КЫДЗ МЕ ВИНАКÖТ ДУГДI ТÖДЧЫНЫ 15 страница
Александра Васильевна ваялiс пызан вылö сола тшаккез, огуреццез, яй капустаöн да мöдiк сёян, и, кыдз заговор керись, баитiс: деддэз, эд тэрмасьö пö, кад лоас, быдöс тöдны пондат.
Кöр пуксисö пызан сайö, Александра Васильевна тшöктiс босьтны рюмкаэз винаöн и горöтчис:
— Поздравляйтö менö, деддэз, — и лукавöя сiя дзарнитiс Мартыновлань.
— Мыйöн жö, Александрушка? — öтiк кылöн юалiсö деддэз.
— Председательöн деддэз, председательöн.
— А ми думайтiм... — горöтчис Фрол Степанович. Деддэз да Мартынов поздравляйтiсö Александра Васильевнаöс, быдöс пö керöм закон сьöртi и кöсйисö бур удж. А Дарья баб бобгис, кытчö пö только юрсö оз сюйышт. Оз ни пö сыись инька пет. Сё сылö етша, сё сылö оз тырмы. Сiя лöгöнмоз дзарнитiс Александра мича чужöм вылö и бöра горöтчис: «Лоан ли тэ кöркö инькаöн? Али öнi инькаэз мужиккезö пöртчöны, а мужиккез кагаэз пондасö ваявны?»
Гриша эшö öтiк лун гöститiс гортас. Мунiк панытас рытнас сiя пырис Александра Васильевна ордö. Дарья баб эз вöв гортын. И Гриша веськыта висьталiс Александра Васильевналö, что сiя локтiс татчö только сы понда и содтiс: «Ме не веж öмугöла зонка и тэ не нылочка, нем миянлö асьнымöс бöбöтлыны и сiдз вот пантасьлыны. Мун ме сайö жöник сайö!»
Александра Васильевна видзöтiс ласковöя Гриша синнэзö и думайтiс: «Вот и ме понда принц адззисис», — но горöтчис совсем мöдiкö:
— Господи, кышасин жö тэ менам юр вылö. Мый, тэныт нывкаэз ли мый ли абуöсь? Ме обыкновеннöй баба, да эшö умöль характера. Вот Наташа, сiя совсем мöдiк. Интеллигентнöй.
Гришалöн, кöр кылiс Наташалiсь ним, чужöм вылас чепöссис вир и горöтчис:
— Ме не Наташа дынö локтi, а тэ дынö. Мыйлö весь касьтывлыны Наташаöс?
— Да тэ вежöрт, кытчö тэ юртö сюйыштан, ме инька ни, ме жöник сайö петалi.
— А ме быдöс тöда. — Мöдiс висьтавны, что Наташасянь и кылiс, но аскадö сувтчис.
— Гриша, милöй, тырмас эта йылiсь баитны. Олам — видзöтам. Проверит ассит чувствоэз, медбы не бöбасьны.
Гриша мунiс Александра Васильевна дынiсь кымöра. И Александра Васильевна сьöлöмын тожö кольччис чушкасян зi. Сiя асьсö видiс, что Гришакöт баитiс чорыта и охота вöлi инькаэз моз горзыны, горзыны.
Х
Мартынов бертiс аслас удж вылö. Сы сьöлöм пытшкын Александра Васильевнакöт пантасьöм бöрын сё мыйкö чушкис и кытчöкö сiйö корис, нуöтiс, лэбтiс, и некыдз эз позь эта чувство бердiсь мездiсьны. «Но удж эм удж, кад эм кад — нiя лечитöны быдкодь шогöтiсь», — сiдз ас пондас думайтiс Мартынов.
Сотрудниккез, механизаторрез панталiсö Мартыновöс приветливöя, кыдз бытьтö сiя дыр кежö кытчöкö ветлiс и гажтöмтчöмась сы понда. Эта сiдз и вöлi. Кык год коста том инженер — спокойнöй, рассудительнöй, а кöр колö керны дело, дак чорыт — гленитчис нылö. Удж сiя ассис тöдiс и корис, медбы быдыс, кыдз колö, уджалiс аслас местаын.
