Акафист Сладчайшему Господу нашему Иисусу Христу
МОЛЕБЕН О СОЗДАНИИ СЕМЬИ
Священник: Благословен Бог наш всегда, ныне и присно, и во веки веков.
Хор: Аминь.
Священник: Слава Тебе, Боже наш, слава Тебе.
(В период от Пасхи до Вознесения вместо молитвы «Царю Небесный» трижды поем тропарь Пасхи: «Христос воскресе из мертвых, смертию смерть поправ и сущим во гробех живот даровав»)
Священник: Бог Господь и явися нам, благословен Грядый во имя Господне.
Исповедайтеся Господеви, яко благ, яко в век милость Его.
(В великие и двунадесятые праздники сначала поется тропарь праздника)
Тропарь Нерукотворному Образу
Господа нашего Иисуса Христа, глас 2
Пречистому Твоему образу покланяемся, Благий,
просяще прощения прегрешений наших, Христе Боже:
волею бо благоволил еси плотию взыти на Крест,
да избавиши яже создал еси от работы вражия.
Тем благодарственно вопием Ти:
радости исполнил еси вся, Спасе наш,
пришедый спасти мир.
Тропарь об умножении любви, глас 4-й
Союзом любве апостолы Твоя связавый, Христе,
и нас, Твоих верных рабов к Себе тем крепко связав,
творити заповеди Твоя
и друг друга любити нелицемерно сотвори,
молитвами Богородицы, Едине Человеколюбче.
Тропaрь Богородице, глас 4-й
К Богородице прилежно ныне притецем,
грешнии и смиреннии, и припадем,
в покаянии зовуще из глубины души:
Владычице, помози, на ны милосердовавши,
потщися, погибaем от множества прегрешений,
не отврати Твоя рабы тщи,
Тябо и едину надежду имамы.
Тропарь святым благоверным Петру и Февронии, Муромским, глас 8-й
Яко благочестиваго корене пречестная отрасль был еси,
добре во благочестии пожив, блаженне Петре,
тако и с супружницею твоею, премудрою Феврониею,
в мире Богу угодивше
и преподобных житию сподобистеся.
С нимиже молитеся Господеви
сохранити без вреда отечество ваше,
да вас непрестанно почитаем.
Слава, и ныне.
Тропарь Богородице, глас 4-й
Не умолчим никогда, Богородице,
силы Твоя глаголати, недостойнии:
aще бо Ты не бы предстояла молящи,
кто бы нас избaвил от толиких бед,
кто же бы сохранил до ныне свободны?
Не отступим, Владычице, от Тебе:
Твоя бо рабы спасaеши присно от всяких лютых.
Священник: Иисусе Сладчайший, спаси нас.
Священник: Пресвятая Богородице, спаси нас.
Хор (повторяет): Пресвятая Богородице, спаси нас.
Священник: Слава Отцу, и Сыну, и Святому Духу
Священник: Молите Бога о нас, святии благовернии Петре и Февроние
Хор:
Священник: Паки и паки миром Господу помолимся.
Хор: Господи, помилуй.
Священник: Заступи, спаси, помилуй и сохрани нас, Боже, Твоею благодатию.
Хор: Господи, помилуй.
Священник: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Хор: Тебе, Господи.
Священник: Ты бо еси Царь мира и Спас душ наших, и Тебе славу возсылаем, Отцу и Сыну и Святому Духу, ныне и присно и во веки веков.
Хор: Аминь.
Акафист Сладчайшему Господу нашему Иисусу Христу
Кондак 1
Возбранный Воеводо и Господи, ада победителю,/ яко избавлься от вечныя смерти,/ похвальная восписую Ти, создание и раб Твой;/ но, яко имеяй милосердие неизреченное,/ от всяких мя бед свободи, зовуща:// Иисусе, Сыне Божий, помилуй мя.
Икос 1
Ангелов Творче и Господи сил, отверзи ми недоуменный ум и язык на похвалу пречистаго Твоего имене, якоже глухому и гугнивому древле слух и язык отверзл еси, и, глаголаше зовый таковая:
Иисусе пречудный, ангелов удивление; / Иисусе пресильный, прародителей избавление. // Иисусе пресладкий, патриархов величание; / Иисусе преславный, царей укрепление. // Иисусе прелюбимый, пророков исполнение; / Иисусе предивный, мучеников крепосте. // Иисусе претихий, монахов радосте; / Иисусе премилостивый, пресвитеров сладосте. // Иисусе премилосердый, постников воздержание; / Иисусе пресладостный, преподобных радование. // Иисусе пречестный, девственных целомудрие; / Иисусе предвечный, грешников спасение. // Иисусе, Сыне Божий, помилуй мя.
