КЫДЗ МЕ ВИНАКÖТ ДУГДI ТÖДЧЫНЫ 5 страница
И вот училищеись выпускник Москва увтын, Западнöй фронт вылын. Вöр шöрись деревняись петöм зонка одзын вöлi быдöс виль, тöдтöм: маскхалатö каттисьöм, бумагаöн клеитöм öшыннэза Москва-столица, а сы сайын, туй бокын, лымöн тыртöм, враглöн и миян жугдöм техника, противотанковöй роввез да надолббез, сотчöм деревняэз, жугдöм заводдэз, фабрикаэз, и враглöн и миян вийöм солдаттэзлö небура вартöм кресттэз.
Миян эшелон сувтiс Сухиничи станцияö. Эта станция увтын примитiм куим бой и бöр миянöс пуксьöтiсö вагоннэзö да иньдiсö воюйтны Юго-Западнöй фронт вылö. Сы коста эта фронт вылын мунiсö ыджыт вира бойез, Быдлö тöдса Харьковский котёл, кытöн уна торксисö миян солдаттэз. Формируйтчис Курско-Орловскöй дуга. Дугдывтöг вира бойез. Виль пополненнёэз.
Миян эшелон локтiс Купянск станцияö. Эстöн формируйтчисö виль часттез. Менö пыртiсö 57 гвардейскöй стрелковöй полкö, 20 гвардейскöй, öнi шусьö Криворожскöй Краснознамённöй первöй степеня Суворов орден нима дивизия. Миян дивизия пырис 37 армияö.
Неылын Купянсксянь миян полк пондiс воюйтны лёк, бура вооружитöм врагкöт.
Уна год чулалiс ни сэксянь, но менам öнöдз сэтшöм чувство, бытьтö сэк пыр öтöрын вöлi кымöра, шондi эз мыччась, кöть вöлi тулыс ни. Эстöн, Украинаын, бойез мунiсö луннэзöн и ойезöн. Мымдакö шоччисян, яйсорöн гречаись дзирыт каша сёян, не öддьöн чöскыт чай армейскöй галетаэзöн юан, а кинлö и шедас сто грамм фронтовöй пайкаись, и бöра бой вылö. Менам взводын миномёттэзлöн трубаэз эз ештö сайкавны, нiя орöттöг залпöн пöлялiсö бомба чужöма минаэз враг юррез вылö.
Локтiс кад, и менам кончитчис война. Полк керис контрнаступленнё öтiк стратегическöй пункт понда. Эстöн менö ранитiсö. А одзлань госпиталлез, госпиталлез... Не уна, не етша, девять месяц и семнадцать лун госпиталлезын меись керисö мортöс. И локтiс лун, кöр госпитались медсестра менö вайöтiс гортöдз.
Миян гвардейскöй дивизияын боевöй олан йылiсь бура гижöма Пермскöй издательстволöн книгаын «Бойцы вспоминают». Эта книгаын менам однополчанин и военнöй училище сьöртi однокашник Вениамин Берлин подробнöя висьтасьö миян солдатскöй удж йылiсь, касьтылö, кыдз менам земляккез Матвей Чакилев и Тимофей Федосеев, öнi эшö ловьяöсь, выполняйтiсö ассиныс солдатскöй долг.
Эта солдатскöй удж понда правительство менö наградитiс Первöй степеня Отечественнöй войналöн орденöн, «За отвагу» медальöн и мöдiк наградаэзöн.
Öнi ме отставкаын капитан, Отечественнöй войналöн инвалид.
Локтi гортö. Быдöнныс уджалöны фронт понда. А ме мый верма керны? Уна ли уджалан костыллез вылын? Колхозiсь председатель, кыдз уваженнё фронтовик дын, менö сувтöтiс караулитны анькытш. Вот эта менам вöлi первöй невоеннöй удж, кöда понда ме босьтi вештöм: кынымкö фунт няньöн или сюöн.
Том мортсö дыр оз шогöт. И ме вочми. Арнас мунi школаö велöтны челядьöс. Мöдiк годö кончитi учительскöй институт, и сыбöрын ни, кынымкö год бöртi, педагогическöй институт и Пермскöй университетiсь историческöй факультетiсь куим курс.
