Стихословие Псалтири – кафизмы 7 и 8

Служба святителю Николаю, архиепископу Мир Ликийских, чудотворцу

Вечерня

Старший:
Молитвами Святых Отец наших, Господи Иисусе Христе Боже наш, помилуй нас.

Братия: Аминь.

Чтец:
Приидите, поклонимся Цареви нашему Богу.
Приидите, поклонимся и припадем Христу, Цареви нашему Богу.
Приидите, поклонимся и припадем Самому Христу, Цареви и Богу нашему.

В начале пения 103-го псалма старший совершает каждение всего храма и братии (при каждом каждении старший творит поклон).

Братия поет 103-й псалом - предначинательный (избранные стихи):
Благослови, душе моя, Господа! Благословен ecu Господи.
Господи Боже мой, возвеличился еси зело. Благословен еси Господи!
Во исповедание и в велелепоту облеклся еси.
Благословен еси Господи! - На горах станут воды. Дивна дела Твоя, Господи.
Посреде гор пройдут воды. Дивна дела Твоя, Господи.
Вся премудростию сотворил еси. Слава Ти, Господи, сотворившему вся.

Старший: Слава Отцу, и Сыну, и Святому Духу, и ныне и присно и во веки веков. Аминь.

Братия: Аллилуиа, Аллилуиа, Аллилуиа, слава Тебе, Боже. -трижды-

Братия: Господи, помилуй.(12 раз) – читается вместо великой ектеньи-поклон-

Стихословие кафизмы

Братия поет 1-й антифон 1-й кафизмы:
Блажен муж, иже не иде на совет нечестивых. Аллилуиа -трижды-
Яко весть Господь путь праведных, и путь нечестивых погибнет. Аллилуиа -трижды-
Работайте Господеви со страхом, и радуйтеся Ему с трепетом. Аллилуиа -трижды-
Блажени вси надеющийся Нань. Аллилуиа -трижды-
Воскресни Господи, спаси мя, Боже мой. Аллилуиа -трижды-
Господне есть спасение, и на людех Твоих благословение Твое. Аллилуиа -трижды-
Слава Отцу, и Сыну, и Святому Духу, и ныне и присно и во веки веков. Аллилуиа -трижды-
Аллилуиа, Аллилуиа, Аллилуиа. Слава Тебе, Боже.
Аллилуиа, Аллилуиа, Аллилуиа. Слава Тебе, Боже.
Аллилуиа, Аллилуиа, Аллилуиа. Слава Тебе, Боже.

Братия:
Господи, помилуй.(3 раз) – читается вместо малой ектеньи-поклон-

“Господи, Воззвах...”

Во время пения "Господи, воззвах" и стихир старший совершает каждение всего храма и молящихся.

Братия: Господи, воззвах к Тебе, услыши мя. Услыши мя, Господи.

Господи, воззвах к Тебе, услыши мя: вонми гласу моления моего, внегда воззвати ми к Тебе. Услыши мя, Господи.

Да исправится молитва моя, яко кадило пред Тобою, воздеяние руку моею, жертва вечерняя. Услыши мя. Господи.

Псалом 140-й:
Положи, Господи, хранение устом моим и дверь ограждения о устнех моих.
Не уклони сердце мое в словеса лукавствия, непщевати вины о гресех.
С человеки делающими беззаконие, и не сочтуся со избранными их.
Накажет мя праведник милостию и обличит мя: елей же грешнаго да не намастит главы моея.
Яко еще и молитва моя во благоволениих их, пожерты быша при камени судии их.
Услышатся глаголи мои, яко возмогоша: яко толща земли проседеся на земли, расточишася кости их при аде.
Яко к Тебе, Господи, Господи, очи мои, на Тя уповах, не отыми душу мою.
Сохрани мя от сети, юже составиша ми, и от соблазн делающих беззаконие.
Падут во мрежу свою грешницы: един есмь аз, дондеже прейду.

Псалом 141-й:
Гласом моим ко Господу воззвах, гласом моим ко Господу по-молихся.
Пролию пред Ним моление мое, печаль мою пред Ним возвещу.
Внегда исчезати от мене духу моему, и Ты познал еси стези o моя.
На пути сем, по немуже хождах, скрыша сеть мне.
Смотрях одесную и возглядах, и не бе знаяй мене.
Погибе бегство от мене, и несть взыскаяй душу мою.
Воззвах к Тебе, Господи, рех: Ты еси упование мое, часть моя еси на земли живых.
Вонми молению моему, яко смирихся зело: избави мя от гонящих мя, яко укрепишася паче мене

На 8

Чтец: Из глубины воззвах к Тебе, Господи.

Братия: Господи, услыши глас мой.

Братия поет стихиры (глас 2-й):
В Мирех пожив чувственно, миро воистинну явился еси, миром помазався умным, святе Николае, святителю Христов: и благоухаеши лица, верою и любовию твою всеславную память совершающих присно, разрешая бед и напастей и скорбей сих отче, к Богу твоими молитвами.

Чтец: Да будут уши Твои.

Братия: Внемлюще гласу моления моего.

Братия:
В Мирех пожив чувственно, миро воистинну явился еси, миром помазався умным, святе Николае, святителю Христов: и благоухаеши лица, верою и любовию твою всеславную память совершающих присно, разрешая бед и напастей и скорбей сих отче, к Богу твоими молитвами.

На 6

Чтец: Аще беззакония назриши, Господи, Господи, кто постоит?

Братия: Яко у Тебе очищение есть.

Братия:
Победы тезоименит воистинну верным людем яви: везде бо призываемь быстро предваряеши, любовию притекающих под кров твой: ты бо во дни и нощи верным являяся, спасаеши от напастей и обстояний.

Чтец: Имени ради Твоего потерпех Тя, Господи, потерпе душа моя в слово Твое.

Братия: Упова душа моя на Господа.

Братия:
Явился еси Константину царю, и Авлавию во сне, и сим страх вложив, сице тем рекл еси: разрешите убо вскоре, яже держите связанныя в темнице, неповинни бо суть беззаконнаго заколения. Обаче аще преслушаеши мене, мольбу сотворю Царю на тя, ко Господу моляся.

На 4

Чтец: От стражи утренния до нощи, от стражи утренния.

Братия: Да уповает Израиль на Господа.

Братия:
Велий заступник и теплый в бедах обретающимся еси славне, святе Николае, священнопроповедниче Христов: сущим на земли и плавающим, сущим далече и близ обретающимся, яко зело милостивнейший и молебник крепкий. Темже сошедшеся вопием: молися ко Господу, яко да всякаго избавимся обстояния.

Чтец: Яко у Господя милость, и многое у Него избавление.

Братия: И Той избавит Израиля от всех беззаконий его.

Братия:
Киими похвальными венцы увязем святителя, плотию в Мирех суща, и духовно всем достизающа, чисте того любящим, всех предстателя и заступника, и всех скорбных утешителя: и всех сущих в бедах прибежище, благочестия столпа, верных поборника? Егоже ради шатания врагов Христос низложи, имеяй велию милость.

