КЫДЗ МЕ ВИНАКÖТ ДУГДI ТÖДЧЫНЫ 17 страница
— Сына глукар, беляков стрелять пошла.
Этна старуха кыввезсянь отир шай-пай керсяс. Чочком офицер перво тожö öшас, сыбöрын стекляннöй синнэсö сувтöтас, гöрдöтас и бöбмöм голосöн горöтас:
— Ведьма, тэ мый висьталiн?
Револьверсö кыскас кобурасис и пондас отир вылö мунны.
— Дак тi быдöнныт гöрддэз понда... Быдöннытö вия, джагöта, керкуэзнытö сота...... У-у-у, пырттöм племя! ...
Никипер адззö, нач шогмö неладно, шапкасö юр вывсис босьтас, сибöтчас офицер дынö, сувтас пидзöссэз вылас сы одзын и пондас баитны:
— Господин офицер, эн лöгась пöрисьыс вылö, сiя висьталiс, что сылöн зоннэзыс мунiсö дозмöррез да уррез вийны. Вöравны мунiсö — государстволö пушнина колö.
— Кытшöм эшö государстволö? — офицер вирдыштiс синнэзнас.
— Да миян, миян государстволö, батюшка.
— То-то жö... Офицер оз вежöрт, мый медбöрья старик кыввезын пуктöма и невна кежö лöньсяс. Сыбöрын пондас бöра горöтлыны, что Советтэзлö конец, правитель öнi Колчак, и быдöнныс долженöсь кеймыны сылö. А кин не ны дор, муö ловйöн дзебасö.
Отир гогинялiсö юррезнаныс, бытьтö соглашайтчисö.
Эта коста бöб зонка Христофор галопöн вайöтас офицер одзö кык бура вердöм воронöй вöв. Зонка чеччöвтас вöв вылiсь, сувтас чочкоммез одзö и то мый шваткöтас:
— Господин офицер, вот тэныт козин. Миян Парамон козьналö, сiя миян деревняын меддобрöй.
Отир только юррезнаныс гогинялöны, не то ошкöны, не то кулитöны Христофорлiсь виль проделка.
Офицер радöн видзöтас бур вöввез вылö, лапкöтас зонкалiсь кисö да горöтчас:
— Молодец. А öнi сбруя, кошова адззы и доддяв. Чожа... Марш!
Христофорлö только эта и колöма. Кузь плетьöн сöтас вöввез бок кузя и ны коккез увтсянь только тшакыльöн лым-бус вывланьö каяс.
Богатей Парамон деревняаныс вöлöма меднадз морт, видзас кынымкö батрак. И Христофор сылö батрачитас. Кöр чочкоммез локтасö Юкся деревняö, Парамон босьтас пишаль и мунас ны дынö. Христофор стрась лöг вöлöма Парамон вылö, лун и ой уджалöма сы дзез кынöм вылö, а вердас öтiк боль ва похлёбкаöн и некöр оз вештiсь. Вот сылiсь и петкöтас конюшняись медбур вöввесö и сылiсь жö доддялас кошова.
Кöр офицер сё эшö горöтлас да ыждалас, медбы мужиккез локтiсö вöрись и мунiсö воюйтны öтлаын чочкоммезкöт паныт советскöй властьлö, лым-бусöн бур кошоваын бöр ни локтас-гöнитас Христофор. Офицер ошкас зонкаöс и эшö пырас солдаттэзкöт керкуö юны вина.
А Христофорлö юрас пырасö ни виль думаэз. Сiя зэлöтас веммесö и веськыт рядö сувтöтас планнэз, мый пондас керны одзлань. «Парамон-дармоедлö батрачитi — эз вешты — вöввез, сбруя, кошова петкöтi; айöс чочкоммез мучитiсö — тожö вештiся. Только вот кыдз?» — думайтас зонка.
Чочкоммез петасö керкуись. А Христофор ны дын ни. Сiя пондас вöзйисьны, медбы сiйö босьтiсö ямщикöн, ачыс нiйö повзьöтлö, öтöрын пö пемыт да кöиннэз табунöн койöны. Чочкоммез согласитчасö.
