КЫДЗ МЕ ВИНАКÖТ ДУГДI ТÖДЧЫНЫ 19 страница
Рытывбыт лэбалiс-дзингис нюр шöрын, некинлö спокой эз сет, но сёйны нем эз адззы. Сёйö бы чöскыта, ловья зверь-пöткалiсь вир бы юö. А кайез важын ни дзебсисисö асланыс поззэзö, кöччез пышшисö ыббез дорö, шыроккез пырисö нораэзö. Ном тшыгувьяс лöгасис и мымда вын пондiс горöтлыны:
— Дзин-нн! Кин паныт шедас, сiйö и сёя! — Ном адззис росянка-быдмаслiсь чочком цветоккез и эшö öддьöнжык горöтiс: — Дзин-нн, мед быдöнныс тöдöны, ме сейчас пукся и цветтэзлiсь вужöдз соксö нимала!
Ном кузь нырсö нюжöтiс, лöсьöтчис бытшкыны и мымда вын дзингöмöн пуксис росянка цвет шöрö. Росянкалöн лепестоккес только хлоп пöднассисö, и ном шедiс сы öмö. Вот сы кузя и век вöлi сылöн. Быдмас-росянка сёйис номöс.
ДИМА ВЕСЬКАЛIС
Лина вöснитик, чож нылочка. Сылöн синоккес югьялöны, кыдз сьöд сэтöр тусёккез. Нылочкалö тырис дас год, и сiя кончитiс куимöт класс. Линалöн тятьыс хирург, мамыс — инженер. Нiя быд год гожуммезöн шоччисьöны нето Крымын, нето деревняын, бабыс ордын. Таво Линалöн тятьыс висьталiс, что мунас шоччисьны бабыс ордö и нывсö босьтас сьöрас. Лина öддьöн радуйтчис, что мунас деревняö, кытöн эшö эз на вöвлы. И вот Лина деревняын. Нылочкалö öддьöн гленитчис сэтчин. Ордчöн деревнякöт сулалö пожума вöр. Вöрас быдмö тшак, быдкодь ягöд, олöны зверрез, поздiсьöны кайез. Деревня увтын котöртö паськыт, но непыдын ю. Ю гöгöрын сук туруна видззез, а видззез вылас уна быдкодь рöма цветтэз. Рыттэзöн баддез коласын герскис кытшöмкö кай, сыбöрын Лина тöдiс, что кайсö шуöны герсканöн. Нельки адззылiс кушборддэзöс.
А кытшöм небоыс голубöй! И кыдз шондiыс öгралö! Нылочкалö быдсöн кажитчис мöднёж, не кыдз городын.
Лина асылöн и рытöн, кöр руыс сöстöм, посöдзын орслывлiс скрипкаöн. Скрипкалöн нежнöй шыэс паськалiсö öтмöдöрö и öшисö ю сайö. Линалö кажитчис, что деревняын и скрипка буржыка горалö и шыэс басöкжыкöсь.
Нылочкалö деревняас только öтiк вöлi умöль, эз ешты тöдсасьны челядькöт и некинкöт вöлi орсны.
Чулалiс неделя. Öтпыр асывнас Лина вердiс типпез. Вдруг ворота сайсянь котöртiс кузь гöна кань, и типпез чивзöмöн рознитчисö öтмöдöрö. Лина пондiс нiйö кытсавны, но öтiк тип кыдз бöбмöм пышшалiс. Типыс сьöрын вöтлiсьтöн, Лина казялiс зоночкаöс, кöда пукалiс кыдз увтын скамья вылын и сералiс. Нылочка лöгасис зоночкаыс вылö. Сибöтчис сы дынö да кöритöмöн горöтчис:
— Эшö зоночка, а он отсав нылочкалö. Вон типыс пышшалö, отсав йöртны. Но мый сулалан, котöрт!
Зоночка дугдiс серавны. Мышкыртiс юрсö и гусьöника горöтчис:
— Ме ог вермы котрасьны. Ме эшö некöр эг котрась. Менам сьöлöмö висьö.
Лина некыдз эз вежöрт: зоночка — и оз котрась. Сiя дзар керис зоночкаыс коккез вылö — коклапаэз, чуннез эмöсь.