Кыдз только Мартынов мыччисис контораын, медодз сiйö панталiс Наташа Неверова, лаборантка. Гришалö гленитчис эта нывка, сылöн рам характер, небыт голос, неперыт басни, гырись зелёнöйкодь синнэз, кöдна пыр мыйкö видзчисисö, и нельки мампас, кöда точкаöн сьöдöтiс шульга öмугöв увтас. Ветлöтiс сiя басöка, шытöг. Механизаторрез, кöдна ас коласаныс грубöя, мукöдпырся нёштöма шутитiсö, Наташа дырни чöлiсö. Нiя сы дырни нельки сералiсö-ваксисö гусьöнжык.
Мартынов тожö гленитчис Наташалö. Нiя неöтпыр öтлаын ветлiсö театрö, киноö. А кыдзкö Мартынов недыр кежö пыралiс Наташа ордö, кöда олiс том специалисттэз общежитиеын. Может бы, ны сьöлöммезын быдмис ыджыт чувство, если бы Мартынов эз пантав Александра
Васильевнаöс. Сыкöт пантасьöм бöрын Мартыновлöн гыркас быдсöн бергöтчис, сорасис.
Механизированнöй колонналöн мелиоративнöй отряддэз уджалiсö план сьöртi. Мартынов уджалiс, кыдз зверь, быд лун командировкаын — то öтiк отрядын, то мöдiкын. Узис етша. Умöльтчис. Мукöдпырся нельки бритчытöм пыравлiс контораö.
Наташалöн сьöлöм кылiс, что Мартыновкöт мыйкö керсьö. Öддьöнжык кымöра сiя вöвлi сэк, кöр ветлас гортас, но сiя полiс юасьны. Да и Мартынов дынас эз сибöт некытшöм юасьöмöн, пантасяс Наташакöт, висьталас «здравствуйте» и бöра котöртö гаражö, мастерскöйö или эшö кытчöкö.
Кыдзкö Наташалö локтiс письмо Савельева Сашасянь (Александра Васильевнасянь), кöда гижис аслас олöм йылiсь, юалiс, кыдз сiя уджалö, кöр мöдö жöник сайö петны, и сэтöн эшö гижöма, кыдз пö тiян сэтчин олö-вöлö Мартынов. И Наташа пондiс догадывайтчыны, что не Саша ли кидтiс Мартыновöс?
Наташа Неверова и Саша Савельева велöтчисö öтiк институтын, только Наташа кончитiс институт годöн бöрынжык. И кöр нiя пантасисö öтiк совещаннё вылын, нiя öтамöдныслö, кöть и не часто, гижисö письмоэз.
Сёр арöн Мартынов ветлiс областись совещаннё вылö. Кöр локтiс, мехколонналöн начальник корис сiйö аслас кабинетö. Начальник, эшö не пöрись, перыт мужик, орсан синнэзöн нёджжöвтiс Мартынов вылö и пондiс юасьны, мый бурсö вайис совещаннё вывсянь, и вдруг шваткис-горöтчис:
— Мартынов, кывзы, тэнат эшö пиннезыт озö висьö котрасьны рядовöй инженерöн?
Мартынов эз вежöрт, мый мöдö висьтавны начальник. «Уджала, ог дышöтчы. Механизаторрез кывзöны. Стул меным сылiсь оз ков», — котöртiсö думаэз сы юрын.
— Мартынов, жаль меным тэнö ас дынсим лэдзны. Но колö, — чорыта висьталiс начальник. — Тэ вежöртан, тэнат роднöй районын организуйтчö миян колонналöн виль участок. Управленнё тшöктö ыстыны тэнö сэтчин начальникöн. Партийнöй власттезкöт тожö согласуйтöм. Но дак кыдз, Мартынов? — начальник сибöтчис сы дынö, кисö пуктiс сы пельпон вылö и эшö содтiс: — Кад ни тэныт уджавны самостоятельнöя.
Мартынов чепöссис, синнэзыс гöгрöссялiсö и чорыта горöтчис:
— А тi менчим юалiт? Кыдз шусьö, менö метöг гöтралiт. А ме босьта и ог согласитчы. Сэк мый?
