АКАФИСТ БОЖИЕЙ МАТЕРИ, ВЛАДЫЧИЦЕ, ДЕРЖАВНОЙ ЦАРИЦЕ ВСЕЯ НЕБА И ЗЕМЛИ (РОССИЙСКОЙ) - ЕДИНОЙ НАДЕЖДЕ ПРАВОСЛАВНЫХ ХРИСТИАН.
Новые Соборные Молитвы по Соглашению за Святую Русь: "Надежда моя, Богородице".
К 100-летию (15 марта 2017г.) передачи царской власти государем Николаем Александровичем в Пречистые руки Госпожи Богородицы. Начиная с 6 ноября сего года, со дня празднования иконы Божией Матери "Всех скорбящих Радосте", каждое воскресение с 17-00 до 18-00 по московскому времени будет совершаться молебен о здравии и чтение новых Соборных Молитв с акафистом Державной Царице всея Неба и Земли (Русской - Российской).
Просьба всех православных христиан, кто желает присоединиться к общему келейному, молитвенному деланию, записаться по электронному адресу: sacred-russia@yandex.ru, а также при желании задать все необходимые вопросы. Ваши имена будут записаны в синодик для поминовения о здравии на год, по 4 ноября 2017г. включительно. Молебен о здравии будет проводить протоиерей Алексий с келейником. В электронном письме укажите Ваши данные: Имя, Фамилия, район проживания. Пожертвование в любом размере переводите на реквизиты портала: http://3rm.info/main/65017-bratya-i-sestry-nam-nuzhna-vasha-pomosch-ot-redakcii-portala.html
Символом Надежды моряки называют "священный якорь спасения", то есть последний шанс и усилие удержать корабль от мятущихся волн и не потонуть. Церковному кораблю народа Божия Святой Руси предстоит в ближайшие 3 года нелегкое плавание среди грядущих испытаний, которые посылаются Богом, чтобы пробудить духовную сторону в людях. Никто кроме Царицы всея Неба и Земли не даст нам свой Покров, самый надежный оберег защиты и крепкий якорь от мятущихся против нас волн врагов Церкви и Отечества. Будем твердо верить, соборно и горячо молиться, да победим врагов наших при помощи любви Божией и чудном заступлении Пресвятой Богородицы. «Просите, молитесь, кайтесь». «И вместо вопросов будут ОТВЕТЫ».
Обо всей той чудесной помощи, которая будет происходить с Вами, просьба сообщать на портал для опубликования по адресу: msk3rim@gmail.com
СИМВОЛ НАДЕЖДЫ
Воистинну исповедую Пресвятую Деву, Богородицу,
всея Неба и Земли Державную Царицу и Владычицу,
Пречистый Храм Спасов и Матерь Божию,
Христом Владыкой нам дарованну едину Надежду,
и в совершенна жизни Святым Духом миру явленну,
и Вседержителем на Небесех триедино властью венчанну.
Мати, рождшую всех святых, Святейшее Слово,
Всецарицу Бога Любви надеждою прославлю.
ПРОШЕНИЯ
О Богохранимей державе нашей Российстей,
боголюбивых властех и христолюбивом воинстве ея,
Господу помолимся.
Господи, помилуй.
О даровании благодати Царицы всея Неба и Земли (Российстей)
и о покорении под нозе Ея всякого врага и супостата,
Царице помолимся.
Пресвятая Богородице, спаси нас.
О покаянии народа Божия Святой Руси
и восстановлении Самодержавного царства Российского,
Господу помолимся.
Господи, помилуй.
О даровании Державе Российстей Царя Православного
и о воскресении Руси Святой Надеждой миру на спасение,
Владычице помолимся,
Пресвятая Богородице, спаси нас.
АКАФИСТ БОЖИЕЙ МАТЕРИ, ВЛАДЫЧИЦЕ, ДЕРЖАВНОЙ ЦАРИЦЕ ВСЕЯ НЕБА И ЗЕМЛИ (РОССИЙСКОЙ) - ЕДИНОЙ НАДЕЖДЕ ПРАВОСЛАВНЫХ ХРИСТИАН.
Кондак 1
Избранней от всех родов Заступнице рода христианскаго, покровом Своея благости покрывающей страну нашу православную, благодарственная пения приносим Ти, Владычице, о явлении нам чудныя иконы Твоея “Державныя”.
