dü timül, ed äsagof täno: „Nö! o söl: ‚Jenkins! vero no.“
„Kis äbinon-li nog plu in monaramar plä mon e bijuts?“
„Lepenäds e buks büsidi teföls.“
„Eleadoy-li seatön atis?“
„Plä mon e bijuts nos defon.“
„Mens liomödotik sevons-li, das binol in ‚London?“
„Lul u mäl.“
‚Jenkins älogom su pokaglok okik. „Kiöpo söl: ‚Wimbledon binom-li tü timül at?“
„In bür okik.“
„Kitimo kömom-li lomio?“
„Tü düp mälid.“
„Täno kanol spetön, das obinob tü düp lulid lä ol, e givolös täno obe lisedi pösodas, kels äsevons, das igekömol ini ‚London.“
Ven ‚Joe Jenkin ätoenom kloküli len dom in ‚Kesington Square, läd: ‚Wimbledon it ämaifükof yani.
„Bos nog ejenon-li fovo?“ täktifan äsäkom.
„Nos, o söl: ‚Jenkins!“
„Täno viloböv nu vilöfo logedön seimna monaramari.“ Pos minuts anik ‚Jenkins älogedom seiliko ramari pemaibreiköl. „Labol-li kiki?“ äsäkom. „Si“, ägespikof, „ati ekipobs ai lä obs.“
Küpälo täktifan älogedom ninädi monaramara. „Dodol-li, das nülogob bukis?“ :as:ajin fubi,
Älülogof säkölo omi. „Mögos, das okanob tuvön jonädi seimik se buks at“ äfovom. „No tupobös vüo oli in jäfots komunik olik! o läd! At binon, vo-li, luveratiko bürod himatana olik?“
Änutof siölo.
„Labol-li kiki ata? Ba okanob tuvön in at nog retodi seimik.“
„No kredob, das nedol sukön us, o söl: ‚Jenkins!“ läd: ‚Wimbledon äsagof smilölol. „In bürod te penäds nenvöladik dabinons. Fe no labob kiki ata, oni himatan obik labom. Vilol-li nu dälön obe nekomi dü düp lafik?“
Boso pos düp: mäl söl: ‚Wimbledon äkömom lomio. No äbinom soelik, poldacalal: ‚Wood ela ‚Scotland Yard, kel ya ivisitom omi in bür omik, äkekömom ko om, ad vestigön nogna pösodiko topi miduna.
„Eseividol-li bilieti et lä sevädans olik?“ poldacalal äsäkom, du älöpiogoloms ve tridem.
„Esäkob osi ele ‚Atkinson ed ele ‚Dawson: büsidaflen votik, ab bofikans äsevoms nosi dö din. Fe, flens obik kanoms töbo paminiludön tefü din at; oms vo-li ga fümo no önübreikoms lä ob?“
„Ga fümo binos ek, kel sevom, das binol in ‚London,“ poldacalal äbleibom lesagön. „Binos-li in cem at?... He! ekö! us sevädan dabinom! Benö! o söl: ‚Jenkins! lio stadol-li?“ Äpedom ladöfiko nami täktifana famik. „Dönu-li egekömol ini Linglän? Ilelilob ya bosi atosa, e sunädo-li dönu voböl?... Ibinos cedü ob no zesüdik, ad kompenükön in din at söli: ‚Jenkins,“ äsagom äflekölo oki lü ‚Wimbledon: „Cedob, das i om, leigoäsä obs, no osevom säditreti se jenet klänöfik at!“
„Ob no evokob söli: ‚Jenkins,“ ‚Wimbledon ägespikom koldäliko.
„Atosi ob edunob,“ läd: ‚Wimbledon äsagof, kel ebo äninikof. „Spelob, das lobülol osi, o ‚James!“
„Klüliko, o löfäb!“ ‚Wimbledon äglidom zadiko jimatani okik. „Dredob te, das söl: ‚Jenkins no okanom frutön obis mödiko. Älilol utosi, kelosi poldacalal: ‚Wood, kel labom ga plaki zesüdik, esagom änu.“
„Verätö!“ poldacalal älobülom omi. „Igo söl: ‚Jenkins no okanom kludön mödikosi se atos. Monaramar pemaibreiköl, e fovo jonäd no bal dabinon. Nos, kel gevon jonädi in lüäl semik!“
„Benö!“ ‚Jenkins äsagom ko smilil takedik, „bosi monaramar ga nunon obe!“
‚Wood älülogom no suemölo täktifani.