Кондак 2
Видя вдовицу зельне плачущу, Господи, якоже бо тогда умилосердився, сына ея на погребение несома воскресил еси; сице и о мне умилосердися, Человеколюбче, и грехми умерщвленную мою душу воскреси, зовущую: Аллилуиа.
Икос 2
Разум неуразуменный разумети Филипп ища, Господи, покажи нам Отца, глаголаше; Ты же к нему: толикое время сый со Мною, не познал ли еси, яко Отец во Мне, и Аз во Отце есмь? Темже, Неизследованне, со страхом зову Ти:
Иисусе, Боже предвечный; / Иисусе, Царю пресильный. // Иисусе, Владыко долготерпеливый; / Иисусе, Спасе премилостивый. // Иисусе, хранителю мой преблагий; / Иисусе, очисти грехи моя. // Иисусе, отыми беззакония моя; / Иисусе, отпусти неправды моя. // Иисусе, надеждо моя, не остави мене; / Иисусе, помощниче мой, не отрини мене. // Иисусе, Создателю мой, не забуди мене; / Иисусе, Пастырю мой, не погуби мене. // Иисусе, Сыне Божий, помилуй мя.
Кондак 3
Силою свыше апостолы облекий, Иисусе, во Иерусалиме седящия, облецы и мене, обнаженнаго от всякаго благотворения, теплотою Духа Святаго Твоего и даждь ми с любовию пети Тебе: Аллилуиа.
Икос 3
Имеяй богатство милосердия, мытари и грешники, и неверныя призвал еси, Иисусе; не презри и мене ныне, подобнаго им, но, яко многоценное миро, приими песнь сию:
Иисусе, сило непобедимая; / Иисусе, милосте безконечная. // Иисусе, красото пресветлая; / Иисусе, любы неизреченная. // Иисусе, Сыне Бога Живаго; / Иисусе, помилуй мя грешнаго. // Иисусе, услыши мя в беззакониих зачатаго; / Иисусе, очисти мя во гресех рожденнаго. // Иисусе, научи мя непотребнаго; / Иисусе, освети мя темнаго. // Иисусе, очисти мя сквернаго; / Иисусе, возведи мя блуднаго. // Иисусе, Сыне Божий, помилуй мя.
Кондак 4
Бурю внутрь имеяй помышлений сумнительных, Петр утопаше; узрев же во плоти Тя суща, Иисусе, и по водам ходяща, позна Тя Бога истиннаго и, руку спасения получив, рече: Аллилуиа.
Икос 4
Слыша слепый мимоходяща Тя, Господи, путем вопияше: Иисусе, Сыне Давидов, помилуй мя! И, призвав, отверзл еси очи его. Просвети убо милостию Твоею очи мысленныя сердца и мене, вопиюща Ти и глаголюща:
Иисусе, вышних Создателю; / Иисусе, нижних Искупителю. // Иисусе, преисподних потребителю; / Иисусе, всея твари украсителю. // Иисусе, души моея утешителю; / Иисусе, ума моего просветителю. // Иисусе, сердца моего веселие; / Иисусе, тела моего здравие. // Иисусе, Спасе мой, спаси мя; / Иисусе, свете мой, просвети мя. // Иисусе, муки всякия избави мя; / Иисусе, спаси мя, недостойнаго. // Иисусе, Сыне Божий, помилуй мя.
Кондак 5
Боготочною Кровию якоже искупил еси нас древле от законныя клятвы, Иисусе, сице изми нас от сети, еюже змий запят ны страстьми плотскими, и блудным наваждением, и злым унынием, вопиющия Ти: Аллилуиа.
Икос 5
Видевше отроцы еврейстии во образе человечестем Создавшаго рукою человека, и Владыку разумевше Его, потщашася ветвьми угодити Ему, осанна вопиюще. Мы же песнь приносим Ти, глаголюще:
Иисусе, Боже истинный; / Иисусе, Сыне Давидов. // Иисусе, Царю преславный; / Иисусе, Агнче непорочный. // Иисусе, Пастырю предивный; / Иисусе, хранителю во младости моей. // Иисусе, кормителю во юности моей; / Иисусе, похвало в старости моей. // Иисусе, надежде в смерти моей; / Иисусе, животе по смерти моей. // Иисусе, утешение мое на суде Твоем; / Иисусе, желание мое, не посрами мене тогда. // Иисусе, Сыне Божий, помилуй мя.