Ты же, яко Всемилостивая Заступница и Наставница всех с верою к Тебе притекающих, от всяких нас бед свободи, да зовем Ти:
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Икос 1
Ангелом радость приимшая, благоволила еси, Владычице, возвестити старице благочестивей радость о явлении иконы Твоея честныя “Державныя”, юже и обретше по указанию Твоему, яко знамение милости Божией к нам, грешным, благодарственно вопием Ти сице:
Радуйся, воли Господней тайны нам открывающая;
радуйся, гнев Его праведный, на ны движимый, умягчающая.
Радуйся, зловерия нечестивых обличение;
радуйся, гордыни их низложение.
Радуйся, веры христианския утверждение;
радуйся, почитания святых икон освящение.
Радуйся, тихое пристанище спасения душ наших;
радуйся, Всемилостивая Заступнице наша у престола Святыя Троицы.
Радуйся, от бед и скорбей наше избавление;
радуйся, Церкве Православныя врачевание.
Радуйся, звездо невечерняго света, нас озаряющая;
радуйся, Матерь Света, всех просвещающая.
Радуйся, Священное Сокровище Славы Божия;
радуйся, Царице Небесная и Матерь Божия.
Радуйся, Православной Веры дивное Преображение;
радуйся, присягнувших Тебе верных запечатление.
Радуйся, Госпоже Владычице наша Наставнице;
радуйся, дарами Духа Святаго Млекопитательнице.
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Кондак 2
Видящи, Всенепорочная, с высоты небеснаго жилища Своего, идеже с Сыном Твоим во славе пребываеши, скорбь верных рабов Твоих, яко гневнаго ради Божия посещения вера Христова поругаема бывает нечестивым зловерием и богоотступничеством, благоволила еси явити нам икону Твою “Державную”, яко земную Царицу нашу и Мати, на Престоле Российстем с Сыном Твоим восседающе и Своими верными чадами управляюще, да вси христолюбивии людие, власти и воинства, усердно молятся пред нею, верно вопиюще Богу: Аллилуиа.
Икос 2
Разуму нашему просвещение свыше исходатайствуй, Пресвятая Богородице, да познаем, что есть воля Божия благая, угодная и совершенная, и сердца верных Тебе направи, еже со усердием творити ю, Тебе же, Всемилостивая Заступнице и Наставнице, непрестанными гласы восхваляти:
Радуйся, явлением честныя иконы Твоея тьму лютых лукавых обстояний
от нас отгоняющая;
радуйся, лучами чудес Царской милости всех просвещающая.
Радуйся, душевными и телесными очами ослепших в вере прозрение;
радуйся, омраченных смыслов жизни русской просвещение.
Радуйся, всех христиан вожделенная Помощнице;
радуйся, всех уповающих на Тя непостыдная надеждо.
Радуйся, вдов и сирот надежный покрове;
радуйся, алчущих Питательнице.
Радуйся, духовных сокровищ Подательнице;
радуйся, богомудрых премудрая доброто.
Радуйся, пресветлая, Божественная красото;
радуйся, обоняние Христова благоухания.
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Кондак 3
Силу Божественныя благодати даруй нам, Пресвятая Богородице, во еже неуклонно и непреткновенно ходити нам спасительным путем Христовых заповедей, путем Божественной Премудрости, даровавшей нам ковчег спасения Российского молитвами Святаго Царя-мученика Николае, и нам всем сердцем же и устами сподоби непрестанно воспевати Всемогущему Богу: Аллилуиа.
Икос 3
Имуще Тя, Богоизбранная Заступнице рода христианскаго, яко зарю светлую, просвещающую душ наших лукавую темноту и разгоняющую мрак сердечнаго неведения нашего, припадаем к честней иконе Твоей “Державней” и с умилением вопием Ти сице:
Радуйся, сохраняти и спасати всех призывающих Тя обещавшая;
радуйся, прославляющих Тя, яко Царицу нашу Российскую и Мати, прославляющая.
Радуйся, к Сыну Твоему и Богу нашему молитвы верных приносящая;
радуйся, благодать Твою иконам Твоим честным даровавшая.
Радуйся, всю вселенную лучами Твоея Царския милости озарившая;
радуйся, премудрости пути Божия принявшая.
Радуйся, Божественныя благодати Подательнице;
радуйся, Владычице, Всемилостивая за нас пред Богом Заступнице.