Чтец: Хвалите Господа вси языцы.

Братия: Похвалите Его вси людие.

Братия:
Киими песненными пении похвалим святителя, нечестия противоборца, и благочестия поборника: Церкве первостоятеля, великаго заступника же и учителя, вся злославныя посрамляюща: потребителя Ариева, и того пособников? Егоже ради сих шатание Христос низложи, имеяй велию милость.

Чтец: Яко утвердися милость Его на нас.

Братия: И истина Господня пребывает во век.

Братия поет 2-ю:
Киими пророческими песньми похвалим святителя, иже далече сущая провидяща, и отстоящая яко близ суща пророчествующа неложно, и всю вселенную назирающа, и вся обидимыя избавляюща, во сне явльшася царю богомудрому, и древле связанныя заколения неправеднаго избавльша, и дарующа велию милость?

Старший (глас 2-й): Слава Отцу, и Сыну, и Святому Духу.

Братия:
Святителей удобрение, и отцев славу, источника чудес и верных заступника великаго, сошедшеся о празднолюбцы! песненными похвалами воспоим, глаголюще: радуйся, миряном хранителю, и первоседателю честный, и столпе неподвижный. Радуйся, светильниче всесветлый, иже мирския концы просвещая чудесы. Радуйся, скорбящих божественная радосте, и обидимых теплый предстателю. И ныне, всеблаженне Николае, не престай моляся Христу Богу, о верою и любовию чтущих приснорадостную и всепразднственную память твою.

Старший: Иныне и присно и во веки веков. Аминь

Братия поет догматик 2-го гласа:
Вертепе благоукрасися, Агница бо грядет чревоносящи Христа: ясли же подымите словом разрешившаго от безсловеснаго деяния нас земнородных. Пастырие свиряюще свидетельствуйте чудеси страшному: и волсви от Персиды, злато и ливан и смирну Царю принесите, яко явися Господь из Девы Матере. Емуже и приникши рабски Мати поклонися, и привещаше к держимому на объятиих Ея: како всеялся еси Мне, или како прозябл еси во Мне, Избавителю Мой и Боже?

Братия поет:
Свете тихий святыя славы, Безсмертнаго, Отца Небеснаго, Святаго Блаженнаго, Иисусе Христе! Пришедше на запад солнца, видевше свет вечерний, поем Отца, Сына и Святаго Духа, Бога. Достоин еси во вся времена пет быти гласы преподобными, Сыне Божий, живот даяй, темже мир Тя славит!

Чтец громко произносит прокимен дня(глас 5-й), и хор вторит ему:
Боже, во имя Твое спаси мя,/ и в силе Твоей суди ми.

Братия: Боже, во имя Твое спаси мя,/ и в силе Твоей суди ми.

Чтец: Боже, услыши молитву мою, внуши глаголы уст моих.

Братия: Боже, во имя Твое спаси мя,/ и в силе Твоей суди ми.

Чтец: Боже, во имя Твое спаси мя

Братия: И в силе Твоей суди ми.

Паремии.

Чтец: Притчей чтение:

Старший читает паремии:
Память праведнаго с похвалами, и благословение Господне на главе его. Блажен человек, иже обрете премудрость: и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней, и лета живота в деснице ея: в шуйце же ея богатство, и слава. От уст ея исходит правда, закон же и милость на языце носит. Послушайте убо мене, о чада! честная бо реку: и блажен человек, иже пути моя сохранит: исходи бо мои, исходи живота, уготовляется хотение от Господа. Сего ради молю вас, и предлагаю мой глас сыновом человеческим: яко аз премудрость устроих совет, и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо незлобивии коварство, ненаказаннии же прилагайте сердца. Послушайте мене и паки, честная бо реку, и отверзу от устен правая: яко истине поучится гортань мой, мерзки же предо мною устны лживыя. С правдою вси глаголы уст моих: ничтоже в них стропотно, ниже развращенно: Вся права суть разумевающим, и проста обретающим разум. Научу бо вас истине, да будет о Господе надежда ваша, и исполнитеся Духа.

Чтец: Притчей чтение:

Старший читает паремии:
Уста праведнаго каплют премудрость, язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая мерзость пред Господем: вес же праведный приятен Ему. Идеже аще внидет досаждение: тамо и безчестие: уста же смиренных поучаются премудрости. Совершение правых наставит их, и поползновение отрицающихся упасет их: Не пользуют имения в день ярости, правда же избавит от смерти. Умер праведный, остави раскаяние: наручна же бывает и посмеятельна нечестивых пагуба. Правда непорочнаго исправляет пути, в нечестие же падает неправда. Правда мужей правых избавит их: безсоветием же пленяются беззаконнии. Скончавшуся мужу праведну, не погибнет надежда: похвала же нечестивых погибнет. Праведник от лова убегнет, вместо же его предается нечестивый. Во устех нечестивых сеть гражданом, чувство же праведных благопоспешное. Во благих праведных исправится град, и в погибели нечестивых радование: Во благословении правых возвысится град, усты же нечестивых раскопается. Ругается гражданом лишенный разума, муж же мудрый безмолвие водит.

Чтец: Премудрости Соломоновы чтение:

Старший читает паремии:
Праведник аще постигнет скончатися, в покои будет. Старость бо честна не многолетна: ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга: Угодна бо бе Господеви душа его. Сего ради потщася от среды лукавствия. Людие же видевше, и не разумевше, ниже положше в помышлении таковое: яко благодать и милость в преподобных Его, и посещение во избранных Его.

Братия: Господи, помилуй.(40 раз) – читается вместо сугубой ектеньи–поклон-

Братия:
Сподоби, Господи, в вечер сей без греха сохранитися нам. Благословен еси, Господи, Боже отец наших, и хвально и прославлено имя Твое во веки. Аминь.

Буди, Господи милость Твоя на нас, якоже уповахом на Тя. Благословен еси, Господи, научи мя оправданием Твоим. Благословен еси, Владыко, вразуми мя оправданием Твоим. Благословен еси, Святый, просвети мя оправдании Твоими.

Господи, милость Твоя во век: дел руку Твоею не презри. Тебе подобает хвала, Тебе подобает пение, Тебе слава подобает, Отцу и Сыну и Святому Духу, ныне и присно и во веки веков. Аминь.

Братия: Господи, помилуй.(12 раз) – читается вместо просительной ектеньи–поклон-

Старший во время пения стихир на литиисовершает каждение храма и братии.

Чтец поет стихиру храма (глас 1-й):

Германово:
Реки Богословия / из честных твоих уст истекоша, Апостоле, / из нихже Церковь Божия напаяема, / покланяется православно Троице Единосущней: / Юже и ныне моли, Иоанне Богослове, / утвердити и спасти души наша.

Чтец поет стихиру Николая (глас 2-й):

Византиево:
Правило веры, и образ кротости, яви тя стаду твоему Христос Бог, святителю Николае: в Мирех убо благоухающу ти, всюду сияют светло божественная твоя исправления, сирых и вдовиц предстателю. Темже молися непрестанно, спасти души наша.