Кондак 6
Проповедник богоносных вещание и глаголы исполняя, Иисусе, на земли явлься и с человеки Невместимый пожил еси, и болезни наша подъял еси, отнюдуже ранами Твоими мы исцелевше, пети навыкохом: Аллилуиа.
Икос 6
Возсия вселенней просвещение истины Твоея, и отгнася лесть бесовская: идоли бо, Спасе наш, не терпяще Твоея крепости, падоша. Мы же, спасение получивше, вопием Ти:
Иисусе, истино, лесть отгонящая; / Иисусе, свете, превышший всех светлостей. // Иисусе, Царю, премогаяй всех крепости; / Иисусе, Боже, пребываяй в милости. // Иисусе, Хлебе Животный, насыти мя алчущаго; / Иисусе, источниче разума, напой мя жаждущаго. // Иисусе, одеждо веселия, одей мя тленнаго; / Иисусе, покрове радости, покрый мя недостойнаго. // Иисусе, подателю просящим, даждь мне плач за грехи моя; / Иисусе, обретение ищущим, обрящи душу мою. // Иисусе, отверзителю толкущим, отверзи сердце мое окаянное; / Иисусе, Искупителю грешных, очисти беззакония моя. // Иисусе, Сыне Божий, помилуй мя.
Кондак 7
Хотя сокровенную тайну от века открыти, яко овча на заколение веден был еси, Иисусе, и яко агнец прямо стригущаго его безгласен, и яко Бог из мертвых воскресл еси, и со славою на небеса вознеслся еси, и нас совоздвигл еси, зовущих: Аллилуиа.
Икос 7
Дивную показа тварь, явлейся Творец нам: без семене от Девы воплотися, из гроба, печати не рушив, воскресе, и ко апостолом, дверем затворенным, с плотию вниде. Темже чудящеся, воспоим:
Иисусе, Слове необыменный; / Иисусе, Слове несоглядаемый. // Иисусе, сило непостижимая; / Иисусе, мудросте недомыслимая. // Иисусе, Божество неописанное; / Иисусе, господство неисчетное. // Иисусе, царство непобедимое; / Иисусе, владычество безконечное. // Иисусе, крепосте высочайшая; / Иисусе, власте вечная. // Иисусе, Творче мой, ущедри мя; / Иисусе, Спасе мой, спаси мя. // Иисусе, Сыне Божий, помилуй мя.
Кондак 8
Странно Бога вочеловечшася видяще, устранимся суетнаго мира и ум на Божественная возложим. Сего бо ради Бог на землю сниде, да нас на небеса возведет, вопиющих Ему: Аллилуиа.
Икос 8
Весь бе в нижних, и вышних никакоже отступи Неисчетный, егда волею нас ради пострада, и смертию Своею нашу смерть умертви, и воскресением живот дарова поющим:
Иисусе, сладосте сердечная; / Иисусе, крепосте телесная. // Иисусе, светлосте душевная; / Иисусе, быстрото умная. // Иисусе, радосте совестная; Иисусе, надеждо известная. // Иисусе, памяте предвечная; / Иисусе, похвало высокая. // Иисусе, славо моя превознесенная; / Иисусе, желание мое, не отрини мене. // Иисусе, Пастырю мой, взыщи мене; / Иисусе, Спасе мой, спаси мене. // Иисусе, Сыне Божий, помилуй мя.
Кондак 9
Все естество ангельское безпрестани славит пресвятое имя Твое, Иисусе, на небеси: Свят, Свят, Свят, вопиюще; мы же, грешнии на земли бренными устнами вопием: Аллилуиа.
Икос 9
Ветия многовещанны, якоже рыбы безгласныя видим о Тебе, Иисусе, Спасе наш: недоумеют бо глаголати, како Бог непреложный и человек совершенный пребываеши? Мы же таинству дивящеся, вопием верно:
Иисусе, Боже предвечный; / Иисусе, Царю царствующих. // Иисусе, Владыко владеющих; / Иисусе, Судие живых и мертвых. // Иисусе, надеждо ненадежных; / Иисусе, утешение плачущих. // Иисусе, славо нищих; / Иисусе, не осуди мя по делом моим. // Иисусе, очисти мя по милости Твоей; / Иисусе, отжени от мене уныние. // Иисусе, просвети моя мысли сердечныя; / Иисусе, даждь ми память смертную. // Иисусе, Сыне Божий, помилуй мя.
