ВАЖ ИСКУССТВОЛÖН ВИЛЬ ОЛÖМ

ГРИБОВА

ЛЮБОВЬ СТЕПАНОВНА

КОМИÖН ГИЖÖМЫС

 

 

ПЫТШКÖС:

 

КАЙВАРЫШ (< Шондiа лунок, 1963)

ПЕРА-БОГАТЫРЬ ЙЫЛIСЬ ЭШÖ ÖТIК ЛЕГЕНДА (< Гора му, 1963)

ЧУДИТЧÖ. Драматическöй этюд (< Иньва, 1965)

ЧУДЬ ЙЫЛIСЬ ИНЬВЕНСКÖЙ ПРЕДАННЁ (< Иньва, 1965)

ВАЖ ИСКУССТВОЛÖН ВИЛЬ ОЛÖМ (< Иньва, 1966)

 

 

 

КАЙВАРЫШ (< Шондiа лунок, 1963)

 

Гожумся луншöр. Лöнь да мича. И кымöрок абу. Сьöкыта лолалö пымалöм муыс. Быдöс ловья пöлöс дзебсисьöм: оз кыв не кайлöн чивзöм, не понлöн вувтöм. Только кытöнкö сук турун пытшкас дугдывтöг чирскöны енкöбывкаэз да рöма цветтэз весьтöт кокнитика лэбалöны чочком борда бабыввез. Деревня дорись кöз вылын, школа сайын, пукалö сера, чукыля ныра кайварыш. Сiя кадiсь кадö гордöя бергöтлö юрнас и, бытьтö хозяин, нёджжалö омöн ассис мусö. Но вот сiя сувтыштiс ув вылас, павдöтiс ассис ыджыт вына борддэсö и лэбтiсис. Лэбзьö кайварыш, дзик уйö — жагвыв, шытöг, басöка, а лэчыт синнэсö мöртчöтö улö, муас. То сiя керис öтiк, сэсся мöдiк кытшöв деревня весьтöттяс. Сыбöрын, тыдалö, мыйкö казялiс, пондiс лэбзьыны чожажыка, лажмöтчис да уйыштiс школа весьтöт нач крыша бердöттяс. Сэсся чожа-чожа, кыдз вынöн чапкöм из, татшкисис учительскöйись öшынö. Му вылö жиль-жоль киссисö стекло торрез, а кайварыш кыдзкö зэркыта трекнитчис и жагвыв лэбтiсис вывланьö.

Школа йöрын эта коста уджалiсö челядь. Нiя адззылiсö, кыдз сера кай жугöтiс öшынсö и одзасьöмöн висьтасисö эта йылiсь. Сэтчö школаись котöрöн петiс учительница да лöгöнмоз юалiс:

— Öнi жö висьталö, кин тiян коласiсь жугдiс öшын? Челядьыс öтамöд вежöн пондiсö висьтасьны, мый адззылiсö.

Сэк учительницаыс пондiс серавны да висьталiс:

— А тöдат, мыля кайварышыс уськöтчис öшынас? Öшын вылас миян кольсьöма сьöлалiсь чучело.

Челядьлöн шум-гам орöтiс луншöрся чöлöмсö. Нiя одзасьöмöн обсуждайтiсö кайварышлiсь помкаэз и радуйтчисö:

— Не пыр тэныт куштыны рамыник каёккесö! Кошшин бы аслыт шыр пöлöссö!

А кайварыш бöра пукалiс ни кöз йыв вылын, кыдз сторож, нёджжасис омöн. Нет-нет да и видзöтыштас лöгöн сы ладорö, кытöн сера борда неловья сьöла первуись бöбöтiс сiйö сэтшöм лёка. Хищник эз и кыв, кыдз ныр дорсяняс жагвыв пидзыртчисö гöрд тёппез да ыскöвтiсö голя кузяс увлань.

 

 

 

ЧУДИТЧÖ

Драматическöй этюд

 

ОРСÖНЫ:

ВЕРА,

ПЕТЯ } _{том гозъя}

ПАЛАДЬ — годдэза инька

 

Олан жыр. ВЕРА ректö чемодан, радувья гажвевйöн нюргö-сьылö. ПАЛАДЬ сулалö сы дын.