„Elogol-li jenöfiko nosi patik len ramar et? o ‚Wood!“
Poldacalal älemufükom noölo kapi.
„Logedolös seimna gudiko yani!“
‚Wood ävestigom yani, ab äjinom logön nosi patik len on.
„Nö! vilob sagön, das mutol logön oni ninao!“ ‚Jenkins äsagom.
‚Wood e ‚Wimbledon älogedoms nu ninaflani yana, i läd: „Wimbledon“ inilikof.
„Nu nog patikos nonik edrefon-li küpäli olik?“
Ab e ‚Wood e ‚Wimbledon äkanoms tüvön nosi patik.
„Benö! elogols fümo, das yan pemaisteigon,“ täktifan äfövom sagi okik.
„Klüliko, atosi elogob.“ ‚Wood äsagom ko smilil keliedik. „Lök pebevobon me stegülaflam, e poso etölatoy fovo yani me cid!“
„Ab utos, kelosi klülabiko no eküpol,“ täktifan äfovom, „binon, das yan no pemaicidon plödao, ab ninao!“ Poldacalal älülulogom täktifani ko logs gretik.
„Klu...“
„Klu,“ ‚Jenkins ävüspikom ome sagi, „klu ek, kel älabom kiki, e kel kludo äfägom ad maifükön monaramari nen geb mekäda, etölatom yani me cid, posä imaifükom büiko oni!“
„Ab sekü kod kinik-li?“ poldacalal ävokädom stuniko.
„Sekü kod kinik-li? Benö! ad koedön jinön, das nübreik ejenon-la!“
„E labol-li niludi seimik, kim enoganükom nübreiki pemiagöl?“ ‚Wimbledon äsäkom raudiko.
Dü timül täktifan älülogom dudraniko bijuteli, täno äsagom takediko: „Ol, o söl: ‚Wimbledon!“
Täno bos äjenon, keli nek ibetikom. Me bun balik bal ‚Wimbledon äbinom lä yan, ämaitirom oni, äfäitirom oni po ok, ed ätülom kiki in lök. Älieloy doniorönön omi ve tridem, ed ün timül fovik domayan äfäijutedon. Atos valik ijenon so lekläravifo, das nek ikanon stöpädön omi.
„Ispetob atosi,“ ‚Jenkins älülogom keliedo lädi: ‚Wimbledon. „Ispetob, das ‚Wimbledon övälom vegi at! Pidob osi, o läd! Cedob osi yamiki, das mutob konön ole verati lügik at, ab binos gudikum ad lelilön verati lügik, kas mutön lifön pö kodüls jönik.“
Läd: ‚Wimbledon idofalof dädäliko sui stul, ko nams fo logs okik.
„Äbedotob sunädo dini,“ täktifan äfovom. „Sosus äkonol dö detäv himatana olik se ‚Teneriffe, äsenälob, das in din at bos no äbinon komunik. No äkanob fomälön, das himatan olik ävilom gekömön ini dom nen dünanef, leteiko demü yof okik. Mögos, das vom yunik, äsä ol, cedof atosi romatiki, ab man-la! No-nuned dünanefa äjinon binon[1] lü ob mu miniludik.
Sunädo tikod äsüikon pö ob, das himatan olik enoganükom desino atosi. Ven kludo älogob monaramari ninao pemaibreiköli, äsuemob, das kekokädan himatana olik fümiko ibejäfom dini. Fümi ädagetob, ven ätuvob ati,“ äkipom in nam okik bilieti yelovik. „Vegamabilieti at lü Lamerikän ätuvob in bürod himatana olik, tefü kel idälob obe ad maibreikön e vestigön oni. Beliet[2] binon pro el ‚Acquitania, kel odetävon ogödo de ‚Southampton.“
Läd ‚Wimbledon älöükof kapi ed älogedof da drens okik täktifani. „Ab kikodo-li... kikodo-li?“ äplonof.