Велöтi челядьöс, директоралi роднöй школаын и педучилищеын, уджалi учителлез усовершенствуйтан институтын директорлöн заместительöн, лекторöн, государственнöй удж вылын. Мымда верми, пуктi пай аслам отирлiсь грамота, культура да экономика лэбтöмö.
Мый этаись шогмис, мед отир судитöны.
1984 годö петi пенсия вылö, но эшö сизим год дырна уджалi.
Кыдз висьтаси ни, менö творческöй удж дынö кыскис томсянь. Öддьöн вöлi охота сочиняйтны и рисуйтны. Но одзжык эта понда эз вöлö условиеэз, а сыбöрын босьтiс менö пленö интереснöй государственнöй да общественнöй удж, и желаннё гижны менам виньдiс уна годдэз кежö.
1956 годö пантаси Миша Вавилинкöт. Кöр сылö висьтаси аслам творческöй интерессэз йылiсь, мый йылiсь меным охота вöлi баитны литература пыр йöзкöт, сiя менö тшöктiс гижны, кöсъясис отсавны. И быль, 1957 годö кынымкö рассказ понда литературнöй конкурс вылын жюри премируйтiс менö дона козинöн. Куим год бöртi ме участвуйтi коми-пермяцкöй литература да искусство фестиваль вылын, кöда чулалiс Перемын. Эта годö менам рассказ вöлi вуджöтöм роч кыв вылö. Вуджöтiс öддьöн тöдса öнi миян странаын гижись Виктор Астафьев. Эта «В погожий день» нима рассказыс пырис «Зори над Иньвой» нима сборникö. Сыбöрын Пермскöй гижись Владимир Черненко вуджöтiс кынымкö юмористическöй рассказ. Нiя вöлiсö печатайтöмась «Урал» журналын, кöда петö Свердловскын, öтi-мöдi рассказ «Звезда» газетаын и Пермскöй издательстволöн «Шутки в сторону» сборникын. Челядь понда рассказзэз, сказкаэз пырисö «Иньва» сборникö и мöдiк изданнёэзö. Рассказ «Баня» пырис «Парма», Коми республикаись «Войвыв кодзув» сборниккезö и «У нас на Иньве» сборникö, кöда петiс Москваын.
Ме висьталi ни, что не профессиональнöй гижись, но гижи и челядь понда, и эстрада понда, мукöд рассказсö бытшöма висьтасисö сцена вывсянь, гижи висьттэз серьёзнöй отир понда.
Эта виль книга, кöда шусьö «Быд кадлöн аслас чужöм», не öтiк годся удж. Если бы не В. Климовлöн пырся тшöктöм да отсöт, а медбöрын и Т. Фадеевлöн да Ф. Истоминлöн тэрмöтлöм, натьтö, эта книгаыс бы сiдз и эз адззыв свет.
Быдöс, мый пырис книгаас, гижöм разнöй годдэзö. Ме нiйö эг корректируйт öнняся политическöй да экономическöй кад сьöртi. Сетi сiдз, кытшöмöсь нiя вöлiсö сэк.
Конечно, быд морт асмознас адззö и донсьöтö событиеэз, историческöй факттэз и керö выводдэз. Ме сьöртi, эна произведеннёэзын эм öтiк дона тусь: правда. Быд событие, факт босьтöм оланiсь, но казялöм да висьтасьöм творческöя.
Ме öддьöн лоа рад, если лыддьöтiсь тöдсасяс менам гижöмöн. Ме лоа рад, если менам однополчаниннэз, кöдна эшö ловьяöсь, лыддьöтасö война йылiсь и касьтыласö асланыс боевöй луннэз йылiсь.
Ыджыт спасибо быдöнлö, кин отсалiс эта книгалö петны свет вылö.
МЕНАМ ПОСАД
Вот менам деревня,
Менам дона поз ...