Отче Николае, мироположница мощей твоих Миры обогащает, в нихже и связанныя неправедно осужденныя, во сне царю видением твоим явився, свободил еси от смерти, и уз, и темницы. Но и ныне, якоже тогда, и присно видением твоим явися, моляй о душах наших.

Отче Николае, аще и Мирская страна молчит, но мир весь иже тобою просвещенный, мира же благоухании, и чудес множества, взывает благохвальными песньми: и спасшиися тобою осужденнии, с сущими в Мирех, и мы поюще вопием: моли спастися душам нашим.

Чтец (глас 4-й):

Отче Николае, Пресвятаго Духа мироположница сый, яко в Мирех благоухаеши божественными ароматы. Христовым бо апостолом подобник быв вселенную обходиши словесы чудес твоих. Темже и дальним яко близ, во сне являяся от смерти избавляеши, иже неправедным судом умрети имущия, спасая преславно от бед многих призывающия тя. Темже и нас от находящих лютых свободи твоими молитвами, присно восхваляющх тя.

Чтец (глас 8-й):

Доблестей твоих преподобне отче плод, просветил есть верных сердца: кто бо слыша безмерное твое смирение, терпению не удивися, еже к нищим тихости, к скорбящим утешению? Вся боголепно научил еси святителю Николае, и ныне неувядаемым венцем увязлся еси, молися о душах наших.

На хвалу потекл еси Господню, Николае, во временней жизни, и Той тя прослави на Небесней и истинней жизни. Темже дерзновение стяжав к Нему, моли спасти души наша.

Старший (глас 6-й): Слава Отцу, и Сыну, и Святому Духу.

Братия:
Благий рабе верный, делателю винограда Христова, ты и тяготу дневную понесл еси, ты и данный тебе талант возрастил еси, и по тебе пришедшим не завидел еси, темже врата Небесная отверзошася тебе: вниди в радость Господа твоего, и моли о нас, святе Николае.

Старший: Иныне и присно и во веки веков. Аминь

Братия поет Богородичен:
Сионе торжествуй, Иерусалиме веселися граде Христа Бога, подыми Зиждителя в вертепе и яслех вмещаемаго: отверзите ми врата, и вшед в ня, узрю яко Младенца пеленами повиваемаго, дланию же содержащаго тварь: Егоже поют ангели непрестанным гласом, Жизнодавца Господа, спасающаго род наш.

Братия: Господи, помилуй. (120 раз) вместо литии –поклон-

Стихиры на стиховне.

Первая стихира поется без стиха. Далее чтец читает первую половину стиха, братия поет вторую половину и стихиру.

Глас 5: Подобен: Радуйся:
Братия:
Радуйся, священная главо, честый добродетелей доме, Божественнейшаго священства правило, пастырю великий, светильниче светлейший, иже победы нося имя, и молящимся милостивен преклонитель, приницаяй к немощных прошениям, избавителю готовейший, хранителю спасительный, всем верою чтущим всеславную память твою, Христа моли преблаженне, низпослати миру велию милость.

Чтец: Честна пред Господем.

Братия: Смерть преподобных Его.

Радуйся, священнейший уме, Троицы чистое обиталище, столпе церковный, верных утверждение, побеждаемым помощь. Звездо, яже сияньми благоприятных твоих молитв, разоряя напастей же и скорбей тьму всегда, святителю Николае. Пристанище тихое в неже притекающе треволненьми жития одержимии спасаются: Христа моли, душам нашим дати велию милость.

Чтец: Священницы Твои облекутся в правду.

Братия: И преподобнии Твои возрадуются.

Радуйся ревности Божественныя исполнивыйся, и наведения зла избавль неправедно хотящих умрети, предстанием страшных и сна запрещеньми, источниче источаяй в Мирех Николае, мира богатно, и души напояющее, смрады же страстей отгоняющее, меч, плевелы прелести посекающий, лопата развевающая Ариева плевельная учения. Христа моли, низпослати душам нашим велию милость.

Старший (глас 6-й): Слава Отцу, и Сыну, и Святому Духу.

Братия:
Человече Божий, и верный рабе, слуго Господень, мужу желаний сосуде избранный, столпе и утверждение Церкве, Царствия наследниче, не премолчи вопия за ны ко Господу.

Старший: И ныне и присно и во веки веков. Аминь

Братия поет Богородичен:
Безневестная Дево, откуду пришла еси? Кто родивый Тя? Кто и мати Твоя? Како Зиждителя носиши на руку? Како не растлилася еси утробою? О великих преславных на Тебе страшных таинств, на земли совершаемых зрим Всесвятая! И предуготовляем достойный Тебе долг, на земли вертеп, и от Небес просим подати звезду, и волсви же приходят от востоков земли к западом видети человеческое спасение, во яслех пеленами повиваемое.

Братия:
Ныне отпущаеши раба Твоего, Владыко, по глаголу Твоему с миром; яко видеста очи мои спасение Твое, еже еси уготовал пред лицем всех людей, свет во откровение языков и славу людей Твоих Израиля.

Чтец:
Святый Боже, Святый Крепкий, Святый Безсмертный, помилуй нас.- поклон -
Святый Боже, Святый Крепкий, Святый Безсмертный, помилуй нас.- поклон -
Святый Боже, Святый Крепкий, Святый Безсмертный, помилуй нас.- поклон -

Слава Отцу, и Сыну, и Святому Духу, и ныне и присно и во веки веков.

Пресвятая Троице, помилуй нас. Господи, очисти грехи наша. Владыко, прости беззакония наша. Святый, посети, исцели немощи наша Имени Твоего ради.

Господи, помилуй. Господи, помилуй. Господи, помилуй.

Слава Отцу и Сыну и Святому Духу, и ныне и присно и во веки веков.
Аминь.

Отче наш! Иже еси на Небесех. Да святится Имя Твое. Да приидет Царствие Твое. Да будет воля Твоя, яко на Небеси и на земли. Хлеб наш насущный даждь нам днесь. И остави нам долги наша, якоже и мы оставляем должником нашим. И не введи нас во искушение. Но избави нас от лукаваго.

Братия: Аминь.

Братия:
Правило веры и образ кротости, воздержания учителя, яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Николае, моли Христа Бога, спастися душам нашым.- поклон -

Старший: Слава Отцу, и Сыну, и Святому Духу.