„Atosi okonob ole, o läd! Himatan olik ädesinom ad fugön ko matagivot olik lü Lamerikän. Pö vestig vifilik bukas omik edagetob fümi, das himatan olik edunom dü yels lätik spekulis lienetik. Büsid äprimikon ad bankrutikön; sosus bos atosa osevädikonöv, kreditans oprimonsöv juetdi. Ävilom büön tefü ons, ed äsludom ad moikön... ko mon olik!“
„Ab mon ga äduton lü om!“ vom neläbik ägesagof. „Sekü kod kinik nu süfülam nübreika äzesüdon-li?“
„I atosi kanob plänön ole. If fug omik, ko mon olik, osevädikonöv, ed elans valik di ‚City usevonsöv atosi, tän himatan olik ibo olabomöv no plu timüli takedik bal! Luveratiko orivomöv igo neföro Lamerikäni, radion omögükonöv fanäbükami oma, büä okanomöv säboidön oki. Nö! äbinos sefikum pro om, ad süükön jini, das mon valik okik pitifon; luveratiko ugetolöv de om penedi fäküköl, in kel upenomöv, das perot ekodon, das äprimikom ad päridikön, e das sekü kod at avilom[3] deidön oki. Du obelügolöv deadi omik, om onestönomöv in Lamerikän me mon olik!“
„Naudodö!“ vom yunik äseifof.
„No obinos fikulik pro om ad dagetön de nafamakompenät bilieti nulik.“ ‚Jenkins äfinükom sagi okik. „Nedom te konön, das eperom oni. If vipol osi, okanobs fanäbükön himatani olik ko mon, tü timül, das boidom oki in ‚Southampton; poldacalal: ‚Wood ovilom vo komitön oke atosi. Pidob, das din at efinikon so neplitiko pro ol. Dälol-li obe, das nu mogolob?“
(Se el ‚Het Vaderland.)
NOETS. (Vükifon)
· Bükapök; pla: binön.
· · Bükapök; pla: biliet.
- · Bükapök; pla: ävilom.
Se Volapükagased pro Nedänapükans 1950, Nüm: 1, Pads: 2-4, Nüm: 2, Pads: 5-8.
Fab Suomiyänik
Seimna frogs tel ädabions, kels pifidons fa stork. Nu äbinons in stomäg böda, ed äbespikons desinis fütürik oksik, kels klüliko ämutons pavotükön bosilo.
„Benö!“ bal onas äsagon zilogölo: „Alo is binos plitiko vamik, e nulüdot i dabinon is.“
Ad kelos votik ägespikon: „Vamik is binos jenöfiko, ab kitopo nulüdot binon-li?“
„Kio binol stupik!“ votik ädönufövon: „Nulüdot ga obs it binobs!“
Se Volapükagased pro Nedänapükans 1950, Nüm: 2, Pad: 8.
Coged di ‚Wien
In ‚Wien konoy cogi bolitik sököl: Timü konfer in ‚Moskva, el ‚Marshall älofom zigarülis se bokod largentik labü nüpenäd sököl: „Lü kevoban digik obik. Presidal: ‚Truman.“ Brefüpo pos atos el ‚Bevin äbläfom atosi me lof se zigarüliär, ini kel pigavos: „As dan ministerane dinädas foginänik oka demü vobod nendemädik omik. Ministeran-Presidan: ‚Attlee.“ El ‚Molotov, kel no ävilom pödablibön, fino äzüramenom bokodi goldik labü diamains, in kel äkanoy reidön: „Lü el ‚Schwarzenberg gudikün okik. Lampör: ‚Franz Joseph.“
Se Volapükagased pro Nedänapükans 1957, Nüm: 1, Pad: 3.
‚Pontius Pilatus
Fa ‚Daan Van der Zee. (Se el ‚De Nieuwe Courant.)
Balan pösodas veütikün in lügadramat de ‚Golgotha el ‚Pontius Pilatus, se tribüt Romänik sevädik elas ‚Pontii, äbinom. Dub bitikam oka evedükom negöno nemi okik nedeadöfiki, ibä äblinom Kristusi leni krod, äsufükom omi slafanadeade, äsä Romänans äkösömons ad nemön krodami, ed älöpükom me atos no sevölo rabinami de ‚Nazareth ad nivod martüranas, sekü kelos balionans in fäkam relöfik ölelogons mani Godik asä pioniri lü reigän süla.