— Тэ дышкучик, — орöтiс лöгöн Лина и мöдiс мунны ни сы дынiсь. Но думайтыштiс и бергöтчис бöр.
— А кыдз тэнö шуöны? — юалiс сiя зоночкалiсь. Мöдыс жöдзыштiс коккез вылас, сэсся лэбтiс сы вылö öбидаöн кутöм синнэсö и висьталiс:
— Митрей.
— Менам тятьö тожö Дмитрий, но мамö шуö Димаöн. Тэ тожö Дима. А менö шуöны Линаöн, гижöны Эвелинаöн. Велöтчан? Куимöт класс кончитiн? Быдöс, шуан, пятёркаэз? А верзьöмöн тэ гöняйтан? Ноко вöтчы ме сьöрö. Он, натьтö, вöт, — сярзис-юасис Лина. — Менам сьöлöмö висьö, — нюжвылика шуис Дима.
— Бекöрпань тожö он миськавлы. И джодж он чышкы. Тэ, натьтö, быль дышкучик, — кöритiс Лина.
Дима юрсö öшöтiс и сы синнэзiсь бледöтöм рожабаннэз кузя быгыльтчисö югыт да гырись синва воттез. Лина сулалiс и думайтiс: «Эшö зоночка, а горзö. Нежнöй чача». Эта коста ны дынö сибöтчис Линалöн тятьыс.
— Ай, ай, Лина, тэ мыля зоночкасö öбидитiн? — горöтчис тятьыс.
— А сiя, тятю, дышкучик, — шуис Лина.
— А тэ мыйöн тöдан, что дышкучик?
— Тип эз отсав йöртны. Бöбöтчö, бытьтö некöр абу котрасьлöм, менам, шуö, сьöлöм висьö. А вон коккес совсем дзоньöсь.
— Сьöлöмыс... — горöтчис Линалöн тятьыс и внимательнöя видзöтiс зоночка вылö. Сы одзын сулалiс кельдöтöм чужöма морток. Мыгöрыс учöтик да вöснитик, кыдз винерик зелёнöй бадь шатёк. Киэс и коккес тожö вöснитöсь да виртöмöсь, Только лöз, небо кодь синнэс видзöтiсö не челядь моз, — тöждiсьöмöн.
«Быдöс вежöртана, — думайтыштiс Дмитрий Павлович, — зоночкалöн, тыдалö, «порок сердца».
— Лина, тэ весь öбидитiн зоночкасö. Извинитчы и кор керкуö. Видзöтам, мый сылöн сьöлöмнас, — висьталiс нылочкалöн тятьыс.
Лина извинитчис, кутiс Димасö киöттяс, и нiя пырисö керкуö.
Ашынас öтлаын колхозниккезкöт Линалöн тятьыс мунiс ытшкисьны. Рытнас ытшкисянсянь гортö бертiс Димаыс айкöт. Нiя дыр мыйкö баитiсö öтамöдкöт.
Лина да Дима пукалiсö посöдзын. Зоночка висьтасис Линалö, кытшöмöсь олöны вöрын зверрез, кытшöмöсь и кыдз горалöны кайез. Линалö гленитчис вежöра зоночкаыс.
Сыбöрын Лина кузьмöса футлярись кыскис басöк свиттялан скрипка и смычокöн нюжöтiс вöснитик, нежнöй шыэз. Дималöн голубöй синнэс гöгрöсмисö, öмыс оссис. Зоночка нельки полiс вöрзьöтчыны. А Линалöн векнитик чунёккес сё чожажык и чожажык котрасисö струнаэз кузя и кисьтiсö быдкодь мелодияэз. Дималö кажитчис, что басöк шыэз уялiсö гöгöр и тшöктiсö буржыка пессьыны сылiсь висян сьöлöмсö.
Кöр Лина дугдiс ни орсны, Дима сё эшö пукалiс осьта öмöн.
— Тэнö кин велöтiс орсны? — недыр мыйись юалiс Дима, Лина висьталiс, что куим год ни велöтчис музыкальнöй школаын.
Дима тожö ошшасис нылочкалö, что сiя кужö орсны пöлянöн, только пöляныс аскерöм, но айыс кöсйисис небны базарскöйö. А эшö висьталiс, что сiя быд лун кывзiс Линалiсь скрипка вылын орсöмсö.