Братия:
Правило веры и образ кротости, воздержания учителя, яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Николае, моли Христа Бога, спастися душам нашым.- поклон -

Старший: И ныне и присно и во веки веков. Аминь

Братия (глас 4):
Богородице, Дево, радуйся, Благодатная Марие, Господь с Тобою; благословенна Ты в женах и благословен Плод чрева Твоего, яко Спаса родила еси душ наших.- поклон -

Под Твое благоутробие прибегаем, Богородице, моления наша не презри во обстоянии; но от бед избави ны, Едина Чистая, Едина Благословенная.– без поклона –

Чтец читает псалом 33: Благословлю

Господа на всякое время, выну хвала Его во устех моих.
О Господе похвалится душа моя, да услышат кротцыи и возвеселятся.
Возвеличите Господа со мною, и вознесем имя Его вкупе.
Взысках Господа и услыша мя, и от всех скорбей моих избави мя.
Приступите к Нему и просветитеся, и лица ваша не постыдятся.
Сей нищий воззва, и Господь услыша и, и от всех скорбей его спасе и.
Ополчится Ангел Господень окрест боящихся Его, и избавит их.
Вкусите и видите, яко благ Господь; блажен муж, иже уповает нань.
Бойтеся Господа, вси святии Его, яко несть лишения боящимся Его.
Богатии обнищаша и взалкаша, взыскающии же Господа не лишатся всякаго блага.

Братия:
Слава Отцу и Сыну и Святому Духу. И ныне и присно и во веки веков. Господи помилуй, Господи помилуй, Господи помилуй. Благослови.

Утреня

Богослужение Утрени состоит из четырех частей:

1. Шестопсалмие, утренние молитвы священника, великая ектения, "Бог Господь и явися нам..."
2. Кафизмы с полиелеем и Евангелием.
3. Канон.
4. Хвалитные псалмы и великое славословие с ектениями и отпуст.

- 1 -

Братия:

Слава в вышних Богу, и на земли мир, в человецех благоволение (Трижды).
Господи! устне мои отверзеши, и уста моя возвестят хвалу Твою (Дважды).

Чтец читает псалом 3-й:

Господи, что ся умножиша стужающии ми!
Мнози востают на мя; мнози глаголют души моей: несть спасения ему в Бозе его.
Ты же. Господи, заступник мой еси, слава моя и возносяй главу мою.
Гласом моим ко Господу воззвах, и услыша мя от горы святыя Своея.
Аз уснух и спах, востах, яко Господь заступит мя.
Не убоюся от тем людей, окрест нападающих на мя.
Воскресни, Господи, спаси мя, Боже мой, яко Ты поразил еси вся враждующия ми всуе; зубы грешников сокрушил еси.
Господне есть спасение, и на людех Твоих благословение Твое.
Аз уснух и спах, востах, яко Господь заступит мя.

Чтец читает псалом 37-й:

Господи! да не яростию Твоею обличиши мене, ниже гневом Твоим накажеши мене:
Яко стрелы Твоя унзоша во мне и утвердил еси на мне руку Твою.
Несть исцеления в плоти моей от лица гнева Твоего, несть мира в костех моих от лица грех моих:
Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего.
Пострадах и слякохся до конца; весь день, сетуя, хождах, яко лядвия моя наполнишася поруганий, и несть исцеления в плоти моей.
Озлоблен бых, и смирихся до зела: рыках от воздыхания сердца моего.
Господи! пред Тобою все желание мое, и воздыхание мое от Тебе не утаися; сердце мое смятеся, остави мя сила моя, и свет очию моею, и той несть со мною.
Друзи мои и искренние мои прямо мне приближишася и сташа;
И ближнии мои отдалече мене сташа, и нуждахуся ищущии душу мою; и ищущии злая мне - глаголаху суетная, и льстивным весь день поучахуся.
Аз же, яко глух, не слышах, и яко нем - не отверзаяй уст своих;
И бых яко человек не слышай и не имый во устех своих обличения.
Яко на Тя, Господи, уповах; Ты услышиши, Господи, Боже мой.
Яко рех: да некогда порадуют ми ся врази мои, и внегда подвижатися ногам моим, на мя велеречеваша;
Яко аз на раны готов, и болезнь моя предо мною есть выну.
Яко беззаконие мое аз возвещу, и попекуся о гресе моем.
Врази же мои - живут, и укрепишася паче мене, и умножишася ненавидящии мя без правды.
Воздающии ми злая возблагая оболгаху мя, зане гонях благостыню.
Не остави мене, Господи, Боже мой, не отступи от мене.
Вонми в помощь мою. Господи спасения моего!
Не остави мене, Господи, Боже мой, не отступи от мене.
Вонми в помощь мою, Господи спасения моего!

Чтец читает псалом 62:

Боже, Боже мой, к тебе утреннюю, возжада тебе душа моя, коль множицею тебе плоть моя, в землипусте и непроходне и безводне.
Тако со святем явихся тебе, видети силу твою и славу твою.
Яко лучши милость твоя паче живот, устне мои похвалите тя.
Тако благословлю тя в животе моем, о имени твоем воздежу руце мои.
Яко от тука и масти да исполнится душа моя, и устнама радости восхвалят тя уста моя. Аще поминах тя на постели моей, на утренних поучахся в тя:
Яко был еси помощник мой, и в крове крилу твоею возрадуюся.
Прильпе душа моя по тебе, мене же прият десница твоя.
Тии же всуе искаша душу мою, внидут в преисподняя земли.
Предадятся в руки оружия, части лисовом будут.
Царь же возвеселится о Бозе: похвалится всяк кленыйся им, яко заградишася уста глаголющих неправедная.
На утренних поучахся в тя, яко был еси помощник мой, и в крове крилу твоею возрадуюся.
Прильпе душа моя по тебе, мене же прият десница твоя.

Слава Отцу и Сыну и Святому Духу.

Братия: И ныне и присно и во веки веков. Аминь.

Братия: Аллилуиа, Аллилуиа, Аллилуиа. Слава Тебе Боже. (Трижды – без поклонов)

Старший: Слава Отцу и Сыну и Святому Духу.

Чтец читает псалом 87-й:

И ныне и присно и во веки веков.

Господи, Боже спасения моего! во дни воззвах, и в нощи пред Тобою.
Да внидет пред Тя молитва моя, приклони ухо Твое к молению моему:
Яко исполнися зол душа моя и живот мой аду приближися.
Привменен бых с нисходящими в ров, бых яко человек без помощи, в мертвых свободь;
Яко язвении спящии во гробе, ихже не помянул еси ктому, и тии от руки Твоея отриновени быша.
Положиша мя в рове преисподнем, в темных и сени смертней.
На мне утвердися ярость Твоя, и вся волны Твоя навел ecu на мя.
Удалил еси знаемых моих от мене, положиша мя мерзость себе, предан бых, и не исхождах.
Очи мои изнемогосте от нищеты, воззвах к Тебе, Господи, весь день: воздех к Тебе руце мои.
Еда мертвыми твориши чудеса? или врачеве воскресят и исповедятся Тебе?
Еда повесть кто во гробе милость Твою, и истину Твою в погибели?
Еда познана будут во тме чудеса Твоя, и правда Твоя в земли забвенней?
И аз к Тебе, Господи, воззвах, и утро молитва моя предварит Тя.
Вскую, Господи, отрееши душу мою, отвращаеши лице Твое от мене?
Нищ есмь аз, и в трудех от юности моея, вознесжеся, смирихся и изнемогох.
На мне преидоша гневи Твои, устрашения Твоя возмутиша мя.
Обыдоша мя яко вода, весь день, одержаша мя вкупе.
Удалил еси от мене друга и искренняго и знаемых моих от страстей.
Господи, Боже спасения моего! во дни воззвах, и в нощи пред Тобою.
Да внидет пред Тя молитва моя, приклони ухо Твое к молению моему!