 

ПАЛАДЬ. Тi этчö овны локтiт?

ВЕРА (кыскалö чемоданiсь книгаэз). Локтiм тай.

ПАЛАДЬ. Ме бы тiян местын, дак некöр эг лок. Дыр эд, натьтö, оз жö овсьы.

ВЕРА (сьывнытö дугдö). Мыля?

ПАЛАДЬ. Чудитчö эта керкуын. Зника абу — чудитчö.

ВЕРА (дивуйтчöмöн). Кыдз чудитчö?

ПАЛАДЬ. Но кыдз пыр чудитчывлö: то мыйкö öшас, кöть юртö пукты — он адззы, то узьны оз сет — шум-гам быдлаын: и голбечас, и джоджулас. Семья дзугö. Тiян вотöдз вот олiсö öтiк гозъя — некыдз ас коласаныс эз вермö лöсьöтчыны — янсöтчисö. Ой, ёна чудитчö эта керкуыс. Ог и тöд, кыдз тi овнытö пондатö. Мукöдыслö нельки мыччасьлö пö, повзьöтлö. Тiян местын кöркö коктöм учитель пö овлöм да матича бердас джагöтчылöм. Вот сiя чуддэскöт, натьтö, и повзьöтлö.

ВЕРА. Но-о? А кыдз нö тi олат?

ПАЛАДЬ. А сiдз жö эд и олам. Велалiм ни да и олам. А сякöйыс жö ни вöлi. Важ мужикöкöт чуть эг вийсьö. А öнi важын ни öтнам, дак велалi ни. Важ олiссесö эд озжык жö полöт.

ВЕРА. Ме некинлö ог верит, не енлö, не чёртлö. Менö и кулöмыс оз повзьöт. А квартира меным гленитчö. Ме чайта, бура эстöн позяс овны.

ПАЛАДЬ. Но видзöт. Тэ том, олансö он на тöд. Ме висьталi, кыдз да мый, а сэтчин — тi асьныт тöдат. Семьятö берегит, мед мужикыт эз пышшы. Ок, том гозъя. (Петö.)

 

Сiя жö жырын Вера да Петя.

 

ВЕРА (места оз адззы, ветлöтö, видчö). Тэныт кыдз колö, а ме сэсся овны эстöн ог вермы. ПЕТЯ. Вера, но мый тэкöт сэтшöмыс? Квартира бур, югыт, гажа. Миськасян-чышкисян абу уна. Мый эшö тэныт этася колö?

ВЕРА. Ме не сы йылiсь.

ПЕТЯ. А мый йылiсь эшö? Ме некыдз тэнö ог вежöрт. Тэ бöрья луннэзö кучикат он тöр. Думайтан, эта меным гленитчö? Тэ, может, шогалан?

ВЕРА, Кыдз бытьтö тэ нем он адззы. Эстöн овны оз туй. Сэтшöм квартира.

ПЕТЯ. Кытшöм квартира, öддьöн нельки бытшöм, думайта, ме дак. Буржыксö он и адззы.

ВЕРА (кинас зэркыта öвтыштöмöн). Баитны эшö тэкöт... Кöр нем кляпсö он вежöрт! Тэ мый синтöм-пельтöм я мый я, что нем он кыв да он адззы? Вунöтiн разь, кыдз виль год кежас медбур платьеöс пасьтавнытö лöсьöтi, а йисö öштi? Сiдз сэки пасьтасьнытö эта увья и эг вермы. А талун вöлись йиыс петiс — коридорын тув вылын öшалö. Кин сiйö сэтчин öшöтiс? Но кин? Кыдз сiя сэтчин вермис лоны, кöр ачыс платьеыс гардеробын öшалö? А висьтав вот, кытчö тэнат сера носкиэт лоисö? А шарфыт? Кин кытчö воштiс? Эд ми олам только кыкöн. И эта лоö — бытшöм квартира?

ПЕТЯ. Тэ мый, думайтан, ме я мый я сымдасö кери? Мый тэ ме вылын чирзан? Йиэз, носкиэз... Да эта жö немтöм торрез! Мый тэ ны увья кучиксит петан?

