Vom binof nämikum ka man!

Num yelas dü kels vom zänedik lifof lunüpikumo ka man: in Fransän: mö yels 5, in Nedän: mö yels 2, in Linglän: mö yels za 5, in Spanyän: mö yels za 6, in Vesüda-Deutän: mö yels za 6, in Litaliyän: mö yels za 2, in Yapän: mö yels za 4, in Hindän: mö yel za lafik, in Lamerikän: mö yels za 6, ed in Stralopän:^[1] mö yels za 4.

NOETS. (Vükifonät)

Bükapök; pla: Laustralän.

Se Volapükagased (Zänagased pro Volapükanef) 1958, Nüm: 3, Pad: 13.

Dö dugäl kulivik volapöpa

Dötumanum pöpama, kel kanon ni reidön ni penön: In Hindän: 80, Brasilän: 57, Rusän: 19 (ün 1939), Grikän: 41, Spanyän: 21, Yapän: 2, Litaliyän: 11, Tats-Pebalöl Meropa (= Lamerikän): 4, Stralopän:^[1] 5.

NOETS. (Vükifonät)

Bükapök; pla: Laustralän.

Se Volapükagased (Zänagased pro Volapükanef) 1958, Nüm: 3, Pad: 13.

Nedänans dü livüp

Dötumanum löfälas distöfik: Reid lekonedas: 51%, cög: 11%, bepläyam musigömas: 20%, kadapledam: 50%, mekül: 45%, gadam: 45%, klubädalif: 35%.

Se Volapükagased (Zänagased pro Volapükanef) 1958, Nüm: 3, Pad: 13.

Kisi jiklavan zänedik duinof-li?

A del, logs ofik dunons mufis kontrolik: za 30 000.
A del alik, dunof kapamufis: za 5 000 de disin lü penamacin.
A del alik, klavof kedetis fomöl fagoti metas: za 170.
Geäd de log ad brein e de brein ad nam dulon mö sekuns ³/₁₀.
A klavam e a klav mufükof vetoti gramas: 350.
A del, at binon vetot milgramas: 29 000.

Se Volapükagased (Zänagased pro Volapükanef) 1958, Nüm: 3, Pad: 13.

Vifs koapa obsik

Nutül me logalips jenon ko vif milmetas: 1 ¹/₅ a düp.
Her glofon ko vif zimmetas: za 15,5 a yel.
Vif sirkülama bluda obsik binon mö mets 288 a düp.
Cil pledöl bevegon fagoti milmetas: za 24 a del.
Mödiküns drimas obsik te dulons dü sekuns: ze 5.
Dol kanon propagön oki ko vif milmetas: 57,7 a düp.
Nuels obsik glofons ko vif zimmetas: 6 a yel.
Sekü seutam skretobs mö liäts vata: 8 a 10 a del.

Se Volapükagased (Zänagased pro Volapükanef) 1958, Nüm: 4, Pads: 15-16.

Spad vola

Num lödanas a kvadamilmet (km²) binon

in Laustralän:	pösod(s)
in Balatam Sovyätarepüblikas sogädimik:	,,
in Lamerikän:	,,
in Tsyinän:	,,
in Linglän:	,,
in Yapän:	,,
in Nedän:	,,
in Monakän:	,,	22 000

Se Volapükagased (Zänagased pro Volapükanef) 1958, Nüm: 4, Pad: 16.

Luimöf

Cil änu pemotöl labon 70% luimöfa,
alan ko lifayels 20 labon 60% ed
utan ko lifayels 70 labon 58%.
Klu fraseod: „bäldan dasägik“ no binon so bisarik!

Se Volapükagased (Zänagased pro Volapükanef) 1958, Nüm: 4, Pad: 16.

Dö kasub

Kasub bo labon literati nemödikün pükas valik Yuropik. Do pük at pagebädon aldeliko fa milats as kosädapük, literat oka äbinädon ün 1912 mö buks te kils u fols; bal bukas at bib äbinon. Gaseds e penäds votik ädefons lölöfiko ün tim löpo pemäniotöl. Igo ün nutim literat lölik püka at bo no osaidon, ad fulükön bäkasakädi julana.

Se Volapükagased (Zänagased pro Volapükanef) 1958, Nüm: 4, Pad: 16.

Hüm Volapüka

Rigiko pepoedon fa ‚Franz Zorell e penoatädon fa ‚J. M. Schleyer; vödem nulik pärevidon fa ‚Arie de Jong.