А. Некрасов
Быд ыджыт ли учöт ли посадлöн, деревнялöн, хуторлöн эм аслас чужöм, лов. Нiя олöны асланыс законнэз да традицияэз сьöртi. Кыдз отир, животнöйез, быдмассэз, нiя чужöны, зорамöны и кулöны. Керкуэз, амбаррез, загоннэз, картаэз, заплоддэз, стыннэз да йöррез керöны нылiсь чужöмбан. А быдсöн ловьяыслöн, мый эм деревняас, посадас — эм душа. Быд олiсь морт посадоклiсь, деревняоклiсь чужöмбансö, душасö адззö и кылö асмознас. Посад, деревня олiсь мортöс быдтö, зорöтö и сы сьöлöмö век кежö пуктö-кольö ассис чужöмбан и лов.
Сiя деревня, кöда йылiсь ме висьтася, чужöм важын ни, кынымöт ни год сылö, некин бытшöмик оз тöд. Деревня пукалö вöр шöрын, Чикисьва дорын, Кульюрамыс увтын. Öтмöдöрсянь сiйö гöгöртöмась чочком нитша яггез да пемыт чöд ягöда вöррез, туримоля нюррез да кöс видззез.
Деревня Вильгорт, отир унажык сiйö шуисö посадöн, вöлi лудъя да мича. Главнöй улицаыс джын верста кузя, Гладьвидззез увтсянь Нюрвидз бердöдз, шуисö сiйö Ипатовскöйöн.
Эта главнöй улица бердсянь пельдiсö öтöр-мöдöрö некузь улицаоккез — кытöн поздiсисö Конановчи, Потаповчи, Кучеввез, Рудоввез, Батуеввез да мöдiккез.
Самöй, самöй посад дорас, веськыт ки вылын, медбöрья улица петiс ыджыт туй вылö, кöда кузя туйис мунны ойланьö — Усольеö, Соликамскö, лунланьö — Кудымкарö да Перемö.
Быд керку одзын, карчйöрын быдмöны льöмпуэз, калина кусттэз. Тулыснас, кöр цветитöны льöмпуэз, посад вевттисьö чочком-чочком чышьянöн и этасянь сiйö эшö шуöны льöмпуа посадöн.
Быд семьялöн огородечын вöлi неыджыт сад, кытöн быдмисö шондi- [1] да сьöдсэтöррез, балянянь, гöрдöтiс рябина.
Отир унажык посадын олiс крепыта. Керкуэз унажык вöлiсö кватьугöлаöсь. Тёсöн вевттьöм öтiк крыша увтын сулалiсö олан керку, чом (кöдзыт керку). Олан керкуэз бöрын пукалiсö житницаэз, конюшняэз, гиддэз, му гуэз.
Коллективизация вотöдз быт дворын вöлiсö кык-куим вöв чаннезöн, кык мöс куканнезöн, сизим или дас мымда порссез, курöггез и нельки дзодзоггез да индейкаэз.
Посадын унажык семьяэз вердсисö не только нянь быдтöмсянь да пода видзöмсянь, но эшö и ремеслоэзсянь. Конановвез — керисö добрöй доддез, кошовкаэз; Потаповвез — шкаппез, пуовöй кроваттез; Кучеввез — гармонняэз; Батуеввез — вурисö меднöй бляшкаэзöн сермöттэз, шлеяэз, седёлкаэз; Рудоввез — узора краситöм дугаэз (мегыррез), наличниккез. Мартынов Гаврил — деревняын меддона морт, кузнеч. Быд семьяын вöлiсö сы киэзöн керöм ухваттэз, заступпез, рукомойниккез, кöртовöй печкаэз, трубаэз.
Том отир арсянь тулысöдз вöралiсö ылын вöррезын. Кöр бертасö гортö, вузалiсö зверь кучиккез. Шедтöм деньга вылö небисö ситец, сукно, кöмкöт и сёянпöлöс. А сыбöрын, тулысся страда вотöдз, быдса неделя празднуйтiсö.
Отир Вильгорт посадын олiсö дружнöя, старайтчисö отсасьны öтамöдныслö. Нiя век кежö вежöртöмась эшö сэк, кöр пышшöмась граф Строганов кипод увтiсь и пуксьöмась татчö, вöр шöрö, что туйö овны да крепамны только öтамöдныслö отсасикö.
Посадын каждöй керку, чом, амбар, баня или эшö кытшöм постройка быд мирöн сувтöтöм. Кин керрез бергöтлiс, кин тшупис, кин тёс пилитiс, а кин сёян вайис, брага-сур керис, — сiдз и сувтiс, быдмис посад.