ВЕРА. Да кывзы тэ. Суп пуа — курыт сов, чай заварита — шöма, дукыс кытшöмкö мöдiк. Этö тэ ачыт сёйтöннят баитлан. И асьным ни быд лун видчам. Вот тэныт и немтöм торрез.

ПЕТЯ. Былись тэ öнi вежсин. Кытшöмкö мöдiк думаэз юрат лоисö. Тэ и стряпайтны пондiн умöльжыка. Кин сэтöн виноват?

ВЕРА. Вот, вот, ме и виноват. Песлалöм паськöм вöскын öшалiс — простыня öшис — ме виноват. Кранiсь ва оз пет — ме виноват. Электричество кусас — бöра ме виноват. Менам мыла ни оз тырмы. Кылан тэ? Ме ог сэсся сiдз вермы! (Пондö горзыны.) Тэ командировкаö ветлiн, дак эта коста ойбыт кинкö вöскас ветлöтö, ёркöтö да шутнялö.

ПЕТЯ. Кинкö, поди, нарошно повзьöтчö да? Тэ бы петiн да и видзöтiн.

ВЕРА. Аха, петiн бы да видзöтiн, кöр ме местаись ог лысьт вöрзьыны.

ПЕТЯ. Кинiсь тэ полан? Или былись кинкö этö умöльсö нарошно керö? Вот бы кутны канальяöс, а?..

ВЕРА. Кутны, шуан? Да нiйö разь кутан? Этö жö чуддэз быдöс керöны.

ПЕТЯ (дивуйтчöмöн). Чуддэз, шуан? (Сералö.) Ха-ха-ха! Кытшöм эшö чуддэз? Да тэ ли этö, Вера? Кин тэныт висьталiс? Кысь сымдасö кылiн?

ВЕРА. Паладь соседкаыс тай баитö. Сiя и висьталiс, что эта керкуын вексö чудитчö.

ПЕТЯ. Дак вот мыйын делоыс. Паладьыс тэныт висьталiс... Сэк ме быдöс вежöртi. Висьтав, кытчö тэ ключтö колявлан?

ВЕРА. Почтовöй ящикö.

ПЕТЯ. А Паладьыс вовлö метöг миянö?

ВЕРА. Часто пыравлö. Сiя жö бур морт, кыдз ме думайта дак. Сiя меным и отсасьлö öтi-мöдi. А ме сы понда сiйö вердыштла.

ПЕТЯ. Сiя тэныт и чуддэс йылiсь пыр модьö? Сiдз эд?

ВЕРА. Висьтасьлö тай, мый миян вотöдз эстöн вöвлöм. Том гозъя, висьталö, эстöн абу вермöмась овны, янсöтчöмась.

ПЕТЯ (ас кежас дивуйтчöмöн оклалöв-керö öтмöдöрö юрнас). Но и Паладь тё-ё-ётка. Не весь, сiдзкö, меным домоуправыс висьталiс: бур квартираö пö тi шедiт, да öтiк умöль: соседка пö сэтшöм — колö кужны лöсьöтчыны сыкöт. Некинкöт пö эшö бытшöма эз лöсяв, быдöннысö пö бöр вöтлö.

ВЕРА. Мыйлö бы сылö этö колö?

ПЕТЯ. Мыйлö, шуан? Кин кульыс сiйö тöдас. Эмöсь эд эшö сэтшöм отирыс, кöдна бурсö керны оз прокмö, дак сы местö кöть умöльсö керöны.

ВЕРА. Нем ог вежöрт. Меным мыйкö оз и веритсьы.

ПЕТЯ. Оз веритсьы? Но, бур. Керам сiдз: часöт игнасям и мунам бытьтö киноö. Ключсö колям важ местас. Асьным бертам бöр и видзöтам, мый эстöн лоас.

 

Кыкнанныс петöны. Сцена сайын Паладьлöн голос: «Кытчö нö, том гозъя, иньдöтчит». Паныт Петялöн голос: «Киноö, Паладь тётка». Пырö ПАЛАДЬ, пондö бергавны жыр пасьта, кошшö, мый бы эшö керны.