— Вон сэтöн, — мыччалiс Дима скамейка вылö.
Кöр нылöн тяттезныс петiсö посöдзö, зоночкалöн айыс крепыта ыжмитiс Линаыс тятьлiсь кисö и горöтчис:
— Спасибо, Дмитрий Павлович. Воч зонöлiсь сьöлöмсö, сет сылö челядь гажсö.
Дмитрий Павлович малыштiс Дималiсь чорыт, веж юрсисö и висьталiс, кыдз ыджыт мортлö:
— Вот, тёзка, тэ мужчина и вежöрт — тэнат сьöлöмö колö керны сложнöй операция. А тэ, Лина, отсалан керны удачнöй операция, ежели пондан дружитны Димаыскöт.
Чулалiс июль. Лина, Дима и Дмитрий Павлович мунiсö городö.
Дима быдса месяц гöститiс Лина ордын. Лина велöтiс Димасö орсны скрипкаöн. Ветлiсö видзöтны кино, зоопаркись зверрезöс. Дималö гленитчис городас. Öтöрын öтмöдöрö шуксисö быдкодь машинаэз, автобуссэз, керкуэз ыджытöсь — пыкöны небо, а отир сымда, кыдз сьöд вöр. Рытнас улицаэзын югыт, быдлаын сотчö электричество. Дималöн лоисö и виль друггез.
Сiя лунö, кыдз водны больницаö, Дима пондiс тöждiсьны. Нельки асывнас эз сёй и синнэсис быгыльтчисö гырись синваэз.
Димаöс локтiсö кольлавны больницаö сылöн виль друггез. Нiя öлiсö Димасö. А чангыля ныра, понпутша Серёжа ыджыт морт моз висьталiс:
— Видзсьы сiдз жö, кыдз миян учительыс. Война вылын сылiсь коксö пилитöмась, кыдз пес, и нельки кваркыш абу керöма. Быль сiдз вöлöм, газетаын эта йылiсь гижöмась, — невна бöбöтчыштiс Серёжа.
А Лина малыштiс Дималiсь юрсисö да горöтчис:
— Крепитчы, Дима, тятьö совсем не зубыта вундалö, кыдз бумага. Вундыштас моростö, кыскас сьöлöмтö, вот этадз пуктас долонь вылас и вочас. — Лина видзöтiс стена вылö, кытöн öшалiс скрипка, и содтiс: — Ежели он понды горзыны — козьнала тэныт скрипкаöс.
Дима — зонка мывкыда, вежöртiс, кыдз старайтчöны челядьыс, медбы сiя эз пов, и серöмтчис:
— Ладно, видзся.
Кöр пондiсö лэбавны öтöрын лым бабыввез, Дмитрий Павлович керис Дима сьöлöмö операция. Месяц бöртi Дима вермис ни пукавны.
Школаись челядь быд лун вовлiсö Дима дынö больницаö, велöтiсö сыкöт уроккез, медбы зоночка эз кольччы велöтчöмын.
А тулыснас Дима бертiс деревняö. Сiя аслас виль друггезлö гижис письмоэз и корис нiйö гожумöн локны деревняас шоччисьны. «Ме тiянöс вöрö нуöтла, — кöсйисис Дима, а медбöрын содтiс: —Котрасьны öнi верма тöвся шупытжыка».
КОМИ ПЕСНЯ, 1959
Первуись коми-пермяцкöй кыв вылын песняэз вöлiсö öктöмöсь эшö 20-öй годдэзö. Но сэк эз вöв возможность печатайтны нiйö типографскöй способöн. Василий Иванович Субботин, кöда öктiс песняэсö, кынымкö экземпляр печатайтiс нiйö Москваын стеклограф вылын. Сэтчö пырисö коми поэттэзлöн песняэз и народнöй песняэз. Этö сборниксö сьöкыт судзöтны, да и унаöн сiя оз ни отвечайт öнняся требованнёэзлö.
1946 годö Коми-Пермяцкöй книжнöй издательство лэдзис сборник «Песняэз», кöдö составитiсö С. Караваев да Н. Попов. Этчö пырисö кыдз коми поэттэзлöн, сiдз и русскöй кыв вылiсь вуджöтöм песняэз. Сборникын вöлiсö печатайтöмöсь только тексттэз, нотаэзтöг. Этö сборниксö öнi сiдзжö сьöкыт адззыны.