O krod! In topäds Romäna milats mödik krodas pelöbumons, i nilü ‚Hierusalem, e pro jenavans Romänik igo krod Yesusa peperon bevü milats et. Ab krod, kel äbinon sek cödeta de ‚Pilatus, evedon sümbol voik komotanefas kritik valik in vol. Ed in penäds paostolik komotanefas et nem ela ‚Pontius Pilatus ämoikon pro tims valik. Te dub jenöfot at pösod omik digädon i nog ün tim obsik küpäli. E to notets jenavik nebundanik saidikos dö pösod at sevädon ad kaladön omi in bepenot skätik brefik.
Län: Yudän äbinon sis yel: 6 timeda obsik pos xil de ‚Archelaus: son ela ‚Herodes lü Galiyän, bal provinas lampörik Romäna. Monigetots se provins somik äkömons ini käd lampörik, e sekü kod at lampör äcälodom pro provin somik pladulani lönik labü titul: prokurator. Ün yel: 26 ‚Pontius Pilatus se ‚Roma päcälom as prokurator in Yudän, kö öfövom eli ‚Valerius Gratus, ed öcalom dü yels deg negönü yudans.
Prokurators somik päcälodoms kösömiko se lesiörs yunik di ‚Roma, kels päpatöfoms as „flens lampöra“: sot roda ma suemods obsik. Lesiörs at no äbinoms militans. E kludo ‚Pilatus, kel äsüikom se sogod at, mu pato no mutom palelogön as militan, ifi älabom dagebio kohortis anik in letopät okik: ‚Caesarea. Cäl ela ‚Pilatus äjenon ün yel: 26, ün yel ot, kü lampör: ‚Tiberius äsoalükom oki sui ‚Capri, ed ägividom reigi reigäna löliko lebüdane legarda okik: ‚Sejanus. Mög kludo binon gretik, das ‚Sejanus ecälodom fovani ela ‚Valerius Gratus, das om kludo ecälom eli ‚Pilatus. E bi dub ‚Philo esevädikos, das ‚Sejanus äbinom neflen yudanas, dub atos leigüpiko bitikam tayudik ela ‚Pilatus paplänon. Bitikam at päprimon ya sunädo pos lüköm ela ‚Pilatus ini ‚Caesarea.
Büans de ‚Pilatus iträitoms ai spalo yudanis dinü neklien onsik ad logön magodis. Trups Romänik äsäplifons neai in ‚Hierusalem stänis labü fremül, kel äninädon magodi lampöra: ‚Tiberius. Ab dunot balid ela ‚Pilatus äbinon ad büedön löpladön kläno ün neit sui möns ela ‚Hierusalem stänis pisäpliföl, kelos klüliko ämuton süükön mimeugi valemik. Sekü löpladam neitik at mutoy kludön noe desini badöfik, abi leigüpo, das ‚Pilatus äjonom me at buami pro prodäts teatik.
Depütäbef gretik se vol yudanas ätevon lü ‚Caesarea ad begön moükami stänas skänik. Ab ‚Pilatus ärefudom. Tü del pos del depütäbef ädajonon oki dönu, balposvotiko dü dels lul. E tü del lätik ‚Pilatus äbüedom kobikön pladulanis yudik ini mätöp, e ven älaidäloms us pö flags oksik, äleadom sübunön soldatis piklänedöl ko glävs pisäveadöl. Dönu: prodät teatik. Yudans ädaloms välön, ud ad sufälön stänis, ud ad padeidön. Gespik omas äbinon jästäd kienöl, in kel älofoms särvigis oksik pro flap deidöl. E täno ‚Pilatus no äkünom ad dadunön. Yudans igaenoms, e stäns pämoükons de möns di ‚Hierusalem.
Ya ün yel fovik konflit nulik ädabinon. ‚Pilatus ävilom koedÖn meikön pro el ‚Hierusalem vatatidefik kvaaduki, e dagebön pro atos temadivi, kel ma suem yudik pidedieton Gode Yisraeläna. Dönu pöp ärunädon kobio, ab nu ‚Pilatus idatikom prodäti teatik votik. Bevü pöp ikoedom seaikön soldatis pimaskaröl ko klöbs ninü mäneds omsik. E sekü vineg me nam omik soldats at äflapoms ko zil lienetik detiko e nedetiko. Ab pö naed at kvaaduk pälemekon.