Офицер да кык солдат пуксясö кошоваö, мöдiк кык солдат розвальö, кöдöн деревняö локтiсö. Чочкоммез винасянь да тагья брагасянь нач коддзöмась, пондöмась сьывны-ряксыны. А Христофор эта коста веммесö зэлöтö, думайтö, кыдз жö вештiсьны. И казявтöг юрас аркмас план.
— Тр-р, тр-р! Сулалö воронкоэз! Господин офицер, ме пукся вöлыс вылö, вöввез кöиннэзöс кылöны, пеллезнысö дзебöны, а то пондасö кидласьны.
Офицер только кинас öвтыштас, пуксьы пö, а ачыс кобураись револьвер кыскас. Христофор кыдз тупыль быгыльтчас кошовка козла вылiсь и пуксяс верзьöмöн доддялöм вöв вылö. Сöтас вöввез бок кузя плетьöн, шутньöвтас и лым-бусöн ыскöвтас кошовка öрсялöм [10] вöр туй кузя. Мышкас мунiсь вöввез тожö öдззасö гöнитны.
Чожа казённöй мельнича... Векнитик пöлiньтчöм пос. Вылына лэбтöм плотина и ыджыт шыбыллез. А плотина одзын пруд вылын стекло кыза йы.
Зонка сё буржыка гöнитöтö вöввез да личыт пуртöн гусьöник вундалö гужиэз. Чочкоммез нем оз казялö, сё сьылöны. Зонка пымалiс — вот-вот спинаас пуля садитасö, но чочкоммез готсьöны-ваксьöны.
Вот и мельнича. Вот и пос. Зонка эшö сетас вöввез бок кузя, пос весьтын вирдыштас неöтпырись пуртöн шöрт кыза ни гужиэз кузя. Вöввез мезмасö оглобляэз бердiсь и пуляöн чеччаласö пос кузя. Кошовка шыбыльтчас поперёк векнитик пöлiня пос вылö, бöрись вöввезыс данасясö кошовка вылö и быдöнныс берездасясö прудö. Йыыс чегас, потласяс, и чочкоммез пондасö вöйны. Тöлiсь югöр увтын нiя ряксасö, грöзитчасö, виклясясö йы вылын и вöясö. А Христофор сувтöтас вöввез, бергöтчас нылань, пернапасасяс и гусьöн горöтчас: «Аминь!»
Джын год чулалас. Деревняын йöз бур кылöн и умöль кылöн касьтывлöны Христофор-згальникöс, пуктiс пö юрсö беднöйка. А Христофор Йöг посадын ни, краснöй гвардия отрядын — Колчаклiсь бандиттэзöс резö-паздö.
Кöр басниыс висьтассис, избушка ыбöс дзуртöмöн оссис и пырис неыджыт, кузь тоша мужик, а киас öшалöны аршин кузя кык щука.
— Ай-да Христофор, тэ и чериавны мастак, — кинкö горöтчас миян коласiсь.
Мужик, конечно, оз вежöрт, что вот только сы йылiсь мунiс басни. Сiя серöмтчис, мыччалiс щукаэз вылö и горöтчис: «Дело, а öнi — аминь», — и пондiс пöрччасьны.
НИНДУЛЛЕЗ
Ме газетаись корреспондент. И сiйöн ме часто ветла колхоззэзö, промышленнöй предприятиеэзö, пантасьла отиркöт: колхознöй ыббез вылын уджалiссезкöт, одзын мунiсь подавöдитiссезкöт, предприятиеэзiсь рабочöйезкöт, геологгезкöт и уна мöдiк йöзкöт.
Но веськыта висьтала: ог куж грешитны паныт правдалö, бур отир коласын пантасьлöны эшö öтiк-мöдiк мортоккез, кöдна бы оча чунь оз вартö, а пользуйтчöны бы сiя жö доброöн, кыдз уджалiсь отир, кошшöны кокнит да басöк олан, эмöсь и сэтшöммез, кöдна думайтöны только асланыс слава да авторитет йылiсь.
Ме неважын вöлi передовöй «Одзлань» нима колхозын. Одзжык эта колхозыс шусис «Кöс логöн». Сэтчин пантаси колхозниккезкöт, виль, неважын строитöм каменнöй клубын, и нiя касьтылiсö лöгöн и смехöн ассиныс председательнысö.