Коми-Пермяцкöй книжнöй издательство медбöрья годдэзö лэдзис кынымкö песня нотаэзöн. «Гажа рыттэз» книжкаын вöлiсö печатайтöмöсь: народнöй песня «Коми нылöй», С. Караваевлöн «Орс, гармонь» да М. Вавилинлöн «Асывся песня». Нотаэзöн жö петiс «Иньва» литературно-художественнöй сборникын быдöнлö тöдса песня «Ой тэ, Иньва». Окружнöй газета «Ленин туй вылöт» печатайтiс нотаэсö «Ыб дорын жельнöг цветитö» да «Никита йылiсь» тексттэз вылö.
Эта виль песенникö пыртöмöсь, конечно, не быдöс коми песняэс, кöдна сьывсисö и öнi сьывсьöны отирын. Народнöй песняэз пыртöмöсь етша сiйöн, что миян народлöн устнöй творчествоыс абу на öктöма. Но эта сборникö босьтöмöсь песняэс тöдчöмöн унажык, нежели первöйезас. И почти быдöс нiя оригинальнöйöсь, коми-пермяцкöйöсь. Переводнöйыс только öтiк («Лёнок»), кöда важын ни комисялiс.
Виль песенникö мийö сетам и нотаэз. Правда, нотаэзнас сетiм только мукöд народнöй песнясö да нiйö тексттэсö, кöдна неважын вöлись мыччисисö и етша тöдсаöсь отирлö.
Мукöд песнясö, кöть и лыддиссьöны нiя народнöйезöн, гижисö либо обработайтiсö коми поэттэз. Шуам, «Нывлöн тöждiсьöм» мунö кыдз народнöй песня, но сiйö гижис поэт Николай Попов. Песня «Пемыт ойöн» обработайтiс Андрей Никифорович Зубов (Питю Öньö). Кынымкö песня вуджисö миян народ коласö Коми АССР-ись. Сэтшöммес: «Коми нылöй», «Уна ныввез чукöртчисö», «Паськыт гажа улица», «Öтпыр вöлi» и «Чужи быдми». Медбöрья кык песнясö гижис коми поэт Виктор Алексеевич Савин (Нёбдiнса Виттор).
ЕГОР-АРТИЛЛЕРИСТ
— Полундра! Воздух! — лёк горшöн горöтiс Хамса.
Артиллерийскöй батареяись солдаттэзöс, кыдз тöвчикöн нöбöтiс, кин кыдз кужис-вермис юррезнысö дзебисö. Быль, минута бöртi мыччисисö неприятельлöн самолёттэз, чапкисö кынымкö бомба двести метра ылына батарея сайын. Кöр самолёттэз саясисö, солдаттэз бöр пондiсö чукöртчыны орудиеэз гöгöр. Только öтiк боец пукалiс снаряддэз ящик вылын и, кыдз бытьтö сигнал «воздух» сы понда эз вöв, каттис коккесö нямöттэзöн.
— Егорка, тэ мый, бöбöв? Но тэ быль Куимёгор, а веммезыт öтiклö оз тырмö. Гитлерлöн кöрткырнышшез юр вевдöрын, а сiя коккесö нятьöсь, дука нямöттэзöн каттьö. Тьфу! Нимтöм артист. — Егор одзын вежмасис, китшкис-ваксис сьöкыт мыгöра, кыз кынöма артиллерист,
— Эх, Хамса, Хамса, горöтлан «полундра», бытьтö флот вылын служитан. Натьтö, Курган степпезат ыджыт шорсö эн адззыв. Горöтлан, а самолёттэзыс батарея вевдöрын ни. Тэ быдлаын сёрман, некытшöм расчёттэз тэнат мыр юрат абуöсь. Сiдз жö зенитчиккез узьöны, кыдз и тэ. Пух! Пух! А самолёттэз батарея ни колисö.
Егорка, сылöн быдса нимыс Егоров Егор Егорович, Куимёгор, кыдз сiйö нимкодялiсö батареяись боеццез, мыгöрнас неыджыт, винерик, да сы вылын не сы размер сьöртi пукалан обмундированнёнас вачкисис огородечись повзьöтчан бедь вылö, коккесö каттис нямöттэзöн и стыдитiс Хамса боецöс.