Посадын челядь сiдз жö уджалiсö. Аймам эзö сетö нылö овны весь. Тöвнас мукöдыс велöтчисö школаын. Гожумнас пöрисьжыккез отсасисö пашня да видззез вылын, учöтжыккез вöрись ваялiсö тшак да ягöд, нетшкисö зелье керöм понда быдмассэз.
Челядь да ыджыттэз тулыссянь арöдз сёйисö пожумьягöд да туган, кыдз ли, сёйисö пистик, пикан, лекарственнöй быдмассэз — гонюш (чышйыл), ыбкушман. Витаминнэз сёйисö пöттöдз, этасянь шогалiсö етша. Да и посадын некöр эз вöв диплома лекарь, некин вылö вöлi надейтчыны.
Сiдз жö челядьлöн вöлi ыджыт забота — чышкыны, весöтны асланыс керкуэз одзын улица. Этасянь Вильгорт посад пыр вöлi сöстöм, мича, вежьялiс лудöн.
Посадiсь отир коласын, кöть и олiсö нiя дружнöя, вöвлiсö быдкодь историяэз. Да и олiсь йöзыс вöлi быдкодь характера.
Босьтам Мартынов семьяöс. Нылöн вужжезыс кольччöмась кытöнкö Россияись шöрöт губернияэзын. Морттэз эта семьяись вежöраöсь, степеннöйöсь, мастеровöйöсь, баитöны жагöник.
Кучеввез? Кытöн нылöн вужжезныс, öнi некин оз тöд. Эта семьяын морттэз гырисьöсь, вынаöсь, весь öтiк шагньöв оз керö. Нылöн и постройкаэзныс ас выланыс вачкисьöны — керкуэз кыз, кондовöй вöрись, ворота столббесö кык киöн сывьялан, огородеч йöрйöм заплоддэзöн. Ны семьяись Егор, сажень сувда, служитöм лейб-гвардияын, караулитöм царскöй дворец. Неöтпыр висьтасьлiс, что унаись адззылiс царь-батюшкоöс. «Сэтшöм учöтик, только пельпонöдззам, винерик, кельдöтöм, пöльыштан и усяс», — ошшасьö Егор. А сылö паныт горöтчöны: «А тэ, Егор, он вешьянат лэдз?» «Брысь, изгальниккез!» — лöгасяс Егор.
А пöрись Марколöн пияннэс — морттэз неыджытöсь, нервнöйöсь, завидуйтiсьöсь. Асьныс мыгöрнаныс кыдз кöсперккез, а кокаласö, песасö вына мортöс. Но гырниччез, кринкаэз нысся буржыка да басöкжыка посадын некин эз куж керны. Сiдзкö, быд семьяын сур виялö Марко пияннэз киэзöн керöм кринкаэзiсь.
Посадын олiс öддьöн интереснöй морт: ас дырниас величайтiсö Филипп Алексеевичöн, а бöрсяняс — колдунöн. Сiя öддьöн дыр служитöм царскöй армияын и сэтчин велöтчöм синнэз пöртмавны, чертитчыны да черешлан öшлыны. Йöзыс баитiс: Филипп Алексеевичлö оз пö гленитчы кö мортыс или мыйынкö сiйö поперегалас — тшыкöтас. Шуас пö: «Тэнат кадж вылö чирей петас». И быль, лун куим бöртi жвангисяс ыджыт чирей. Филипп Алексеевич рад: локтас пö кольттезöн ме дынö лечитчыны. И не öтпыр вовлас.
Кыдзкö тулысся праздник коста колдун Филипп пессьöм заклад отиркöт, что сiя пырас и петас кер пытшкöт. Отир дивуйтчöны ― быль колдун пырис кер пытшкö. А эта коста Коля Петров телега вылын турун вайö и горöтлö йöзлö: «Отир, сiя тiянöс бöбöтö, кер бокöттяс кыссьö». Колдун Филипп чеччöвтас кер бокись и кинас мыччалö: «Отир, видзöтö жö, Коляыслöн туруныс сотчö». Коля бергöтчас бöрланяс и адззö: турун ыджыт биöн öгралö. И медбы сылöн Гнедокыс эз сотчы, гужиэсö кералас. И только вöвсö оглобляэзiсь мездас, адззö — туруныс дзонь, некытшöм би абу. Коля öддьöн лöгасяс, черсö кыскас косксис и лэбтас бы колдун вылö, но сэтчö кыдз му бердö лякасяс и зэг оз вермы керны. Колдун Филипп нёштöм синнэзöн нёджжöвтас Коля вылö и кыдз сьöвзяс: «Каджыт чирейсялас». Но Колялöн чирейез эз петö.