 

ПАЛАДЬ. Ок, нем мыйкö менам оз пет. Кытчöдз эшö нiя пондасö этадз менö мучитны? Кыдз нiйö велöтны? Быдöс ни кери, а нiя бытьтö нем оз адззö, не оз кылö. Не яйись-вирись отир, кытшöмкö кöртiсь. Немись-нем нылö оз мöртчы. Öзтыны я мый я керкунысö. Ешта жö эд ассим добросö петкöтны. (Сибöтчö электроплитка дынö, сюйышта розеткаö вилка, пуктö плитка вылö газета, газета öзйö, пондö сотчыны.) Ась, ась сотчö. Одö бы мунö, дак пожарыс вöтлас. Тiянсянь эд сiя, колит кö сiдз плиткасö.

 

Котöрöн пырöны ПЕТЯ да ВЕРА. Петя уськöтчö кусöтны би.

 

ВЕРА. Дак вот кытшöм лёкöсь ни лоисö öнi чуддэс, Паладь тётка!

ПЕТЯ (сылö жö). Ноко, лок мунам, кытчö колö, кытöн некин оз чудитчы!

 

Занавес

 

 

ВАЖ ИСКУССТВОЛÖН ВИЛЬ ОЛÖМ

 

 

Важся каддэзсянь олö миян отирын ыджыт да бур мастерство — паськöм серöтöм. Этö — серöн кыйöм пестреддез, öктöмöн да уна вöртöн серöтöм дöра, кушак-покром кыйöм, чулки-кепись серöтöм да вышивайтчöм.

Юав пöрись йöзлiсь, и быдыс тэныт вись­талас, кытшöм сьöкыт уджöн вöлi инькаэз понда паськöм керöм. Медперво колiс быд­тыны лён нето пыш, вартны сiйö, тыöтны, косьтыны, сыбöрын нярьявны, пыркöтны да зуавны — янсöтны торк бердiсь джендöс, джендöс бердiсь — сöдз. Сыбöрын кудельсö колiс тöвбытöн печкыны да вöлись кыйны. И быдöс эта керсис не машинаöн, а морт киэзöн, сартаса би одзын, тшынын да саын. Медбы не сэтшöм гажтöма кыссис эта öткодь кузь удж сайын кадыс, инькавöрыс [1] öксьывлiсö öтлаö, сiдз шусяна пукаланiннэз вылö. Пукаланiннэзын томмес велöтчывлiсö уджавны пöрисьжыккезсянь, быдыс старайт­чис керны буржыка, чожажыка да басöкжыка мöдiкся.

Коми иннез да ныввез öддьöн радейтлiсö керны мича, серöтöм паськöм да серöтöм пызандöраэз, чышкöттэз, шебрас, половик­кез. Öнi ми видзöтам баббезлiсь серöтöмсö и оз веритсьы, что этö быдöс керисö неграмотнöй, пемыт синма инькаэз сiя кадö, кöр, кажитчö, шоча и кынöм вöлi пöт.

Кудымкарскöй да Юсьвинскöй районнэзын и öнi эшö видзöны тöдвылын, кыдз кöркö Строгановвез босьтавлiсö асланыс мастерскöйезö кужисьжык инькаэсö да нывкаэсö серöтны дöра, кыйны ковёррез да керны мöдiк басöкторрез. Öнi эшö эм зэв интерес­нöй преданнё Настенька Радостева йылiсь, коми ныв йылiсь, кöдö граф Строганов, кыдз öддьöн кужись мастерицаöс, нуöтöм Петербургö. Настенькалöн кыйöм ковёрыс гленитчöм австрийскöй посоллö, и козьналöм графыс посолыслö этö ковёрсö, а заодно и Настенькасö (эд сiя вöлi только крепостнöй крестьянка). Сэтшöм Настенькаэз коми йöз коласас вöлiсö, натьтö, не öтiк. Эд не весь жö пöрись кужиссес и öнi баитлöны: «Мый ни ми кужам... Вот миян баббезным кужлiсö: мый бердö бы эз кутчö, сiя и петлiс ны кипод увтiсь. Кужлiсö нiя серöтны-баситны!»

А эд и öнi миян мастеррес эмöсь неумöльöсь.