А этö историясö бура тöдiс колхозiсь ветеран, Макар Петрович, и ме гижи сылiсь висьтасьöмсö.
«Кöс лог» нима колхозын председательöн кык год ни уджалiс быдöнлö тöдса Ниндулёв. Сылiсь важын ни гильöтiс сьöлöм гöгöрсö öтiк дума — кыдз бы шедны районiсь начальстволöн почётнöй списокö. Сы синнэз одзын важын ни бергалiс аслас портрет, кöда лоас печатайтöм газетаэзын, да эшö сэтшöм гора нима статьяöн «Сельхозартельлöн славнöй вожак». Эна думаэз чöскыта пöжсисö сы моросын. Ниндулёв юрыс чездытöдз думайтiс, кыдз и мый керны, медбы кöть начальство сiйö радейтiс. Но нем юрас эз пыр.
Председатель киэсö сюйыштiс карманас и пондiс чывны одзлань-бöрлань пустöй кабинет кузя. «Тыдалö, пыр колас пукавны эта важ председательскöй кресло вылын, кытчöдз сивилёнö оз сетö. — Видiс асьсö Ниндулёв. — Кöть бы невна уджалыштны кытшöм-нибудь районнöй руководительöн. Вот бы мыччавны ассим ум, сiйö меным не одзöсавны».
Ниндулёв син вылö усяс стенаö лякöтöм мöймуся плакат, кöдалöн доррес косясьöмась — нето шыррез, нето тараканнэз йирöмась. Плакатас гижöмась: «А тэ кöдзан кежö готов?»
Председатель лыддьöтiс, и юрвемыс кыдз бытьтö югдiс. И сэк жö колана думаöдз локтiс: «Эх, юр, юр, шалитны тэ пондiн, кешитчан ме вылын, — тюкöтiс чуньнас госа кымöс кузя, — мыля одзжык эн висьтав? Вот-вот пондöтчас кöдзан кампания. Сэк бы и мыччавны ассим способносттез, мыччавны кин сэтшöм Ниндулёв. Кöдзыштны бы районас медодз — вот тэныт и слава, почёт, выдвиженнё. А кыдз этö керны?»
Ниндулёв абу велалöм кошшыны резерввез колхознöй хозяйствоын. Сылöн вöлi простöй правило: орöтны-корны, адззыны мöдiк хозяйствоись — сэтчин буржыка тыдалö и киэзöн позьö пешлыны.
Председатель кузь думаэз бöрын шынь-шынь аслыс серöмтчис и пондiс юрас бергöтлыны: «ежели бы содтыны куимдас трактор дынö только невна-невна, кöть кык-куим — и дело петас. Но вот задача, кытiсь нiйö босьтны и керны сiдз, медбы районiсь начальство эз тöд?» Сiя пондiс ассис тупика чуннесö кöставны, бöрйыны организацияэз, кöдналöн эмöсь тракторрез. Но вот беда, нiя отсалiсö ни, а Ниндулёв ныкöт эз вештiсь. Пондыв эшö корны — ныр кузя вачкасö. «Нем, натьтö, оз пет. Некинлiсь корны тракторрез», — ыш ловзисис Ниндулёв.
Эна сьöкыт думаэзiсь саймöтiс сiйö öтöрын горöтлöм. Ниндулёв чеччöвтiс местаись, чужйис стул кузя и дзарнитiс öшынö.
Öтöрын, правленнё дынас, старик Макар Петрович трактористтэз вылын ыждалiс. Кузь, шапкатöм, уна годдэзсянь кусiньтчöм старик тюкöтiс желля бедьöн му кузя и, кыдз сабан кузя, жванöтiс-горöтлiс:
— Ах тi, дубинаэз! Вот ме тiянöс, шельмаэзöс, кыдз этöн ньöрнас матегала, сэк дугдат рызйыны. Мый öнöдз шляйтчат? Мыля не ыб вылын? Эттшöм техника сулöтатö, ылöстöм юррез. Му пöимсялö — косьмö!... Кытшöм эшö мазь абу? Отирыслöн эм, гöрöны, кöдзöны.