Радуйся, яко Тобою от вечныя смерти свобождаемся;
радуйся, яко Тобою безконечныя жизни сподобляемся.
Радуйся, честнейшая Херувим;
радуйся, славнейшая без сравнения Серафим.
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Кондак 4
Буря житейскаго моря сокрушает духовный корабль наш волнами мирских попечений, и мир убогих душ наших мятется. И где обрящем тихое пристанище спасения, и корабля
Церковного верное управление? Токмо на Тя возлагаем надежду, Владычице и Наставнице; имущи бо державу непобедимую и скипетр власти Небесней, от всяких бед, глада, скорбей и болезней избави нас, от ересей и Церковных расколов убереги всех верно вопиющих Богу: Аллилуиа.
Икос 4
Слышавше православнии людие повеление Твое, Владычице, молитися пред образом Твоим “Державным”, со умилением сердечным прибегают к Твоему всесильному заступлению у престола Всемогущаго Бога, Пресвятыя Троицы и благоговейно вопиют Ти сице:
Радуйся, горняго мира Небесного украшение;
радуйся, дольняго мира Российского заступление.
Радуйся, Дщи благословенная Отца Небеснаго;
радуйся, Родительнице неискусомужная Сына Предвечнаго.
Радуйся, демонския полки побеждающая;
радуйся, враги спасения человеческаго посрамляющая.
Радуйся, яко волею Твоею сокрушаются еретические главы;
радуйся, яко вернии Тобою сподобляются славы.
Радуйся, телес наших безмездная Целительнице;
радуйся, душ наших к Царствию горнему Путеводительнице.
Радуйся, яко сотвори Тебе величие Сильный;
радуйся, яко призре на смирение Твое Господь.
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Кондак 5
Боготечная звезда явися нам, Владычице, честная Твоя икона “Державная”, страну Российскую всю обтекающая и лучами чудес Твоея Царския милости осиявающая всех блуждающих по морю страстнаго жития, мрак печалей и мглу всяческих недуг и скорбей прогоняющая и наставляющая на путь спасения с верою к Тебе притекающих и вопиющих Богу: Аллилуиа.
Икос 5
В дни лютых скорбей, искушений, соблазнов и злых обстояний явила еси нам, Владычице, велию милость обретением честныя иконы Твоея “Державныя”, да вси с верою молящиися пред нею приимут здравие и душ спасение. Сего ради и мы, прославляюще Твое милосердие неизреченное, усердно вопием Ти сице:
Радуйся, светило незаходимое, светом истиннаго богопознания нас просвещающее;
радуйся, Вратарнице, двери райския верным отверзающая.
Радуйся, многотекущая река Божественныя благодати;
радуйся, неистощимый источниче святыни.
Радуйся, ко благочестию наша Наставнице;
радуйся, душ наших освящение.
Радуйся, кающихся грешников с Богом примирение;
радуйся, добрыя обеты приемлющая.
Радуйся, благим намерениям способствующая;
радуйся, злыя начинания разрушающая.
Радуйся, вражия козни расторгающая;
радуйся, скорая человеком Помощнице.
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Кондак 6
Воспеваем Твое милосердие досточудное к земле Русской православней христианской и многое к нам снисхождение Матерние, Пресвятая Богородице, не престаеши бо молитися о нас, грешных, Сыну Твоему и Богу нашему, еже отвратити гнев Его праведный, за грехи богоотступничества и цареубийства на ны движимый, и помиловати всех верно вопиющих Богу: Аллилуиа.
Икос 6
Возсиявает в души наша, омраченныя скорбию и унынием от множества согрешений, свет благодатнаго утешения, и сердце наше исполняется веселия и радости, егда непрестанными Твоими, Владычице наша Наставнице, вразумлениями возбуждаеши нас вопити к щедрому Богу, да милостив будет и простит нам прегрешения наша. Не премолчи убо, Владычице, наставляющи и вразумляющи нас, зовущих Ти сице:
Радуйся, с Пророком Иоанном Крестителем к покаянию велиему нас зовущая;
радуйся, жестокосердных и злых сердец умягчающая.
Радуйся, в скорбех и болезнех долготерпению нас научающая;
радуйся, вся помышления наша к распятому за грехи мира Спасителю устремляющая.
Радуйся, страдания Его и крестную смерть в памяти нашей обновляющая;
радуйся, правосудием Божиим к ожесточенным и нераскаянным нас устрашающая.