Konflit kilid de ‚Pilatus ko yudans päblinon ome dub jenet tefü Yesus: saludipredan se ‚Nazareth, kel picödetom deadio fa sanhedrin yudik kodedü blasfäm. Pro ledun deadapönoda ye zep ela ‚Pilatus päneodon. E nu ‚Pilatus äbitikom in dunod telik, ed as cödal, ed as prokurator. As cödal ebinom verätik. Posä ililom kusadi, älibocödetom omi. Ab sekü drän ela ‚Caiphas ed omikanas, kels bolitiko ökanomsöv vedön riskädiks pro om, älovegivom Yesusi neflenes oma, ed älavom namis okik in vatabasin, ad stetön oki ma ced okik nedöbiki tefü pijenölos. Prodät teatik nulik! Binälo äjonom oki alna asä fibälani, kel no äplobom ta lüäl vudik.
Ün yel bal pos lügadramat de ‚Golgotha, kel ejenon niludiko ün yel: 30, ‚Pilatus ästeifülom ad plaädön stänajenoti piperöl, pö naed at dub löpladam stimü ‚Tiberius platädas pesaludüköl nen magod, ab te ko mäniot nema lampöra. Klülos, das yudans no äleadoms cütidön okis: äflekoms okis nu pösodiko lü ‚Tiberius, kel äbüdom moükami platädas.
Lügadramat de ‚Tirathana äbinon lätik, keli ‚Pilatus ekodedom in dunod prokuratora. Su bel saludik Samaritänanas: ‚Gerazim lekredans ikobikons ini vilag: ‚Tirathana, e bevü mens at ‚Pilatus äkoedom dunön saseni vemik, niludo bi äcedom, das kobikam älabon diseinis volutik. Büdü legätan in Süriyän: ‚Vitellius nu päsedom gidükamio lü ‚Roma, kö pas älükömom, ven lampör: ‚Tiberius ideadom, e pifövom fa ‚Caligula.
Fät fovikum ela ‚Pilatus kanon te pagetuvön in konäds. Ab mu niludo lampör: ‚Caligula exilom omi lü ‚Vienna in Galiyän, e ‚Pilatus esasenom us oki.
Saidos ad mäniotön nog, vio se notets valik at klülädos, das prokurator: ‚Pilatus ebinom komulan Romänik vemo zänedöfik, suföföl ko döfáds valik pösodas somik (demüt, dadränälam, sasen), e das äbinom tu fibälik ad koedön senälön yudanis nämäti okik. Te sekü mijenot ereafom bevü pösods jenavik, no sekü meritab oka. Ed if no ebinomöv kompenan pö lügadramat de ‚Golgotha, tän nenvöladan at no edigädomöv küpäli anik.
Se Volapükagased pro Nedänapükans 1950, Nüm: 3, Pads: 9-11.
Reg naütom oki
Fa ‚J.C.L.B.P. (Se el ‚De Nieuwe Courant.)
Reg, kel äreigom bü tumyels in Lägüptän, äseadom in tronalecem okik.
Po om, e detü e nedetü om, jislafans äkienofs, kels älüfänofs ome me fäns binü pafaplüms koldüli. Reg äseifom nekoteniko, iba[1] änaütom oki.
Ko namajäst trögik ävinegom domali, kel pänemom ‚Amenaphes, e kel äbinom fägik ad datikön säjäfälükamis pro reg.
Ko spid gravik domal älükömom, ed äbiegom fo plin, jüs flom omik ärivon gluni.