Макар Петрович горöтлöмсянь кузя кызöктiс и сыбöрын кинитчис бедьнас трактористтэз вылö. Механизаторрез нюжласисö шондi увтын керрез вылын и готсисö сы ыждалöм вылын.
— Деду, председательсö матегав, сылöн кучикыс öшкася кызжык и кадж гöгöрыс небытжык. Мед сiя кинлiськö умсö одзöстас да тракторрезлö масло ваяс.
Ниндулёв лöгасис, кыдз механизаторрез кеслöны пиннезнысö сы вылын. Сылöн ныр йылыс гöрдöтiс, няпыртiс тупика чуннесö кулакö и пондiс грöзитчыны öшын пыр ны вылö: «Ах тi, мавтöм бессэз, ме йылiсь сiдз... Ме тiянлö мыччала, мый колö одзöстны...» И вдруг сылöн талун юрвемыс мöдöтпыр югдiс: «Ба, стариклöн племяшыс ыджыт начальник. Кыдз этö одзжык тöдвылö эз усь?»
— Эй, Нюшка, кор старик Макарöс ме дынö. Чожжык, бок пöжись, öт кокыт татöн, мöдыт — сэтчин! — горöтiс сiя сторожихалö.
— Öддьöн эн тэрмöт, уся эд, — горöтчис узьöм синнэза техничка и вижгыльтiс öтöрö.
Кынымкö минута бöртi дед пукалiс председатель одзын. Ниндулёв пырöтан синнэзöн видзöтiс Макар Петрович пöрись синнэзö, сыбöрын пиннесö векыштöмöн серöмтчис (дед одзжык некöр эз адззыв, кыдз сiя сералö) и орсöмöн пондiс ольсавны сёрни.
— Дона Макар Петрович, натьтö, важын ни эн гöстит племянникыт ордын?
Макар Петрович дивуйтчöмöн видзöтiс председатель вылö и старайтчис вежöртны, кытчö сiя кусiньтö. Дедöс эшö öддьöнжык дивуйтiс сылöн виа голос.
— Мый эта, допрос? — чорыта горöтчис старик.
— Мыля жö допрос... Тi менö обижайтат, дона Макар Петрович. Ме колхознöй пенсионеррез понда заботитча, думайта ны йылiсь.
— Годся унажык ни, натьтö, эг вöв... Некöр меным гöститöтчыны, кытчöдз эшö прокö эм — уджавны колö. Вон Шарыбас сваль йöрыс пöрöм и некинлö дело абу. Вочны муна, — сiдзжö чорыта баитiс дед.
— Но дак вот, Макар Петрович, эн тöждiсь, йöр вочамö. А талун тэ мунан гöститны племянникыт ордö.
Эта бöрын Ниндулёв лэчыта видзöтiс Макар дед вылö и лукавöя содтiс:
— Правленнё тэнö ыстö гöститны.
Ниндулёв эшö матöжык сибöтчис дед дынö и содтiс, кыдз бытьтö ыджыт государственнöй тайна.
— Вежöртан, Макар Петрович, — джын голосöн бобгис сiя, — ме сетi кыв районiсь руководстволö медодз кончитны кöдзан кампания.
— А колхозниккезлiсь юалiн? — паныт горöтчис дед. — Эн поперегась, — пизис Ниндулёв, — вежöртан, эта лоас район понда примерöн. Кыдз бы буржыка висьтавны, миян сьöртi пондасö равняйтчыны мöдiк колхоззэз.
«Ой и плут, но и сярзьö. Натьтö, равняйтчасö миян сьöртi, отирыс кöдзны ни петiсö, а миян техника мавттöг сулалö», — думайтiс дед.
— Вежöрт, Макар Петрович, эта миян колхозлö ваяс слава, а миянлö тэкöт — почёт. Но перво колö учöтик отсöт, кыдз шуöны — страховочка. А страховочка — законнöй дело бур хозяинлöн. Тракторрез не ловьяöсь, жугалöны. Учöтик резерв бы вöлi и дело бы бур вöлi. Тэнат племянникыт ыджыт начальник, юра морт, тöдö миянлiсь, хозяйственниккезлiсь, нуждаэз. Öтамöдлö отсöт — вот миян обществолöн закон. Племянник тэнат веськöтлö ыджыт предприятиеöн, мый бы сылö чапкыны миянлö кык-куим трактор? — Ниндулёв öвтыштiс кинас, кыдз бытьтö быль, тракторрез бабапель гöн сьöкытаöсь.
