Песнь Пресвятыя Богородицы

Братия:
Величит душа Моя Господа,/ и возрадовася дух Мой о Бозе, Спасе Моем.

Припев: Честнейшую Херувим/ и славнейшую без сравнения Серафим, /без истления Бога Слова рождшую,/ сущую Богородицу, Тя величаем!

Яко призре на смирение рабы Своея,/ се бо отныне ублажат Мя вси роди.

Яко сотвори Мне величие Сильный/ и, свято имя Его, и милость Его в роды родов боящимся Его.

Сотвори державу мышцею Своею,/ расточи гордыя мыслию сердца их.

Низложи сильныя со престол, и вознесе смиренныя;/ алчущия исполни благ и богатящияся отпусти тщи.

Восприят Израиля, отрока Своего,/ помянути милости, якоже глагола ко отцем нашим, Аврааму и семени его даже до века.

Песнь 9-ая (Канона Богородицы, глас 2-й)

Ирмос 9-й: Живоприемный источник приснотекущий, светоносный светильник благодати, храм одушевленный, сень пречистую, небесе и земли пространнейшую, Богородицу вернии величаем. –дважды-

Припев: Пресвятая Богородице, спаси нас!

Тропарь: Струю благодати Твоея источи ми, пламенем злоключений опаляему, и люте истаяваему, источниче благодатно точащий, рождшая реку благодатей: из неяже пияй, вжаждется никогдаже.

Тропарь: Яко Жениха Тя красный чертог, яко владычню палату одушевленну, яко порфиру всезлатую, яко краснейшее обителище Христово, Владычице всех, умоляющаго Тя спаси мя.

Песнь 9-ая (Канона святителю, Феофаново, глас 2-й)

Ирмос 9-й: Безначальна Родителя Сын, Бог и Господь, воплощься от Девы нам явися, омраченная просветити, собрати расточенная. Тем Всепетую Богородицу величаем.

Припев: Святителю отче Николае, моли Бога о нас.

Тропарь: Свещами благодати, богомудре, просвещаемь, и светильник благочестия яве был еси, сущия в напастех спасаеши, и сущия во глубине морстей избавляеши, и питаеши алчущия преславно, всеблаженне.

Тропарь: Нже в раи сладости ныне водворяяся, и неизреченную славу ясно зря, от небесных круг певцы твоя назираеши, от страстей избавляя, богоносе, всеблаженне.

Богородичен: Премудрость, и силу, и Слово Ипостасное Отчее, Богомати, Чистая, родила еси от Твоих пречистых кровей Свой храм приимшую, и Сему по соединению соединившуюся нераздельно.

Песнь 9-ая (другого Канона святителю, Иосифово, глас 6-й)

Ирмос 9-й: Таинство странное вижу и преславное: небо, вертеп: престол херувимский, Деву: ясли, вместилище, в нихже возлеже невместимый Христос Бог, Егоже воспевающе величаем.

Припев: Святителю отче Николае, моли Бога о нас.

Тропарь: Ликовствуем духовно вси празднолюбцы, небеса веселитеся, горы же и холми, Церкви и дев лицы, и постников светлость, в памяти всеблаженнаго: в нейже сошедшеся Спаса величаем.

Тропарь: Да поют песньми непрестанно вси концы, похвальными венцы верх Николаа украшающе яве, угодника Христа Бога: егоже молитвами от страстей же и бед да избавимся.

Тропарь: Яко достойное приими пение, Николае, малаго труда сего, якоже Христос прият вдовы два лепта: не возгнушайся окаяннаго страстьми, не гордяся бо, треблаженне, дерзнух.

Троичен: Соединяется единосущною волею Троица: разделяется же паки лично нераздельне, соблюдающи державу присно, Отец, Сын и Дух Живый, един Триипостасный Бог, Егоже величаем.

Богородичен: Потребися всяка печаль Рождеством Твоим, и отъят Господь рыдание и плач, и всяку слезу от всякаго лица земнородных, Чистая Богородице Неискусобрачная: о Тебе и мы долги исполняем.

Катавасия 8-я: Таинство странное вижу и преславное: небо, вертеп: престол херувимский, Деву: ясли, вместилище, в нихже возлеже невместимый Христос Бог, Егоже воспевающе величаем.

Братия: Господи, помилуй. (12 раз) – читается вместо малой ектеньи - поклон -

Старший: Свят Господь Бог наш!