Volapük perevidöl

Volapük rigik

Sumobsöd svistama stäni!	Sumolsöd stäni blodäla!
Neflenami obs hetobs.	Dikodi valik hetobs.
Dakipobsöd ga baläli!	Tönöls jüli baladäla,
Volapüki beyubobs.	Volapüke kosyubobs,
Vokädobsöd ko cifal:	Vokobsöz ko datuval:
„Menefe bal, püki bal!“	„Menade bal, püki bal“!

Kis okanon-li plu svistön	Kis also, kanos koblodön
lölika vola menis?	lölika vola menis?
Kis plu ogudükumon-li	Kis also kanos menodön,
ka pük bal onas stadis?	äs pük bal, omsa stadis?
Klu vokädobsöd bu val:	Klu tonodosöz in val:
„Menefe bal, püki bal!“	„Menade bal, püki bal!“

Cifal püka ga lifomös!	Datuvel püka lifomöd,
Lifonsös slopans ona!	Lifomsöd pakels ota,
Volapük ai floronös,	Volapük aiflolomöd,
e spiked jönik ona!	e välapüked oma!
Klu tonosös love tal:	Oibinomöd su tal
„Menefe bal, püki bal!“	Menade bal, püki bal!

Vödem in Volapük perevidöl. Se Volapükagased pro Nedänapükans 1933, Nüm: 4, Pad: 18. Se Volapükagased (Zänagased pro Volapükanef) 1958, Nüm: 4, Pad: 17. Päpüböl i nesekidiko fa Volapükaklub valemik Nedänik su pad tiädü: „HÜM VOLAPÜKA“.

Vödem in Volapük rigik. Se Lekaled Volapüka plo yel 1888 / Volapük-Almanach für 1888 fa Sigmund Spielmann (Leipzig: Verlag von Eduard Heinrich Mayer), Pad: 75.

Esepülobs libi

Fa ‚Johann Schmidt (Pepoedon ün 1943)

Esepülobs libi
dü dag e tep vemik;
no elogobs strali
lita zü sark blägik.
Esepülobs libi,
e komanef smalik
no älogon meni
votik ko dol legik.
Mens äcogons in doms,
us älilobs smili,
du ün neit ko toms
esepülobs libi.

Se Volapükagased (Zänagased pro Volapükanef) 1958, Nüm: 4, Pad: 18.

Viol

Fa ‚Johann Schmidt

Viol floron in jad e dag,
ti no logon deli,
toä glofon dis bled e stag,
gevon benosmeli.
Koveniko us in kein
lifon in mük e stil,
ga i pro on vam e rein
padosedons de sil.

Se Volapükagased (Zänagased pro Volapükanef) 1958, Nüm: 4, Pad: 18.

Trod

(Poedot stelafomik fa ‚Johann Schmidt)

Nif in zif e länäd äsä tapäd su glun seaton, su bel, fälid e fon. Glidob oli, o nifüp! tegol tali fenik dü tüp nesofik semik me nif e glad; ye dis kold, nif e glad - o menalad! ekö! glof nulik dönu eprimon, si! ebo dub stil glof pafödon. Demü atos glidob oli, o nifüp! ibä soli no obevikodol; ed oreigon sus bel e fon. sus fälid ko nid. Yö!

(1 jüesa 10 silabs e täno 10 jüesa 1 silabs.)

Se Volapükagased (Zänagased pro Volapükanef) 1958, Nüm: 5, Pad: 22.

Motalöf

Om: „Sonil ola, stötom-li laidiko?“

Of: „Nö! o söl! Te ven spikom.“

Se Volapükagased (Zänagased pro Volapükanef) 1958, Nüm: 5, Pad: 22.

Gadan trögik

Gadan, kel no älöfom vobi, äseitom oki ini jad bima ed äslipom. Mastan oma fädiko äbeistepom, ed äblamom omi, sagölo: „Oh trögan! no völadol, das son besvieton oli.“ - „Ö!“ votikan ägespikom: „Ebo kodü atos äseitob obi ini jad!“

Se Volapükagased (Zänagased pro Volapükanef) 1958, Nüm: 5, Pad: 22.

Gespik gudik

Man ämonitom su jevod vemo lunik ä vemo mägik. Beigolan älülogom onis, e fino äsäkom kofiko monitane: „Jevod at poselon-li seimüpo bai pauns u bai mets?“ Monitam älöpiotovom göbi jevoda ed äsagom: „Nüstepolös ini selidöp at! Us odagetol nüni pevipöl.“

Se Volapükagased (Zänagased pro Volapükanef) 1958, Nüm: 5, Pad: 22.