Чтец читает псалом 102-й:

Благослови душе моя Господа, и вся внутренняя моя имя святое Его.
Благослови душе моя Господа, и не забывай всех воздаяний Его;
Очищающаго вся беззакония твоя, исцеляющаго вся недуги твоя;
Избавляющаго от истления живот твой, венчающаго тя милостию и щедротами;
Исполняющаго во благих желание твое: обновится яко орля юность твоя.
Творяй милостыни Господь, и судьбу всем обидимым.
Сказа пути Своя Моисеови, сыновом Израилевым хотения Своя;
Щедр и милостив Господь, долготерпелив и многомилостив.
Не до конца прогневается, ниже во век враждует;
Не по беззаконием нашим сотворил есть нам, ниже по грехом нашым воздал есть нам.
Яко по высоте небесней от земли, утвердил есть Господь милость Свою на боящихся Его.
Елико отстоят востоцы от запад, удалил есть от нас беззакония наша.
Якоже щедрит отец сыны, ущедри Господь боящихся Его.
Яко Той позна создание наше, помяну, яко персть есмы.
Человек, яко трава дние его, яко цвет сельный, тако оцветет;
Яко дух пройде в нем, и не будет, и не познает ктому места своего.
Милость же Господня от века и до века на боящихся Его.
И правда Его на сынех сынов, хранящих завет Его, и помнящих заповеди Его творити я.
Господь на небеси уготова Престол Свой, и Царство Его всеми обладает.
Благословите Господа вси Ангели Его, сильнии крепостию, творящии слово Его, услышати глас словес Его.
Благословите Господа вся силы Его, слуги Его, творящии волю Его.
Благословите Господа вся дела Его, на всяком месте владычества Его.

Благослови, душе моя, Господа. На всяком месте владычества Его, благослови, душе моя. Господа!

Чтец читает псалом 142-й:

Господи! услыши молитву мою, внуши моление мое во истине Твоей, услыши мя в правде Твоей,
И не вниди в суд с рабом Твоим! яко не оправдится пред Тобою всяк живый;
Яко погна враг душу мою, смирил есть в землю живот мой; посадил мя есть в темных, яко мертвыя века.
И уны во мне дух мой, во мне смятеся сердце мое.
Помянух дни древния, поучихся во всех делех Твоих, в творениих руку Твоею поучахся.
Воздех к Тебе руце моя, душа моя - яко земля безводная Тебе.
Скоро услыши мя, Господи: исчезе дух мой; не отврати лица Твоего от мене, и уподоблюся нисходящим в ров.
Слышану сотвори мне заутра милость Твою, яко на Тя уповах.
Скажи мне, Господи, путь, воньже пойду, яко к Тебе взях душу мою.
Изми мя от враг моих, Господи; к Тебе прибегох, научи мя творити волю Твою, яко Ты еси Бог мой.
Дух Твой благий наставит мя на землю праву!
Имене Твоего ради, Господи, живиши мя; правдою Твоею изведеши от печали душу мою;
И милостию Твоею потребиши враги моя, и погубиши вся стужающия души моей, яко аз раб Твой есмь.
Услыши мя, Господи, в правде Твоей, и не вниди в суд с рабом Твоим (дважды).
Дух Твой благий наставит мя на землю праву!

Слава Отцу и Сыну и Святому Духу.

Братия: И ныне и присно и во веки веков. Аминь.

Братия: Аллилуиа, Аллилуиа, Аллилуиа. Слава Тебе Боже. (Трижды – без поклонов)

Братия: Господи, помилуй. (12 раз) – читается вместо великой ектеньи -поклон-

В соответствии с Уставом зажигаются свечи в ознаменование того, что с явлением в мир Господа воссиял людям свет велий (Исаия).

Старший: Бог Господь и явися нам, благословен Грядый во имя Господне.

Братия: Бог Господь и явися нам, благословен Грядый во имя Господне.

Старший: Исповедайтеся Господеви, яко благ, яко в век милость Его.

Братия:Бог Господь и явися нам, благословен Грядый во имя Господне.

Старший: Обышедше обыдоша мя, и именем Господним противляхся им.

Братия: Бог Господь и явися нам, благословен Грядый во имя Господне.

Старший: Не умру, но жив буду, и повем дела Господня.

Братия: Бог Господь и явися нам, благословен Грядый во имя Господне.

Старший:
Камень, егоже небрегоша зиждущии, сей бысть во главу угла: от Господа бысть сей, и есть дивен во очесах наших.

Братия: Бог Господь и явися нам, благословен Грядый во имя Господне.

Братия:

Правило веры и образ кротости, воздержания учителя, яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Николае, моли Христа Бога, спастися душам нашым.–дважды-

Старший: Слава Отцу и Сыну и Святому Духу. И ныне и присно и во веки веков.

Братия поет Богородичен:
Еже от века утаеное, и ангелом неведомое таинство, Тобою Богородице сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.

- 2 -

Стихословие Псалтири – кафизмы 7 и 8

 

Чтец читает 10-ю кафизму.:

Слава Отцу и Сыну и Святому Духу.

Старший: И ныне и присно и во веки веков.

Братия: Аминь.

Братия: Аллилуиа, Аллилуиа, Аллилуиа, слава Тебе, Боже –трижды-

Господи, помилуй. (12 раз) – читается вместо малой ектеньи -поклон-

Старший: Слава Отцу и Сыну и Святому Духу, и ныне и присно и во веки веков.
Аминь.

Чтец читает седален, глас 2-й:
В Мирех живый чувственне, иерарше, миром разумно духовным явился еси помазан отче Николае. Темже миры чудес твоих мир облаговонил еси миро приснотекущее проливая, мирными твоими благовонными словесы, и памятию твоею.

Старший:
Слава Отцу и Сыну и Святому Духу
Облиставаеши на земли чудес лучами, Николае мудре, и движеши всяк язык, на славу же и хвалу на земли тя Прославльшаго: Егоже моли всякия нужды избавитися, память твою верою и любовию почитающим, отцев избрание.

Старший: И ныне и присно и во веки веков. Аминь.

Чтец читает Богородичен:
Всех Творца, Бога же и Содетеля, Всенепорочная Чистая, Духом Божественным в ложеснах, зачала еси, и тления кроме родила еси: Егоже славяще, Тя воспеваем Дево, яко палату Всецаря, и мира защищение.

Старший: Слава Отцу и Сыну и Святому Духу

Чтец читает 11-ю кафизму: И ныне и присно и во веки веков. Аминь.

Слава Отцу и Сыну и Святому Духу.

Старший: И ныне и присно и во веки веков.

Братия: Аминь.

Братия: Аллилуиа, Аллилуиа, Аллилуиа, слава Тебе, Боже – трижды -

Господи, помилуй. (12 раз) – читается вместо малой ектеньи -поклон-

Старший: Слава Отцу и Сыну и Святому Духу, и ныне и присно и во веки веков.
Аминь.