Дед вежöртiс Ниндулёвлiсь баснисö. Сiя мöдiс поперегавны сiйö, что и сiдз тырмасö тракторрес, ежели буржыка ны вылын уджавны. Да кытчö тэ. Ниндулёв не сэтшöм морт, медбы сыкöт вермасисö.
— Дона, Макар Петрович, мийö быдöнным патриоттэз, быдöнным пессям бур дело понда. Öнi не кад гарйисьны, кытöн бур-умöль. Да и погоддя кöсйöны умöльö.
— Кыдз жö умöльö — поперегалiс старик, — радио висьталiс, что как раз лоас погода крестьянскöй удж понда бур.
— Радио... Верит тэ öмтöм болтунлö. А вот менам научнöй, долгосрочнöй прогноз, сэтчö гижöмась, что умöль.
Ниндулёв кыскис пызанiсь бумага и синнас кваркыш эз кер, бöбöтiс пöрись мортöс.
Председатель перыта чеччис местаись и кинас мыччалiс, что баснилö конец. Нöш кодь кулакнас жвангис пöввезiсь забор кузя, кöдöн вöлi янсöтöмась кык жырыс, и властнöя горöтчис: «Эй, Прошка, кытöн тэ, бöра чезнитан? Ноко, чеччы! Öт кокыт татöн, мöдыт — гаражын. Макар дедкöт гöнитат городö», — прикажитiс Ниндулёв аслас шофёрлö.
... Макар Петрович городын. Прошка веськыта вайöтiс дедöс куим сувда керку дынö, кытöн уджалö сылöн роднöй племянник. Дед дыр жöдзис ыджыт керку одзын и думайтiс: пырны или не пырны. Сыбöрын öвтыштiс кинас и, ныр увтас горöтчис: «Адззисьлам кöть».
Пырисö керкуö. Керку пытшкын югыт, гажа, паркетнöй джодж вылö ольсалöмась дона ковёррез. И эта керкуын сылöн племянник медглавнöй морт. Не весь Макар Петрович, неграмотнöй крестьянин, одзжык пессис гöрд добровольческöй отрядын Советскöй власть понда, эта город понда. А öнi сылöн племянниккез, внучоккез — инженеррез, учёнöйез. Этна думаэзсянь стариклöн сьöлöмыс небзис, синнэзiсь быгыльтчисö синваэз:
А вот и племянниклöн приёмнöй. Приёмнöй жырын шы не тöв. Стенаэз пöлöн кык ряд пукалöны отир и быдöнныс гырись, польдöм портфеллезöн. Öтiккез сунасьöны, мöдiккез баитöны джын голосöн кытшöмкö машинаэз йылiсь, куимöттэз жöдзöны дыр пукалöмсянь, а öтiк, ыбöс бердас ни, грузинскöй усока морток, сiдз и норовитö нёджжöвтны замок осьта пыр.
Учöтик пызан сайын пукалö öддьöн бытшöм нывка. Сiя, кыдз артистка, орсö, лэбталö телефоннöй трубка аппарат вылiсь и отвечайтö öтiкö: «Сылö некöр».
Дед пуксис угöлö. Пукалiс джын час, но некин сы вылö дзар эз кер, некин сылiсь нем эз юав.
А племянникыс кабинетö некин эз пыр, не эз пет. «Быль, тыдалö, öддьöн сылö некöр, заседаннё, натьтö», — думайтiс Макар Петрович. Сылö жаль лоис весь кадсö чулöтны. Сэсся тöдвылас усис Шарыбись вочтöм йöр, видiс асьсö, что кывзiс Ниндулёвöс. Дед чеччис местасис, сибöтчис секретарь дынö и висьталiс, что сылöн эм срочнöй дело начальник дынö.
Нывка юрсянь кок увтöдз меряйтiс дедöс и нёштöма нюмыртiс öмсö. Макар Петрович нёджжöвтiс аслас хлопчатобумажнöй вешьян да кирзовöй сапоггез вылö, но нем син вылас эз усь сэтшöмыс, медбы позис сiйö осудитны.
