Ин канон, Пресвятей Богоро́дице. Ле́ствица, Еюже к нам сни́де Вы́шний, / истле́вшее естество́ испра́вити
Ле́ствица, Еюже к нам сни́де Вы́шний, / истле́вшее естество́ испра́вити, / Ты я́вственно, Чи́стая, всем ны́не ви́дена была́ еси́: / Тобо́ю бо Преблаги́й мирови бесе́довати благоволи́.
Разреши́ся кля́твы дре́вния осужде́ние / Твои́м хода́тайством, Де́во Пречи́стая: / из Тебе́ бо Госпо́дь я́влься, / всем благослове́ние, я́ко Преблаги́й, источи́, / Еди́на челове́ков удобре́ние.
Песнь 4
Ирмос: Боже́ственное Твое́ разуме́в истоща́ние / прозорли́во, Авваку́м, Христе́, со тре́петом вопия́ше Тебе́: / во Спасе́ние люде́й Твои́х / спасти́ пома́занныя Твоя́ прише́л еси́.
Канон воскресен
Яже от Ме́рры горча́йшыя во́ды, / я́ко во о́бразе проначерта́я Пречи́стый Крест Твой, Бла́же, / грехо́вное умерщвля́ющ вкуше́ние, / дре́вом услади́л еси́.
Крест за дре́во разу́мное, / за сла́дкую же пи́щу желчь, Спа́се мой, прия́л еси́, / за тле́ние же сме́рти кровь Твою́ Боже́ственную излия́л еси́.
Другий канон, крестовоскресен.
Яко водрузи́ся на земли́ на ло́бнем Крест, / сокруши́шася вереи́ и вра́тницы ве́чнии, / и возопи́ша: сла́ва си́ле Твое́й, Го́споди.
Яко сни́де Спас к свя́занным я́ко мертв, / совоскресо́ша с Ним и́же от ве́ка уме́ршии, / и возопи́ша: сла́ва си́ле Твое́й, Го́споди.
Ин канон, Пресвятей Богоро́дице
Созда́вый от не су́щих вся́ческая, / от Тебе́, Чи́стыя, созда́тися я́ко Благоде́тель, благоволи́, / на Спасе́ние ве́рою и любо́вию Тя пою́щих, Всенепоро́чная.
Тя Жезл Иса́иа именова́, / от Него́же прозябе́ нам кра́сный Цвет, Христо́с Бог, / на Спасе́ние ве́рою и любо́вию притека́ющих к Покро́ву Твоему́.
Песнь 5
Ирмос: Одея́йся Све́том, я́ко ри́зою, / к Тебе́ у́треннюю, и Тебе́ зову́: / ду́шу мою́ просвети́ омраче́нную, Христе́, / я́ко Еди́н Благоутро́бен.
Канон воскресен
Иже сла́вы Госпо́дь в несла́вне зра́це, / на дре́ве обезче́щен во́лею ви́сит, / о боже́ственней мне сла́ве несказа́нно промышля́я.
Ты мя преобле́кл еси́ в нетле́ние, Христе́, / тли сме́ртныя неистле́нно пло́тию вкуш, / и возсия́в из гро́ба тридне́вен.
Другий канон, крестовоскресен.
Плени́л еси́ ад, Спа́се мой, Твои́м погребе́нием, / и Твои́м Воскресе́нием ра́дости вся испо́лнил еси́.
Воскре́с от гро́ба тридне́вно, Жизнода́вче, / и всем источи́л еси́ безсме́ртие неги́блющее.
Ин канон, Пресвятей Богоро́дице
Вси проро́цы Тя я́ве предвозвести́ша / хотя́щую бы́ти Бо́жию Ма́терь, Богоро́дице Чи́стая: / еди́на бо обрела́ся еси́, Чи́стая, соверше́нна Непоро́чная.
Яко близ всю Тя до́бру и непоро́чну, / запечатле́нну де́вством чи́сте возлюби́, / в Тя Всели́выйся Бог, я́ко еди́н Благоутро́бен.
Песнь 6
Ирмос: Неи́стовствующееся бу́рею душетле́нною, / Влады́ко Христе́, страсте́й мо́ре укроти́, / и от тли возведи́ мя, я́ко Благоутро́бен.
Канон воскресен
В тле́ние попо́лзся родонача́льник, Влады́ко Христе́, / преслу́шаннаго бра́шна вкуш, / и к животу́ возведе́н бысть стра́стию Твое́ю.
Живо́т низше́л еси́ ко а́ду, Влады́ко Христе́, / и тле́ние растле́вшему быв, / тле́нием источи́л еси́ Воскресе́ние.
Другий канон, крестовоскресен.
Просте́рл еси́ дла́ни Твои́, собира́я дале́че расточе́нная / язы́к Твои́х собра́ния, Христе́ Бо́же наш, / живоно́сным Кресто́м Твои́м, я́ко Человеколю́бец.
Плени́л еси́ смерть, и врата́ а́дова сокруши́л еси́, / Ада́м же свя́занный разреше́н быв, вопия́ше Тебе́: / Спасе́ мя десни́ца Твоя́, Го́споди.
Ин канон, Пресвятей Богоро́дице
Исцеле́ний, Влады́чице, душепита́тельный точа́щий исто́чник / ве́рно притека́ющим к покро́ву Твоему́ благосла́вному, / ве́мы Тя, Всенепоро́чная.
Спасе́нию вино́вна Жизнода́вца родила́ еси́ нам, / ве́чное избавле́ние да́рующаго, / Истинную Богоро́дицу Тя пропове́дающим.
Малая ектения, Кондак, глас 5.
Ко а́ду, Спа́се мой, соше́л еси́, / и врата́ сокруши́вый я́ко всеси́лен, / уме́рших, я́ко Созда́тель, совоскреси́л еси́, / и сме́рти жа́ло сокруши́л еси́, / и Ада́м от кля́твы изба́влен бысть, Человеколю́бче; / те́мже вси зове́м: / спаси́ нас, Го́споди.
Икос: Услы́шавша жены́ а́нгеловы глаго́лы, отложи́ша рыда́ние, / ра́достны бы́вша и тре́петны, у́жас бо ви́деша, / и се Христо́с прибли́жися к ним, глаго́ля: е́же, ра́дуйтеся, / дерза́йте, Аз мира победи́х, и у́зники свободи́х, / потщи́теся у́бо ко ученико́м, возвеща́юща им: / я́ко варя́ю вы во гра́де Галиле́йстем, е́же пропове́дати. / Те́мже вси Тебе́ зове́м: спаси́ нас, Го́споди.
Песнь 7
Ирмос: Превозноси́мый отце́в Госпо́дь / пла́мень угаси́, о́троки ороси́, согла́сно пою́щия: / Бо́же, благослове́н еси́.
Канон воскресен
Пло́тию обло́жься я́коже на у́дице льще́ния, / Боже́ственною Твое́ю си́лою зми́я низвле́кл еси́ / возводя́ вопию́щия: Бо́же, благослове́н еси́.
Земли́ непрохо́дное осуществова́вый составле́ние, / во гро́бе покрыва́ется пло́тию Невмести́мый. / Ему́же вси пое́м: Бо́же, благослове́н еси́.