Батареяись боеццез оланiсь эта эпизодыс вöлi шоныт июнь коста. 1943 годö. Неприятель лöсьöтчис ыджыт вермасьöм кежö. Сiя некыдз эз вермы вунöтны сталинградскöй разгром. Öнi керис планнэз вештiсьны ыджыт стратегическöй öштöмсянь. Эта виль, öддьöн вира вермасьöмыс историяö пырис кыдз Орловско-Курскöй битва. А öнi Гитлерлöн и миян войскоэз лöсьöтчисö виль бойез кежö.
Миян особöй, кинкö эшö нимтöм экспериментальнöйöн, артиллерийскöй батарея сулалiс Орёл город увтын, Гостья нима посад дорын. Батареяöн, кыдз баитiсö боеццез, юралiсö Москвасянь, а оперативнöй боевöй уджöн — дивизияись артиллериялöн начальник. Веськыта батареяöн командуйтiс генерал-майор, а бойез коста эшö сылöн заместитель, капитан. А генералыс немымда эз вачкись боевöй генерал вылö. Вон кытшöмöсь генераллэзыс армияас, судачитiсö ас коласаныс артиллеристтэз, томöсь, боёкöсь, волькытöсь, кыдз бытьтö праздник кежö лöсьöтчöмась. А шед кö паныт сэтшöм генераллö, сизимись ньылöмтö чышкан, усьтöдз велöтас приветствуйтны устав сьöртi. Мед ен берегитö, медбы сэтшöм генералкöт пантасьны. Егорка стрась полö воинскöй начальниккезiсь, куим месяц артиллерийскöй училищеын велöтчöм коста сiдз эз и велав приветствуйтны начальствоöс: то должность, то званнё соралас, и кисö оз куж лэбтыны кöсича весьтöдз.
Егор ас кежас думайтiс, а миян пö генералыс дзор не дзор, пöрись не пöрись, невна мышкыра, нач миян университстiсь математика сьöртi профессор вылö вачкисьö. Немöн миян командир — не статьöн, не голосöн оз судзöт боевöй генерал дынöдз. Натьтö, кыдз и ме, оз тöд воинскöй устав, и приветствуйтны, кыдз устав тшöктö, тожö оз куж. Не сiдз кисö лэбтö, каблуккезнас оз жвангы, да и баитö солдаттэзкöт, кыдз миян профессор: «Батенька, лейтенант Шухта, тэ кыным класс кончитiн? Тэныт, батенька, не артиллеристöн колö лоны, а безменöн вузасисьöн. Да тэ, натьтö, и безменсис он куж лыддьыны, сэтöн эд не килоэз, а фунттэз да пуддэз. Тэ некыдз он вежöрт, мый сэтшöм быдса единица и джын единица, вот тэнат снаряддэзыс и лэбзьöны то целься ылöжык, то матöжык, либо нач бокö». Артиллеристтэз гот-гот ваксьыштасö, кыдз генерал лейтенантöс стыдитö. Боеццез эзö радейтö лейтенант Шухтаöс — öддьöн ни пö сiя вышитчö да ошкö асьсö. Генерал бергöтчис ваксиссезлань и грöзитчö: «Цыц, шельмеччез! Адззöмась мый вылын ваксьыны. Миян татöн первокласснöй техника и сыкöт колö кужны баитны и лыддисьны».
Батареяись личнöй состав пондiс вежöртны, что эта не рядовöй батарея и сэтшöм орудиесö одзжык эз на эшö адззывлö. Вон витöт орудиеись командир первöй лунсянь война вылын, и сiя бойез коста лыйсикö сорасьö расчёттэзöн. Да и особöй отделiсь часто вовлiсö батареяö, а генераллöн ны дынсянь вöлi личнöй охрана. Сiдз жö батареясö караулитiсö автоматчиккез лун и ой, медбы батареяись личнöй состався объект расположеннёö некин эз шед. Неприятель самолёттэзсянь батареясö караулитiсö зенитчиккез. Батареяись боеццез асьнысö лыддисö тожö не простöй артиллеристтэзöн и вышитчисо пехотинеццез одзын: «Мый тiян пехота — пух-пах-тр-р-р керасö винтовкасянь либо автоматсянь. А миян — войналöн ен, рез-паз керас, нельки кымöр пымалас». А пехотаись боецöс куш киöн тожö он кут: «Тi только рез-паз и кужат керны, а посаддэзö, городдэзö ми первöйöсь пырам». Сiдз öтамöдныс коласын вермасисö артиллерияись и пехотаись боеццез.