— Сэк мый? А нем. Ме тöда, тэ морт принципиальнöй. Да тырмас синнэтö сувтöтнытö, менö он сёй, абу чöскыт. Сэк, шуан, мый? А тэ коммунист, вот мый, — начальник паныт Мартыновлö видзис ответ и пуксис пызан сайö. — Вот эшö мый, талун-ашын шоччисян, мöдлун босьт менчим машина и гöнит аслат районö: тэнö райкрмись секретарь видзчисьö. А эшö, если панталан Александра Васильевнаöс, басöк сатаналö месянь поклон.
Этна бöрья кыввез начальниклöн кыдз öшöпекöн сöтiсö Мартынов спина кузя. Сiя перыта осьтiс кабинетiсь ыбöс, пуляöн петiс коридорö и чуть оча кымöс эз люкась Наташакöт. Мартынов эз и кор извиненнё, уськöтчис öтöрö. Наташа кинитчис öшын дынö и адззис, кыдз Мартынов кузь шаггезöн перыта мунiс улица кузя. «Но и но», — только и горöтчис сiя аслыс Мартынов йылiсь.
Мартынов локтiс гортö, кыскис холодильникись чорзьöм колбаса, кисьтiс рюмкаö коньяк, öтiк гулькöн сiйö ньылыштiс, курччöвтiс колбаса тор и водiс кровать вылö. Начальниккöт видзчисьтöм баитöм понiсь сылöн öшис душевнöй покой.
Мартыновлö быдöс вöлi вежöртана: отрядлöн начальник, виль удж, роднöй район. А кытшöм боксянь эстöн Александра Васильевна? Вот этö сiя некыдз эз вежöрт.
А дело вöлi сiдз. Округын мунiс партийно-хозяйственнöй актив и эстöн Александра Васильевна сувтöтiс вопрос севернöй районнэзын мелиоративнöй отряддэз организуйтöм йылiсь. А окружкомись секретарь висьталiс, что предложеннё лоас видзöтöм.
И этасянь виль организация керöмлö оссис туй. А кин лоас начальникöн, рекомендуйтiс мехколонналöн начальник.
Сы коста, кöр Мартынов куйлiс кровать вылын и одолейтiсö сiйö думаэз, кыдз пондас уджавны виль местаын, кыдз сiйö панталас Александра Васильевна, райкомын мунiс сы йылiсь басни.
Секретарь Лобанов сибöтчис Александра Васильевна дынö, нуöтiс сiйö отир дынiсь ылöжык, чикыртiс учöтик синнэсö и жагвыв горöтчис:
— Александра, — секретарь некöр эз величайт айнимнас председательöс. — Миян дело шогмö. Мелиоративнöй отряд миян лоас. И начальник эм ни. А тэ тöдан кинöс? Мартыновöс. Ме кылi, тэ сылö тöдса? — секретарь бöра чикыртiс лэчыт синнэсö и серöмöн видзöтiс Александра Васильевна вылö, видзчисис, кыдз примитас председатель сылiсь кыввесö. Кылöм тöдса фамиллё Александра сьöлöмö кыдз бытшкис, но не зубыта, а долыта, и сы чужöм кузя пондiс шоныта паськавны вир.
XI
Мартынов кык месяц ни уджалiс виль местаын. Виль дело пондöтiкö уджыс вöлi уна, но райком и райисполком отсалiсö сылö. Да и мехколоннаись начальник неöтпыр ни вовлiс районö, видзöтiс, кыдз уджалö сылöн «крестник» — сiя сiдз ас коласаныс шуис Мартыновöс.
Сибалiс Виль год. Отир мöдöтöны гортаныс ёлкаэз, лöсьöтчöны кольлавны не умöль важ год, пантавны вильö, кöдасянь видзчисьöны эшö унажык.
Мартынов, счастливöй, гордöй, райцентрсянь подöн лэдзчис гортö. Кöть öтöрын вöлi бимороз, сылö вöлi шоныт. Мороз вылын сылöн чужöмыс öгралiс пым вирöн.
Кöр сiя локтiс гортö, рытнас тшöктiс дядьсö пасьтавны виль костюм, кышавны орден, мöдöтчыны тёткасö. Кöр тёткаыс юалiс племянникыслiсь, мый понда нiйö сiдз тшöктö лöсьöтчыны, Гриша хитрöя серöмтчис: «Корасьны, тётка, корасьны».
