Пресвятая Госпоже Богородице спаси нас
Сокрушена мя безчислеными согрешении Дево, ходатайством Ти обнови, уврачюющи ми душу, и слово подающи вопити: благословена яже Бога плотию порождьши.
Преподобне отче Паисие Великии, моли Бога о нас.
Многих грехов исполнен аз, и твоя молитва яко кадило благовонно исправися отче. Бездну грехов моих потреби, и буяющее море злаго жития изсуши, и напоение гневное отжени, и целомудренный ум молитвами своими утверди отче Паисие.
Преподобне отче Паисие Великии, моли Бога о нас.
Наставника тя и молитвенника тепла имущи, и скораго помощника, яко стену тверду и забрало недвижимо и воеводу крепка и непобедима молим тя, не забуди молитвенник твоих, избавляя от всякия печали и навет вражиих.
Преподобне отче Паисие Великии, моли Бога о нас.
О, чюдо велие, во един от дней седящу ти отче Паисие в пещере, бысть ти глас глаголяи: мир тебе, возлюбленному Моему угоднику, ты же возстав со страхом и трепетом одержим, паде поклонися и рече: се раб Твой Господи. Сего ради молим тя, моли Человеколюбца, да спасет душа наша.
Слава.Даждь ми Христе разум и терпение, еже не осуждати согрешающих с кичением фарисейским, но яко мытарево покаяние приими, и яко блуднаго сына Боже вечери Твоей достойна мя яви, молитвами преподобнаго Паисия, и грехов прощение ми даруй.
И ныне.Возникни, о, страстная душе, возстани окаянная, бий из глубины в перси, и испусти слез источники, да тя помилует окаянную милосердая Мати Христа Бога.
Катавасия: Избави от бед рабы своя, святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон).
Катавасия: Избави от муки вечныя усопшаго(их) раб(а) своего(их) (имя рек), преподобне отче Паисие Великии, яко вси по Бозе к тебе прибегаем, ты бо молиши о нас Христа Бога нашего (поклон).
Господи помилуй (трижды с поклонами).
Песнь 8.Из пламене святым росу источи, а праведнаго жертву и воду попали, вся бо твориши Христе елика хощеши, тем Тя превозносим Господа во веки.
Святыи мучениче Уаре, моли Бога о нас.
Матерьских послушав мучениче молеб, небесному воиньству светло воиньствуя. Отрока честнаго не отвержена показал благославна, неизреченным милосердием.
Святыи мучениче Уаре, моли Бога о нас.
От Египта тя богатьство, яко многоценное принесе мучениче, разбогатящи многоценными дарми Клеопатра целении всю Палестину, любовию тя почитающю.
Святыи мучениче Уаре, моли Бога о нас.
Веселяся подвиги своя совершил еси, воине доблии Вседержителя, и яко победитель от Него венчася, Уаре всеблаженне мучеником великая славо.