Вежсис инькалöн олан, öнi шоча ни кыйöны дöра, керöны паськöм. Петiн магазинö и бöрйы, кытшöм сера тэныт колö ситец нето платье. Быдöс керö фабрика: и бура, и басöка, и не вывтi дона. Кыйöм да гöрдззöм кольччис только кыдз шоччисьöм, кыдз сьöлöмгаж, кыдз искусство. Отир öнi босьтöны магазинiсь готовöй сунис, мичöтöны нето небöны мичöтöм ни мулинэ и мöдiк шöрт и кыйöны, гöрдззöны да вурöны, мый нылö колö. Округись быд деревняын адззи­сяс не öтiк и не кык морт, унажыксö пöриссез, кöдна асланыс шоччисян кадö керöны басöк коланторрез.

 

* * *

Вот ми Ошиб посадын. Быдöнныс иньдöны Анастасия Ивановна Лунегова дынö. Сiя учительница (бур удж понда сылö сетöмась Ленин орден), пöрись ни öнi морт, но сельскöй активистка сё эшö уна уджалö, мед лэбтыны посадын олiссезлiсь культура, отсавны томмеслö лоны бур морттэзöн. Век радейтiс музыка, песняэз и быдöс басöксö: сылöн, кыдз некинлöн, цветтэзöн тырöм керкуыс, йöрыс; сылöн — кужöмöн бöрйöм картинаэз, книгаэз, журналлэз. Но медодз син вылö усьöны сы киöн вурöм-серöтöм ковёррез, думкаэз, чышкöттэз, пызандöра, покрывалоэз — мыйыс только сылöн абу, и быдöс аскерöм. Унажыксö Анастасия Ивановна вышивайтö крестöн, а сiдзжö гладьöн, керö ришелье, гöрдззö кружеваэз. Сiя вышивайтiс не öтiк классическöй карти­на, кыдз «Алёнушка», «Куим богатырь» и мöдiккез. Гладьöн вурöм ыджыт покрывало повторяйтö народнöй геометрическöй сер. Серсö лöсьöтiс и сунис рöмсö бöрйис ачыс мастерицаыс. Гöрд, зелёнöй да веж рöммез. бура тöдчöны да каттисьöны öтiк уна рöма гаммаö чим сьöд ыб вылын. Покрывалоыс миянлö дона кыдз коми йöз искусстволöн выраженнё.

Анастасия Ивановналiсь вурöм-серöтöмсö неöтчид ни мыччавлiсö окружнöй выставкаэз вылын, сылöн удж отметитöм не öтiк ни грамотаöн.

Кудымкарын, нач Иньва берег дорас ляпкисьöм пуовöй шатровöй вевта керку. Сы бердiсь йöрыс тырöм фруктовöй пуэзöн да ягоднöй кустарникöн, а межаэс тырöмась быдкодь цветöн. Эта керкуын олöны мама-ныла, басöктор радейтiссез — Клавдия Николаевна да Ольга Михайловна Барановаэз. Дас год мымда ни нiя öктöны коми-пермяцкöй йöзлiсь орнаменттэз. Нiя лöсьöтiсö ни кык ыджыт альбом, кытöн уна рöмöн рисуйтöмась быдкодь серрез, унажыксö ку­шак да покром серрез. Видзöтан ны вылö и дивуйтчан: кытшöм талантливöй йöз керис сэтшöм басöк йиэсö, лöсьöтiс энö адззывлытöм серресö, кöднаын бытьтö енöшка ольсассьöм аслас сизим рöма мичöн!

Öнi, кöр етша ни пондiсö новйыны покроммесö да кушаккесö, Барановаэзлöн орнамент öктöм — öддьöн ыджыт и благороднöй удж. Нiя мöдöны чукöртны да кольны бöрся увтырлö сы предоккезсянь бур козин — веккезöн керöм да бöрйöм серрез, быдöс сiйö басöксö, кöда вöлi коми-пермяккеслöн (кынымкö кушак да йи узöр печатайтöмöсь вклейка вылын).