Радуйся, ожиданием будущих небесных благ нас услаждающая;
радуйся, к наследству нетленному и вечному нас приводящая.
Радуйся, наследниками Царствия Божия нас сотворяющая;
радуйся, трапезо святая, хлебом жизни нас питающая.
Радуйся, маслине благоплодная, елеем милости сердца умягчающая;
радуйся, яко молитвою пред иконою Твоею приемлем духовное утешение.
Радуйся, яко сердцам нашим даруеши благодатное сокрушение;
радуйся, яко благостынею Твоею угашаеши в нас огнь нечестия.
Радуйся, Троеручице долгожданное вспоможение;
радуйся, Прибежищеот зол избавление.
Радуйся, всемирная Радость, возсия нам велия;
радуйся, Цельбоносный источниче душ спасения.
Радуйся, Покрове, от врагов защищающая;
радуйся, на молитву ко Святей Троице нас собирающая.
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Кондак 7
Хотяй всем человеком спастися и в разум познания истины приити, премилосердный Господь и Создатель наш посла во дни гневнаго посещения Своего ангела пресветла в новоявленнем образе Твоем “Державном”, яко Царицы Небеси и земли. Сию бо икону во отраду и утешение даровал нам Бог знамением Матерния любве Твоея, тако глаголе о Тебе пророки Божии: Сия преграждение вражды разрушивши, мир введе и Царствие отверзе, Сию убо имуще веры утверждение, Поборника имамы из Нея рождшагося Господа; да и мы с верою и любовию молящиися пред "Державным" Твоим образом, приимем помощь и заступление Твое всесильное и радостно вопием Всемогущему Богу: Аллилуиа.
Икос 7
Новую показа милость всех Творец и Владыка наш Господь, егда положи во гневе Своем
наказати гордый род человеческий огнем, мечем, гладом и болезньми, сотвори сие наказание для многих человеков ко вразумлению и исправлению во спасение душ. Сего ради и мы, Владычице, припадающе к Пречистому образу Твоему “Державному”, усердно молим Тя: не даждь нам погибнути до конца, но милосердия двери отверзи нам, вопиющим Ти сице:
Радуйся, неприступнаго Божества селение;
радуйся, ангельское непрестающее удивление.
Радуйся, рабов Божиих тайное вразумление;
радуйся, Заступнице всех сущих в скорбех и болезнех.
Радуйся, благодатное безстрастие ищущим его подающая;
радуйся, всех в чистоте целомудрия живущих зело любящая.
Радуйся, пристанище небурное подвижников благочестия;
радуйся, гневом Божиим вразумляющая сынов нечестия.
Радуйся, безмолвствующих сладкая Собеседнице;
радуйся, отшельников Христа ради крепкое упование.
Радуйся, постников Божественное радование;
радуйся, пустынножителей тихое веселие.
Радуйся, грешников Всемилостивая Споручнице;
радуйся, погибших душ Взыскание.
Радуйся, благодатная Богородице Дево;
радуйся, всех скорбящих Радосте.
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Кондак 8
Странни и пришельцы есмы на земли сей: житие бо наше суетно и маловременно есть.
Мы же смерти безвестное во ум никогдаже приемлем, ни помышляем о Страшнем судищи Христове, в немже имамы праведному Судии предстати и дати ответ о всяком же деле и слове. Темже молим Тя, Владычице: возбуди нас скоро от сна греховнаго, да не постигнет нас час смерти неисправленных и да сподобимся Твоим ходатайством получити беззакониям нашим прощение и во гласе радования воспевати Христу Богу: Аллилуиа.
Икос 8
Вся бывши горе, к небесным взята еси и земных не оставляеши, Пресвятая Богородице, священным Твоим предстательством: имаши бо дерзновение к Сыну Твоему и Богу нашему. Темже утверди, Владычице, в мире глубоце страну нашу православную и вся полезная даруй рабом Твоим, да величающе воспеваем Ти тако:
Радуйся, умным очесем нашим горький и страшный час смертный представляющая;
радуйся, на кийждо день, аки уже на последний жития нашего, взирати нас научающая.
Радуйся, любити мир и яже в мире нам воспрещающая;
радуйся, пристрастие к тленному богатству из сердца нашего искореняющая.
Радуйся, вся блага земная быти привременна и скоропреходяща нам показующая;
радуйся, славы человечи, аки тени преходящия, искати нам возбраняющая.
