Малая ектения, Кондак, глас 3
Воскре́сл еси́ днесь из гро́ба, Ще́дре, / и нас возве́л еси́ от врат сме́ртных; / днесь Ада́м лику́ет, и ра́дуется Ева, / вку́пе же и проро́цы с патриа́рхи воспева́ют непреста́нно / Боже́ственную держа́ву вла́сти Твоея́.
Икос:Не́бо и земля́ днесь да ликовству́ют, / и Христа́ Бо́га единому́дренно да воспева́ют, / я́ко у́зники от гробо́в воскреси́. / Сра́дуется вся тварь, / принося́щи досто́йныя пе́сни Созда́телю всех, / и Изба́вителю на́шему: / я́ко челове́ки из а́да днесь, я́ко Жизнода́тель, совозве́д, / на небеса́ совозвыша́ет, / и низлага́ет вра́жия возноше́ния, / и врата́ а́дова сокруша́ет / Боже́ственною держа́вою вла́сти Своея́.
Песнь 7
Ирмос: Якоже дре́вле / благочести́выя три о́троки ороси́л еси́ / в пла́мени халде́йстем, / све́тлым Божества́ огне́м / и нас озари́, / благослове́н еси́, взыва́ющия, / Бо́же оте́ц на́ших.
Канон воскресен
Раздра́ся церко́вная све́тлая катапета́сма, в распя́тии Соде́теля, / сокрове́нную в Писа́нии явля́ющи ве́рным и́стину,/ благослове́н еси́, зову́щим, Бо́же оте́ц на́ших.
Прободе́нным Твои́м ре́бром, / ка́плями Богото́чныя Животворя́щия Кро́ве, Христе́, / смотри́тельно ка́плющия на зе́млю, / су́щих от земли́ возсозда́л еси́, / благослове́н еси́, зову́щих, Бо́же оте́ц на́ших.
Ин,канон крестовоскресен
Не про́ста со́лнце на кресте́ ви́сяща челове́ка, / но Бо́га воплоще́нна зря помрача́ется. Ему́же и пое́м: / благослове́н еси́, Го́споди, Бо́же оте́ц на́ших.
Кре́пкаго Божество́м прие́м ад страшли́вый, нетле́ния Пода́теля, / ду́ши пра́ведных вопию́щия изблева́: / благослове́н еси́, Го́споди, Бо́же оте́ц на́ших.
Ин канон Пресвятей Богородице,
Иже сла́вы Госпо́дь, и держа́й го́рния си́лы, / Иже со Отце́м седя́й, де́вственныма рука́ма носи́мь: / благослове́н еси́, Го́споди, Бо́же оте́ц на́ших.
Яра смерть, но сию́ Тебе́ бесе́довавшую погуби́л еси́, / от Де́вы Богоипоста́сная плоть быв: / благослове́н еси́, Го́споди, Бо́же оте́ц на́ших.
Песнь 8
Ирмос: Нестерпи́мому огню́ соедини́вшеся, / Богоче́стия предстоя́ще, ю́ноши, / пла́менем же неврежде́ни, / Боже́ственную песнь поя́ху: / благослови́те, вся дела́ Госпо́дня, Го́спода / и превозноси́те во вся ве́ки.
Канон воскресен
Раздра́ся церко́вная све́тлость, / егда́ крест Твой водрузи́ся на ло́бнем, / и тварь преклоня́шеся стра́хом, воспева́ющи: / благослови́те вся дела́ Госпо́дня, Го́спода, / по́йте и превозноси́те Его́ во ве́ки.
Воскре́сл еси́ Христе́ из гро́ба, / и па́дшаго прельще́нием, дре́вом испра́вил еси́ Боже́ственною си́лою, зову́ща и глаго́люща: / благослови́те вся дела́ Госпо́дня, Го́спода, / по́йте и превозноси́те Его́ во ве́ки.
Ин,канон крестовоскресен
Сло́во нестра́стное, безстра́стно у́бо Божество́м, / стра́ждет же пло́тию Бог, Ему́же и пое́м: / благослови́те вся дела́ Госпо́дня, Го́спода, / по́йте и превозноси́те Его́ во ве́ки.
Усну́вый у́бо, я́ко сме́ртен, / воскре́сл еси́, я́ко Безсме́ртен, Спа́се, / и спаса́еши от сме́рти пою́щих: / благослови́те вся дела́ Госпо́дня, Го́спода, / по́йте и превозноси́те Его́ во ве́ки.
Ин канон Пресвятей Богородице,
Чи́ны у́мныя, я́ко Ма́ти, превозшла́ еси́, / и близ Бо́га бы́вши: / благослови́м, Благослове́нная Де́во, рождество́ Твое́,/ и превозно́сим во вся ве́ки.
Добро́ту есте́ственную, красне́йшу показа́ла еси́, облистава́ющую плоть Божества́. Благослови́м, Благослове́нная Де́во, рождество́ Твое́, и превозно́сим во вся ве́ки.
Таже, песнь Богородицы: Вели́чит душа́ моя́ Го́спода: с припевом: Честне́йшую херуви́м:
Песнь 9
Ирмос: Но́вое чу́до и Боголе́пное: / деви́ческую бо дверь затворе́нную / я́ве прохо́дит Госпо́дь, / наг во вхо́де, / и плотоно́сец яви́ся во исхо́де Бог, / и пребыва́ет дверь затворе́на. / Сию́ неизрече́нно / я́ко Богома́терь, велича́ем.
Канон воскресен
Стра́шно есть зре́ти Тебе́, Творца́ / на дре́ве воздви́жена, Сло́ве Бо́жий, / пло́тски же стра́ждуща Бо́га за рабы́, / и во гро́бе бездыха́нна лежа́ща, / ме́ртвыя же из а́да разреши́вша: / те́мже Тя, Христе́, я́ко Всеси́льна, велича́ем.
Из тли сме́ртныя спасл еси́, Христе́, пра́отцы, / положе́н быв во гро́бе мертв, / и живо́т процве́л еси́, ме́ртвыя воскреси́в, / руководи́в естество́ челове́ческое ко све́ту, / и в Боже́ственное обле́к нетле́ние. / Те́мже исто́чника Тя све́та при́сно жива́го велича́ем.
Ин,канон крестовоскресен
Честь челове́ком от безче́стныя сме́рти всем источи́л еси́: / ея́же распя́тием Твои́м, Спа́се, вкуси́в, / существо́м сме́ртным нетле́ние мне дарова́л еси́, Христе́, я́ко Человеколю́бец.
Спасл мя еси́ воскре́с из гро́ба, Христе́: / воскре́сл же еси́, и Отцу́ приве́л еси́ Твоему́ Роди́телю: / одесну́ю же Его́ спосади́л еси́ / за благоутро́бие ми́лости Твоея́, Го́споди.
Ин канон Пресвятей Богородице,
Сы́тость Твои́х похва́л, Де́во, / благочести́вым ве́рным отню́д не быва́ет: / жела́нием бо жела́ние при́сно Боже́ственное, и Духо́вное прие́млюще, / я́ко Ма́терь Бо́жию, велича́ем.
Положи́л еси́ нам непосты́дную Моли́твенницу, / Тебе́ ро́ждшую, Христе́. / Тоя́ мольба́ми Ми́лостива подае́ши нам Ду́ха, Пода́теля бла́гости, / от Отца́ Тобо́ю происходя́ща.
Ектениа малая. Таже, Свят Госпо́дь Бог наш.
На хвалитех стихиры воскресны, глас 3: