СТЕПАН КАРАВАЕВ ТВОРЧЕСТВО ЙЫЛIСЬ
Тридцатöй годдэзö коми-пермяцкöй крайын, кыдз и быдлаын миян великöй Родина пасьта, керсисö ыджыт социально-экономическöй преобразованнёэз городын и деревняын, мöдкодьсялiс да зорамис промышленность, коллективизируйтсис сельскöй хозяйство. Эна жö годдэзö странаын быдмисö социалистическöй производительнöй выннэз промышленностьын и сельскöй хозяйствоын, зорамис народдэзлöн виль социалистическöй культура.
Виль социально-экономическöй преобразованнёэз да виль общественнöй основаэз вылын лоисö ыджыт измененнёэз материальнöй оланын и коми-пермяцкöй деревняын. Сiдз жö, кыдз миян странаын быдöс народдэзлöн, вежсисö коми мортлöн психическöй склад да действительность вылö эстетическöй взгляддэз. Коми-пермяцкöй народлöн развивайтчис национальнöй формаа, социалистическöй содержаннёа культура.
Быдöс эта вильыс быдмис и крепамис жестокöй пессьöмын важкöт, реакционнöйкöт.
Беднöй крестьянин коми-пермяк пессис аслас классовöй врагкöт — кулачествокöт, медбы хозяйство сувтöтны социалистическöй рельссэз вылö, мунiс важ, отмирайтан мненнёэзкöт пессьöм, виль эстетическöй взгляддэзлöн важ эстетическöй взгляддэзкöт пессьöм.
Коми-пермяккезлö, кыдз национальнöй меньшинстволö, пемыттэзлö, неграмотнöйезлö, öддьöн сьöкыт вöлi вежöртны этö историческöй обстановкасö.
Быдкодь классово-чуждöй элементтэз: маскируйтчöм национальнöй буржуазия, кулаккез, вичкуэзын служителлез, эсеррез и мöдiккез старайтчисö бöбöтлыны пемыт коми уджалiсь крестьянинöс и призывайтiсö пессьыны виль преобразованнёэзлö против. Этасянь эшö сьöкытжык вöлi уджалiсь крестьяналö вежöртны, мый керсьö ны гöгöр.
Коми-пермяцкöй народлöн передовöй интеллигенция, кöда велöтчис великöй русскöй народ дынын, босьтiс сылiсь быдöс передовöйсö, прогрессивнöйсö, локтiс отсöтöн аслас народ дынö, отсалiс вежöртны сiя кадся историческöй обстановкасö да иньдöтны Коммунистическöй партияöн мыччалöм социализм туй кузя.
Эта историческöй фон вылын и мыччалам С. И. Караваевлiсь творчество пондöтчöмсö да развивайтчöмсö.
Эта кадö С. Караваев печатайтiс ассис медодзза поэтическöй произведеннёэз «Ордым» да «Ударник» журналлэзын, а сыбöрын Москваын «Молодая гвардия» издательствоын печатайтiс рассказ, «Велöтчöм понда».
Аслас медодзза произведеннёэзын поэт сувтöтö задача: отсавны коми-пермяцкöй народлö вежöртны виль общественнöй условиеэзлiсь значеннё, тöдны, кинкöт сылö колö пессьыны, кинкöт ордчöн мунны виль олан строитöмын; призывайтö пессьыны важкöт, кöда мешайтö одзлань, социализмлань, мунöмын; баитö Коммунистическöй партия йылiсь, кöда велöтö и нуöтö странаись быдöс народдэсö югыт олан дынö, социализмö. Поэт тшöктö велöтчыны грамотаö, велöтчыны русскöй рабочöй класс дынын, великöй вождь да учитель Ленин дынын.
С. Караваев эна годдэзö унажыксö гижис лирическöй стихотвореннёэз и эз эшö вермы керны ыджыт обобщеннёэз, эз эшö куж поэтическöй деталлез да художественнöй образзэз отсöтöн мыччавны быдöс сiйö, мый керсис быдсöн странаын и аслас роднöй крайын. Поэзия Караваевлöн вöлi декларативнöй, уна стиххез вöлiсö нехудожественнöйöсь, слабöйöсь. Но эна слабосттез и недостатоккез эзö мешайтö поэтлö мыччавны виль кадлiсь вылын идеаллэз, отсавны вежöртны туй, кöда кузя нуöтiс Ленинлöн партия. Оз ков вунöтны и сiйö, что коми-пермяцкöй национальнöй оригинальнöй литература только чужис, вöлi эшö «кага пелёнкаэзын» и этасянь содiсö трудносттез писательскöй делоын. Но поэттэз мужественнöя осьтiсö только что чужöм коми-пермяцкöй литературалö туй.