Радуйся, яко сладчайшее имя Господа Иисуса Христа устами непрестанно произносити и во уме держати нас побуждаеши;
радуйся, яко от празднословия, многоглаголания, паче же от кощунства нас удержаваеши.
Радуйся, яко воздержанию в пищи и питии приобучити нас печешися;
радуйся, яко Твое за нас ходатайство сильно есть пред Богом,
еже не вверженным нам быти во тьму кромешнюю.
Радуйся, яко присно внушаеши нам омывати грехи своя слезами покаяния,
да избавимся геенны адския;
радуйся, яко побуждаеши нас день и нощь молитися, да не посланы будем
со демоны мучитися.
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Кондак 9
Всякое естество ангельское удивися делу Твоего милосердия, Господи, яко даровал еси нам толико твердую и теплую Заступницу роду христианскому во дни гневнаго Своего посещения, нам невидимо сопребывающую Царицею нашей и Матию, слышащую же Тебе поющих: Аллилуиа.
Икос 9
Ветии многовещаннии, непросвещеннии светом истиннаго богопознания, поклонишася златому тельцу и одержишася недугом сребролюбия, наипаче уклонишася от заповедей Христовых и возлюбиши славу и власть мирскую века сего тлетворного, привременного, и покоришася душою своею велия страсти любоначалия и гордыни. По слову же апостола, всяк любостяжатель есть идолослужитель. Сего ради Божие гневное посещение всему миру зряще, и мы, грешнии, смиренно молим Тя, Владычице: умилостиви Создателя,
да потщится гнев Свой праведный преложити на милость и помиловати нас, вопиющих Ти сице:
Радуйся, яко Твоея помощи и заступления никогдаже нас лишаеши;
радуйся, яко ум наш, омраченный небрежением, светлым Твоим покровом озаряеши.
Радуйся, яко Тобою от страстей телесных избавляемся;
радуйся, яко Тобою сладостей духовных исполняемся.
Радуйся, твердое Православия укрепление;
радуйся, честное Пресвятыя Троицы носило и похваление.
Радуйся, и во временней жизни полезная нам подающая;
радуйся, душевныя раны наша елеем спасительным умащающая.
Радуйся, от страстей любостяжания наше избавление;
радуйся, Церкве Православныя врачевание.
Радуйся, яко из рова беззаконий наших рукою Твоея помощи нас исхищаеши;
радуйся, яко греховный сон душевредныя нашея лености отрясаеши.
Радуйся, душевное умиление и сердечное сокрушение в нас раждающая; радуйся, яко твориши всем спастися, в державный покров Твой прибегающим.
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Кондак 10
Спасти хотя многия люди от обдержащих их скорбей и болезней и веру их утвердити во всесильное заступление Твое, Владычице, даровала еси нам изображение честныя иконы Твоея “Державныя”, да вси, видяще являемую Тобою милость, вопиют со умилением Богу: Аллилуиа.
Икос 10
Стена явилася еси, Богородице Дево, Российстей стране честными Твоими иконами, изливающи чудеса во бранех и осеняющи благодатною помощию Твоею христолюбивых воинов. Под державным бо покровом Твоея благости Российская страна созидашеся, и врата адова не одолеша Православныя Церкве Христовы. Сего ради припадающе к честней иконе Твоей “Державней”, радостно вопием Ти сице:
Радуйся, Российския страны покрове и утверждение;
радуйся, от нашествия иноплеменных избавление.
Радуйся, от всех врагов видимых и невидимых нас покрывающая;
радуйся, супостатов государства Российского под нози Свои покоряющая.
Радуйся, боголюбивым властям и христолюбивому воинству помогающая;
радуйся, благая Вратарнице, двери райския верным отверзающая.
Радуйся, сущих в пленении свобождение;
радуйся, от глада и болезней наше спасение.
Радуйся, саде земли обетования;
радуйся, цвете Божественнаго саждения.
Радуйся, лозо добродетельная винограда Христова;
радуйся, древо чудоточное рая Иисусова.
Радуйся, жилище и дом Христа Бога нашего;
радуйся, вместилище неизреченныя Его славы.
Радуйся, Владычице, Всемилостивая Подательнице щедрот;
радуйся, яко много может молитва Твоя пред Сыном Твоим и Богом нашим.