Рытнас öкмыс-дас час гöгöр, Гриша дядьыскöт да тёткаыскöт мунiсö Александра Васильевна ордö.
Кöр пырисö керкуö, сэтчин пукалiсö ни колхозiсь парткомлöн секретарь, дед Фрол Степанович, Ольга, Емельян Ивановичлöн ныв, жöникнас, и эшö тöдтöмöсь старик да старуха. Гöссезöс панталiс ачыс Александра Васильевна, сiя тöдсöтiс Гришаöс айыскöт да мамыскöт.
Одзись керку угöлын сулалiс ёлка. Пызан вылын тырдоз: пежьялö госöн ососок, поднос вылын куйлö дзодзог, ордчöн — öмсö осьтöм, чуть не аршин кузя, фаршируйтöм судак, сэтöн жö ельдöггез, рыжыккез, огуреццез, яйöн шöма капуста, веж быгья сур, сюромка и уна мöдiк сёян-юан.
Но вот и эшö гöссез локтiсö — Егор Нестерович, колхозiсь главнöй агроном, иньнас.
Александра Васильевна висьталiс, что быдöс гöссез локтiсö, и корис пызан сайö. Мартынов пуксикас кыскис портфелись куим бутылка шампанскöйöн, сувтöтiс пызан вылö и пуксис ордчöн хозяйкакöт. Сашалöн аймамыс пуксисö нылö паныт. Кольлалiсö важ год, юисö шампанскöй, а кин и курытö. Шоналiсö. Горöнжыка пондiсö баитны. Сашалöн аймамыс видзöтiсö то Гриша вылö, то нывныс вылö, Дарья баб гусьöника сералiс öмугöввезнас.
Вдруг öтöрын кылiс машина шы и сувтiс öшыннэз одзö. Керкуö шумöн пырис Лобанов. Сiя ыбöс дынсянь горöтчис:
— У-у, невна эг сёрмы. — Часыэз вачкисö даскык час. Михаил Тимофеевич лэбтiс шампанскöйöн бокал, тшöктiс лэбтыны гöссезöс и висьталiс:
— Александра Васильевна, дона ёрттэз, гöссез, поздравляйта Виль годöн тiянöс. Эта годö миянлö колö керны унажык, нежели кольöм годö. Здоровье тiянлö, счастье тiянлö виль годын.
Гажöна панталiсö Виль год. Сёрнитiсö, шумитiсö. Гöссез буржыка тöдсасисö öтамöдныскöт.
Шыасис Мартынов. Тшöктiс рюмкаэзö кисьтны вина. Гöссез внимательнöя видзöтiсö сы вылö. Гриша чужöм вылын орсiс том, здоровöй вир, синнэз югьялiсö. Сiя сувтiс, сетiс поклон Александра Васильевна аймамлö, сыбöрын гöссезлö и горöтчис:
— Дона Василий Захарович, дона Ирина Гурьяновна (аймамыс Сашалöн), Дарья Петровна, гöссез, ми Александра Васильевнакöт (сiя тожö сувтiс) öтамöднымöс любитам и тiянлiсь корам соглассё йитны миянлiсь олан.
Гöссез коласын лэбтiсис шум. Нiя горöтлiсö:
— Благословитам, счастье да любитöм тiянлö.
Александра Васильевналöн аймамыс окалiсö нывнысö и Гришаöс. Дарья Петровна пернапасалiс, синнэзсис быгыльтчисö синваэз и бобгыштiс ныр увтас: «Енлö слава».
Александра Васильевна пуктiс кисö Гриша пельпон вылö, гажöна нёджжöвтiс гöссезлань и горöтчис: «Вот, донаэз, и менам принц локтiс. А тэ, Дарья баб, весь тöждiсин». Сiя окыштiс Гришаöс и корис юны ны счастье понда.
Öтöрын вöлi бимороз. Но быдлаын кылiсö гажа шыэз, сьыланкыввез, кытöнкö горöна орсiс гармонь.