Братия: Свят Господь Бог наш!

Старший: Яко свят Господь Бог наш!

Братия: Свят Господь Бог наш!

Старший: Над всеми людьми Бог наш.

Братия: Свят Господь Бог наш!

Ексапостиларий (светилен) Святителя.

Чтец (подобен Жены услышите):
Великаго архипастыря и иерарха вси, председателя Мирлиийскаго, Николая восхвалим: многи бо мужы спасе неправедно умрети имущия: и царю является со Авлавием во сне, реша неправедный суд.

Старший: Слава Отцу и Сыну и Святому Духу

Чтец
Вельми тя прослави в чудесех Господь, и жива и по конце, иерарше Николае: кто бо от любве веры токмо святое твое имя призовет, и не абие услышан, тепла тя предстателя обретает?

Старший: И ныне и присно и во веки веков. Аминь.

Чтец
Богородичен: Мудрость Ипостасную, и Слово пресущественное, и врача всех Христа рождши, Дево, гноения и язвы души моея исцели лютыя и многовременныя, и сердца моего страстная помышления умертви.

- 4 -

Хвалитны псалмы

Старший:
(150-й) Всякое дыхание да хвалит Господа!
(148-й) Хвалите Господа с небес, хвалите Его в вышних!
Припев: Тебе подобает песнь, Богу!
Хвалите Его вси ангели Его, хвалите Его вся силы Его.
Припев: Тебе подобает песнь, Богу!

Чтец:
Хвалите его солнце и луна, хвалите его вся звезды и свет. Хвалите его небеса небес, и вода яже превыше небес. Да восхвалят имя господне: яко той рече, и быша: той повеле, и создашася. Постави я в век и в век века: повеление положи, и не мимо идет. Хвалите Господа от земли, змиееве, и вся бездны: огнь, град, снег, голоть, дух бурен, творящая слово его: Горы и вси холми, древа плодоносна и вси кедри: Зверие и вси скоти, гади и птицы пернаты: Царие земстии и вси людие, князи и вси судии земстии: Юноши и девы, старцы с юнотами да восхвалят имя господне, яко вознесеся имя того единаго: исповедание его на земли и на небеси. И вознесет рог людей своих: песнь всем преподобным его, сыновом исраилевым, людем приближающымся ему.
(149-й) Воспойте Господеви песнь нову, хваление его в церкви преподобных. Да возвеселится Исраиль о сотворшем его, и сынове Сиони возрадуются о царе совем: Да восхвалят имя его в лице, в тимпане и псалтири да поют ему. Яко благоволит Господь в людех своих, и вознесет кроткия во спасение. Восхвалятся преподобнии во славе, и возрадуются на ложах своих. Возношение божия в гортани их, и мечи обоюду остры в руках их: Сотворити отмщение во языцех, обличения в людех: Связати цари их путы, и славныя их ручными оковы железными.

На 6

Старший:
1.Сотворити в них суд написан.

Братия: Слава сия будет всем преподобным Его!

Братия поет стихиру:
Воззрев неуклонно на высоту разума, и узрев неявленно премудрости глубину, твоими ученьми мир обогатил еси отче, о нас присно молися Христу, святителю Николае.

Старший:
2.Хвалите Бога во святых Его!

Братия: Хвалите Его во утверждении силы Его!

Братия поет стихиру, глас 1-й, самогласны:
Человече Божий и верный угодниче, и строителю Того Таин, и мужу желаний духовных, столпе одушевленный, и вдохновенный образ: яко Божественное бо сокровище тя Мирская Церковь чудящися прияла есть, и молитвенника о душах наших.

На 4

Старший:
1.Хвалите Его на силах Eгo!

Братия: Хвалите Его по множеству величествия Его!

Братия поет стихиру, глас 1-й, подобен Небесных чинов:
Церковныя цветы облетая, якоже птенец вышняго гнезда ангельскаго, Николае треблаженне, зовеши присно к Богу о всех нас, иже в нужных бедах и искушениих, и избавляеши молитвами твоими.

Старший:
2.Хвалите Его во гласе трубнем.

Братия: Хвалите Его во псалтири и гуслех!

Братия поет стихиру:
Священныя одежды красоту, деятельными соделал еси добродетельми светлейшую, отче богоносе. Темже нам священнодействуеши дивная, славных чудес священнодетелю, лютых избавляя ны.