Гражданскöй война эз орддьы миянлiсь деревняэсö. То гöрддэз локтасö, то чочкоммез пыраласö. Некысянь польза олiсь йöзлö абу: гöрддэз локтасö — фураж нöбöтасö, чочкоммез пырасö — сусеккезiсь зöр вöввезлö кураласö или вöввез нöбöтасö.
Вильгорт посадö кыкись пыравлöмась чочкоммезлöн отряддэз. Медодзза пыралöм коста тыртöмась сёян запассэз няньöн, кольтьöн, виöн, мöдпырись — вöввез понда турун, зöр нöбöтасö. Мöдпырись чочкоммезлöн пыралöм йылiсь посадын паськалiс басни, кöдö и öнöдз касьтывлöны.
Сiя кадö Рудов семьяын быдмис öддьöн бытшöм, Наста нима, нывка. Кучев Конанлöн невеста. Свадьбасö мöдöмась орсны арся праздник Николай Угодник бöрын.
Чочкоммезлöн командир да сылöн адъютант сулалöмась Рудов керкуын. Сэк и гленитчöма чочком адъютантлö Наста.
Рытнас, кöр нывка петас видзöтны, кыдз лонтiсьö баня, сы сьöрö гусьöник вöтчас адъютант.
Мый шогмис баняын — некин эз тöд, но только адъютант кыдз муö йиджис.
Рытнас и ашынас посадiсь быд пельöс бергöтiсö, некытiсь эз адззö. Отирöс чочкоммез страшайтiсö, что ежели оз адззö, посадсö сотасö. Посад сотны эз ештö. Чочкоммез, кыдз йöймöмöсь, пышшисö посадiсь. Гöрддэз бура нiйö повзьöтiсö.
Эта бöрын Наста пондiс шогасьны, кельдöтiс, косьмис и Николай Угодник праздник вотöдз эз тырмы.
Только гожумнас отир вежöртiсö, мый шогмис баняын. Неылын Рудов хозяйство сайын важ, тыртöм öшымöс дынö пондiсö котрасьны поннэз да лэбавны катша-рака. Сэк отир осьтiсö öшымöс и адззисö: пыдöсас куйлö кулöм морт. Кöр лэбтiсö, вежöртiсö: чочкоммезлöн адъютант. Горшыс орöтöм. Сэтчинiсь жö лэбтiсö чарла.
Вильгорт посадын вöлi эшö öтiк достопримечательность. Этö вичку. Басöк, ыджыт вичку. Куполыс зелёнöй, öшын наличниккез узöраöсь, а стенаэзыс нач чочкомöсь. Первöй империалистическöй война вотöдз посадiсь олiссез деньга вылö строитöмась.
Эта льöмпуа Вильгорт посадын чужис, быдмис да вынсялiс Лудов Степан Егорлöн пиян — Лёва. Но сы йылiсь басни одзланьын.
Лудов Лёва вöтöнмоз эшö тöдö, кыдз сылöн бабыс Егорей праздник коста вайöтлiс вичкуö, и сiя поп киись окалiс кöдзыт крест да ньылыштiс панись чöскыт дари. А сыбöрын, кык год бöртi, локтiс кытшöмкö начальник — «антихрист», кыдз сiйö видiсö отир, тшöктiс розоритны вичкусö.
Посадскöй том зонкаэз ваксьöмöн, гажöна перво пöрлалiсö купол вылiсь кресттэз, сэсся звонница вылiсь чапкалiсö колоколлэз. Пöрись отир видiсö томмесö богохульниккезöн да повзьöтлiсö страшнöй судöн, а нылö — кыв эз мöртчы. Сэксянь вичку виньдiс, эз понды кресенняэз, праздниккез коста шыасьлыны. Вильгорт посадöс кутiс тöдтöм шогöт, кöда кыссис öддьöн дыр.