Эна жö годдэзö поэтöс вдохновляйтiсö ВКП(б) ЦК-лöн 1932 годся апрель 23 лунся постановленнё «Литературно-художественнöй организацияэз перестроитöм йылiсь» да советскöй писателлезлöн 1934 годö Первöй Всесоюзнöй съезд, кöда вылын А. М. Горький аслас знаменитöй выступленнёын висьталiс, что колö иньдöтны особöй вниманнё унанациональнöй советскöй литература развивайтöм вылö, что советскöй литератураыс не только русскöй кывлöн литература, эта литература всесоюзнöй.
Партиялöн эта важнöй документыс да писателлез съездлöн решеннёэз Караваев творчество развивайтчöм понда лоисö научно-методологическöй основаöн, и поэт упорнöя пондiс гижны одзлань. Сiя печатайтö виль стихотвореннёэз: «Дасвит», «Коми округлö», «Большевистскöй вöркылöтан», «Тулыс большевистскöй».
Эна произведеннёэзын поэт мыччалö коми-пермяцкöй народлiсь свободнöя лолалöм, коллективнöй трудлiсь медодзза радосттез, колхознöй стройлiсь преимущество. Особöй поэтическöй деталлезöн поэт мыччалö кадлöн движеннёлiсь ритм, кöда йитсьö странаын политическöй да экономическöй развивайтчöмкöт, кöдöн руководитö большевистскöй партия.
С. Караваевлöн творчество öддьöнжык пондiс развивайтчыны 30 годдэз мöдöдз джынын, кöр коми-пермяцкöй деревня быдсöн вуджис социалистическöй туй вылö, кöр коми крестьянин, миян странаись быдöс народдэзкöт ордчöн, ыджыт энтузиазмöн строитiс социализм, вильмоза керис ассис быт. Эна жö годдэзö коми-пермяцкöй крайын пондiс быдмыны леснöй и местнöй промышленность, содiс рабочöй класс, кöда ас сьöрас вайис передовöй культура.
Торйöн колö висьтавны сы йылiсь, что кöр Октябрьскöй революция освободитiс коми отирöс кыкпöвса гнёт увтiсь, русскöй да национальнöй буржуазия гнёт увтiсь, вичкуэзiсь служителлез да великодержавнöй миссионеррез идейнöй давитöм увтiсь, коми отир кыдз шондi дынö пондiс кыссьыны культура дынö. Быдöс эта сетiс öддьöн богатöй материал коми-пермяцкöй поэзия да проза развивайтчöм понда.
С. Караваев эна годдэзö гижö медбур произведеннёэз. Н. Попов да С. Караваев настойчивöя уджалöны поэтическöй обобщеннёэз вылын, гижöны сы йылiсь, мый керсьö ны гöгöрын. Нiя быдсöн ассиныс творчествонысö подчиняйтöны социализмлöн триумфальнöй шествиелö.
Эта кадö Караваев творчествоын етшажык лоис декларативность, поэт ачыс идейнöя быдмис, содтiс ассис теоретико-литературнöй знаннёэз, крепытжыка сувтiс социалистическöй реализм метод вылö.
Поэт разрабатывайтö виль темаэз, шуам, новаторрезлiсь движеннё, гижö передовöй интеллигенция представителлез йылiсь, кöдна петiсö коми-пермяцкöй народiсь, кошшö виль реалистическöй художественнöй формаэз, медбы буржыка мыччавны образ советскöй коми мортлiсь. Поэт внимательнöйжыка видзöтö явленнёэз вылö, медбы реальнöйжыка мыччавны нiйö поэзияын («Велосипед», «Студенткалö, кöда кончитiс педучилище», «Письмо» и мöдiккез). Уна аслас произведеннёэзын поэт сьылö Родина йылiсь.
Этö темасö разрабатывайтiкö, С. Караваев оз торйöт ассис чужанiн, коми-пермяцкöй крайись деревняэз и селоэз великöй Родина-мам дынсянь. Сiя вежöртö, что коми край, роднöй чужанiн — эта эм учöтик социалистическöй уголок, ыджыт Родиналöн часть, кöда зорамö социализм шондi увтын, странаын öтлаын быдöс народдэзкöт пессьö виль победаэз понда.
