На стиховне (утрени).

Января. Поклонение честных вериг апостола Петра.

На Господи воззвах, глас 4:

Прелесть связал еси, по Господе вяжемь,/ и в темнице, апостоле, заключаемь./ Темже тя любовию почитаем/ и верою вериги облобызаем твоя:/ от нихже почерпающе здравие телесе и души спасение,/ по долгу восхваляем тя, Боговидче,// безплотных собеседниче.

Тобою разум приемлют неразумием одержимии,/ языков многосеменнии роди первее,/ ихже образ показа, с высоты носимь,/ сосуд, внутрь вмещающ всякое животно, апостоле./ Темже всяк тя возраст славит,/ покланяяся, яже носил еси, веригам,// за Христа усерднейше.

Егоже отверглся еси судима, / воставша воспел еси из мертвых, апостоле: / и проповедал еси в концех мира, / Бога же и Человека, / благостию многою земным приобщившася. / Темже любовию тя блажим, Петре, / покланяющеся, яже носил еси, веригам, // за Христа, преславне.

Слава, глас 6:

Днесь нам основание Церкве,/ Петр – камень веры/ предлагает честныя своя вериги в душевное благочестие./ Приидите вси, сия облобызающе,/ благохвальными песньми того увенчаим:/ радуйся, теплый веры поборниче,/ иже теплым разумом Христа исповедав/ и Сына Божия в дерзновении мнозем./ Радуйся, вселенныя радование/ и Небеснаго Царствия ключарю,/ благодать подавай любовию тя чтущим/ и честныя твоя вериги облобызающим желанием,/ яко предстоя престолу всех Царя Христа,/ молитву творяо нас,// совершающих память твою.

На стиховне.

Слава, глас 6:

Паки нас теплый предстатель совоздвизает к духовней трапезе,/ Петр – камень веры,/ честныя своя вериги предложив нам,/ якоже снедь многоценну,/ недугов во врачевание,/ скорбящих во утешение,/ в пристанище обуреваемых./ Приидите вси, сия облобызающе,/ того Прославльшаго умолим:// молитвами его, Христе, спаси души наша.

Тропарь, глас 4:

Рима не оставль, к нам пришел еси/ честными веригами, яже носил еси, апостолов первопрестольне./ Имже верою покланяющеся, молимся:/ твоими к Богу молитвами// даруй нам велию милость.

Кондак, глас 2:

Верховнаго и перваго апостолов,/ Истины Божественнаго ученика,/ Петра великаго восхвалим,/ и того верою целуем вериги,// прегрешений разрешение приемлюще.

Ин кондак, глас 2:

Камень Христос каменя веры прославляет светло, учеников первопрестольника:/ созывает бо вся праздновати, Петре, чудеси твоея честныя вериги// и подает согрешений прощение.

На стиховне (утрени).

Слава, глас 4:

Трикратным вопрошением,/еже, – Петре, любиши ли Мя, –/ трикратное отвержение Христос исправи./ Темже и к Тайноведцу Симон:/ Господи, вся веси, вся знаеши,/ Ты веси, яко люблю Тя./ Темже к нему Спас:/ паси овцы Моя,/ паси избранныя Моя,/ паси агнцы Моя,/ яже Своею кровию стяжах во спасение./ Того моли, Богоблаженне апостоле,// даровати нам велию милость.