Volapükaklub valemik Nedänik: Kobikam 32id

Lautan no pämänioton.

Kobikam 32id Volapükakluba valemik Nedänik päjenükon in ‚Leiden ün poszedel zádela: novul 24 yela: 1951.

Presidan: ‚Dr. Arie De Jong ämaifükom kobikami ko benokömaspikäd smalik in Volapük, päsököl dub tradutod ona in Nedänapük. Pos atos protok kobikama büik päloreidon, pälobülon e pädispenon fa presidan.

Fovo sekretan: söl: ‚J. G. M. Reynders Sr. älüblinom nunodi dö degyel epasetiköl. Nunod at äninädon brefiko sökölosi.

Kobikam büik päjenükon in ‚Utrecht tü mäzul 22 yela: 1941 pö dinäds vemo patiks, bi sekü tatak Deutänanas ün 1940 mayul 10 i län obsik ireafon ini volakrig telid. Sekü on, e pos on, lecifef emuton komipön ta fikuls mödik. Klub obsik päfinidon fa koupanef Deutänik, e pänätükon dönu pas ün 1946 mayul 11. Propagidapämod obsik pämodugon u pänosükon fa Deutänans. Jäfidot obsik: „Volapükagased“ no ekanon papübön dü tim anik (1942-1946), e nu pubon labü pads te 4, sekü fräds mu gretiks e papüra e büka. Ga cifef kluba e Volapükans votik zilik esteifons ad dünön demädis Volapüka.

Söl: ‚De Jong efovom ad lautön fövotis nulik ad vödabuk gretik Volapüka. Om e söl: ‚Krüger ebevoboms Vpagramatilis in püks Linglänik, Fransänik, Litaliyänik e Svedänik. De Volapükamäks ünü tim epasetiköl samäds 7200 peselons. Ün 1941 mälat sirkülapenädas päpakon, ed ün 1950 studabledil smalik Volapüka äpubon pro yunanef.

Tü 1941 mayul 28 söl: ‚N. Schravesande, vipresidan kluba ädeadom ün bäldot yelas 61. Plad labülabik oma no päfölon jünu. Num limanas emödikumon boso. Tü 1947 mäzul 2 ‚Dr. De Jong älabom säkaspikoti ko ‚Dr. R. A. Ten Bruggencate: redakan ela ‚A. N. P. (Gasedemabür valemik Nedänik). Te ini delagaseds anik nunod spikota at pelüsumon. Ün gustul yela ot cifal ettimik: ‚Jakob Sprenger evisitom obis ad bespikön dinis difik Volapüki tefölis.

Ko Volapükans foginänik e nitedälans votik elabobs spodi ze liföfiki. Ven atos dönu ämögon Volapükagased obsik epubon dönu nomiko ai pos mul telid. Demü propagid gased at papoton i nomiko ladetes distik in nilän e foginän. Plä yegeds redakanas suvo i yegeds nitedik Volapükanas foginänik pelasumons.

Dö diläd valemik feda Vpaklubas kanos i panunön, das limananum, do nevifiko, mödikumon.

In ‚Amsterdam studaklub bevünetik: ‚Societas Polyglottica Universalis (Klub polüglotik valemik) pefünon, kel bejäfon mögiküno pükis valik vola. Bevü mekavapüks i Volapük pelasumon.

Tefü kadäm Volapüka kanos panunön, das sis fün onik pösods 127 pecälons as kadämans, kelanas söl: ‚F. J. Krüger binom liman lätiko pevälöl. Balposvotiko pädan: ‚J. M. Schleyer, ‚Prof. Dr. A. Sleumer, e ‚J. Sprenger ebinoms dilekans kadäma, e söl: ‚J. Schmidt evedom sekü cäl oma as cifal Volapükanefa sis 1950 yunul 8 dilekan kadäma. Kodü dinäds difik elovepolom ye tü 1950 dekul 21 nelaidüpo cifalami ä dilekanacali ele ‚Dr. Arie De Jong, del demü atos pecälom as vicifal Volapükanefa. Sis d. 16id febula yela: 1936 söl: ‚De Jong binom sekretan, e söl: ‚Reynders kädan Volapükakadäma.

Nunod äninädon i nog lovelogami smalik valemapükasitas pageböl votik.

Pos loreid nunoda söls: ‚F. J. Krüger ed ‚A. De Jong Jr. ekontroloms kali degyela lätik, e posä ekonstatoms, das äbionn verätik, edispenoms oni.

Bi söls: ‚Dr. Arie De Jong e ‚J. G. M. Reynders Sr. demü bäldot vemik okas no ägebidükoms okis dönudaväle, pädaväloms söl: ‚F. J. Krüger as presidan, söl: ‚A. De Jong, Jr. as vipresidan, e söl: ‚P. H. J. Uittenbogaard as sekretan-kädan.

As top e tim pro kobikam fovik ‚Leiden e febul yela: 1952 pälonons büfiko.

Posä säks anik pibespikons, presidan äfärmükom ko vöds danöl lü limans ikömöl kobikami valemik.

 

 

Se Volapükagased pro Nedänapükans 1952, Nüm: 1, Pads: 2-3.