ГАРМОНИСТ
Война вотöдз миян деревня богатсялiс, ловзис. Колхознöй ыббез вылын дöвьялiсö гырись шепа рудзöггез, нельки шогдiэз воисö, кöдна одзжык миян ойладорын умöля быдмисö, нёкрасисö паськыт роза зöррез, дзуллялiсö лённэз. Фермаэзын тыр пода, пруддэз вылын уялiсö дзодзоггез, уткаэз.
Керкуэзын пызан вылын тырдоз, погреббезын быгьясисö сюромкаэз. Деревняын уджалiссез уна, быдöс том отир. Олöны дружнöя, уджалöны боёка, бытшöма гажöтчöны.
Рытнас, уджалöм бöрын, том отир чукöртчасö колхознöй амбар дынö и медодзза петуххез китсасьöм вотöдз сьылöны да йöктöны. Да вот только сiя беда, деревняын гармонисттэз эз вöлö. Öтiк зонка Öртя Петя мало кужис важ венка вылын орсны. И то сiя вышитчис, корис, медбы сылö кеймисö.
Рыт сибалас и медбытшöм нывкаэз мунöны Öртя Петя ордö, корöны сiйö орсны гармоння вылын.
— Петя, Петька, Петюнька, петав жö невна кежö, кок пятаэз лудöны, йöктöны бы. Петюнька, бурмöт сьöлöммезнымöс, — ласковöй кыввезöн корöны Öртя Петяöс нывкаэз.
А Öртя Петя пукалö пызан дорын, пиньласьö, нюжласьö и кыдз бытьтö оз кыв, что сiйö кытсалöны. Или вышитчас, вышитчас да крест на крест горöтчас: «Ме бы локтi, да ог лок. Мыдзи. Чуннезö гадьсялiсö, ньöр митi [8]».
Нывкаэз кыдз локтасö, сiдз и мунасö. Öртя Петя винерик, неыджыт зонка, кытшöмкö нескладнöй, ветлöтö пиньласьöмöн, кок пятаэзнас мунiкас зыртö му, а юрсö видзö öддьöн чатырöн. Деревенскöй згальник сiйö нимкодялöма «Чатыра юра кузь пята».
Деревняын быдмис нывка Оксана. Не нывка, а горадзуль. Волькыт да небыт, кыдз тулысся бадь шатёк, юрсиэзыс — чочком виль кудель, синнэзыс — сöстöм шорись сöдз ва. Кыдз дзарнитан сы синнэзö, сiдз и вöян. А кыдз сералö! Кыдз ваксьö! Серöмтчас — золотоöн козьналас, ваксьыштас — сьöлöмлö долыт емöн бытшкас. Не öтiк зонка сы понда шогалö, бур вöттэз вöтасьö. Не öтiк пара син сiйö панталö и кольлалö. И Öртя Петялöн сьöлöмыс эта ныв увья косьмис. Но Оксана некинöс эз примечайт, некытшöм зонка вылö эшö гусьöн эз видзöт. Сы сьöлöмын эшö эз на öзйы би.
Кöр Öртя Петя кратайтчö, сэк нывкаэз керöны медбöрья хитрость — Оксанаöс сы дынö ыстöны. Нiя тöдöны, что Петя сы одзын рисьмö и, кыдз домалöм понок, сы сьöрын котöртас. И быль: Öртя Петя пиньласьö-локтö Оксана бöрын гармонняöн.
Öртя Петя пуксяс, амбар поспу вылö, долонь вылас сьöвзяс, не кывзiсь юрсиэсö гладьöтас, сыбöрын мыйкö дыр гармоннясö малалас, кывзас сiдз и этадз гармоння голоссэзсö и вöлись пондöтчас: перво мехсö кузя эд, вижгылясьöмöн, нюжöтас и только сыбöрын йöктöтан пондас орсны. И гармонняыс кыдз бытьтö асьсö Петяöс нерö:
Öртя Петя, Öртя Петя
Öрись пет,
Öртя Петя, Öртя Петя
Öшöпек,
Öртя Петя, Öртя Петя
Кузь голя,
Öртя Петя, Öртя Петя
Кузь пята.
И сiдз этö проглассö [9] орöттöг асылöдз някралö. А том отир сералöны да йöктöны, лишь бы гармоння шы вöлi.