А кöр посадын керисö колхоз, председательыс адззöм петшöр пытшкись колокол и тшöктöм посад шöрас сувтöтны столб да öшöтны сы вылö колоколсö. Дорыс вöлöма чегöм и сы понсянь горыс дребезжитiс. А эшö куим учöтик колокол, кыдз ваö вöйисö, öшисö.
Вичкуись иконостас разисö, мый сэтöн вöлi доброыс, гусялiсö. Еннэсö, кöднö отир эз ештö нöбöтны гортаныс и пыдынжыка дзебны, сотiсö.
Лёвалöн бабыс пониток полаэз увтын гортас вайис кык ен — Николай Угодникöс да Георгий-Победоносецöс и дзебис нiйö аскерöм коробьяö.
Вичкусö пöртiсö народнöй домö. А столб вылын колокол жванöтiс, горзiс, дребезжитiс пожар коста нето отирöс корис сходка вылö, петны удж вылö.
Одзжык, кыдз только шыасяс асыв, посадiсь уджалiсь отирöс кыдз тöлöн пöльыштас удж вылö, а öнi пондiсö видзчисьны, кöр бригадир звонитас колоколöн. Ёткöтö колокол, а йöз гыжьясьöмöн чеччöны ольпась вылiсь и, нюжласьöмöн, сьöрсьöн-бöрсьöн чукöртчöны амбаррез дынö, мед бригадирлiсь удж вылö босьтны наряд. Медбöрын локтö тальянкаöн чукыля кока Губин Фрол. Чукыля кок нюжöтас гöрд сарафана гармоннялiсь меххез, и отир мунасö ыббез вылö. Но мылякö не гармоннялöн орсöм, не отирлöн сьылöм эз тыртö няньöн сусеккез.
Льöмпуа посад быдмис, горалiс, кыдз сира пожум. Керкуэз и мöдiк строеннёэз вöлiсö ёнöсь.
Посадын уджалiсь отир вöлi тыр, унажык том, здоровöй, боёк морттэз.
Отир пондiсö пасьтасьны буржыка да басöкжыка. Томмез пондiсö новйыны базарскöй пиджаккез, вешьяннэз, коккезын — сапоггез, ботинкиэз. Том нывкаэз чорыт лёнiсь дубассэз пондiсö вежны сера сарафаннэз да юбкаэз вылö, новйыны кофтаэз, кöмавны чаркиэз.
Öтiк-кык семья öтлаын небисö аслыныс сепараторрез, мыччисисö вурсян машинаэз. А Батуеввез небисö нельки вартан машина «Очёрка» да веялка.
Пондöтчiс коллективизация.
Отир неöткодя панталiсö сiйö. Крестьянин, мулöн хозяин, эз желайт пельдыны аслас му бердiсь. Том отир интересöн видзчисисö виль коллективнöй олан.
Лёва касьтывлö, кыдз горзöмöн посадiсь отир керисö аслыныс колхоз.
Крестьяна горзöмöн öтлаалiсö ассиныс пода, доддез, телегаэз да дугаэз, сийöссэз да уна мöдiкö. Лёва касьтывлiс, кыдз сылöн бабыс герьялiс, кöр конюшняись петкöтiсö вöввез — Гнедкоöс да Лысанкоöс, нуöтiсö öтласа дворö мöс да кукань. А томмез эзö вежöртö, кытчö вайöтас коллективнöй удж, готсисö-ваксисö, чожа пö пондасö инькаэзсö да нывкаэзсö öтлаавны и узьлыны öтiк шебрас увтын.
Сiдз Вильгорт посадын шогмис «Югыт туй» нима колхоз. Первöй председательöн бöрйисö Леналiсь айсö — Лудов Егор Степановичöс.
Локтiс кад висьтасьны Лёва Лудов йылiсь, сы семья йылiсь.