Поэт Караваев, страналiсь дрстиженнёэз мыччалiкö, оз вунöт и сы йылiсь, что миян странаным капиталистическöй окруженнёын. Народлöн враггезкöт, внешньöйезкöт и внутренньöйезкöт, пессьöмыс лоис темаöн С. Караваев стихотвореннёэзлöн сборникын «Ме талун рад». Поэт призывайтö крепытжыка видзны киын победнöй знамя, топытжыка йитсьыны Коммунистическöй партия гöгöр, дорйыны мир политика, социализм страналiсь завоеваннёэз. Поэт бура этö идеясö нуöтö аслас стихотвореннёын «Презреннöй враг».
Эта стихотвореннёлöн стройнöй композиция, вылын идейность, кужöмöн политическöй средствоэзöн мыччалöма коварнöй враг дынö презреннё.
Поэт аслас творчествоöн отсалö пессьыны отир сознаннёын капитализм пережитоккезкöт, разгильдяйствокöт, бездельниккезкöт. Этаын сiя чувствуйтö ассис гражданскöй долг аслас народ одзын.
«...ог любит сэтшöм отирсö,
Кин уджын дзугны лют,
Кин падтö миян туй вылын,
Кыдз кок увтын ва нювт:...
...А медбöрын висьтала ме:
Что локтiн — öддьöн бур,
Ме часöт жö серöтышта
Тiян йылiсь кывбур...»
(«Заказ»).
Аслас поэзияöн поэт разоблачайтö религиознöй служителлезлiсь «дьявольскöй удж», кульö ны вылiсь маскаэз и мыччалö нылiсь действительнöй чужöм. («Сувтöтны пом»).
Караваевлöн сатирическöй стихотвореннёэз оз занимайтö сы творчествоын ыджыт места. Да и эна неуна стихотвореннёэз оз лэбтiсьö сэтшöм грознöй оружиеöдз, кытшöмöн сiя вöлi русскöй советскöй поэттэзлöн, кыдз шуам, Маяковскийлöн да Демьян Бедныйлöн.
Великöй Отечественнöй война пыртiс быдöс советскöй литература развивайтчöмö, öтлаын сэтöн и коми-пермяцкöй литература развивайтчöмö, виль этап. Великöй Отечественнöй война — эта ыджыт историческöй событие влияннё увтын С. Караваев творчествоын войнабöрся годдэзö лоис ыджыт подъём. Поэт аслас стихотвореннёэзын мыччалö советскöй патриотизм, сылiсь основнöй чертаэз: героизм, стойкость, мужество.
Эта тема вылö поэт гижö поэма «Кöр мунiс война». Эна годдэзö коми-пермяцкöй литератураын поэма являйтчö самöй значительнöй произведеннёöн не только жанр сьöртi, но и замысел да советскöй мортлiсь образзэз мыччалöм сьöртi. Поэмаын главнöй геройез — комсомолеццез, Великöй Отечественнöй войнаын победителлез и тыллiсь крепость обеспечитiссез.
Поэмаын мыччалöма кык боецлiсь коми-пермяккезлiсь история, врагкöт пессьöмын нылiсь мужество да самоотверженность. Öтлаö ныкöт йитсьö коми нывкалöн Надя Тарасовалöн героическöй тылын олан да удж. Эта произведеннёын поэт кужöмöн мыччалö событиеэзлiсь мунöмсö и рисуйтö реальнöй образзэз.
Поэтлöн геройез олöны, уджалöны, любитöны и ненавидитöны, и действиеыс развивайтчö напряжённöя, драматическöя. Поэмаын эмöсь и недостатоккез, кыдз шуам, абу мыччалöма коммунистлiсь цельнöй образ, неудачнöй образ Макарлöн, но сёжö поэма аслас идейнöй содержаннё сьöртi кольччö коми-пермяцкöй литератураын значительнöйöн öння кадöдз.
Война годдэз бöрын С. Караваев гижис стиххез, кöднаын мыччалiс, кыдз коми-пермяцкöй народ öтлаын миян странаись народдэзкöт ыджыт темппезöн восстанавливайтiс войнаöн разрушитöм хозяйство и керис сiйö эшö буржыкöн. Эта мирнöй трудлöн героика буржыка тыдалö стихотвореннёэзын «Деревня Аразай», «Цветитан край», «Нянь — миян вын», «Вöр» и мöдiккезын. Стихотвореннёын «Цветитан край» ыджыт вынöн мыччалöмöсь социально-историческöй мотиввез: важ оланыс, кöда кольччис только историяö, противопоставляйтсьö виль общественнöй условиеэзлö. «Шеп золотöй» стихотвореннёын поэт эшö öтпыр утверждайтö деревняын социалистическöй стройлiсь преимущество, урожай быдтöмын радость.