Кондак 10
Спасти хотя мир, Восточе востоком, к темному западу - естеству нашему пришед, смирился еси до смерти; темже превознесеся имя Твое паче всякаго имене, и от всех колен небесных и земных слышиши: Аллилуиа.
Икос 10
Царю Превечный, Утешителю, Христе истинный, очисти ны от всякия скверны, якоже очистил еси десять прокаженных, и исцели ны, якоже исцелил еси сребролюбивую душу Закхеа мытаря, да вопием Ти, во умилении зовуще:
Иисусе, сокровище нетленное; / Иисусе, богатство неистощимое. // Иисусе, пище крепкая; / Иисусе, питие неисчерпаемое. // Иисусе, нищих одеяние; / Иисусе, вдов заступление. // Иисусе, сирых защитниче; / Иисусе, труждающихся помоще. // Иисусе, странных наставниче; / Иисусе, плавающих кормчий. // Иисусе, бурных отишие; Иисусе Боже, воздвигни мя падшаго. // Иисусе, Сыне Божий, помилуй мя.
Кондак 11
Пение всеумиленное приношу Ти недостойный, вопию Ти яко хананеа: Иисусе, помилуй мя; не дщерь бо, но плоть имам страстьми люте бесящуюся и яростию палимую, и исцеление даждь вопиющу Ти: Аллилуиа.
Икос 11
Светоподательна светильника сущим во тьме неразумия, прежде гоняй Тя Павел, богоразумнаго гласа силу внуши и душевную быстроту уясни; сице и мене темныя зеницы душевныя просвети, зовуща:
Иисусе, Царю мой прекрепкий; / Иисусе, Боже мой пресильный. // Иисусе, Господи мой пребезсмертный; / Иисусе, Создателю мой преславный. // Иисусе, Наставниче мой предобрый; / Иисусе, Пастырю мой прещедрый. // Иисусе, Владыко мой премилостивый;/ Иисусе, Спасе мой премилосердый. // Иисусе, просвети моя чувствия, потемненныя страстьми;/ Иисусе, исцели мое тело, острупленное грехми. // Иисусе, очисти мой ум от помыслов суетных; / Иисусе, сохрани сердце мое от похотей лукавых. // Иисусе, Сыне Божий, помилуй мя.
Кондак 12
Благодать подаждь ми, всех долгов решителю, Иисусе, и приими мя кающася, якоже приял еси Петра, отвергшагося Тебе, и призови мя унывающаго, якоже древле Павла, гоняща Тя, и услыши мя, вопиюща Ти: Аллилуиа.
Икос 12
Поюще Твое вочеловечение, восхваляем Тя вси, и веруем со Фомою, яко Господь и Бог еси, седяй со Отцем и хотяй судити живым и мертвым. Тогда убо сподоби мя деснаго стояния, вопиющаго:
Иисусе, Царю предвечный, помилуй мя; / Иисусе, цвете благовонный, облагоухай мя. // Иисусе, теплото любимая, согрей мя; / Иисусе, храме предвечный, покрый мя. // Иисусе, одеждо светлая, украси мя; / Иисусе, бисере честный, осияй мя. // Иисусе, каменю драгий, просвети мя; / Иисусе, солнце правды, освети мя. // Иисусе, свете святый, облистай мя; / Иисусе, болезни душевныя и телесныя избави мя. // Иисусе, из руки сопротивныя изми мя; / Иисусе, огня неугасимаго и прочих вечных мук свободи мя. // Иисусе, Сыне Божий, помилуй мя.
Кондак 13 (читается трижды)
О, пресладкий и всещедрый Иисусе! / Приими ныне малое моление сие наше, якоже приял еси вдовицы две лепте, / и сохрани достояние Твое от враг видимых и невидимых, / от нашествия иноплеменних, от недуга и глада, / от всякия скорби и смертоносныя раны, / и грядущия изми муки всех, вопиющих Ти: // Аллилуиа, аллилуиа, аллилуиа.
Икос 1
Ангелов Творче и Господи сил, отверзи ми недоуменный ум и язык на похвалу пречистаго Твоего имене, якоже глухому и гугнивому древле слух и язык отверзл еси, и, глаголаше зовый таковая:
Иисусе пречудный, ангелов удивление; / Иисусе пресильный, прародителей избавление. // Иисусе пресладкий, патриархов величание; / Иисусе преславный, царей укрепление. // Иисусе прелюбимый, пророков исполнение; / Иисусе предивный, мучеников крепосте. // Иисусе претихий, монахов радосте; / Иисусе премилостивый, пресвитеров сладосте. // Иисусе премилосердый, постников воздержание; / Иисусе пресладостный, преподобных радование. // Иисусе пречестный, девственных целомудрие; / Иисусе предвечный, грешников спасение. // Иисусе, Сыне Божий, помилуй мя.