На 2

Старший:
1.Хвалите Его в тимпане и лице.

Братия: Хвалите Его во струнах и органе.

Братия:
Невидимых доброты проходя, страшную ону разумел еси славу святых, святе. Темже нам небесная словеса, присноживотных оных видений являеши, священнейший отче.

Старший:
2.Хвалите Его в кимвалех доброгласных, хвалите Его в кимвалех восклицания.

Братия: Всякое дыхание да хвалит Господа.

Братия поет стихиру:
Яко во сне предстал еси благочестивому царю, и узники, отче, от смерти избавил еси: молися непрестанно, яко да и ныне молитвами твоими, избавимся от искушений и бед и болезней, достойно благохвалящии тя.

Старший: Слава Отцу и Сыну и Святому Духу

Чтец, глас 5-й, самогласны:
Вострубим трубою песней, взыграем празднственная, и ликовствуем радующеся в молебное торжество богоноснаго отца. Цари и князи да стекутся, и иже сонным страшным явлением царя препирающа, неповинно держимыя три отпустити воеводы, да воспоют. Пастырие и учителие добраго Пастыря, подобноревнительна пастыря, сошедшеся восхвалим. Иже в недузех врача, и иже в бедах избавителя, грешнии заступника, нищии сокровище, и иже в скорбех утешителя, спутника путешествующии, на мори сущии правителя, и вси везде тепле предваряюща, великаго святителя восхваляюще, сице рцем: пресвятый Николае, предвари и избави ны от настоящия беды, и спаси стадо твое молитвами твоими.

Старший: И ныне и присно и во веки веков. Аминь.

Чтец:
Богородичен: Вострубим трубою песней: приникши бо свыше Всецарица Мати Дева, благословеньми венчевает воспевающия Ю. Царие и князи да стекутся, и Царице да восплещут в песнех, Царя рождшей, иже смертию держимыя первее, разрешити человеколюбно благоволившаго: пастырие и учитилие, добраго Пастыря Пречистую Матерь сошедшеся восхвалим. свещник златозарный, светоносный облак, небес пространнейшу, одушевленный кивот, огнезрачный Владычень престол, манноприемную златую стамну, затворенную Слова дверь, всех христиан прибежище, песньми богогласными похваляюще, сице рцем: палато Слова, сподоби смиренных нас Небеснаго Царствия: ничтоже бо невозможно ходатайству Твоему.

Великое славословие

Слава в вышних Богу,/ и на земли мир,/ в человецех благоволение. /Хвалим Тя, благословим Тя,/ кланяем Ти ся, славословим Тя, благодарим Тя/ великия ради славы Твоея.
Господи, Царю Небесный, Боже, Отче Вседержителю,/ Господи Сыне Единородный, Иисусе Христе, и Святый Душе./ Господи Боже, Агнче Божий, Сыне Отечь,/ вземляй грехи мира, помилуй нас.
Вземляй грехи мира, приими молитву нашу./ Седяй одесную Отца, помилуй нас./ Яко Ты еси Един Свят;/ Ты еси Един Господь, Иисус Христос, в славу Бога Отца, аминь.
На всяк день благословлю Тя и восхвалю имя Твое во веки, и в век века.

Сподоби, Господи, в день сей без греха сохранитися нам!/ Благословен еси, Господи Боже отец наших,/ и хвально и прославлено имя Твое во веки, аминь.
Буди, Господи, милость Твоя на нас, якоже уповахом на Тя.
Благословен еси, Господи, научи мя оправданием Твоим (трижды).
Господи! прибежище был еси нам в род и род./ Аз рех: Господи! помилуй мя, исцели душу мою, яко согреших Тебе.
Господи! к Тебе прибегох: научи мя творити волю Твою, яко Ты еси Бог мой,/ яко у Тебе источник живота,/ во свете Твоем узрим свет./ Пробави милость Твою ведущим Тя!
Святый Боже, Святый Крепкий, Святый Безсмертный, помилуй нас! (трижды).
Слава Отцу и Сыну и Святому Духу, и ныне и присно и во веки веков, аминь.
Святый Безсмертный, помилуй нас. Святый Боже, Святый Крепкий, Святый Безсмертный, помилуй нас!

Братия творит поясной поклон и после этого поет тропарь:
Правило веры и образ кротости, воздержания учителя, яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Николае, моли Христа Бога, спастися душам нашым.