«Край шыннялö да радуйтчö,
Богатсялö край роднöй...
Сюа ыб вылын красуйтчö,
Шеп тырсялö золотöй».
С. Караваев шагнялiс литератураын ордчöн русскöй, украинскöй да мöдiк поэттэзкöт. Сiя быд кадö аслас стихотвореннёэзöн шыасьлiс актуальнöй темаэз вылö. Кöр миян столицалö — Москвалö тырис 800 год, поэт гижис стихотвореннё «Москва». Москва йылiсь поэт гижö, кыдз государственнöй твердыня йылiсь, кöда являйтчö унанациональнöй народдэзлö счастьелöн, свободалöн, культуралöн центрöн. Москвасö поэт шуö меддона кылöн:
Москва — народлöн сьöлöмшöр.
И сылiсь вынсö не чегöтны,
Кыдз небосводiсь жö некöр
Он вермы шондiсö уськöтны.
Столица отирлöн, роднöй,
Народсö счастьеöн козьналö...
Вот сiйöн песня боевöй
Москва олöм йылiсь горалö.
Караваев гижис стиххез русскöй писателлез да поэттэз йылiсь, кыдз шуам, «Горький ловья». Поэтлö öддьöн дона Горькийлöн революционнöй творчествоыс. Горький сы понда аслас боевöй произведеннёэзöн пыр «народ одзын югьялö».
Интереснöйöн являйтчö поэт замысел сьöртi стихотвореннё «Петрова Зоя». Эта произведеннёын мыччалöма коми народ представителлезiсь рабочöй класслöн быдмöм. Поэт пыдынсьöтö национальнöй специфическöй характер и сiйö мыччалö трудовöй действие вылын.
«...Простöй пилаöн эта жö пораö
Петрова мöйму заптiс кер.
А таво сiя электропилаöн
Мыччалö вöрас каждöйлö пример».
Сёрöнжык С.. Караваевлöн творческöй активностьыс чинiс. Видно сiя объясняйтсис сiйöн, что поэт эз вермы вöтчыны олан сьöрын. Одзжык сiя лэдзис нёль сборник, а медбöрья кадö «Миян луннэзö» да «Иньва» сборниккезын печатайтiс только кынымкö стихотвореннё, но и ныын етша вильыс, унажык повторяйтö асьсö («Гажа, гажа асылö» и мöдiккез.)
Колö висьтавны, что С. Караваев öнi вились пондöтчö аслас лирикаöн гажöтны коми народлiсь сьöлöммез, призывайтны сiйö пессьыны югыт коммунистическöй общество понда. Поэт разрабатывайтö виль темаэз школьнöй молодёжь понда, кöдаын адззö коммунизм строитiссезлiсь достойнöй продолжателлезöс.
Позьö надейтчыны, что поэт эшö уна гижас значительнöй произведеннёэз.
* * *
Караваев творчествоын особöй места занимайтö песеннöй лирика. Пожалуй, позьö шуны, что сiя являйтчö родоначальникöн советскöй коми-пермяцкöй песня развивайтöмын. Пондылам этö видзöтны общественнöй условиеэз фон вылын. Только эта позиция вывсянь видзöтiкö позьö керны правильнöй выводдэз.
Коми-Пермяцкöй крайын Октябрьскöй революция бöрын вежсисö социальнöй условиеэз, вежсисö производстволöн важ способ и производственнöй отношеннёэз, ны туйö лоисö производстволöн социалистическöй способ и социалистическöй производственнöй отношеннёэз. Эта основа вылын вежсисö и коми-пермяккезлöн эстетическöй представленнёэз. Важ эстетическöй представленнёэс эзö пондö удовлетворяйтны коми отирöс виль общественнöй условиеэз дырни. Нiя чувствоэз, предметтэз, вещщез и явленнёэз, кöдна лыддиссисö важ социальнöй действительность дырни басöккезöн, öштiсö значеннёнысö виль экономическöй база да общественнöй условиеэз почва вылын.
Коми-пермяцкöй народ бытлiсь да культуралiсь русскöй исследователлез XIX векся 60-öй годдэзö гижисö, что коми-пермяккезлöн олан öддьöн сьöкыт, нiя почти быдöнныс неграмотнöйöсь, öддьöн беднöйöсь, тшыгьялöм да нищета коми отирлöн вечнöй спутниккез. Быдсöн эта сьöкыт оланыс пуктiс печать коми отир искусство вылö: песняэз вöлiсö горзанаöсь, печальнöйöсь...