Чтец читает седален, глас 4-й:
Верным предстательствуеши, покрывая, соблюдая тыя, блаженне, всякия скорби избавляя яве, иерархов краснейшая славо и хвало, Николае преподобне.

Старший: Слава Отцу и Сыну и Святому Духу.

Чтец читает седален, глас 8-й:
Источник чудес отче мудре приемь от Господа, всем верным источаеши блаженне медоточныя воды: яко бо пастырь сый и проповедник веры, истиннаго Пастыря словеса соблюл еси. Темже дерзновение к Нему имея, человеки спасл еси от смерти, Николае иерарше блаженне: моли Христа Бога, грехов оставление подати чтущим любовию святую память твою.

Старший: И ныне и присно и во веки веков. Аминь.

Чтец читает Богородичен:
В тину впад грехов, и несть мне постояния, люте потопи мя буря прегрешений: но яко рождшая Слово, единаго Человеколюбца, на мя раба Твоего призри, и избави мя всякаго греха, и страстей душетленных, и всякаго озлобления лукаваго убийцы, Богородице Неискусомужная: моли Христа Бога, грехов оставление дати мне: Тя бо надежду имам раб Твой.

Полиелей

Посреди храма устанавливается аналой, на него возлагается икона святого. Во время полиелея весь храм должен быть освещен свечами. Старший во время пения кадит храм и молящихся:

Старший: Хвалите имя Господне, хвалите раби Господа.

Братия: Аллилуиа. – 3 раза

Старший: Благословен Господь от Сиона, живый во Иерусалиме.

Братия: Аллилуиа. – 3 раза

Старший: Исповедайтеся Господеви, яко благ, яко в век милость Его.

Братия: Аллилуиа. – 3 раза

Старший: Исповедайтеся Богу небесному, яко в век милость Его.

Братия: Аллилуиа. – 3 раза

Чтец читает седален, глас 5-й:

Премудраго иерарха восхвалим, яко тепла в бедах и в скорбех суща от Бога помощника и защитника, вси Николая вернии богоноснаго благочестно: молится бо Господу, о верою творящих и поющих божественную память его.Богослове апостоле, моли Христа Бога, согрешений оставление даровати, празднующим любовию святую память твою.

Старший: Слава Отцу и Сыну и Святому Духу.

Чтец читает седален, глас 4-й:

Предстатель теплейший Церкве Христовы показался еси Николае. И ересей безбожная разрушая со дерзновением, и правило показался еси всем православия, о всех моляся последующих твоим божественным учением, и наказанием.

Старший: И ныне и присно и во веки веков. Аминь.

Чтец читает Богородичен:
Скоро приими Владычице молитвы наша, и сия принеси Твоему Сыну и Богу, Госпоже Всенепорочная: избави обстояний к Тебе притекающия: сокруши коварства, и низложи дерзость вооружающихся безбожных Пречистая, на рабы Твоя.

Величание поется многократно, пока не закончится каждениехрама.

Братия:
Величаем тя, / святителю отче Николае, / и чтим святую память твою / ты бо молиши о нас / Христа Бога нашего.

Чтец глаголет избранный псалом 48-й:
Услышите сия, вси языцы, внушите, вси живущии по вселенней, земнороднии же и сынове человечестии, вкупе богат и убог. Уста моя возглаголют премудрость, и поучение сердца моего разум. Приклоню в притчу ухо мое, отверзу во псалтири ганание мое. Вскую боюся в день лют? беззаконие пяты моея обыдет мя. Надеющиися на силу свою и о множестве богатства своего хвалящиися: брат не избавит, избавит ли человек? не даст Богу измены за ся, и цену избавления души своея: и утрудися в век, и жив будет до конца, не узрит пагубы. Егда увидит премудрыя умирающыя, вкупе безумен и несмыслен погибнут, и оставят чуждим богатство свое. И гроби их жилища их во век, селения их в род и род, нарекоша имена своя на землях. И человек в чести сый не разуме, приложися скотом несмысленным и уподобися им. Сей путь их соблазн им, и по сих во устех своих благоволят. Яко овцы во аде положени суть, смерть упасет я: и обладают ими правии заутра, и помощь их обетшает во аде: от славы своея изриновени быша. Обаче Бог избавит душу мою из руки адовы, егда приемлет мя. Не убойся, егда разбогатеет человек, или егда умножится слава дому его: яко внегда умрети ему, не возмет вся, ниже снидет с ним слава его. Яко душа его в животе его благословится, исповестся тебе, егда благосотвориши ему. Внидет даже до рода отец своих, даже до века не узрит света. И человек в чести сый не разуме, приложися скотом несмысленным и уподобися им.

Слава Отцу и Сыну и Святому Духу.

Старший:
И ныне и присно и во веки веков.

Братия:
Аминь.

Братия:
Аллилуиа, Аллилуиа, Аллилуиа, слава Тебе, Боже – трижды -

Братия:
Господи, помилуй. (12 раз) – читается вместо малой ектеньи - поклон -

Степенна

Антифон 1-й(например 1-го гласа):

Братия:
От юности моея мнози борют мя страсти, но Сам мя заступи и спаси, Спасе мой! Ненавидящий Сиона посрамитеся от Господа: яко трава бо огнем будете изсохше!

Старший:
Слава Отцу и Сыну и Святому Духу. И ныне и присно и во веки веков.

Братия:
Святым Духом всяка душа живится и чистотою возвышается, светлеется Тройческим единством священнотайне.

Прокимен

Прокимен поется на 4-й глас; Поэтому существует практика на утрени не возглашать глас прокимна, кроме воскресных дней.

Чтец:
Прокимен, Псалом Давидов.

Чтец:
Честна пред Господем смерть преподобных Его.

Братия:
Честна пред Господем смерть преподобных Его.

Чтец:
Что воздам Господеви о всех, яже воздаде ми?

Братия:
Честна пред Господем смерть преподобных Его.

Чтец:
Честна пред Господем.

Братия:
Смерть преподобных Его.

Стаpший:
От Иоанна Святаго Евангелия чтение.
Братия:
Слава Тебе, Господи, слава Тебе. -поклон-

Старший :
Вонмем.

Старший читает Евангелие :
"Во время оно, рече Господь Своим учеником: Аз eсмь дверь: Мною аще кто внидет, спасется: и внидет и изыдет, и пажить обрящет. / Тать не приходит, разве да украдет и убиет и погубит: Аз приидох, да живот имут и лишше имут. / Аз eсмь пастырь добрый: пастырь добрый душу свою полагает за oвцы: / А наемник, иже несть пастырь, eмуже не суть oвцы своя, видит волка грядуща, и оставляет oвцы, и бегает: и волк расхитит их, и распудит oвцы: / А наемник бежит, яко наемник eсть, и нерадит о oвцах. / Аз eсмь пастырь добрый: и знаю Моя, и знают Мя Моя: / Якоже знает Мя Oтец, и Аз знаю Oтца: и душу Мою полагаю за oвцы. / И ины oвцы имам, яже не суть от двора сего: и тыя Ми подобает привести, и глас Мой услышат: и будет eдино стадо и eдин Пастырь.той не умрет. И не рече ему Иисус, яко не умрет, но: аще хощу тому пребывати, дондеже прииду, что к тебе? / Сей есть ученик свидетельствуяй о сих, иже и написа сия: и вем, яко истинно есть свидетельство его. / Суть же и ина многа, яже сотвори Иисус, яже аще бы по единому писана быша, ни самому мню всему миру вместити пишемых книг. Аминь."