Старший:
Слава Отцу и Сыну и Святому Духу, и ныне и присно и во веки веков, аминь.

Братия:
Богородичен:Вся паче смысла,/ Вся преславная Твоя, Богородице, таинства,/ чистоте запечатанной, и девству храниму,/ Мати позналася еси неложна,/ Бога рождши истиннаго;/ Того моли спастися душам нашим.

Братия: Господи, помилуй. (12 раз) – читается вместо сугубой ектеньи - поклон -

Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем!

Слава Отцу и Сыну и Святому Духу, и ныне и присно и во веки веков, аминь. Господи, помилуй, Господи, помилуй, Господи, помилуй. Благослови.

Ый час

Старший:
Приидите, поклонимся Цареви нашему Богу. -поклон-
Приидите, поклонимся и припадем Христу, Цареви нашему Богу. -поклон-
Приидите, поклонимся и припадем Самому Христу, Цареви и Богу нашему. -поклон-

Чтец читает псалом 5:
Глаголы моя внуши, Господи, разумей звание мое. Вонми гласу моления моего, Царю мой и Боже мой: яко к Тебе помолюся, Господи. Заутра услыши глас мой: заутра предстану Ти, и узриши мя: яко Бог не хотяй беззакония Ты еси: не приселится к Тебе лукавнуяй, ниже пребудут беззаконницы пред очима Твоима: возненавидел еси вся делающыя беззаконие, погубиши вся глаголющыя лжу: мужа кровей и льстива гнушается Господь. Аз же множеством милости Твоея вниду в дом Твой, поклонюся ко храму святому Твоему, в страсе Твоем. Господи, настави мя правдою Твоею, враг моих ради исправи пред Тобою путь мой. Яко несть во устех их истины, сердце их суетно, гроб отверст гортань их, языки своими льщаху. Суди им, Боже, да отпадут от мыслей своих: по множеству нечестия их изрини я, яко преогорчиша Тя, Господи. И да возвеселятся вси уповающии на Тя, во век возрадуются, и вселишися в них: и похвалятся о Тебе любящии имя Твое. Яко ты благословиши праведника, Господи, яко оружием благоволения венчал еси нас.

Чтец читает псалом 89:
Господи, прибежище был еси нам в род и род. Прежде даже горам не быти и создатися земли и вселенней, и от века и до века Ты еси. Не отврати человека во смирение, и рекл еси: обратитеся, сынове человечестии. Яко тысяща лет пред очима Твоима, Господи, яко день вчерашний, иже мимо иде, и стража нощная. Уничижения их лета будут: утро яко трава мимо идет, утро процветет и прейдет: на вечер отпадет, ожестеет и изсхнет: яко изчезохом гневом Твоим, и яростию Твоею смутихомся. Положил еси беззакония наша пред Тобою, век наш в просвещение лица Твоего. Яко вси дние наши оскудеша, и гневом твоим изчезохом: лета наша яко паучина поучахуся: дние лет наших в нихже седмьдесят лет, аще же в силах, осмьдесят лет, и множае их труд и болезнь: яко прииде кротость на ны, и накажемся. Кто весть державу гнева Твоего, и от страха Твоего ярость Твою изчести? Десницу Твою тако скажи ми, и окованныя сердцем в мудрости. Обратися, Господи, доколе? и умолен буди на рабы Твоя. Исполнихомся заутра милости Твоея, Господи, и возрадовахомся и возвеселихомся: во вся дни нашя возвеселихомся, за дни, в няже смирил ны еси, лета, в няже видехом злая. И призри на рабы Твоя и на дела Твоя, и настави сыны их. И буди светлость Господа Бога нашего на нас, и дела рук наших исправи на нас, и дело рук наших исправи.

Чтец читает псалом 100:
Милость и суд воспою Тебе, Господи: пою и разумею в пути непорочне: когда приидеши ко мне? прехождах в незлобии сердца моего посреде дому моего. Не предлагах пред очима моима вещь законопреступную: творящыя преступление возненавидех. не прильпе мне сердце строптиво: уклоняющагося от мене лукаваго не познах. Оклеветающаго тай искренняго своего, сего изгонях: гордым оком и несытым сердцем, с сим не ядях. Очи мои на верныя земли, посаждати я со мною: ходяй по пути непорочну, сей ми служаше. Не живяше посреде дому моего творяй гордыню: глаголяй неправедная не исправляше пред очима моима. Воутрия избивах вся грешныя земли, еже потребити от града Господня вся делающыя беззаконие.