Лудоввезлöн керку сулалiс сэтчин жö, кытöн олiсö Кучеввез да Батуеввез. Посадын ордчöн сулалiсö квать угöла олан керку да нёль угöла чом. Олан керку вöлi кык жыра: öтiкыс — прихожöй, мöдыс — горница. Эшö вöлi ком сунилабичöн да комсайöн. Кыдз и быд керкуын, стенаэз пöлöн нюжалiсö лабиччез, а вевдöрын — джаджжез. А самöй коланаöн керкуын вöлiсö гор да челядь понда полаттез. Огородечын вöлi неöддьöн ыджыт сад, но челядь пöттöдз сёйисö сэтчинiсь сьöд да шондiсэтöррез, балянянь, малина, небыт льöм, арнас — шöма рябина да басöк жовпу ягöд.
Лудоввез керкулöн ыбöс некöр эз пöднассьывлы, пыр кытшöмкö морттэз койисö. То пизь одзöстны локтöны, то спичкаэз или сов, майöв корöны. Посадiсь пастух, бобыль Ося Паша, ны ордын и бергалiс, челядьлö нинкöммез кыйис, сьöкталiс. Лудов ай дынö отир локтöны кытшöмкö бумагаэзöн. И сiдз лунiсь лунö.
Айыс Лёвалöн, Степан Егор, гражданскöй война вылын ранитöмсянь шульга кокнас öддьöн чотiс, и том пöлöсыс нимкодялiсö сiйö «руп-пять, руп-пять». А Степан Егор эз лöгавлы ны вылö.
Одзжык, колхоззэз вотöдз, служитöм сiя волостнöй писарьöн, а кöр посадын пондiсö керны колхоззэз, медодз пуктöм заявленнё. Колхозниккез, кöр лöгасясö айыс вылö, нерисö сiйö: «Тив-тив коллектив, Степан Егор сомустил...». А Лёвалöн вöлi не öтiк ним: бабыс величайтiс Лёванидöн, мамыс Лёняöн, а школаын Левкоöн или кузь бурсиа левöн. Айыс, кöр кымöра, лöг, сiйö видiс каналья кокöн, а кöр коддзыштас — величайтiс Егорычöн.
Лёва чужöм вотöдз ны семьяын вöлi только öтiк мужик — айыс, инвалид. А хозяйство вöлi ыджыт: кык керку да сруб, кык вöв, кык мöс куканнезöн, баляэз, порссез, курöггез. Колiс гöрны-кöдзны, му весöтны, турун керны.
Дедыс, айыслöн айыс, тöввезнас пимиэз гындiс. Медбы хозяйство эз усь, эз разьсьы дедыс кулöм бöрын айыслöн пöрисьжык сойыс челядьнас локтöм ны ордö отсасьны.
Матрёна Степановна, кыдз сiйö величайтiсö посадын, вдова, мужиксö вийöмась империалистическöй война вылын. Лёва бабсö бура тöдö, дыр пöрисьыс олiс. Вöлi ыджыт, ён, киэс гырисьöсь, голосыс чорыт, быд кыв, сылöн семьяын вöлi приказ. Лудоввез семьяын сiя вöлi хозяйка.
Праздник коста Лёвалöн бабыс чочком, сöдзовöй вышивайтöм йöрнöс вылас пасьталас лöз шушун, юр вылас пуктас бисера кокошник, коккезас кöмалас кузь голеня чаркиэз, и керкуын кыдз бытьтö югытжык лоас. Бабыс Лёваöс öддьöн радейтiс, и нiя кресенняэз коста ветлывлiсö гöститны родняэз ордö. Вöвлi, бабыс сiйö пуксьöтас öлöдз вылас, малалас сылiсь юрсö и висьтасьö, кыдз зонка свет вылö мыччисьöм. Шогмин пö тэ ловтöг и шытöг. Повитуха-бабка шлёпöтiс тэнат пуканнэз кузя и ныр увтас бобгис. Айыт видчö: торкитö пö менчим зонöс. И эта коста, кыдз мыйиськö мезмин, пыдына ловзисин и чанöтiн лёк горшöн русö. Айыт радмис: «Ах, каналья кок, ловзис эд. Ай да каналья, а голосыс кытшöм! Быдмас — натьтö, попöн лоас».
А Лёва одзлань юасьö:
— Баба, а мый нö Öксяыс шуö, менö пö мамö рос увтiсь адззöма?
― Ай тэ, пиянок тэ менам, быдман да ачыт вежöртан, кыдз быдöс ловьяыс чужö, — бабыс окыштас зонкалiсь чужöмсö.