Дед эшö висьталiс нывкалö, что сылöн срочнöй дело. Нывка трекнитiс кольта юрсиа юрнас и кыдз бытьтö сьöвзис стариклö: «Пенсионер, а сэтчö жö пелитчö, кытчö тiянöс оз корö». Сiя югнитiс öмтырья пиннезнас и мыччалiс синнэзнас польдöм портфеля пукалiсь отир вылö. Стариксö некин эшö сiдз эз öбидитлы. Эстöн, племянникыс приёмнöйын, первуись сылö кыдз бытьтö пельбокас вачкисö. Настроеннё öшис, но сэтöн жö сылöн и смелость лэбтiсис. Сiя веськöтiс пöрись спинасö, лэбтiс вывланьö дзормöм юрсö и, кыдз богатырь, иньдöтчис кучикöн вартöм ыбöс дынö. Сiя чорыта няпыртiс бронзовöй вуг и дёрнитiс ас вылас сьöкыт ыбöс. Кабинетас пырикö казялiс, кыдз нывкалöн повзьöмсянь гöгрöссялiсö синнэс, а грузинскöй усока морт мяч моз чеччöвтiс бокö. Дед пырис кабинетö и перво шай-пай керсис богатствосянь. Но сiйö некин эз казяв. Отир, кöдна гöгöртöмась племянниксö, готсисö-ваксисö кытшöмкö лöчыт басни вылын, и сы дынöдз нылö некытшöм дело эз вöв.
Племянник пукалiс ыджыт пызан сайын. А сы одзын быдса телефоннöй станция: куим нето нёль телефон. Сiя кыз голосöн горöтлiс: «Вот, каналья, молодец, просто артист. Ноко, Филипп Кузьмич, эшö сьöлöм бурмöт!» Учöтик, плеша морток вöснитик голосöн пондiс висьтавны кытшöмкö восточнöй история, — и бöра готсьöм.
Дед пукалiс и думайтiс, кöр жö нiя уджалöны. Но вот пондöтчисö. Дедлöн сьöлöмыс пуксис местаас.
Племянникыс перво öтiк телефон трубка босьтiс и кинöскö öддьöн видiс кытшöмкö кöрттуввез да шуруппез понда, мöдiк трубкаö горöтлiс, мед сылö эз мешайтö уджавны. Перво старик кывзiс, мый йылiсь племянникыс баитö, старайтчис вежöртны, кыдз сiя решайтö ыджыт вопроссэз, а сыбöрын артсис öшис, и юрыс пондiс дикмыны сiйöн, что шуруппезын некытшöм государственнöй дело эз адззы. Макар Петрович пондiс гильöтны вемсö, кин вылö жö вачкисьö сылöн племянникыс. И вöлись тöдвылас усис — колхознöй диспетчер Ваня Гайкин вылö. Только сыын мöдкодьыс сiя, что Ванялöн кабинетыс мазутöн мавтöм и öтiк телефон. А телефонö горöтö сiдз жö, кыдз и племянникыс.
Вдруг аппаратын горöна, кузя пондiс триньгыны звонок. Племянникыс босьтiс трубкасö, юрсö мышкыртiс и джын голосöн пондiс бобгыны: «Кывзы жö, мил... Валентина Игнатьевна, талун совсем некöр... Эн беспокоитчы, керам... Öнi? Некыдз оз туй. Менам совещаннё, решайтам ыджыт вопроссэз».
А отир, кöдна пукалiсö сы гöгöр, бöра пондiсö висьтасьны гажа историяэз. Стариклöн сьöлöмыс гудыртчис. Чеччис местасис, сьöвзис и мöдiс гусьöник петны кабинетiсь.
Эта коста кабинетö пуляöн пырис кай ныра морток и дрöжитан киэзöн сюйыштiс начальник ныр одзö газета.
Отир дугдiсö серавны. Нiя осьтöм öммезöн мыйкö дырна видзöтiсö повзьöм морт вылö, а сыбöрын кинитчисö видзöтны газета вылö. Быдöнныс öтiк голосöн нюжöтiсö: «Фельет-о-о-н!»