„O ‚Amenaphes!“ reg äspikom, „naütob obi.“
„Lilolsöd!“ domal äplonom, „reg gretik naütom oki, lefogs caradas dagükons soli, e vats ela ‚Nile sägikons.“
„O ‚Amenaphes“ reg ädönusagom, „naütob obi. Sagolöd obe utosi, keli mutob dunön ad moükön naüti!“
„Oplitos-li reigani sublimik ad logön vomis yunik, kelis ekoedob kömön? Binofs jipuls vemo jöniks, kelis dünans sona de ‚Isis eväloms se pöp Lägüptäna. Fümo logam vomülas nobik kiltum at opliton plini nämädik.“
„Spikol nesiämi, o ‚Amenaphes!“ reg äsagom koldäliko, „obleiboböv naütön obi. Ai evalöl vomis jönik pro ob. Skänofs obi. Ba oyofoböv obi, if ologoböv vomi nejönik, ab jiatani elogob neföro. Si! ga, memob, das seimna elogob vomi nejönik. Kredob, das äbinof jimatan olik, o ‚Amenaphes!“
„Vöds rega binons so benosmeliks de sap, äsä lotudaflors,“ domal ägespikom dalestümiko, „jenöfö! jimatan obik binof naudodiko nejönik. Obüedob-li dugön ofi isio, dat naüt plina godik omoikonös?“
„Ag!“ reg äsagom nefäköfiko, „no kredob, das atos ofruton. Betikolöd bosi votik, o ‚Amenaphes! dat no plu naütob obi!“
„Obüedob-li dugön isio krigafanäbis, ad leadön deidön onis lo logs sona ela ‚Isis? Fanäbs vemo jöniks dabinons se Yisraelän, e fanäbs blägik se läns sulüdik, e fanäbs vemo vietiks, kelis milits rega eblinons de nisuls in mel, kels topons in nolüd.“
„Deid naüton obi, o ‚Amenaphes! Atos no ofrutonöv. Betikolöd bosi votik!“
„Soldats rega edugoms menis bisarik lü cifazif. Menis vemo smalikis, no geilikumis ka gretot piedas kil, kels lödons fagiko in län sulüdik. Binonsmens küpädik, e fümo reg oplidom ad logön onis.“
Ab reg äbleibom logetön föfio mivimiko, ed ‚Amenaphes äfovom: „Obüedob-li föfovegön yagavabis rega, dat oyagom tigridis in sulüd, e leonis in vesüd, e gasalis in lofüd?“
„Yag naüton obi, o ‚Amenaphes! e leons vedons drediks.“
„Leons dremikons sekü dredäl, ven loegons pubön yagavabis reigana gretik.“
„Reg vipom-li ad logön piramidi, kel pabumon pro om? Lägüptänans degmil e slafans foginänik tummil jäfoms me bum piramida reigana nämädik.“
„Lägüptänans naütoms obi, o ‚Amenaphes! e slafans foginänik leigo. Sagolöd obe utosi, keli mutob dunön ad no naütön plu obi!“
‚Amenaphes äletikom seilölo, ven reg süpiko ävokädom frediko:
„O! nu sevob utosi, kelosi mutob dunön. No onaütob plu obi.“
„Sap rega binon gretik, ä svidiko smoköl, äsä boväl filöl. Son de ‚Isis büdomös!“
„O ‚Amenaphes!“ reg äsagom lezäliko, „ospatob.“
Lejek älogädon su logod domala, e, biegölo, jüs flom omik äkontagon gluni, äspikom:
„Zun rega luslugonös obi! ab dredob, das atos no obinon mögik. Dünasts degfol büröletanas reigana nämädik eleadons vabön okis in krigavabs binü zeadaboad e skins toras, ven ägolons ad krigön, ed in yagavabs binü zeadaboad ko purpur pikölöl, ven äyagons leonis in vesüd, e tigridis in sulüd. Ed eleadons polön okis in polastuls binü bäad e gold, ven ädajonons okis lo pöp Lägüptäna.“
„Seilolöd! o ‚Amenaphes!“ reg äbüdom, „dünasts degfol büröletanas obik no ereigons-li Lägüptäni, e tribütafat dafamüla obik no pemotom-li se jigod: ‚Isis? Ed ol, kis ol binol-li? o ‚Amenaphes! Tailavum pülik.“
„Reg gretik espikom,“ ‚Amenaphes äsagom sufodiko, „slafan mükik omik nüsugom vödis rega, äsä biens nüsugons mieli svidik. Reigan sublimik, reg nämädik, son ela ‚Isis golom ad spatön!“
E du reg löädom benovimiko de tron okik, e, pesököl fa domal e jislafans fänöl, äsespatom ko steps gravik se tronalecem, se spadüls valik ledoma ätonos lezäliko:
„Reigan sublimik, reg nämädik, son ela ‚Isis golom ad spatön!“
NOETS. (Vükifonät)
- Bükapök; pla: ibä.
Se Volapükagased pro Nedänapükans 1950, Nüm: 3, Pads: 11-12, Nüm: 4, Pads: 17-18.