Эта йылiсь жö гижис аслас знаменитöй произведеннёын «Подлиповцы» русскöй прогрессивнöй писатель Решетников, кöда бура тöдiс коми отирлiсь олöмсö.
Революция бöрын коми морт ачыс лоис аслас судьбалöн хозяинöн. Сылöн эстетическöй отношеннёэс босьтiсö виль характер. Коми отир пондiсö сьывны русскöй народлiсь бодрöй, радостнöй песняэз, сiйöн что асланыс кыв вылын песняэс эзö вöлö. С. Караваев вежöртiс странаын оланлiсь ритм, вежöртiс, кытшöмöсь песняэз колöны öнi аслас народлö.
Сiя гижис стихотвореннёэз «Пинялiссез», «Ытшкисян кад», «Чожа, чожа», кöдна лоисö народнöй песняэзöн.
Гижис уна мöдiк песняэз, кыдз шуам, том кад йылiсь, аслас мöдкодьсялöм край йылiсь, Коммунистическöй партия йылiсь, комсомолеццез да молодёжь делоэз йылiсь, виль стройкаэз йылiсь и сiдз одзлань. Отöна паськалiс Коми-Пермяцкöй край пасьта сылöн популярнöй песня «Ой тэ, Иньва». И вежöртана, что коми народлöн быдсöн олан, думаэз и радосттез йитсьöмöсь Иньва юöн, кöдалöн виль олан дырни и значеннёыс лоис виль.
«Ой тэ, Иньва, Иньва ваиньöй,
Голубöй синбана ва!
Вексö важын менам крайиньöй
Кисьтiс шоррезöн синва.
Ой тэ, Иньва, гора берега!
Ась паськалö тэсянь гор!
Лишь советскöй миян годдэзö
Счастьеасис Иньва дор».
Любовнöй темаэз вылö поэт гижис стихотвореннёэз «Ме любита», «Горадзуль» и мöдiккез.
Том бытшöм морттэзлiсь искренньöй чувствоэз мыччалiс поэт «Горадзуль» стихотвореннёын. Поэт бöрйö медбур поэтическöй средствоэз, эта понда обращайтчö народнöй творчество дынö, медбы мыччавны самöй чудеснöй чувствоэз том отирлiсь.
«Шондi югöр золотöй
Видз вевдöр малалö,
Горöн сьылö соловей,
Горадзуль пежьялö...»
С. Караваев поэт-лирик. Уна сылöн стиххез-песняэз отсалiсö коми народлö одзлань развивайтны песеннöй искусство. Эта циклiсь стихотвореннёэз музыкальнöйöсь, гажаöсь, бодрöйöсь и гордöйöсь. Эмöсь ныын, конечно, и недостатоккез. Быдöс событиеэсö поэт мыччалö противоречиеэзтöг, быдöс явленнёэз поэт син одзын кыдз бытьтö мунöны благополучнöя, ровнöя. Сiя быдлаын адззö только сьылöм да йöктöм, но оз адззы оланлiсь отрицательнöй ладорресö.
Думайтсьö, поэт öння луннэзö эшö активнöйжыка асьсö мыччалас эта жанрын, активнöйжыка пондас отсавны песеннöй искусство развивайтöмын.
С. Караваевлiсь творческöй туй анализируйтiкö первöй годдэзсянь, кöр сiя печатайтiс медодзза стихотвореннёэз, и öння кадöдз, позьö висьтавны, что поэт сулалö правильнöй позицияэз вылын. С. Караваев понда литература развивайтчöмын единственнöй правильнöй методологическöй основаöн являйтчö социалистическöй реализм. Поэт старайтчö керны быдöс, медбы сылöн творчество вöлi полезнöйöн народлö, обществолö.
[1] шондiсэтöр ― гöрдсэтöр
[2] латка - ви понда учöтик бекöрок
[3] истöг — спичка
[4] Некодя — эстöн: умöль.
[5] кружка омöн ― эстöн: вевдöрöттяс
[6] Вижгыльтчыны — (ойл.) вынтöмсялöмсянь коккезлö чукыльтчыштны (кöстiсьыштны, пиньöвтчыштны)
[7] данасис — люкасис
[8] ньöр митны ― нöитны, небзьöтны йöрйисикö ньöр (эстöн поговорка)
[9] проглас (важм.) ― мотив
[10] öрсялöм — лоöм öр кодь, гарйöм
[11] вочöтас (ойл.) – пасьтöтас
[12] нуженöсь — винерöсь, нярöсь