Но Клавдия Николаевна и Ольга Михайловна не только бур öктiссез. Нiя асьныс серöтöны ны сьöртi чышкöттэз, подзоррез, платьеэз да мöдiк берсясö. Нiя медодз мыччалiсö, кыдз кыйöм серсö вуджöтны вышивайтанö. Эта понда нiя асьныс лöсьöтiсö пиня валик, кöда отсöтöн позьö пасъявны гладь ситец вылын канва, а сы сьöртi вöлись вурны гладьöн или крестикöн быд­кодь рöма сунисöн серрез.

Нiя уна отсалöны мöдiк мастерицаэзлö, театрын уджалiссезлö, художниккезлö и учёнöйезлö. И öддьöн бы вöлi бур, ежели бы печатайтны эна орнаменттэзiсь альбом. Сэк бы миян йöзлöн орнамент чожа сюрис и фабричнöй производствоö.

 

* * *

Кувинскöй сельсоветiсь Учöт Сидорова деревняын олö простöй да скромнöй морт — Александра Дмитриевна Истомина. Сiя эшö том, но сьöкыт сьöлöм шогöт ляпкöтö сiйö ольпась бердö. Только Александра Дмитри­евна оз сетчы шогыслö, вермасьö сыкöт. И нельки адззöм аслас оланын ыджыт гаж — кыйö пестредь, половиккез, чышкöт дöра. Эстöн сiя мыччалö ассис ыджыт талант.

Кöркö сылöн мамыс да и мöдiккес дöрасö серöтлiсö гöрдöн чочком панан вывтi. А Истомина öктö серсö быдкодь рöма кыянöн, сысянь сылöн серрес унаöн богатжыкöсь, мичажыкöсь. Быд кушак сер сiя кыйöмöн вермö вуджöтны дöра вылö. Сы кы­йöм чышкöттэзын вились ловзьöны да зорамöны кушак серрез, кöдна вермисö бы лоны вунöтöмöсь öтлаын покроммескöт да кушаккескöт. А. Д. Истоминасянь велöтчö уна отир. Уна рöма кыйöм сё паськалö.

Эмöсь мастерицаэс Ыджыт Сидорова, Раменнё, Вежайка да мöдiк деревняэзын.

 

* * *

Кинни, натьтö, Кудымкарын öнi оз тöд Ираида Георгиевна Климоваöс: сы йылiсь гижöны газетаэзын, висьтасьöны радио пыр, сiйö мыччалö телевиденнё, сы йылiсь тöдöны нельки Москваын. Сылiсь аскерöм ковёрсö, кöда понда Всероссийскöй выставка вылын сетiсö медодзза степеня диплом, босьтiс РСФСР культура Министерстволöн. Художественнöй фонд.

И вот ми тöдса мастерица ордын. Сiя тэрмасьöмöн, кыдз и прокод, висьтасьö:

— Чайтi я ме лоны кыйисьöн? Не сiя ка­дыс вöлi, сё некöр да некöр. Колiс уджав­ны и уджавны: медодз — медбы шедтыны нянь, сыбöрын — мед не кольччыны рево­люция сьöрись, велöтчыны, велöтны мöдiккезöс. Сэсся — война, бöра уджалам, велöтчам, велöтам... Не кыйöм дорöдз вöлi...

Сылöн бабыс кыйлöма дöра строгановскöй мастерскöйезын. И пыр старайтчöм кыйны дöрасö сэтшöм сераö, кытшöмö абу на адззывлöмась мöдiккез. Айыс вöлöма набойщикöн да синильщикöн. Этасянь Ираида Георгиевна челядь кадсянь велалöма быд­кодь рöма серрез бердö, только пöрисьувьяс ни, пенсия вылö петöм бöрын, пондiс чулöтны кад важ ремесло сайын.

Ираида Георгиевналöн мастерство öддьöн богатöй. Мый сiя только оз кер! Сiя гöрдззö сетка (сiдз, кыдз гöрдззöны саккез) да вевттьö сiйö узöррезöн — керö сiдз шусяна филейка. Серöн жö гöрдззö чулки-кепись, вышивайтö ковёррез, салфеткаэз да мöдiкö, кыйö уна вöртöн и öктöмöн. И мый бердö бы сiя эз кутчись, быдöс сылöн аркмö аскоддя и пыр мöдкодь. Быд сер, быд композиция, рöмлöн быдкодь сочетаннёэз — быдöс сiя лöсьöтö и керö ачыс, аслас юрись, аслас киöн. Эта и дона сы творчествоын, сiя уджалö кыдз подлиннöй худож­ник. «Ми эд серресö не асьным лöсьöтам, нiйö сетö миянлö ачыс природаыс», — шуö мастерица и висьтасьö, кыдз сылö сетöны серресö и рöммесö то цветтэз, то пуэз да нылöн вуджöррес, то шондiлöн югöррес.