А кöр медодзза петуххез кытсöвтасö, том отирöс кыдз тöвчикöн нöбöтас. Кин параöн, кин паратöг асланыс поззэзö котöртасö. Öртя Петя öтнас амбар дынö кольччас. Гармоння сюйыштас конувтас и пятаэзнас мусö зыртöмöн иньдöтчас гортас. И сiдз чуть не быд рыт Оксана нывкаэзлö отсалö — Петяöс орсны гармонняöн корö. И быд рыт гармонист гортас бертö öтнас. И мый Петя эта йылiсь думайтö, некин оз тöд.
И вот война. Мужиккез и зонкаэз мунiсö тышкасьны фашисттэзкöт. И медбöрын ни мунiс и Öртя Петя, кöть некин эз верит, что и сiя ковсяс война вылын. Мунiк панытас Петя кортöг рытывбыт йöктöтiс нывкаэзöс и шысеттöг мунiс гортас.
Война гымалiс не öтiк год ни. Деревня лöньсис. То öтiк керкуын, то мöдiкын герьялiсö инькаэз — похоронкаэзсянь. Öтiк-мöдiк мужиккез бертiсö гортö — кин коксö кольöм, кин кисö.
Нывкаэз öнi шочыника рыттэзöн чукöртчывлiсö амбар дынö. Нiя сьылiсö мöдiк сьыланкыввез — военнöйезö, а йöктöтны нiйö некинлö вöлi. Да и кытшöм ни йöктöм, кöр быд керкуын печаль да горе, кöр нывкаэз да бертöм война вывсянь инвалиддэз куим морт понда уджалiсö, кöр вöввез надсадасянь бороздаэзö усявлiсö.
Öртя Петясянь вöлiсö кынымкö письмо и сэсся кыдз гуö вöйис.
Оксана совсем невестасялiс. Эшö бытшöмжык лоис. Сылöн сьöлöмас öзйис би, кöда чепöссис петны, корсис шонтны, но вöлi некинлö. Öнi сiя вежöртiс, кыдз рыттэзöн котрасис Петя ордö и корис сiйö орсны гармонняöн, и сылö вöлi стыд. Сылö вöлi стыд, что сiя одзжык нем эз вежöрт, эз вежöрт Петялiсь шогöт. Том мортлiсь шогöт, кöдалöн нимыс — любитöм.
Оксаналö овны вöлi сьöкыт. Мамыс надсадасянь пондiс шогавны. Айыс öшис война вылын. Семьяын эшö учöтöсь куим вон да сой, уджавны сэсся некинлö.
Эта коста деревняö бертiс Макар Васька. Госпитальсянь. Зонка война вотöдз вöлi боёк да лöчыт. И война вылас пö неумöля асьсö мыччалöма — не весь морос вылас югьялöны не öтiк медаль. Макар Васька эшö буржыка öзйöтiс Оксаналiсь сьöлöмсö, и арнас шогалiсь мамыс благословитiс Оксанаöс жöник сайö петны.
— Сё жö керкуын лоас мужик. А то совсем кусiньтчан миян увья, — синваэсö чышкытöн горöтчис мамыс.
Арнас орсiсö негора свадьба. Макар Васька вöлi быдтас, и сiя локтiс овны Оксана семьяö.
Оксаналöн недыр югьялiс счастье: джын год бöртi жöниксö бöра босьтiсö война вылö, и кынымкö месяц бöртi, война конецас ни, локтiс похоронка — геройскöя пö пуктiс юрсö Чехословакияын народдэз освободитöм понда.
Победа. Войналö конец. Кинлö гаж, кинлö шог. Мужиккез сьöрсьöн-бöрсьöн бертiсö гортö. Кöть кöдна и инвалиддэз, но сё ни мужиккез. Деревня гажöна бöра пондiс ловзьыны да вочмыны. Том отир, кыдз война вотöдз, но уже мöдiк поколеннё, бöра пондiсö чукöртчывлыны колхознöй амбар дынö. Лоис и виль гармонист, кöда орсны кужис быдкодь мелодия. Амбар дынö петавлiсö и фронтовиккез, кöдна öтлаын томмезкöт сьылiсö боевöй походдэз йылiсь песняэз.
Кöр öксясö амбар дынö, кинкö мужиккез ли инькаэз коласiсь горöтчас: «А беднöйка Петя кытчöкö торксис. Первöй гармонист вöлi деревня вылын».