Слава Отцу и Сыну и Святому Духу.

Старший: И ныне и присно и во веки веков.

Братия: Аминь.

Братия: Аллилуиа, Аллилуиа, Аллилуиа, слава Тебе, Боже–трижды-

Господи, помилуй. –трижды-

Старший: Слава Отцу и Сыну и Святому Духу.

Братия:
Правило веры и образ кротости, воздержания учителя, яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Николае, моли Христа Бога, спастися душам нашым.

Старший: И ныне и присно и во веки веков.

Братия: Аминь.

Чтец:
Богородичен: Что Тя наречем, о Благодатная; Небо, яко возсияла еси солнце правды: Рай, яко прозябла еси цвет нетления: Деву, яко пребыла еси нетленна: чистую Матерь, яко имела еси на святых Твоих объятиях Сына, всех Бога. Того моли спастися душам нашим. – 3 поклона -

Старший:
Стопы моя направи по словеси Твоему: и да не обладает мною всякое беззаконие. – 3 поклона –

Избави мя от клеветы человеческия, и сохраню заповеди Твоя. – 3 поклона –

Лице Твое просвети на раба Твоего, и научи мя оправданием Твоим.– 3 поклона -

Да исполнятся уста моя хваления Твоего, Господи, яко да воспою славу Твою, весь день великолепие Твое.

Братия: Святый Боже, Святый Крепкий, Святый Безсмертный, помилуй нас. (Трижды)

Старший: Слава Отцу и Сыну и Святому Духу, и ныне и присно и во веки веков.
Аминь.

Чтец:
Пресвятая Троице, помилуй нас. Господи, очисти грехи наша. Владыко, прости беззакония наша. Святый, посети, исцели немощи наша Имени Твоего ради.

Братия: Господи, помилуй. Господи, помилуй. Господи, помилуй.

Старший:
Слава Отцу и Сыну и Святому Духу, и ныне и присно и во веки веков.

Братия: Аминь.

Братия:
Отче наш! Иже еси на Небесех. Да святится Имя Твое. Да приидет Царствие Твое. Да будет воля Твоя, яко на Небеси и на земли. Хлеб наш насущный даждь нам днесь. И остави нам долги наша, якоже и мы оставляем должником нашим. И не введи нас во искушение. Но избави нас от лукаваго.

Братия поет кондак:
В Мирех, святе, священнодействитель показался еси, Христово бо, преподобне, Евангелие исполнив: положил еси душу твою о людех твоих, и спасл еси неповинныя от смерти. Сего ради освятился еси, яко великий таинник Божия благодати.

Братия: Господи, помилуй. (40 раз)

Старший:
Иже на всякое время, и на всякий час, на небеси и на земли покланяемый и славимый, Христе Боже, долготерпеливе, многомилостиве, многоблагоутробне, иже праведныя любяй, и грешныя милуяй, иже вся зовый ко спасению обещания ради будущих благ. Сам Господи, приими и наша в час сей молитвы, и исправи живот наш к заповедем Твоим: души наша освяти, телеса очисти, помышления исправи, мысли очисти, и избави нас отвсякия скорби, зол и болезней: огради нас святыми Твоими Ангелы, да ополчением их соблюдаеми и наставляеми, достигнем в соединение веры, и в разум неприступныя Твоея славы: яко благословен еси во веки веков, аминь.

Братия: Господи, помилуй. –трижды-

Старший: Слава Отцу и Сыну и Святому Духу, и ныне и присно и во веки веков.

Братия: Аминь.

Братия:
Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем!

Братия:
Слава Отцу и Сыну и Святому Духу, и ныне и присно и во веки веков, аминь. Господи, помилуй, Господи, помилуй, Господи, помилуй. Благослови.

Старший говорит отпуст:
Христос истинный Бог наш, молитвами пречистыя своея Матере, святаго апостола любви, первоиерарха Церкви ныне на земле сущей, Иоанна Богослова, и прочих святых славных и всехвальных апостол, святителя Николае архиепископа Мир Ликийских чудотворца, святых праведных богоотец Иоакима и Анны и всех святых помилует и спасет нас, яко Благ и Человеколюбец.