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Кондак 11
Пение хвалебное и благодарственное приносим Ти, Владычице, под державным бо покровом Твоея благости пребываем в непостыдней надежде всесильнаго заступления Твоего за нас, грешных, и все упование наше на Тя возложивше, радостно вопием Богу: Аллилуиа.
Икос 11
Светильницы наши угасоша, елея же благих дел не имамы, во еже возжещи благодать Духа Святаго. И где обрящемся, окаяннии, сном греховным отягченнии, егда постигнет нас внезапу в полунощи час кончины нашея? Но да не услышим и мы, якоже юродивыя девы, грознаго гласа Жениха: не вем вас! Помози нам, Владычице, наполнити сосуды душ наших елеем благих дел, паче же милосердия и смирения, да благодарственно воспоем Ти сице:
Радуйся, яко воспоминанием грядущаго грознаго суда Божия от грехов нас отреваеши;
радуйся, яко души наши, аки невесту, ко сретению прекраснаго Жениха Христа предуготовляти нас поучаеши.
Радуйся, яко возбуждаеши нас на всяк день же и час приносити Христу Богу молитвы, прошения и благодарения;
радуйся, яко с мудрыми девами, душами праведных, внити в брачный чертог Сына Твоего и Бога нашего помогаеши.
Радуйся, яко в ризу непорочности и чистоты облещися нам способствуеши;
радуйся, яко стати нам на Страшнем суде Христово одесную Его ходатайствуеши.
Радуйся, яко благоутробие Божие о причастии нас лику избранных умоляеши;
радуйся, яко ум наш, омраченный небрежением, светом Своим озаряеши.
Радуйся, яко голубину простоту и агнчу кротость стяжати нам приискренне желаеши;
радуйся, яко самоотвержению и отречению от злыя нашея воли приобучити
нас тщишися.
Радуйся, яко младенческое незлобие даровати нам способствуеши;
радуйся, яко хладное сердце наше молитвами воспламеняти нам помогаеши.
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Кондак 12
Благодать прияла еси, Владычице, от Всемогущаго Господа Бога миловати благочестивых чад Церкве Христовы и вразумляти нечестивых сынов ея. Сего ради, притекающе под державный покров Твоея благости, усердно молим Тя, Владычице: избави нас от ухищрений духов злобы, разслабляющих наши душу и тело леностию и нерадением, и возбуди нас от сна греховнаго, да благодарственно вопием Богу: Аллилуиа.
Икос 12
Поюще Твоя чудеса, бывшая в древняя и настоящая времена, хвалим Тя, Владычице, яко живоносный источник благодати и неистощимую чудес реку, бездну бо милости и щедрот даровала еси роду христианскому явлением честных икон Твоих. Сего ради и мы, припадающе к честней иконе Твоей “Державней”, со умилением вопием Ти сице:
Радуйся, Церкве Небесныя и земныя украшение;
радуйся, девства честный покрове и ограждение.
Радуйся, светлое пророческое сбытие;
радуйся, всехвальных апостолов восхваление.
Радуйся, честная похвало иереев благоговейных;
радуйся, молние, неверных устрашающая.
Радуйся, славою чудес Твоих верных смыслы озаряющая;
радуйся, печаль и скорбь нашу в радость претворяющая.
Радуйся, яко молиши Сына Твоего и Бога нашего всем нам спастися;
радуйся, яко твориши милости всем в державный Твой покров притекающим.
Радуйся, Заступнице всех сущих в скорбех и болезнех;
радуйся, всем с верою Тебе молящимся полезная дарующая.
Радуйся, Державная Царице всея Неба и Земли, Владычице и Мати,
благодатию Пресвятей Троицы нас спасающая.
Кондак 13
О всепетая Мати, Пресвятая Державная Царице Неба и Земли, Всемилостивая Владычице наша! Приими ныне сие малое моление наше и величия ради благости Твоея и неизреченных щедрот Твоих не помяни множества грехов наших, не возгнушайся, не остави нас, не отступи от нас, но заступись и исполни во благих прошения наша: даруй нам вся потребная к жизни и благочестию в земном отечестве нашем, избави нас от глада, болезней и печали, огради нас от всякаго врага и супостата и покори их под нози Свои, вразуми и настави на путь правый, окорми нас дарованием благодати Духа Святаго, и Царствия Небеснаго наследники всех сотвори, верно вопиющих Богу: Аллилуиа.
(Этот кондак читается трижды, затем икос 1 и кондак 1)