Год ни чулалiс война бöрсянь, и Петя йылiсь дугдiсö касьтывлыны.
Олан эз сулав, одзлань мунiс, керис ассис дело. Война бöрсянь кöртассис мöдiк гожум.
Рытъявылас Оксана пукалiс посöдз вылын и орсiс зоночкаыскöт, кöда кольччис Макар Васькасянь. Вдруг зоночкаыс чепöссис, бергöтчис и чуннезнас мыччалiс улица вылö.
— Во дядя... дядя... у-у... дядя, — Оксана дзарнитiс улица вылö, и быль, кинкö увланьсянь, Гладьвидз увтсянь, перыта шагнялö. Веськыт киас видзö ыджыт чемодан, шульга киас тöдтöм ящик, гимнастёрка вылас рытся шондi увтын югьялöны золотоöн уна орденнэз да медаллез.
— Кин жö бы сiя? — старайтчис тöдны Оксана. — Кин жö бы сiя?
Военнöй, не учöт, не ыджыт, веськыт мыгöра, стройнöй, чатыра, боёка шагнялiс одзлань. Оксана видзöтiс сы спина вылö и старайтчис тöдны, кин сiя. Кинкö тöдса и не тöдса? Кин жö сiдз чатырöн юрсö видзис? Кыдз бы эз вынсьöтчы Оксана, некыдз тöдвылö эз усь.
Мöдiк лунö деревняыс быдсöн уже тöдiс, Öртя Петя пö локтöм. Германияын служитöм. Морос вылас орденнэзыс да медаллезыс быдса иконостас. Да сэтшöм бытшöм лоöм, стройнöй, нач не Öртя Петя.
Öтiккез баитiсö, вот эд мый вермас керны армияын служба. Кинöс кусiньтас, а кинöс и вочмöтас. Öтiк осколок, пуля пö абу гыжйöвтöм. Да эм жö пö шрам веськыт рожабан увтас, баитiсö мöдiккез. Дöнзьöм жö сылö войнаыс вылын. И пленö шедлöм, да пышшöм, партизанитöм, сыбöрын быдсöн Европасö шагнялöм, а война бöрас Германияын служитöм. А челядь öтамöдныслö кыв оз сетö шуны, висьтасьöны — орденнэзыс да медаллезыс пö сизима, а Славаэзыс — куима. Старшöй сержант. Во, герой! А гармонняыс сылöн кытшöм? Только вирдалö быдкодь рöмöн, а ряддэзыс нёля и кытшöм басöка орсö, быд проглассö тöдö. Во!
Эта басниэз понсянь Оксаналöн чужöмыс то öзйис, то бледöтiс. Сылiсь сьöлöмсö пидзыртiс, кыдз кытшöмкö керис ыджыт грех.
— Ас юрнам эг думайт, нывкаэз понда котраси Петя ордö и вежöрттöг кешитчи зонка чувствоэз вылын. — Деревня синнэз увтiсь некытчö он дзебсись, а Петякöт колас пантасьны. Мый нö лоас? — полöмöн думайтiс Оксана.
Но пантасьöм лоис видзчисьтöм. Неделя кык бöрын Петя ачыс локтiс Оксана ордö. Пырикас полать юр бердö данасис-люкасис и шутитöмöн горöтчис: «Полатьыс тiян лажмалöм». Оксана серöмтчис. Челядь тожö. Нiя тöдiсö, что Петя вöлi медучöт деревняись зонкаэзся.
Сiя смелöя пуксис лабич вылö и гажöна серöмтчис. Оксана и мамыс видзöтiсö Петя вылö. Быль, нач мöдiк. Топ айыс кодь жö лоöм: ыджыт, веськыт, ласковöй, бытшöм.
— Оксанка, мый нö ми пукалам. Мун жö котöрт погребас, вай ельдöггез да рыжыккез, сюромка петкöт. Вон кытшöм гöсь локтiс. Ой-ёй, ой-ёй, кытшöм тэ, Петя, лоöмыт, быдмöмыт, сирзьöмыт, кыдз покойнöй айыт жö, — тарзис Оксаналöн мамыс.
— Да нем оз ков. Ме öнi только гöститi Супоней дядьö ордын.