Кондак 1
Возбранный Воеводо и Господи, ада победителю,/ яко избавлься от вечныя смерти,/ похвальная восписую Ти, создание и раб Твой;/ но, яко имеяй милосердие неизреченное,/ от всяких мя бед свободи, зовуща:// Иисусе, Сыне Божий, помилуй мя.
Священник: Иисусе Сладчайший, спаси нас.
Священник: Пресвятая Богородице, спаси нас.
Хор (повторяет): Пресвятая Богородице, спаси нас.
Священник: Слава Отцу, и Сыну, и Святому Духу
Хор:
В период от Пасхи до Вознесения (двунадесятые праздники)
вместо «Достойно есть» поем задостойник Пасхи (задостойник праздника)
Священник: Помилуй нас, Боже, по велицей милости Твоей, молим Ти ся, услыши и помилуй.
Хор: Господи помилуй (трижды)
Священник: Еще молимся о Великом Господине и отце нашем Святейшем Патриархе Кирилле, и о Господине нашем Преосвященнейшем епископе Пантелеимоне, и всей во Христе братии нашей.
Хор: Господи помилуй (трижды)
Священник: Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.
Хор: Господи помилуй (трижды)
Священник: Еще молимся о милости, жизни, мире, здравии, спасении, посещении, прощении и оставлении грехов рабов Божиих (имярек) и всех нуждающихся в Божией помощи и заступлении и о еже помиловати их.
Хор: Господи помилуй (трижды)
Священник: Еще молимся Господу Богу нашему о еже прияти молитвы рабов Своих, благодати бракообщения чающих, и явити им благую и совершенную волю Свою, терпение же, смирение и любовь истинную вкоренити в сердцах их, молим Ти ся, услыши и помилуй.
Хор: Господи помилуй (трижды)
Священник: Еще молимся Тебе, Господу Богу нашему, вся ко спасению человека устрояющему, призри на рабы Твоя, на Тя всецело упование возложившия, и открый им путь жития их, и аще угодно Ти, соедини в любви избранныя Тобою, Ты бо рекл еси: «не добро быти человеку одному», рцем вси: услыши и скоро помилуй.
Хор: Господи помилуй (трижды)
Священник: Еще молимся Тебе, Спасителю нашему, о еже скоро избавити рабов Твоих сих от уныния, вражды и обиды, и даровати им радость общения, и в Тебе совместнаго жития, его же заповедал еси, и желание любве сия вложил еси в нас, молим Ти ся: услыши и помилуй.
Хор: Господи помилуй (трижды)
Священник: Услыши ны, Боже Спасителю наш, упование всех концов земли и сущих в море далече: и милостив, милостив буди, Владыко, о гресех наших и помилуй ны. Милостив бо и Человеколюбец, Бог еси, и Тебе славу воссылаем, Отцу и Сыну, и Святому Духу, ныне и присно и во веки веков.
Хор: Аминь.
Господу помолимся.
Хор: Господи помилуй.
Молитва Господу нашему Иисусу Христу
О, Сладчайший наш Иисусе Христе! На Тя возложихом все упование наше, и вся, елика приуготовил еси нам, да будет. В руце Твои предаем живот наш, и аще сотвориши нам по прошением нашим, аще ли же ни, смиренно приимем. В Тебе бо вся радость наша, и любы Твоя в место всякия нужды в мире сем нам бывает. Сам же, Господи, в Кане Галилейской явил еси, яко Твоя воля есть – законное супружество. Сего ради просим Тя: даждь и рабом Твоим сим дар любве истинныя, посли им супругов желанных, Тобою, по вере их, приуготовленных. Отжени от них вся соблазны и препятия вражия, от уныния и отчаяния избави, смирению, терпению, целомудрию и всему потребному в семейнем житии научи. Да тако, по воле Твоей, в любви и единомыслии поживше, сподобимся и будущия радости, идеже любы не оскудевает взирающим на сладчайший Лик Твой, и воспевающим Тя со Безначальным Твоим Отцем и Пресвятым Твоим Духом во веки. Аминь.