Но кыдз формируйтчис батареялöн личнöй состав, только командованнё тöдiс. Но, шуам Егор Егорович Егоров кончитiс отлично вылö куим месяцся артиллерийскöй училище, кöть приветствуйтны устав сьöртi сiдз эз и велав. Особöй отделлöн проверка бöрын сэк жö шедiс батареяö. А мöдiккез? Мукöдыс воюйтöмась ни. А Кабыхно? Веськыта татчö Москвасянь. А Хамсоедов, нимкодь сьöртi Хамса, противотанковöй пушкаöн ни воюйтöм, не весь öшалö морос вылас медаль «За отвагу». Сiдзкö, личнöй составись боеццез бытшöмик нем эз тöдö. Батареялöн вöлi квать орудие, тожö не артиллерия устав сьöртi. А каждöй орудие бердö командирöн сувтöтöм лейтенант. Не весь батареяыс шусьö особöйöн.
Кöр локтiсö батареяö Егор — Куимёгор и Хамсоедов — Хамса, ны вылын боеццез шуткаэз, сгаллэз керисö. Егор и Хамса öддьöн разнöй мывкыда боеццез. Егор винерик, кыдз чужмöр, то татöн, то эстöн, весь öтiк кыв сы öмись оз пет. Том, но морт серьёзнöй. А Хамса небытик, тупыль кодь (и кöр война коста кынöмсö ештöм быдтыны?), сылöн сералiсь öмыс некöр эз тупкассьы. Хамса и Егор öддьöн öтамöднысö радейтiсö, но и орöттöг кеслiсö öтамöдныс вылын пиннезнысö.
— Эй, Хамса, тiян Курган лесостеппезас хамсаыс эд оз быдмы, — ваксьö Егор. А Хамса адззö ни паныт öмлöсалан кыв:
— Миян Терень Пальчов, гор вылын быдмöм, аскерöм профессор, не только бур шогдi кöдзыс быдтö, но и нюррезын хамса вöдитö. Вот ме сылöн первöй экземпляр. — Сыбöрын локтö очередь згальничайтны Егор вылын, — но тэ, Куимёгор, ас вылат видзöт, нач огородечись катша-рака повзьöтан. Тэ особöй батареяись боец, а коссит ременьыт умöль газ лэдзанöдз öшöтчöм. — И одзлань шырзьö Хамса, — Егорка, ноко ошшась, кöть öтпыр ас бердат нывкасö зэлöтыштлiн, мороссэсö малыштiн?
Ежели сiйö он öмлöсав, сылöн пизян öмыс оз и тупкассьы.
— Невежда тэ, Хамса, — паныт ёткис Егор.
А лейтенант Шухта зубыта жельнöгалiс Егорöс, тэ пö мый, Хамса, он адззы, сылöн öмугöллэзыс абу эшö мамыс йöвсянь косьмöмась, кытчö сылö нывкаэз дынöдз.
Егор думайтыштiс аслас Марина йылiсь, кöда дырни сiя полiс шуны неколана кыв, а сэтöн мороссэз маласьöм йылiсь, сылöн гöрдöтiсö пеллезыс, чужöмыс пондiс биöн сотчыны. Сэтöн жö эшö зубыта чушкис лейтенант, боец лöгасис, вирöн пизис сьöлöм, и мый шедiс кыв вылас, кожгис:
— Гер лейтенант, Туорта, ду бист ферфлюнтер тэйфель.
Боеццезлiсь öммезнысö кыдз кляпöн тупкалiсö, нiя некыдз эз видзчисьö зонкасянь эттшöм чорыт да эшö тöдтöм кыввез. Шухта тожö раммис, сiя вежöртiс только медодзза кыввесö «господин лейтенант», сэсся эз тöд, но догадайтчис, что бöрья кыввезыс нёштöмöсь. А батареяись боеццез веммезö пырис мыйкö эшö тöдтöм, что Куимёгор не нинöн вурöм студентик. Но а Шухта бердö дыр кежö лякасис виль фамиллё — Туорта.