Макар Петрович казьмöтчытöг петiс кабинетiсь. Лэдзчис первöй этаж вылö. А эстöн книга вузалан киоск дынын очередьын сулалiсö отир, небисö газетаэз. Перво пеллезöдз локтiсö торья кыввез: «Правильно. Аскадö постановленнё петiс. Колö лэбтыны сельскöй хозяйство». А кинкö горöна ваксьыштiс и горöтчис: «Видзöтö жö, видзöтö, фельетон. Но и бура матегалöмась начальникнымöс. Сiдз и колö, асьсö гöгöртiс подхалиммезöн да бюрократтэзöн и ачыс сэтшöм жö лоис».
Макар Петрович тожö небис газета, а рытнас сiя пукалiс ни правленнёын.
Ниндулёв одзын куйлiс павдöтöм тöдса газета. Сiя нервнöя няпралiс киэзсö. Сыбöрын дзар керис дед вылö и виньдöм голосöн юалiс: «Но, кыдз гöститiн?»
Макар Петрович зэгнитiс дзор юрнас и лöгöна вирдыштiс пöрись синнэзнас.
— Менам племянниклöн юрыс быгалöма. Сы местын бюрократ пукалö. Тэ кодь жö.
Председатель кватитiс кыкнан кинас плешсялöм юрсö и пондiс, кыдз мывкыдсис öшöм морт, ныр увтас бобгыны мыйкö йылiсь, ачыс эз вежöрт. И вдруг мымда вын, правленнёись русö чанöтiс сылöн горöтöм: «Ох, чужьясö тэнö, Ниндулёв!».
«Слава тэныт, Пречистöй Дева Мария, югдiсö веммезыс», — серöмтчис аслыс Макар дед.
Вот сiдз славатöг и кончитчис Ниндулёвлöн колхозöн руководитöм. А Макар дедлöн племянникыс уджалö рядовöй мастерöн сiя жö системаын и бура пö уджалö.
Макар дед висьтасьöм бöрын отир иньдöтчисö гортö. Öтöрын вöлi шоныт, рытланьсянь вайöтлiс небытик уль руок и ласковöя малалiс чужöм. Репродуктор пыр, кöда сулалiс клуб крыша вылын, ылына паськалiс кремлёвскöй куранттэзлöн орсöм. А кытöнкö ыб вылын горöна, гажöна урöтiсö тракторрезлöн моторрез.
ВЕНЯ-МИНИСТР
I
Министр Вениамин Константинович Чирков депутатскöй делоэзöн локтiс областнöй центрö. Уджавны сувтöтiс чорыт расписаннё: öтiк лун уджавны аслас должность делоэз сьöртi, мöдiк лунö отирлöн сыкöт, депутаткöт, пантасьöм, куимöт лунö — эшö öтi-мöдi и сэкжö ветлыны аслас родинаö, кытöн сiя чужис да быдмис.
Областнöй центрсянь звонитiсö районö, и сэтчинсянь сельсоветiсь председательлö, тiян селоö пö локтас министр, и чорыта висьталiсö, панталö пö кыдз колö, медбы рожаöн не ляпкисьны нятьö.
Сельсоветiсь председатель öктiс актив: совхозiсь директорöс, сельпоись председательöс, школаись директорöс, коммунальнöй службаись заведующöйöс и клубись директорöс.
Эта актив судитiс-рядитiс и сувтöтiс: совхозiсь директор пызан вылö ваяс порсьпиян яй, дзодзоггез. Сельпоись председатель лöсьöтас столовöй: адззас свежöй чери, а вот стуллэз öктас семьяэзiсь, а то кöдна эмöсь — жики-ваки и куим кокаöсь; школаись директор сувтöтас велöтчиссезöс чышкыны улицаэз, кытi мунас министр; коммунальнöй службаись заведующöй кошшас виль чочком баня и лонтас, баняын медбы туиссэзын сулалiс брага; клубись директор дзимлялас клуб пытшксö, гижас лозунг министркöт пантасьöм йылiсь, а сiдзжö öктас медбасöк нывкаэзöс, вочöтас [11] национальнöй паськöмö и нянь-солöн панталасö дона гöсьöс.
Сельсоветiсь председатель юалiс, кинлöн пö эшö кытшöм вопроссэз эмöсь.