Лудоввез семьяын Лёвалöн мамыс хозяйкаöн эз шусьы. Неуна басниа, шытöг ветлöтiс керкуын, кывзiс Матрёна Степановналiсь велöтöмсö и керис колана удж. Лёва öддьöн любитiс мамсö, любитiс сылiсь ласковöй киэсö, сылiсь небыт басни, пемыт, каштановöй юрсиэз, кöдна, кöр нiйö мамыс зуалiс, лэдзчисьлiсö косысся улöжык.
Лёва мамыскöт мукöд праздниккез коста ветлывлiс гöститны дедыс (мамыслöн ай) ордö. Дедыслöн семьяыс вöлi ыджыт: вит зонка, кык нывка да эшö кык невестка, дяддеслöн инькаэз. Но и сёяныс вöлi тырдоз. Васька дядьыс вöлi посадын медбур гармонист. А медучöт дядьыс Лёвалö пыр ошшасис, ми пö Батуй родiсь. Сэтшöм пö миян фамиллёыс — Батуев. Сiдз не сiдз, зонка эшö эз вежöрт.
Тырдоза пызан сайö пуксьöм вотöдз быдöнныс юрбитöны сэтчöдз, кытчöдз дедыс оз дугды лыддьöтны молитваэз. А Лёвалö Коля дядьыскöт неохота юрбитны, сувтасö пидзöссэз выланыс, быкышшасö и торскöтöны кымöссэзнаныс джодж кузя. Дедыс казялас нылiсь бöбалöм и лöгöн горöтчас: «Но, шельмаэз, марш татiсь!» — и одзлань лёбö молитва.
Пызан сайын, кытчöдз дедыс медодз оз босьт пань и паньышт таз ыжда бекöрись шыд, некин киас оз босьт нянь да пань. А внучокыс кыдзкö Василей вечер коста, латкаись [2] кисьтiс пызан дöра вылö ви, дедыс шытöг тарскис сы кымöс кузя нöш кодь паньöн. Эта понiсь сiя пызан сайын некöр панись воть эз уськöт.
Льöмпуа посадын бура чулöтiсö праздниккез: важжесö — Ыджыт лун (Пасха), Троица, Егорей лун, Вöв праздник; виллесö — Октябрьскöй праздник да Первомай, а война бöрын — Победа лун. Некин эз вöвлы öддьöн код, некин эз тышкась, а челядь виль праздниккез коста ветлöтiсö стройöн, маршируйтiсö деревня кузя и сьылiсö «По долинам и по взгорьям» да мöдiк сьыланкыввез.
Сiдз чулалiсö Лёвалöн челядься годдэз.
Медодзза годдэзö коллективизация бöрын посадiсь отир «Югыт туй» колхозын олiсö справнöя. Колхозниккез, кыдз асланыс му наделлэз вылын да видззез вылын, уджалiсö важмоза: шондi петансянь шондi саясьтöдз.
Сюэз быдмисö бурöсь. Рудзöг, ид да зöр сетiсö бытшöм урожай. Нянь тырмис сёйны отирлö и подалö, и государствокöт вештiсьны тожö тырмис. А сыбöрын гырись начальниккез колхозын жугдiсö севооборот. Тшöктiсö кöдзны заморскöй шогдi, а сiя миянлiсь ойланись мусö эз радейт и эз шогмы. Сэтчö жö, кынымкö год вöлi засуха, и государство медбöрья тусьöдз пондiс куравны сусеккез. Колхозниккезлö, подалö нянь эз понды тырмыны, квас-брага эзö пондö юны, эзö пондö сёйны пöта.
Крестьянин пызан вылын лоис эттшöм сёян: турунсора нянь, тшакьяшыд, пистик да пикан. Отир тшыгсянь пондiс пыктыны, кувны, пода тожö кок вывсис усис.
Колхозiсь председательöс, гражданскöй войнасянь инвалидöс, кöда тшöктöм сайöвтны кынымкö центнер рудзöг, ид да зöр кöдзыс вылö районiсь уполномоченнöй синнэз одзись, пуксьöтiсö тюрьмаö кыдз саботажникöс, вредительöс.