Батареяись боеццез эзö тöдö, что нiя испытывайтöны виль артиллерийскöй системаэз настоящöй бойез вылын. А батареялöн командир — этна системаэзлöн конструктор. Сылöн вöлi мог бойез коста проверитны метитчан приборрез и орудиеэзлiсь жугдан-паздан вын,
Öтiк кадö, кöр бойез эзö вöлö, и фронт вылö лэдзчисис сук туманöн лöнь, неприятель керис виль дислокация, тыртiс ассис часттесö виль пополненнёöн. Миян армия тожö шоччисис и тыртiс ассис вынсö. Но боеццез сьöлöмын вöлi тревога, нiя тöдiсö ни асланыс опытiсь — вот-вот пондöтчасö ыджыт бойез.
Генерал команднöй пунктö öктiс батареяись командиррезöс. Сiя бöра внушительнöя велöтiс, кыдз колö уджавны орудиеэзöн, керны расчёттэз, пользуйтчыны временнöй таблицаэзöн. Сiя тшöктiс чеччыны местасис лейтенант Шухтаöс и сувтöтiс сы одзö задача. Лейтенант сулалiс, пымавтöдз аскöттяс решайтiс задача, керис расчёттэз и полöмöнмоз сетiс ответ.
— Неправильно, батенька лейтенант! — öтöр-мöдöрö шагньöвтiс помещеннё кузя и лöгöн горöтчис генерал. — Тэнат лыддьöм сьöртi снаряд двести метрася унажык усяс цель бокö. Командиррез, кытшöм ошибка керис лейтенант Шухта?
Командиррез, кöть и тöдiсö Шухталiсь ошибкаэз, некин эз висьталö, некин эз охотитчы кöртасьны зынöсь лейтенанткöт.
Кöр командиррез чöлiсö и гыжьялiсö юррезнысö, ыбöс дынсянь кылiс не совсем чорзьöм мужик голос: «Ёрт майор-генерал, лейтенант Туорта, виноват, генерал, Шухта керис кык ошибка. Öткö, неправильно лыддис тöвлiсь вын, мöдкö, вунöтiс öтöрись температура». Генерал адззис — ыбöс дынын сулалiс паськыт гимнастёркаа подросток.
— Этö эшö кин шыасьлö? Кин тэнö татчö корис? — горöтлiс чорыта генерал. А лейтенанттэз гусьöна, но Егор кылiс, китшкисö-сералiсö, вот пö тэ шедiн, Чужмöр кок, уна тöдiсь Куимёгор. А лейтенант Шухта биöн öзйöм синнэзöн лыйис-нилис, сы сьöртi, не уставнöй боецöс.
Генерал эшö видзöтiс вель том боец вылö, зэлöтiс тырппесö, медбы не серöмтчыны, рамöн ни юалiс:
— Кин тэ, батенька, висьтась?
Егор веськöтчис, смевсялiс и пондiс гарддьыны-сорасьны: «Ёрт майор-генерал, виноват, сораси, генерал-майор, ме рядовöй артиллерист, Егоров Егор Егорович, прозваннё сьöртi Куимёгор. Письмо тiянлö, генерал». Боец шагньöвтiс пызан дынö и генерал киэзö сюйыштiс конверт.
— Молодец, Егор Егорович! — боец первöй раз кылiс, кыдз сiйö величайтiсö быдса нимöн. Генерал бергöтчис командиррезлань, — лейтенант Шухта, а Егор Егоровичыс правильно адззис тэнчит ошибкаэз, — серöмöн видзöтiс сiя командиррез вылö.
Вöлi сэтшöм жö лун, кыдз одззася, гажа, чöскыт руа, только бöбмöм гуттэз пырисö öмö, кильöтiсö ныр и кыскис несйыны. Батарея расположеннёын кинкö горöтiс: «Боец, Егоров, генерал дынö. Пондас тэнö матегавны». Егор кöмтöм куйлiс вуджöра куст увтын и думаэзнас гижис письмо: «Дона Мариночка, вот ме и артиллерист. Но солдат, не солдат, ачым эшö ог вежöрт. Мунi дорйöны ассим Родина, а кыдз ме дорья? Эшö öтiк фашистöс эг адззыв...» Эта думаэз коста и кылiс генерал дынö кытсалöм.