Братия:
Слава Тебе, Господи, слава Тебе. -поклон-

Братия поет праздничную стихиру (глас 6-й):
Наследниче Божий, сопричастниче Христов, служителю Господень, святе Николае, по имени твоему тако и житие твое: спросия бо седине разум, свидетельствоваше светлость лица твоего душевное незлобие, извествоваше кротость слова молчаливое. Жизнь твоя славна, и успение со святыми: моли о душах наших.

Чтец глаголет псалом 50-й:
Помилуй мя Боже, по велицей милости Твоей и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших, и лукавое пред Тобою сотворих, яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне Боже, и дух прав обнови во утробе моей. Не отвержи мене от лица Твоего, и Духа Твоего Святаго не отими от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая: тогда возложат на олтарь Твой тельцы.

Старший:
Слава Отцу и Сыну и Святому Духу.

Братия:
Молитвами святителя и чудотворца отца нашего Николае, Милостиве, очисти множества согрешений наших.

Старший:
И ныне и присно и во веки веков, аминь.

Братия:
Молитвами Богородицы, Милостиве, очисти множества согрешений наших.

Помилуй мя, Боже, по велицей милости Твоей и по множеству щедрот Твоих очисти беззаконие мое!

Братия поет стихиру (глас 6-й):
Наследниче Божий, сопричастниче Христов, служителю Господень, святе Николае, по имени твоему тако и житие твое: спросия бо седине разум, свидетельствоваше светлость лица твоего душевное незлобие, извествоваше кротость слова молчаливое. Жизнь твоя славна, и успение со святыми: моли о душах наших.

Старший:
Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя; молитвами Всепречистыя Владычицы нашея Богородицы и Приснодевы Марии: силою Честнаго и Животворящаго Креста: предстательствы честных Небесных Сил безплотных: честнаго славнаго пророка, Предтечи и Крестителя Иоанна, святаго Апостола Иоанна Богослова и прочих святых славных и всехвальных апостол: иже во святых отец наших и вселенских великих учителей и святителей, Василия Великаго, Григория Богослова и Иоанна Златоустаго: иже во святых отца нашего Николая, архиепископа Мир Ликийских, чудотворца: святых равноапостольных Мефодия и Кирилла, учителей Словенских: святаго равноапостольнаго великаго князя Владимира: иже во святых отец наших всея России чудотворцев, Михаила, Петра, Алексия, Ионы, Филиппа и Ермогена: святых славных и добропобедных мучеников, преподобных и богоносных отец наших, святых и праведных Богоотец Иоакима и Анны (и святаго, имя рек, егоже есть храм и егоже есть день) и всех святых: молим Тя, многомилостиво Господи, услыши нас, грешных, молящихся Тебе, и помилуй нас.

Братия:
Господи, помилуй. (12 раз)

- 3 -

Каноны (Богородицы со ирмосом на 6, и святого оба канона на 8)

Песнь 1-ая (Канона Богородицы, глас 1-й)

Ирмос 1-й: Песнь победную поим вси Богу, сотворшему дивная чудеса мышцею высокою, и спасшему Израиля, яко прославися. –дважды-

Припев: Пресвятая Богородице, спаси нас!

Тропарь: Премудрости бездну рождшая, капли мудрости ми, источник благодатно точащий, Чистая низпосли, песнословити благодатей Твоих пучину.

Тропарь: Пою Тя Всепетая, Юже воспевают ангелов чини, яко Бога рождшую препетаго, Егоже вся тварь воспевает: яко прославися.

Песнь 1-ая (Канона святителю, Феофаново, глас 2-й)

Ирмос 1-й: Во глубине постла иногда, / фараонитское всевоинство преоруженная сила, / воплощшееся же Слово всезлобный грех потребило есть, / препрославленный Господь, славно бо прославися.

Припев: Святителю отче Николае, моли Бога о нас.

Тропарь: Венценосец престолу Христову премудре Николае, предстоя со ангельскими воинствы, просвещение ми даруй, озаряющее души моея омрачение, яко да восхвалю радуюся твою, всеблаженне, память.

Тропарь: Прославляяй вся Господь Того славящия, тя верным прибежище даде, напастей избавляюща притекающия к твоему крову, Николае, и призывающия тя верою и любовию, преславне.

Богородичен: Сравнитися желание ми вложив змий вселукавый, Содетелю, яко пленника восхити. Тобою же, Всечистая, воззван бых, обожився истиннейше: Ты бо, о Богомати, мене обожившаго родила еси.

Песнь 1-ая (другого Канона святителю, Иосифово, глас 1-й)

Ирмос 1-й: Христос раждается, славите. Христос с небес, срящите. Христос на земли, возноситеся. Пойте Господеви вся земля, и веселием воспойте людие: яко прославися.

Припев: Святителю отче Николае, моли Бога о нас.

Тропарь: Недоуменным языком и устнами, похваление малое и моление принести твоему, Николае, приидох богоподражанному преизяществу: но яко богатодавец, Спаса и Бога милостива подаждь ми.

Тропарь: Человек сый Небесный, равноангелен на земли явился еси, вдов защитник готовый, и утруждаемых отмститель, и всем скорбящим в бедах помощник, отче Николае.

Тропарь: Сказует вся подсолнечная, Николае треблаженне, чудес твоих добродетелей пучину: нищии предстателя, и сироты и вдовы питателя, и слепии путевожда, вси же поборника.

Троичен: Троицу чествую несозданную, Отца и Сына со Духом, существо просто, Божество, Естество несекомое существенне, три Ипостаси, разделяя лично и по Ипостаси.

Богородичен: Безсеменно Слово зачала еси, Единаго от Троицы, Всенепорочная, и Сего плотию родила еси, пребывши по рождестве Дева яко и прежде: Сего яко Сына Твоего и Бога о нас присно моли.

Катавасия 1-я: Христос раждается, славите. Христос с небес, срящите. Христос на земли, возноситеся. Пойте Господеви вся земля, и веселием воспойте людие: яко прославися.

Песнь 3-ая (Канона Богородицы, глас 2-й)

Ирмос 3-й: Да утвердится сердце мое в воли Твоей, Христе Боже, Иже над водами небо утверждей второе, и основавый на водах землю Всесильне. –дважды-

Припев: Пресвятая Богородице, спаси нас!

Тропарь: Небес чистейшее Царево обителище, благодатно дышущий воистинну и благовонный рай, надежду христиан, Богородительницу мою воспеваю.