— Ме юася, — горöтчис коммунальщик, — банясö мый вылö лонтны?
— Тэ мый, Григорий, он тöд, кыдз панталöны гöссезöс, да эшö министрöс? Адзза, тэ литературакöт он тöдчы.
— Ме эшö юала, — горöтчис клубись директор, — кытшöм лозунг гижам?
Председатель юрсö гыжйыштiс и шваткис: «Натьтö, «Да здравствует министр!» Школаись директор поперегалiс, что оз сiдз лöсяв и шуис ассис: «Добро пожаловать аслат родинаö, министр». Öнi быдöнныс согласитчисö.
Совхозiсь директорыс жöдзис-жöдзис местаас и тожö шытöг эз кольччы: «А кöр сiя локтас?»
― Кин? А министрыс. Мöдлун вертолётöн. Кыдз только пондас гурöтны вертолёт, быдöнныт локтö сельсоветö. Отирсö чукöртам Дом культурыö. А... вот эшö вунöтiм. Вертолёт, натьтö, пуксяс лесничество одзын, сэтчин вертолёт понда площадка. Григорий, эн вунöт, площадка весöт, — медбöрья наказзэз сетiс председатель.
— А кывзы жö, эшö эд вунöтiм öтiк йылiсь, — горöтчис коммунальщик и мыччалiс горш вылас, — сiя кöть министр, а тожö морт.
— Эта заботаыс сельсоветiсь да сельполöн председателлезлöн, — öмалiс сiйö школаись директор, — а сiдз жö эд вунöтö антиалкогольнöй пессьöм йылiсь.
Сельсоветiсь председатель öвтыштiс кинас, кыдз гуттэз вашöтiс и серöмсорöн горöтчис, эта пö миян забота.
Лун пондöтчис мича да гажа. Быдлаын чочком вевтöсöн цветитiсö калина да рябина. Руын дöвьялiс цветтэзсянь коддзöтан дук. Отчаяннöй челядь пешлiсö ни пруд вылiсь ва.
Председатель, сылöн актив да селоын олiсь отир видзчисисö землякöс, дона гöсьöс, министрöс. Челядь патруллез пукалiсö, оз я мыччись вертолёт.
Луншöрлань, кысянькö мöдöрсянь, не сэтчинсянь, кысянь видзчисисö, сибалiс село дынö вертолёт. Селосö гöгöртiс, адззис лесничество крыша вылiсь знаккез и, кыдз ыджыт зелёнöй юрсигусь, пуксис площадка вылö.
Сельсоветлöн актив местаын ни. Нывкаэз сулалiсö нянь-солöн, цветтэзiсь букеттэзöн. Кыдз только вертолётлöн лопасттез сувтiсö, клубись директор вертолёт ыбöс дынö ольсалiс гöрд дорожка. Активись морттэз кулöм не ловья пукалiсö да видзчисисö, мый лоас одзлань.
Вертолётiсь ыбöс оссис. Сэтчинiсь петiс шляпаа, кучикись курткаа кыз морт. Сыбöрын эшö öтiк морт. Актив сибöтчис вертолёт дынö.
Председатель петiс одзас и пондöтiс:
— Добро пожаловать, дона гöсь. Ми тэнö öддьöн видзчисим. Видзöт, кыдз олö миян отир. Велöт, кыдз миянлö овны. Тi Москваас буржыка тöдат... — сэсся кыввесö эз адззы и кинас мыччалiс нянь-сов вылö, — курччöвтö, пешлö аслат родинаись нянь-сов.
Нывкаэз вайисö гöссез одзö нянь-сов и сетiсö букеттэз.
— Спасибо, спасибо, дона ёрттэз, — горöтчис кучика курткаа морт, — öддьöн спасибо, — и окалiс нывкаэзöс да активись быд морткöт здоровайтчис. Ачыс думайтiс, что сылöн сотрудниккез лöсьöтiсö этö комедиясö.
Кучика курткаа морт актив одзын оссис, ме пö Вöр заптан объединеннёись генеральнöй директор... Актив коласын шушкисö, видзöтö жö пö, сiя эшö и генерал. Министр да эшö и генерал. Ыджыта пö быдмöм миян земляк.