Егор чеччис, зэгнитiс паськыт гимнастёрка, дернитiс вывланьö брюкиэз, буржыка зэлöтiс ремень, пуктiс юр вылас нöитчöм пилотка и мунiс генерал дынö думаэзöн, натьтö, быль пö менö матегалас одззася пантасьöм понда.
Егор локтiс генераллöн команднöй пунктö и приветствуйтiкас бöра сорасис. Генерал вежöртöмöн, кыдз ай, видзöтiс томыник морт вылö и жалейтöмöн аскежас думайтiс, мымда пö весь торксяс отир эта неправеднöй война вылын. Эта зонкалö бы эшö пондöтчыны тöдны мир, вежöртны сiйö, радуйтчыны, любитны, а сiя локтiс вийны сэтшöм жö том отирöс, и ачыс торксяс.
— Боец Егоров, тэныт кыным год? — видзчисьтöг юалiс генерал.
— Ёрт майор-генерал — только и ештiс горöтчыны боец, генерал сiйö öмалiс. Тырмас пö, Егоров, козыряйтны, ежели тэ Уставас эн велав, кыдз и ме, кöть и генерал. — Мöдлун тырас даскыкьямыс год.
— А кыдз тэ шедiн армияö, несовершеннолетньöй?
— Миян курсiсь быдöнныс зонкаэс мунiсö фронт вылö. А ме нысся умöльжык? Öтнам кольччи нывкаэзкöт. Бöбöтi военкомсö, меным, мыся, тырис даскыкьямыс год.
— Егоров, бöбöтчыны грех. Война — не театр. Война вылын отирöс вийöны, — горöтчис генерал и одзлань юасис: — Кытöн велöтчин?
— Университетын, ёрт генерал. Нёль курс татчö локтöдз досрочно помалi.
— Нёль? Дак тэ мый, даснёльгодсяöн, семилеткасянь пырин университетö?
— Так точно, генерал. Шöрöт школа сизим годöн кончитi.
— Кинö велöтчин?
— Математикö. Ме неыджыт научнöй удж кери, академическöй журналын печатайтiсö. Медбöрья кыввесö боец висьталiс невна ошшасьöмöн, медбы генерал öддьöн сы вылö эз лöгав.
Эта юасьöм бöртi генерал дыр, вель дыр мыйкö думайтiс и шы эз сет. Сiя видзöтiс öшын пыр батарея расположеннё вылö, пожуммез вылö, кöдна гöгöртiсö сiйö, небо вылö, кытöн öтiк кымöрок эз вöв. Чеччис пызан сайись, öтöр-мöдöрö керис кынымкö оськöв кабинет кузя и, ай моз горöтчис: «Дак вот сiдз, батенька Егоров, тэ лоан менам помощникöн». Боец мыйкö мöдiс паныт висьтавны, но генерал чорыта ни жвангис: «Эта приказ!»
Боец дыр, быднёж, кыдз тöдтöм уравненнё решайтiс, лыддис, вежис-панiс генераллiсь приказ, кытшöм пö ме сылö помощник, некыдз досповна эз артав. Армияын командир — ен, начальник и судья, мый тшöктас — сiйö и керан.
Кытшöмкö кад бöртi Егор пуксис аслас дона нывкалö гижны письмо: «Дона Мариночка, менам олан армияын нач дзугсис. Господи, генерал менö керис техничкаöн, сылiсь кабинет чышка да миськала, письмоэз да распоряженнёэз генераллiсь батареяö новья, сёян сылö походнöй кухняись ваяла. Только сэки сьöлöмын гаж овлö, кöр генерал тшöктö капризнöй уравненнёэз решайтны. Мариночка, неужто ме сэтшöм несчастливöй морт?» Егор лöг ас вылас, письмо косялiс, нöитiс, сьöвзис бокö и чапкис гор öмö кыввезöн: «Кинлö колö тэнат горзана письмо». Сэксянь неетша кад чулалiс. Вот-вот пондöтчасö ыджыт бойез. Быдлаын ни эта йылiсь кывсис. Каждöй, ыджыт и учöт, воинскöй начальниклöн и рядовöй боецлöн зубыта пидзрасис сьöлöм эшö тöдтöм чувствоэзсянь.