Медбура сiя мыччалö талантсö кыйöмын. Половиккез, дорожкаэз да ковёррез кыйтöн сiя не только используйтö цветнöй пестрединнöй серрез, кыдз керöны уна отир, но сы коста жö кужöмöн кыйö уна вöртöн, а сiдзжö ас мознас бöрйö мичöтöм шöртсö öктытöнняс.

Уна отир велöтчöны эта мастерица дынын. И кин бы эз лок, сiя пыр бытшöмика висьталас аслас удж йылiсь да мыччалас, кыдз сiя керö ассис шедеврресö. Сылöн, позьö шуны, лоис аслас художественнöй шко­ла, сiя быдтiс ни да велöтiс ас коктуяс не öтiк мастерицаöс ни.

Кыдз подлиннöй художникöс И. Г. Климовасö характеризуйтö пырся виль, аслас адззöм: сiя пыр кошшö, кошшö и адззö ас­лас творчествоын сэтшöмö, кöда эз на вöв эшö некинлöн мöдiклöн одзжык и нельки сылöн аслас.

Нач неважын ми адззылiм сылiсь виль дорожка, кöда вылын традиционнöй «климовскöй» ромббез пытшкын вдруг пондiсö уйны уткаэз — топ сэтшöмöсь жö, кытшöмöсь олöны не öтiк век ни миян отир изобразительнöй творчествоын (кыдз утка-солонкаэз). Виль салфетка вылын, кöдö таво керис Ираида Георгиевнаыс, уна вöртöн кыйöмöсь зэв сложнöй да басöк серрез, а шöрас öктöмöн кыйöмöсь да вурöмöсь бисерöн кыввез: «50 лет» — салфеткасö керöма Советскöй властьлöн локтан юбилей кежö.

КПСС-лöн XXIII съездлö мастерица козь­налiс векнитик кузь дорожка, кöда вылын кык рöмöн кыйöмöсь кыввез: «Да здравствует КПСС!»

И. Г. Климовалöн юрыс тырöма творческöй планнэзöн. Сылöн сымда виль думаэз, мымда абу мöдiк, нельки том мортлöн.

Ми чайтам, сiя дыр и уна эшö пондас керны отирлiсь син гажöтан торрез.

 

* * *

Ми висьтасим эстöн только кынымкö ма­стерица йылiсь. А нiя эд округас неетша. И быдыслöн аслас манера, аслас серрез, аслас кужöм. Гайнскöй районын Мысовскöй сельсоветiсь деревняэзын, шуам, öддьöн радейтöны эшö сера чулкиэз да кепис­сез. А Косаись мастерицаэз керöны öддьöн бытшöм пестреддез, бура вышивайтчöны. Кöч посадын олö пенсионерка Елена Михе­евна Пыстогова. Сiя быдкодь рöма тороккезiсь вурö ковёррез, и нiя петöны сэтшöм гажöсь, что немымда озö кольччö вышивайтöм да кыйöм ковёррез сьöрись.

Сiя жö районын эшö уналаын кыйöны да новйöны сера покроммез. Сiдз, Петухова деревняись колхозница Татьяна Николаевна Мелехина кыйö не только аслыс, но и уна соседдэслö. Кыйö сiя тожö вильмоза: бöрйö серресö скромнöйöсь, поснитикöсь — сэтшöмöсь, кытшöмöсь öнi колöны отирлö.

Быдлаын миян нывкаэс да инькаэс öд­дьöн радейтöны вышивайтчыны, гöрдззыны, серöн кыйны — быднёжа баситны не толь­ко праздниксяö, но и пыр новьян паськöм, половиккез, занавессэз да мöдiкö. И кытшöм бура да бытшöма керöны нiйö!