Тропарь: Словом Слово породила еси, словом все к существу приведшаго словесное естество, купно и безсловесное, безсловесия избавляющаго человеки, Всеблагословенная.

Песнь 3-ая (Канона святителю, Феофаново, глас 2-й)

Ирмос 3-й: Процвела есть пустыня яко крин, Господи, / языческая неплодящая Церковь, пришествием Твоим, / в нейже утвердися мое сердце.

Припев: Святителю отче Николае, моли Бога о нас.

Тропарь: Николае блаженне, Владыки искренний ученик ты быв, спасаеши к тебе притекающия от лютых бед и смерти горькия.

Тропарь: Очисти рабы Твоя, грехов оставление яко благ даруя, Николая Твоего угодника, яже к Тебе ходатайствы, Многомилостиве.

Богородичен: Утоли смущение души моея, Пречистая, и жизнь окорми, Всесвятая, Бога рождшая, в Немже утвердися сердце мое.

Песнь 3-ая (другого Канона святителю, Иосифово, глас 6-й)

Ирмос 3-й: Прежде век от Отца рожденному нетленно Сыну, и в последняя от Девы воплощенному безсеменно, Христу Богу возопиим: вознесый рог наш, Свят еси, Господи.

Припев: Святителю отче Николае, моли Бога о нас.

Тропарь: Скрижаль в сердцы стяжав богомудре многих добродетелей, написану безсмертным и пречистым перстом Христа Бога, Николае, паче меда и сота сладость точиши из устен твоих.

Тропарь: Показа благодать на тебе, преславне, чудеса, Николае: чистое бо житие твое воистинну злата светлейши, облистает мрачныя души зарею Божественнаго Духа.

Тропарь: Живеши и по смерти, во снех яве являяся, и юноши от смерти преславно избавил еси, вопия яве царю: не обиди мужей, суетною завистию оклеветанных.

Троичен: Милостива буди мне, Всесвятая Троице Боже наш, безмерными прегрешении осквернившему житие, Отче, Сыне, и Душе Живый, соблюдающи мя отвсюду, и присно неуязвлена от скорби.

Богородичен: Даеши Богородице спасения надежду рабом Твоим, и в нуждах и напастех скоротечными молитвами соблюдати, и помогати предстани: Ты бо еси похвала нам верным, Приснодево.

Катавасия 2-я: Прежде век от Отца рожденному нетленно Сыну, и в последняя от Девы воплощенному безсеменно, Христу Богу возопиим: вознесый рог наш, Свят еси, Господи.

Братия:
Господи, помилуй. (12 раз) – читается вместо ектеньи

Седален, глас 8. Подобен: Премудрости:

Возшед на высоту добродетелей и Божественными оттуду, отче, озарився сиянии чудес, пресветел воистинну явился еси мирови пастырь, нам в напастех сый предстатель непобедимь: темже преславно врага победив, лжу отгнал еси, и человеки спасл еси от смерти, Николае. Моли Христа Бога, грехов оставление даровати, чтущим любовию святую память твою.

Слава Отцу и Сыну и Святому Духу.

Седален, глас 8:

Реку исцелений обильне изливающую, и источник тя чудес неоскудный показа, Николае, милости бездна: тяжкими бо недугами горце дручимии, и злоключеньми жития люте мучимии, всякия скорби целебную воистинну обретают лечбу, теплое твое защищение. Сего ради вопием ти: молися Христу Богу, прегрешений оставление даровати празднующим любовию святую память твою.

И ныне и присно и во веки веков.

Богородичен:Яко Деву и едину в женах, Тя без семене рождшую Бога плотию, вси ублажаем роди человечестии: огнь бо вселися в Тя Божества, и яко Младенца доиши Зиждителя и Господа. Тем ангельский и человеческий род достойно славим Пресвятое Рождество Твое, и согласно вопием Ти: моли Христа Бога, согрешений оставление даровати, покланяющимся верою Пресвятому Рождеству Твоему.

Песнь 4-ая (Канона Богородицы, глас 2-й)

Ирмос 4-й: Духом провидя пророче Аввакуме, Словесе воплощение, проповедал еси вопия: внегда приближитися летом, познаешися, внегда приити времени, покажешися. Слава силе Твоей, Господи. –дважды-

Припев: Пресвятая Богородице, спаси нас!

Тропарь: Смерти убо вина земным Ева бысть, советом змия: Ты же Дево Чистая, рождшая словом Слово, безсмертия и жизни ходатаица явилася еси. Темже достойно поем Тя.

Тропарь: Духом пророцы предзряще Тя Чистая, гору, дверь, трапезу, святый кивот, свещник, престол жизни, стамну и одр, Божию Матерь в гаданиих Тя проявиша: ихже мы зрим сбытие.

Песнь 4-ая (Канона святителю, Феофаново, глас 2-й)

Ирмос 4-й: Пришел еси от Девы, не ходатай, ни Ангел, / но Сам, Господи, воплощься, / и спасл еси всего мя человека. / Тем зову Ти: слава силе Твоей, Господи.

Припев: Святителю отче Николае, моли Бога о нас.

Тропарь: Приближився чисте зарям духовным, светоносец был еси, мира просвещая концы, всем предстательствуя, и вся спасая верою к тебе притекающия.

Тропарь: Избавляя от смерти, яко явился еси первее, Николае, юноши преподобне: тако и ныне мя спаси от всякаго обстояния, и напастей и бед, всеблаженне.

Тропарь: Облистал еси добродетелей сияньми всеблаженне, подражатель преизряднейший твоего Владыки быв, спасаеши же призываемь, благоговением и любовию тя славящия.

Богородичен: Найде на Тя Владыка твари воплощаемь, и спасая яко благоутробен всего мя, человека: темже вернии Богородицу Тя славим.

Песнь 4-ая (другого Канона святителю, Иосифово, глас 6-й)

Ирмос 4-й: Жезл из корене Иессеова, и цвет от него Христе, от Девы прозябл еси, из горы хвальный приосененныя чащи, пришел еси воплощься от неискусомужныя невещественный и Боже, слава силе Твоей, Господи.

Припев: Святителю отче Николае, моли Бога о нас.

Тропарь: Именование твое едино воистинну призываемо, от всех вражиих совет скоро избавляет зовущия тебе тепле, священне Николае: яко первее воеводы избавил еси, спаси и нас от всякаго лютаго обстояния.

Тропарь: Престолу предстоя Божию, молити прилежно, мудре, не престай, о всех нас твоих верных рабех, чудне Николае: да огня вечнаго избавимся, и от врагов, языка лукаваго, и озлобления.

Тропарь: Врачевания точиши всюду верою к тебе притекающим, и от уз избавляеши вся. Темже печаль нашу в радость преложи, твоими богоприятными молитвами, Николае пресветле, низлагая гордость врагов наших.

Троичен: Безначальнаго Божества начало Отца, и Сына чту, и Духа почитаю Всесвятаго: всяческих вседетельное, единственное, несекомое, треми характиры и Лицы разделяемое присно, едино Царство нераздельное.