— Поди, эшö невна тöрас? — шыннялöмöн паныт горöтчис старуха.
Петяöс пуксьöтiсö пызан сайö кыдз дона гöсьöс. Вердiсö-юкталiсö. А винасö только öтiк рюмка юис, ме пö ог сыкöт тöдчы.
Сёрнитiсö, висьтасисö, юасисö? И Петя дипломатиятöг чорыта шваткис:
— Оксана, ме только тэ понда гортö локтi. Менö эшö колисö служитны.
Эта бöрын сёрни дзугсис. Керкуын лоис неколана шы не тöв. Эта коста лöньсö дзугис Оксаналöн зоночкаыс.
— Мама, дядя... дядя... — и чуньнас мыччалiс Петя морос вылö, кытöн югьялiсö орденнэз да медаллез.
Оксаналö, кыдз мыйкö сы бердiсь мезмис, локтiсö сылö колана кыввез:
— Петя, ме не öтнам. Менам зон.
— Ме тöда ни. Сiя и меным зонöн лоас. Война... Мый керан.
ЗУРАСЯН КАДСЯ ОШИБКАЭЗ
Сельскöй хозяйстволöн управленнё менö командируйтiс «Югыт туй» нима колхозö отсавны дзимлявны урожай.
Кöр ме локтi колхозö и пондi юасьны, кыдз мунö страда, председатель норöна висьтасис, что погоддя умöль, страда мунö öддьöн сьöкыта. Комбайннэз ыббез вылын сибдöны, тракторрез вöйöны, кизертчис му и туйез разьсисö. А если висьтавны öтiк кылöн — беда, стихия.
Ме пондi одзлань интересуйтчыны, а эмöсь ли колхозын трудовöй династияэз, организуйтöмöсь ли семейнöй подряддэз? Эта коста председатель кабинетö пырис колхозiсь парткомлöн секретарь. Председатель добрöя шынньöвтiс и мыччалiс кинас секретарь вылö.
— А вот висьталас, сiя организуйтiс семейнöй подряддэз, ачыс и пестуналö нiйö.
Парткомлöн секретарь висьталiс, что медылiсь бригадаын, кöда почти вöр шöрын, уджалöны семейнöй подряддэз. Если эм тэнат мог, ветлам, аслат синнэзöн видзöтан. Секретарь серöмтчис и содтiс: мужиккез пö богатыррез, молодец молодецкöт ордчöн пукалöны.
Секретарьлöн медбöрья кыввез бöрын менам моросын öзйис интерес. Эг пондö видзчисьны мöдiк лун, ми мунiм висьталöм бригадаö.
Кадыс вöлi луншöр. Кымöрсянь кисьтiс, кыдз ар коста, поснитик зэр. Сюэз ляпкисьöмась, водöмась му вылö. Кытчö бы эн видзöт — быдлаын ва, нять, быдöс горзö.
Сизим километра бригадаöдз миянöс кыскис вездеход час мымда. Деревнясянь веськыта мунiм ыб вылö, кытöн уджалiсö комбайннэз. Пыримö машинаöн топ механизммез дынöдз. Кык комбайн пöрöтiсö сю, öтiк сулалiс.
Сулалiсь комбайн дынын вöлiсö куим морт, öтiк ны коласiсь гуддисис ременьöн, мöдiк — катыльтiс ходовöй колесо, а куимöтыслöн комбайн увтсянь тыдалiсö только сапоггезыс.
— Олат-вылат, молодеццез, — горöтчис парткомлöн секретарь. — Мый нö сулалат? А ме вот только неважын тiянöс ошки округись представительлö, — сiя мыччалiс юрнас мелань. — Мыся, вот миян эмöсь молодеццез, нiйö некин оз падмöт: не ен, не чёрт.
Комбайн увтiсь перыта петiс неыджыт, топытик морт. Юрыс вевттьытöм, дзугсьöм рыжöй юрсиэзсянь чужöм вылас рудзалö ва. Ме эшö казялi, что веськыт киыс сылöн öшалö, кыдз плеть. Сiя сибöтчис миян дынö, мöдiс шульга кисö сетны здоровайтчыны да казялiс, что киыс мазутöсь, лэдзис бöр.