1965 годö вöлi ыджыт Всероссийскöй вы­ставка. Перво округын, областьын, а сэсся и Москваын мыччассисö и миян мастеррезлöн экспонаттэз. Асланыс мастерство понда босьтiсö медодзза да мöдiк степеня дипломмез И. Г. Климова, М. Якимова, А. Гордеева, Е. Ханжина, И. Шахова.

Уна эмöсь миян и мöдiк мастеррез, кöдна йылiсь ми огö на тöдö нето тöдам öддьöн етша. Но даже эта дженыт обзор сьöртi мивермам шуны, что коми-пермяцкöй йöзлöн кöркöся паськöм серöтöм олö отирас да зорамö. И ежели сiя кöркö вöлi отирлö сьöкыт уджöн да и отирыс керис уна басöксö не аслыс, а хозяинлö, баринлö нето петкöтiс рынокö, медбы шедтыны аслыс нянь вылö, — öнi эта уджыс лоис гаж искусствоöн, бур шоччисьöмöн. И öнi ни ми вермам шуны, что кыным буржыка олö отир, сыным ёнжыка зорамö сылöн искусствоыс.

Эмöсь эта бур да колана уджын и недостатоккез. Мукöдчид (и нешоча!) мастерицаэз озö вермö адззыны да небны колан рöма шöрттэз, колана краскаэз, канва да мöдiкö. Миян книжнöй полкаэз вылын абу колана книгаэз, нем абу коми-пермяцкöй отир творчество йылiсь. Мукöдыс видзöтöны эшö эта удж вылö кыдз весь олöм вы­лö, нёштöмтор вылö, оз лыддьö сылiсь ыджыт эстетическöй и воспитательнöй значеннёсö.

Важын ни колö осьтны оланö туй важ, бытшöм мастерствоыслö. Колö адззыны быдöннысö, кин мöдö занимайтчыны художественнöй ремеслоöн, йитны нiйö артельö, кöть нiя и уджалöны быдыс аслас гортын.

Колö сетны мастерицаэс уджлö виль направленнё: мед нiя керöны сiйö, кöда колö миян виль оланын. Сiдз, серöтöм дöра öнi вермас öддьöн лöсявны портьераэз вылö, пызандöраэз да салфеткаэз вылö. Öнi моднöйöсь аскыйöм джодж дорожкаэз да ковёррез, неыджыт сера салфеткаэз журнальнöй пызаноккез вылö. Покроммез туйö öнi пондiсö кыйны векнитик сыртöм гасниккез, кöднö позьö домавны пряжкаэзöн (тожö аскерöмöсь — лыовöйöсь или шöртовöйöсь), киззезöн, брошкаэзöн да нато­диль керöм вöснитик шнуроккезöн. Нiйö позьö новйыны и платьеöн и юбкаöн, нiя лöсялöны учöтик челядь паськöм дынö. Кыйöм серрезöн позьö бура баситны пла­тьеэз, гожумся костюммез, быдкодь праздничнöй паськöм. Кыйöм серöтöм гасниккез (йиэз) сiдзжö öддьöн лöсялöны мужиккезлö галстуккез туйö. Миян кöдзыт климата крайын öддьöн моднöйöсь лоисö серöтöм чулки-кепись да вурунiсь гöрдззöм паськöм: шапкаэз, шляпаэз, шарффез, коф­таэз, костюммез, свитеррез. Лöсялöны нiя кöть кинлö: пöрисьлö и томлö, нывкалö и зонкалö, öддьöн бурöсь нiя и поснит че­лядь понда.

Ежели миян мастерицаэс пондасö керны быдöс этö, нылöн ремеслоныс öддьöн чожа лэбас, бурсялас, лоас нельки доходнöйöн. Только колö бöра жö кужöмöн отсавны нылö öктыны да вузавны керöм продукциясö. Этö позьö керны бытовöй комбинат пыр или народнöй творчестволöн Дом пыр. Ежели кужöмöн организуйтны быдöс этö уджсö, Кудымкар и округыс вермис бы ло­ны миян странаын öддьöн аскоддя да бытшöм народнöй прикладнöй искусстволöн центрöн.